1. Ni atail kin medewe duwen ahn Eipraam pwoson, peidek dah me kitail kakete idek?

 MENDAHKI aramas tohto rongehr duwen Eipraam, pali laud ese soahng keite duwen ih. Ahpw, ke ese soahng tohto duwen Eipraam. Karasepe, ke ese me Paipel mahsanih me Eipraam iei “semen irail koaros me kin pwoson.” (Rom 4:11) Ahpw, ke kakete medewe, ‘I kak duwehte Eipraam oh ahneki soangen pwosonohte me e ahneki?’ Ei, ke kak.

2. Dahme kahrehda e kesempwal en onopki ahn Eipraam mehn kahlemeng? (Seims 2:​22, 23)

² Ehu ahl me kitail kak kakairada soangen pwoson me Eipraam ahneki iei sang ni atail onopki eh mehn kahlemeng. Koht ketin mahsanihong Eipraam en keseula ehu sahpw me uhdahn doh, kousoan nan ihmw likou erein sounpar tohto, oh song en meirongkihla nah pwutak kompoakeo Aisek. Eipraam wia soahng pwukat koaros pwehki e pwoson laud Siohwa. Pwehki eh pwoson oh wiewia mwahu kan, met imwikihla Siohwa eh ketin kupwurperenki oh wiahla kompoakepah. (Wadek Seims 2:​22, 23.) Siohwa ketin kupwurki kitail koaros—pil kowe—en pwungla reh oh wiahla kompoakepah. Pwehki met, e ketin doadoahngki sounnting en Paipel ko Pohl oh Seims en koasoia ahn Eipraam mehn kahlemeng. Kitail pahn koasoiapene eh mehn kahlemeng nin duwen me Rom irelaud 4 oh Seims irelaud 2 mahsanih. Pohl oh Seims koaros koasoia mehkot me uhdahn kesempwal duwen Eipraam.

3. Mehnia iren Paipel me Pohl oh Seims doadoahngki?

³ Pohl oh Seims koaros koasoia dahme Senesis 15:6 mahsanih,  me koasoia: “[Eipraam] pwosonla Siohwa, oh pwehki met E ketin wiahkihla ih aramas pwung men.” Ni aramas emen eh kin kaperenda Siohwa, Siohwa kin ketin kilengwohng ih nin duwen aramas pwung men de sohte sapwung kis reh. E kapwuriamwei me Koht kak ketin wiahki aramas dipan oh soh unsek men emen me sohte sapwung kis reh! Ele ke men wia soangen aramaso. Kitail pahn koasoiapene dahme kahrehda Siohwa ketin ekerki Eipraam ohl pwung men oh dahme kitail anahne wia pwehn pwungla reh.

4. Dahme kin kauhdi aramas en wia me pwung kei?

⁴ Nan nah kisinlikou ong mehn Rom ko, Pohl koasoia me aramas koaros dipan. (Rom 3:23) Eri, dahme kahrehda Koht kak ketin kupwurkin kitail oh ekerkin kitail aramas pwung kei? Pohl doadoahngki ahn Eipraam mehn kahlemeng pwehn sapengala peideko.

5. Dahme kahrehda Siohwa ketin ekerki Eipraam ohl pwung men? (Rom 4:​2, 4)

⁵ Siohwa ketin ekerki Eipraam ohl pwung men ni ahnsou me e koukousoan nan Kenan. Dahme kahrehda Siohwa kak ketin ekerki Eipraam ohl pwung men? Ia duwe, pwehki e peikiong Kosonned en Moseso ni unsek? Soh. (Rom 4:13) Kosonnedo kohieng wehin Israel sounpar 400 samwa mwurin Koht eh ketin ekerki Eipraam ohl pwung men. Eri, dahme kahrehda Koht ketin ekerki Eipraam ohl pwung men? Siohwa ketin kasalehda kadek kalahngan ong Eipraam oh ketin ekerki ih ohl pwung men pwehki eh pwoson.—Wadek Rom 4:​2-4.

6. Dahme kahrehda Siohwa kak ketin ekerki aramas dipan men pwung?

⁶ Pohl koasoia me ni aramas emen eh kin pwoson Koht, e “kin pwungla rehn Koht pwehki eh pwoson.” (Rom 4:5) E pil koasoia: “Depit pil koasoiahki duwen pai en aramas emen me Koht ketin wiahkihla me pwung men likin eh wiewia kan. E ahpw nda: ‘Meid pai irail akan me aleier mahkpen arail wiewia suwed kan oh diparail kan pweipweila; meid pai aramas emen me Siohwa sohte pahn ketin tamataman dipe.’” (Rom 4:​6-8; Mel. 32:​1, 2) Koht kin ketin mahkohng de pwainla dipen irail kan me kin pwoson ih. E kin ketin mahkohng irail douluhl. E kin ketin kilengwohng irail nin duwen aramas pwung kei oh sohte sapwung kis rehrail pwehki arail pwoson.

