1. Ia uwen kesempwal en pilawa ong aramas akan nan Paipel?

 PILAWA wia mwenge keieu kesempwal ong aramas akan nan Paipel. (Sen. 14:18; Luk 4:4) Ni mehlel, ekei pak ni Paipel eh doadoahngki lepin lokaiao “pilawa,” e kin wehwehki mwenge. (Mad. 6:11) Manaman riau me Sises ketin wiahda pil kin pidada mwenge. (Mad. 16:​9, 10) Kitail wadek duwen ehu manaman ko nan Sohn irelaud 6. Ni atail koasoiapene ire wet, kitail pahn kilang mehn kasukuhl kan me kitail kak doadoahngki rahnwet.

2. Iahd me aramas kid kei anahnehda mwenge?

² Sapwellimen Sises wahnpoaron ko uhdahn pwangada mwurin arail kalohk. Eri irail iangih Sises douda pohn pwoat ehu oh kotehla Sehd en Kalili pwe ren kak kommoal. (Mark 6:​7, 30-32; Luk 9:10) Irail kelehpwla wasa ehu me karanih Pedsaida. Ahpw aramas akan rongada me Sises ketiket wasao, oh sohte pwand aramas kid kid kei kohla pwehn tuhwong. Sises sohte ketin pohnsehseirailla. Ni kadek e ketin wiahda ahnsou pwehn padahkihong irail duwen Wehio oh pwehn kamwahwihala me soumwahu kan. Pwehki eh ni soutiklahr, tohnpadahk ko men ese ia duwen aramas ko ar kak ale kanarail mwenge. Ele ekei pein wahda kanarail kisin mwenge, ahpw pali laud anahne kohla nan kahnimw ko oh pwainda mwenge. (Mad. 14:15; Sohn 6:​4, 5) Dahme Sises ketin wia?

SISES KETIKIHDA PILAWA SANG NI MANAMAN EHU

3. Dahme Sises ketin padahkihong sapwellime wahnpoaron ko en wia? (Pil kilang kilel ni Kahn Iroir wet.)

³ Sises ketin padahkihong sapwellime wahnpoaron ko: “Re sohte anahne kohkohpeseng; kumwail kihong irail mehkot  ren kang.” (Mad. 14:16) Met wia kahpwal ehu pwehki mpen ohl 5,000 mi wasao. Oh patehng lih oh seri kan, ele aramas 15,000 anahne mwenge. (Mad. 14:21) Andru koasoia: “Mie kisin pwutak men wasaht me tungoalenki lopwon en pilawa limau oh mwahmw riemen. Ahpw ia duwen mepwukat eh pahn itar ong diren aramas pwukat?” (Sohn 6:9) Pilawa me wiawihsang parli iei me aramas ako kin kalapw kang, oh ele mwahmw tikitik me soahldi. Ahpw, uwen me mi rehn kisin pwutako sohte pahn itar pwehn kamwengehla aramas tohto!

4. Dahme kitail kak sukuhlkihsang Sohn 6:​11-13? (Pil kilang kilel kan.)

⁴ Sises kupwurki kasalehiong aramas ko kadek, eri e mahsanihong irail en mwohndi nan dihp ko oh wiahda pwihn kei. (Mark 6:​39, 40; wadek Sohn 6:​11-13.) Mwuri, Sises ketin kalahngankihong Semeo pilawa ko oh mwahmw ko. Met uhdahn konehng pwehn kalahngankihong Koht pwehki ih me kin ketikihda mwenge. E kesempwal en idawehn sapwellimen Sises mehn kahlemeng sang ni atail kapakap mwohn mwenge, pil ni atail kelehpw de mi rehn meteikan. Eri Sises ketin padahkihong sapwellime tohnpadahk ko en kihpeseng mwenge ko oh aramas ko mwenge lao irail medla. Pil mie luhwen mwenge ko oh Sises sohte kupwurki mwenge ko en koskosla. Eri e ketin padahkihong sapwellime tohnpadahk ko en kihpene luhwen mwenge ko pwe ren kak kang mwuhr. Sises sohte kin ketin wiakauwe soahng kan. Met wia mehn kahlemeng mwahu ong kitail. Ma kowe pahpa de nohno men, ke kak doadoahngki  koasoi wet pwehn padahkihong noumw seri kan kesempwalpen en kapakap mwohn mwenge, en kadek, oh sapan ong meteikan duwehte Sises.

