1. Dahme kahrehda Eipraam kak koapworopworkihte me e pahn nainekihda pwutak men?

 SIOHWA ketin inoukihong kompoakepaho Eipraam me pwehki kadaudoke wehi koaros nin sampah pahn ale kapai. (Sen. 15:5; 22:18) Pwehki Eipraam uhdahn pwoson Koht, e uhdahn kamehlele me sapwellimen Koht inou pahn pweida. Ahpw, ni Eipraam eh lel sounpar 100 oh eh pwoudo 90, pwopwoud lelepek wet saikinte nainekihda seri. (Sen. 21:​1-7) Mendahki met, Paipel mahsanih: “[Eipraam] koapworopworki oh pwoson me e pahn wiahla semen wehi tohto mendahki e mwomwen me met sohte pahn kak wiawi. E kamehlele met nin duwen me Koht ketin mahsanih.” (Rom 4:18) Ke ese me ahn Eipraam koapworopworo pweida. E wiahla semen Aisek, pwutako me erein ahnsou werei e kin koapworopworki en nainekihda. Dahme kahrehda Eipraam uhdahn kamehlele me Siohwa pahn ketin kapwaiada sapwellime inou?

2. Dahme kahrehda Eipraam uhdahn kamehlele me sapwellimen Siohwa inowo pahn pweida?

² Pwehki eh nanpwungmwahu keren rehn Siohwa, Eipraam “uhdahn kamehlele me [Koht] pil kak ketin kapwaiada dahme E kin ketin inoukihda.” (Rom 4:21) Siohwa ketin kupwurperenki Eipraam oh wiahki ih aramas pwung men pwehki eh pwoson. (Seims 2:23) Nin duwen me Rom 4:18 kasalehda, Eipraam kin ahneki pwoson oh koapworopwor. Met kitail pahn koasoiapene dahme wahnpoaron Pohl koasoiahki duwen pwoson, me kileldi nan Rom irelaud 5.

3. Dahme Pohl kawehwehda met duwen koapworopwor?

³ Pohl kawehwehda dahme kahrehda kitail kak kamehlele me  atail ‘koapworopwor sohte kin kansensuwedih kitail.’ (Rom 5:5) E pil sewese kitail en wehwehki ia duwen koapworopwor me Kristian men ahneki eh kak kehlailla. Ni atail pahn koasoiapene Rom 5:​1-5, medewehla ia duwen omw koapworopwor ong ahnsou kohkohdo eh kak kehlailla. Atail koasoiapene met pil pahn kasalehda ia duwen omw kak wiahiong omw koapworopworo en kehlailla sang ahnsou wet. Kitail pahn koasoiapene mahs duwen koapworopwor kaselel ehu me Pohl koasoia me sohte pahn kansensuwedih kitail.

4. Dahme Rom 5:​1, 2 koasoakoasoia?

⁴ Wadek Rom 5:​1, 2. Pohl ntingkihlahng mwomwohdiso en Rom mahsen pwukat. Irail kan wasao sukuhlkiher duwen Siohwa oh Sises, kasalehda arail pwoson, oh wialahr Kristian kei. Irail “pwunglahr rehn Koht pwehki pwoson,” oh Koht ketin keieirailkihdi sapwellime manaman. Irail kak kasikasik keting kaselel ehu oh kak uhdahn kamehlele me irail pahn alehdi.

5. Koapworopwor dahieu me me keidi kan ahneki?

⁵ Mwuhr Pohl ntinglahng Kristian keidi kan nan Episos duwen koapworopworo me Koht ketikihong irail. Irail pahn alehdi “sohso ehu ong aramas sarawi kan.” (Ep. 1:18) Pohl pil padahkihong mehn Kolose ko ia wasa me irail pahn alehdi ketingparail. E kahdaneki koapworopworo “koapworopwor me nekinek ong kumwail nanleng.” (Kol. 1:​4, 5) Eri, koapworopwor me Kristian keidi kan ahneki iei en iasada ong mour soutuk nanleng, wasa me irail pahn iang Krais kaunda.—1 Des. 4:​13-17; Kaud. 20:6.