7. Dahme kahrehda kitail kak nda me sapwellimen Siohwa ladu kan mahso wia aramas pwung kei?

⁷ Mendahki irail wia aramas pwung kei rehn Koht, Eipraam, Depit, oh sapwellime tohnkaudok lelepek teikan kin wiahte aramas dipan kei. Ahpw pwehki arail pwoson, Koht kin ketin kilengwohng irail nin duwen aramas kei me sohte sapwung kis rehrail, ni mehlel ni atail kapahrekiong irail aramas akan me sohte kin pwoson Koht. (Ep. 2:12) Nan nah kisinlikowo ong mehn Rom kan, Pohl kawehwehda me kitail anahne pwoson pwehn wiahla kompoakepahn Koht. Eipraam oh Depit wia kompoakepahn Koht pwehki ira pwoson ih. Kitail pil kak wiahla kompoakepah pwehki atail pwoson.

8-9. Dahme ekei ndahki duwen dahme Seims oh Pohl ntingihedi, oh dahme kahrehda?

⁸ Erein sounpar epwiki kei, kaunen pelien lamalam kan kin akamaiki duwen pwoson oh kesempwalpen wiewia. Ekei irail kin padahngki me ihte me ke anahne wia pwehn komourla iei en pwoson Kaun Sises Krais. Ele ke kin rong arail kin nda, “Alehda Sises oh ke pahn  komourala.” Ekei irail nda me Pohl padahngki met pwehki e koasoia: “Koht ketin wiahkihla me pwung men likin eh wiewia kan.” (Rom 4:6) Ahpw, ekei kin koasoia me ke kak komourala sang ni omw kohla wasa kan me arail sarawio kin wiahki wasa sarawi kei, oh pil sang ni omw wia soahng mwahu kan. Ele irail kin doadoahngki dahme Seims 2:24 me mahsanih: “Aramas emen pahn kin pwungla rehn Koht pwehki eh wiewia kan ahpw kaidehn pwehki eh pwosonte.”

⁹ Pwehki arail madamadau wekpeseng, ekei me saman kan medewe me Pohl oh Seims sohte pwungkipene dahme emen anahne wia pwehn pwungla rehn Koht. Nin duwen me ekei sounpadahk en pelien lamalam kan koasoia, Pohl kamehlele me ihte me aramas emen anahne iei pwoson pwehn pwungla rehn Koht, ahpw Seims kamehlele me aramas emen anahne wia soahng mwahu kan pwehn pwungla rehn Koht. Emen professor en pelien lamalam koasoia me Seims sohte wehwehki dahme kahrehda Pohl koasoia me aramas emen anahnehte pwoson pwehn pwungla rehn Koht, oh me Seims sohte pwungki dahme Pohl kawehwehda. Ahpw Siohwa ketin doadoahngki Pohl oh Seims en ntingihedi dahme mi nan Paipel. (2 Tim. 3:16) Eri mie ahl mengei ehu en wehwehki dahme ira nda. Kitail pil anahne tehk soahng teikan me ira ntingihedi nan neira kisinlikou ko pwehn wehwehki mwahu dahme ira koasoia.

10. “Wiewia” dah kan me Pohl koasokoasoia? (Rom 3:​21, 28) (Pil kilang kilel.)

¹⁰ “Wiewia” dah kan me Pohl koasoia nan Rom 3 oh 4? E koasokoasoia duwen peikiong Kosonned en Moseso me kohieng mehn Israel ko. (Wadek Rom 3:​21, 28.) E mwomwen me ni mwehin Pohlo, ekei Kristian en Suhs ko kamehlele me irail anahnehte idawehn Kosonned  en Moseso. Eri Pohl doadoahngki en Eipraam mehn kahlemeng pwehn kadehdehda me aramas emen sohte anahne idawehn Kosonnedo pwehn pwungla rehn Koht. Ahpw, Pohl kawehwehda me kitail anahne pwoson. Met wia mehn kangoang pwehki e padahkihong kitail me ma kitail pwoson Koht oh Krais, kitail kak pwungla rehn Koht.

11. “Wiewia” dah kan me Seims koasokoasoia?

¹¹ Ahpw, “wiewia kan” me Seims irelaud 2 koasoia duwe sohte duwehte soahng kan nan Kosonned en Moseso me re anahne peikiong. Seims koasokoasoia wiewia kan me Kristian men kin wia rahn koaros nan eh mour. Soangen wiewia pwukat kin kadehdehda ma Kristian men uhdahn pwoson Koht de soh. Medewehla karasaras riau me Seims doadoahngki.

12. Ia duwen Seims eh kawehwehda duwen wiewia oh pwoson ara dokpene? (Pil kilang kilel.)

¹² Nan tepin karasaraso, Seims kawehwehda me Kristian kan en dehr lipilipilki aramas. E kawehwehda met ni eh doadoahngki karasepen ohl emen me kadekohng emen me kepwehpwe oh sohte kadekohng emen me semwehmwe. Seims koasoia me soangen ohl menet kakete nda me e pwoson ahpw eh wiewia kan kasalehda me e sohte pwoson. (Seims 2:​1-5, 9) Keriaun karasaraso, Seims koasokoasoia me ni emen eh kilang ‘rie ohl de lih emen me sohte eh likou oh kene mwenge’ ahpw sohte sewese. Mehnda ma aramaso nda me e pwoson, eh wiewia kan kadehdehda me e sohte pwoson. Duwehte me Seims ntingihedi, “ma pwosonte me mie ahpw wiewia sohte iang, e wia pwoson mehla ehu.”—Seims 2:​14-17.