6. Dahme brother keidi men koasoiahki eh koapworopworo?

⁶ Kristian keidi kan kin uhdahn kesempwalki koapworopwor wet. Emen irail, Brother Frederick Franz, koasoiahda dahme e medewehki koapworopwor wet: “At koapworopwor uhdahn mehlel, oh emenemen kiht meh 144,000 kan pahn alehdi dahme Koht ketin inoukihong kiht. Ketingpat pahn uhdahn mwahusang dahme se kin medewe.” Mwurin eh papahkier Koht erein sounpar tohto,  Brother Franz koasoia nan pahr 1991: “[Se] uhdahn kesempwalkihte at koapworopworo. . . . Uwen werei en at awih koapworopwor wet kin uhdahn kalaudehla at kalahnganki. Se uhdahn men awihete, mehnda ma se anahne awihki sounpar rar rar kei. I uhdahn kesempwalki at koapworopworo laudsang mahs.”

7-8. Koapworopwor dahieu me pali laud en sapwellimen Koht ladu kan ahneki? (Rom 8:​20, 21)

⁷ Pali laud en irail kan me kin kaudokiong Siohwa rahnwet ahneki koapworopwor ehu me weksang met. Irail ahneki koapworopworohte me Eipraam ahneki, me iei en mour kohkohlahte nin sampah pahn kaundahn Wehin Koht. (Ipru 11:​8-10, 13) Pohl ntingihedi duwen koapworopwor kaselel wet. (Wadek Rom 8:​20, 21.) Ni omw tepin sukuhlki duwen inou kan en Paipel ong ahnsou kohkohdo, mehnia me ke keieu kasikasik en wiawi? Ire mehlelo me pid ehu rahn ke sohla pahn wia aramas dipan men? De ke uhdahn perenkihda omw sukuhlki me irail kan me ke poakohng me mehla pahn pwurehng mourda nan paradais nin sampah? Pwehki koapworopwor me Koht ketikihong kitail, mie soahng kaselel tohto me kitail kak kasikasik.

⁸ Sohte lipilipil ma kitail kasik en mour kohkohlahte nanleng de nin sampah, kitail ahneki koapworopwor kaselel ehu me kin kahrehiong kitail en peren. Oh atail koapworopwor kak kehlailla. Dahme Pohl ntingihedi mwuhr kawehwehda ia duwen met eh kak pweida. Kitail pahn koasoiapene dahme e ntingihedi me pid atail koapworopworo. Atail wia met pahn kalaudehla atail kamehlele me atail koapworopwor pahn kekehlailla oh sohte pahn kansensuwedih kitail.

9-10. Nin duwen me ahn Pohl mehn kahlemeng kasalehda, dahme Kristian kan kak kasik? (Rom 5:3) (Pil kilang kilel.)

⁹ Wadek Rom 5:3. Pohl koasoia me ni atail kin lokolok, atail koapworopwor kin kehlailla. Ele met kapwuriamwei. Ni mehlel, sapwellimen Krais tohnpadahk kan koaros kak kasik en lelohng kahpwal kan. Medewehla ahn Pohl mehn kahlemeng. E ndaiong irail kan  nan Deselonika: “Ni ahnsou me se kin mihmi rehmwail, se kin ndaiong kumwail mwowe me kitail pahn lokolongki kahpwal, oh ih me wiawi.” (1 Des. 3:4) Oh ong mehn Korint kan, e ntingihedi: “Se men kumwail en ese, riei ko, duwen kahpwal laud me se lelohng . . . Se sohte medewe me se kak mour.”—2 Kor. 1:8; 11:​23-27.

¹⁰ Kristian kan rahnwet pil kak kasik en lelohng soangen kahpwal kan. (2 Tim. 3:12) Ia duwe, ke sou kin lelohng lokolok pwehki ke pwoson Sises oh tepida idawehn ih? Kompoakepahmw oh kisehmw kan ele kin kapailoke iuk. Mwein irail pil kin lemeiong uhk. Ia duwe, omw kin nantihong en kin mehlel ni mehkoaros sou kin kahrehda kahpwal ong uhk nan wasahn doadoahk? (Ipru 13:18) Ke kin lelohng uhwong sang koperment pwehki ke kin ehukihong meteikan duwen omw koapworopwor? Ahpw, sohte lipilipil soangen kahpwal dah me kitail ele lelohng, Pohl nda me kitail en kin peren. Dahme kahrehda?

11. Dahme kahrehda kitail anahne koasoanehdi teng en dadaur pahn soangen kahpwal koaros?

¹¹ Kitail kak peren pil ni atail kin lelohng lokolok pwehki kitail ese me met kak sewese kitail en kakairada irair kesempwal ehu. Rom 5:3 mahsanih, “apwal kin sewese kitail en dadaur.” Kristian koaros pahn lelohng kahpwal kan, eri Kristian koaros anahne dadaur. Kitail anahne koasoanehdi teng en dadaur pahn kahpwal sohte lipilipil me kitail kakete lelohng. Kitail pahn ale ketingo me kitail kin koapworopworki ihte ma kitail kin dadaur oh doulahte papah Siohwa. Kitail sohte men duwehte irail kan me Sises ketin karasahiong weren tuhke me pwupwudi pohn wasa takain. Aramas me duwehte weren tuhke ko kin pwungki mahseno nin tapio ahpw kin dipekelekel “mwurin kahpwal de kalokolok eh kin pwarada.” (Mad. 13:​5, 6, 20, 21) Mehlel me e sohte mwahu en lelohng uhwong de kahpwal, ahpw kitail kin paiekihda ni atail kin dadaur pahrail oh doulahte papah Siohwa. Ni ahl dah?

12. Ia duwen atail kin paiekihda atail dadaur pahn kahpwal kan?

¹² Wahnpoaron Seims koasoia duwen kamwahupen en dadaur pahn kahpwal kan. E ntingihedi: “Mweidohng amwail dadaur en kanekehla eh doadoahk, pwe kumwail en unsekla oh sohte karaunpamwail ni mehkoaros oh sohte pahn anahne mehkot.” (Seims 1:​2-4) Eri, Seims koasoia me mie katepen atail kin dadaur. Met kak seweseiuk en kalaudehla omw kanengamah, pwoson, oh koapworopworki Koht. Ahpw pil mie ehu kamwahu tohrohr me kohsang atail kin dadaur pahn kahpwal kan.

13-14. Ia imwilahn atail kin dadaur, oh dahme kin wiawihong atail koapworopwor pwehki atail kin dadaur? (Rom 5:4)

¹³ Wadek Rom 5:4. Pohl koasoia me en dadaur kin imwikihla atail en “ahneki sapwellimen Koht kupwuramwahu.” Eri, ni omw kin dadaur, Siohwa kin ketin kupwurperenkin uhk. Met sohte wehwehki me Siohwa kin ketin kupwurperenki omw lelohng kahpwal kan. Ahpw e kin ketin kupwurperenkihda omw kin dadaur ni lelepek. Met kin uhdahn kangoange kitail en ese me ni atail kin dadaur, kitail kin kaperenda Siohwa!—Mel. 5:12.

¹⁴ Tamataman me Eipraam lelohng kahpwal kan oh ni eh dadaur pahn kahpwal pwukat ni lelepek, Siohwa ketin kupwurperenkihda. Siohwa ketin wiahki ih Kompoakepah oh aramas pwung men. (Sen. 15:6; Rom 4:​13, 22) Met pil kak wiawihong kitail. Siohwa kin ketin kupwurperenki kitail kaidehn pwehki uwen laud en doadoahk me kitail kin wia de pwehki pwais kaselel kan me kitail ahneki. Siohwa kin ketin kupwurperenki kitail ni atail kin lelepek mendahki kahpwal kan. Sohte lipilipil atail sounpar, atail irair, de atail koahiek, kitail  koaros kak dadaur. Ia duwe, ke kin dadaur pahn kahpwal ehu ahnsou wet oh kin loalopwoatete ong Siohwa? Ma ei, tamataman me ke kin kaperenda Siohwa. Atail pohnese me Koht ketin kupwurperenki kitail kak uhdahn kamwakid kitail. E kak kakehlakahla atail koapworopwor.