13. Karasaras dahieu me Seims doadoahngki pwehn kadehdehda me kitail anahne pwoson oh wia soahng mwahu kan? (Seims 2:​25, 26)

¹³ Seims koasoia me Reap wia mehn  kahlemeng mwahu en pwoson sang ni eh wiewia kan. (Wadek Seims 2:​25, 26.) E rong duwen Siohwa oh ese me e kin ketin utung mehn Israel ko. (Sos. 2:​9-11) Eh wiewia kan kasalehda me e pwoson. Pwehki eh pwoson, e kapitala lipoahrok en Israel riemen ni ara mour mihla nan keper. Pwehki met, lihen Israel soh unsek menet pwungla rehn Koht, duwehte Eipraam. Kitail sukuhlkihsang Reap me e uhdahn kesempwal en kasalehda ni atail wiewia me kitail pwoson.

14. Dahme kahrehda kitail kak nda me dahme Pohl oh Seims ntingihedi kin dokpene?

¹⁴ Ni mengei, Pohl oh Seims kawehwehda duwen pwoson oh wiewia ni ahl riau. Pohl ndaiong Kristian en Suhs ko me irail sohte kak pwungla rehn Koht sang ni arail idawehnte Kosonned en Moseso. Seims koasokoasoia me Kristian kan koaros anahne kasalehda arail pwoson sang ni arail wiahiong meteikan soahng mwahu kan.

15. Ia ahl teikan me kitail kak kasalehda pwoson sang ni atail wiewia? (Pil kilang kilel.)

¹⁵ Siohwa sohte ketin mahsanih me ma kitail men pwungla reh, kitail anahne wia soahngohte me Eipraam wia. Ni mehlel, mie ahl tohto me kitail kak kasalehda me kitail pwoson. Kitail kak kasamwo me kapw kan nan mwomwohdiso, sewese riatail Kristian kan me anahne sawas, oh wiahiong atail peneinei soahng mwahu kan, soahng pwukat koaros mehkot me Siohwa pahn ketin kupwurki oh kapaiahda. (Rom 15:7; 1 Tim. 5:​4, 8; 1 Sohn 3:18) Ehu ahl keieu kesempwal me kitail kak kasalehda atail pwoson iei sang ni atail ngoangki kalohki rongamwahwo ong meteikan. (1 Tim. 4:16) Kitail koaros kak kasalehda sang ni atail wiewia me kitail pwoson me sapwellimen Siohwa  inou kan pahn pweida oh me sapwellime ahl akan me keieu mwahu. Oh ma kitail wia met, kitail kak uhdahn kamehlele me Koht pahn ketin wiahkin kitail aramas pwung kei oh kitail pahn wiahla kompoakepah.

16. Ia duwen ahn Eipraam koapworopwor eh pidada eh pwoson?

¹⁶ Rom irelaud 4 kasalehda pil ehu mehn kasukuhl kesempwal me kitail kak sukuhlkihsang Eipraam: kesempwalpen koapworopwor. Siohwa ketin inoukihda me pwehki Eipraam “wehi ngedehrie” pahn alehdi kapai. Medewehla inou kaselel kan me Eipraam kak kasikasik! (Sen. 12:3; 15:5; 17:4; Rom 4:17) Ahpw, mendahki Eipraam sounpar 100 oh Sara sounpar 90, ira saikinte nainekihda seri. E mwomwen me Eipraam oh Sara sohte kak nainekihda pwutak men. Kasongosong laud ehu met ong Eipraam. Ahpw, “e koapworopworki oh pwoson me e pahn wiahla semen wehi tohto.” (Rom 4:​18, 19) Kedekedeo, dahme Eipraam koapworopworki pweida. E wiahla semen Aisek, me e kin koapworopworki en nainekihda.—Rom 4:​20-22.

17. Ia duwen atail ese me kitail kak pwungla rehn Koht oh wiahla kompoakepah?

¹⁷ Kitail kak pwungla rehn Koht oh wiahla kompoakepah, duwehte Eipraam. Ih met me Pohl koasoia ni eh ntingihedi: “Mahsen pwukat ‘e ketin wiahkihla ih aramas pwung men’ sohte ntingdi ong [Eipraam] ihete, ahpw pil ong kitail me Koht pahn ketin wiahkihla aramas pwung kei pwehki kitail kin kamehlele Ih me ketin kaiasada Sises atail Kaun sang rehn me melahr akan.” (Rom 4:​23, 24) Duwehte Eipraam, kitail anahne pwoson Siohwa, wia soahng mwahu kan, oh uhdahn kamehlele me sapwellimen Siohwa inou kan pahn pweida. Pohl doula koasoia duwen atail koapworopwor nan Rom irelaud 5, me kitail pahn koasoiapene nan iren onop en mwuhr.