15. Dahme Pohl koasoiahki Rom 5:​4, 5, oh peidek dahieu me emen kakete idek?

¹⁵ Nin duwen me Pohl kawehwehda, Siohwa kin ketin kupwurperenkin kitail ni atail kin lelepekte ong ih oh dadaur pahn kahpwal kan. Tehk dahme Pohl doula koasoia: “Kupwuramwahu wet uhd kihong kitail koapworopwor, oh koapworopwor wet sohte kin kansensuwedih kitail.” (Rom 5:​4, 5) Mwoweo nan Rom 5:​2, Pohl ndahiongehr Kristian kan nan Rom duwen koapworopwor ehu, me iei “koapworopwor en alehdi sapwellimen Koht lingan.” Eri, emen ele pahn idek, ‘Ma Kristian ko ahnekier koapworopwor ehu, dahme kahrehda mwuhr Pohl pil koasoia duwen koapworopwor?’

16. Ia duwen koapworopwor eh kak lalaudla rehn emen? (Pil kilang kilel.)

¹⁶ Kitail kak wehwehki dahme Pohl koasoia sang ni atail tamataman me koapworopwor kin kak lalaudla. Karasepe, ke taman ahnsou me ke tepin rong duwen koapworopwor kaselelo nan Mahsen en Koht? Ele ahnsowo ke medewe me en mour nan paradais nin sampah kohkohlahte uhdahn kaselel ahpw ke sohte nohn kamehlele me e pahn uhdahn pweida. Ahpw, ni omw kalaudehla omw esehla duwen Siohwa oh inou kan nan Paipel, ke uhdahn kamehlelehla me koapworopwor wet uhdahn pahn pweida.

17. Ia duwen omw koapworopwor eh kin pousehlahte kekeirda mwurin omw papidaisla?

¹⁷ Pil mwurin omw papidaisla, ni omw esehla mwahu duwen Siohwa oh kalaudehla omw poakohng ih, omw koapworopworo kin wie lalaudla. (Ipru 5:13–6:1) Ele ke pil lelohng nan soangen irairo me kileldi nan Rom 5:​2-4. Ke lelohng soangsoangen kahpwal kan, ahpw ke dadaurete oh kehn me Siohwa ketin kupwurperenkin uhk. Pwehki omw ese me e ketin kupwurperenkin  uhk, met kalaudehla kahrepen omw kamehlele me ke pahn alehdi dahme e ketin inoukihda. Omw koapworopworo laudla sang nin tapio. Ong uhk, met uhdahn mehlel. E uhdahn kamwakid uhk. E kin kamwakid soahng koaros nan omw mour oh wekidala mwomwen omw wiewia ong omw peneinei, omw wiahda pilipil kan, oh pil mwomwen omw doadoahngki omw ahnsou.

18. Inou dahieu me Siohwa ketikihda?

¹⁸ Wahnpoarono pil koasoiahda ire uhdahn kesempwal ehu me pid koapworopworo me ke ahneki mwurin omw pwungla rehn Koht. E kamehlelehiong uhk me omw koapworopworo pahn pweida. Dahme kahrehda ke kak kamehlele met? Pohl pil koasoiaiong Kristian kan duwen inou wet sang rehn Koht: “Koapworopwor wet sohte kin kansensuwedih kitail, pwehki sapwellimen Koht limpoak pwilidohngehr nan atail mohngiong sang ni sapwellime manaman me kohiengehr kitail.” (Rom 5:5) Mie kahrepe tohto me ke ahneki pwehn kamehlele omw koapworopworo.

19. Dahme ke kak uhdahn kamehlele me pid omw koapworopwor?

¹⁹ Medemedewe duwen sapwellimen Siohwa inou ong Eipraam oh duwen Eh ketin kupwurki oh wiahki ih Kompoakepah. Dahme Eipraam koapworopworki pweida. Paipel mahsanih: “Mwurin Eipraam eh kasalehdahr kanengamah, e ahpw alehdi inou wet.” (Ipru 6:15; 11:​9, 18; Rom 4:​20-22) E uhdahn sohte nsensuwedla. Ke kak pil kamehlele me ma ke kin kolokolete omw lelepek, ke pahn alehdi ketingo me ke koapworopworki en ale. Ke ahneki kahrepe tohto en peren pwehki ke ese me omw koapworopwor pahn pweida; ke sohte pahn nsensuwedla! (Rom 12:12) Pohl ntingihedi: “Koht me kin ketikihda koapworopwor en ketin audehkinkumwailda soangen peren oh popohl koaros pwehki amwail kin likih ih, pwe kumwail en direkihla koapworopwor sang ni roson en sapwellimen Koht manaman.”—Rom 15:13.