5. Ia duwen aramas ko ar mwekidki dahme Sises ketin wia rahno, oh dahme e wia?

⁵ Aramas ko pwuriamweila pwehki Sises kak ketin wiahda manaman kan oh wia sounpadahk mwahu men. Irail ese me Moses koasoia me Koht pahn ketin kadarodohng irail soukohp lapalap men, ele irail medewe me Sises iei soukohpo. (Deud. 18:​15-18) Ele irail medewe me Sises pahn wia kaun mwahu men oh kak kamwengehla wehio pwon. Pokono men “parokedi [Sises] pwe ren kasapwiladahng nanmwarki.” (Sohn 6:​14, 15) Ma Sises ketin mweidala met en wiawi, e pahn iang pidada palien koperment en Suhs, me mi pahn kaundahn Rom. Ahpw e sohte ketin wia met. Paipel mahsanih me Sises “ketidahla pohn nahnao.” Eri mendahki kasongosong sang meteikan, e sohte ketin iang pidada palien koperment kan. Met uhdahn wia mehn kasukuhl kesempwal ong kitail!

6. Ia duwen atail kak alasang sapwellimen Sises mehn kahlemeng? (Pil kilang kilel.)

⁶ Ei mehlel, aramas akan sohte pahn peki kitail en wiahda manaman pwehn kihda mwenge de kamwahwihala me soumwahu, de wiahla arail nanmwarki. Ahpw irail kak peki kitail en iang usada emen me irail medewe pahn wia kaun mwahu men. Ahpw, sapwellimen Sises  mehn kahlemeng sansal. E sohte iang pidada palien koperment kan, oh pil mahsanih: “Ei wehi kaidehn kisehn sampah wet.” (Sohn 17:14; 18:36) Kristian kan anahne alasang sapwellimen Sises madamadau oh wiewia. Kitail kin utung Wehio, padahkihong aramas akan, oh kapakapki en ketido. (Mad. 6:10) Pil mie soahng kei me kitail kak sukuhlkihsang sapwellimen Sises manaman ni eh ketikihda pilawao.

‘WEHWEHN LOPWON EN PILAWAO’

7. Dahme Sises oh wahnpoaron ko wia? (Sohn 6:​16-20)

⁷ Mwurin Sises eh ketin kamwengehla pokono, e padahkihong sapwellime wahnpoaron ko en douda pohn pwoht ehu oh pwurala Kapernaum oh e ketidahla pohn nahnao, pwehn soikala pokono ar songosong en kasapwiladahng nanmwarki. (Wadek Sohn 6:​16-20.) Erein wahnpoaron ko ar seiseiloak, mie melimel laud ehu wiawi me kahrehda ilok laud. Eri Sises ketila rehrail oh alialu kohla pohn sehdo. Oh e ketin luke wahnpoaron Piter en pil iang ih alu pohn sehdo. (Mad. 14:​22-31) Ni ahnsou me Sises ketida pohn pwohto, melimelo uhdi. Tohnpadahk ko pwuriamweila oh koasoia: “Komwi me uhdahn Sapwellimen Kohto!” a (Mad. 14:33) Ahpw e kapwuriamwei me tohnpadahk ko koasoia met mwurin eh alu pohn sehdo, a kaidehn mwurin eh ketikihda pilawao ni manaman. Tehk dahme Mark ntingihedi ahnsowohte: “[Wahnpoaron ko] uhdahn pwuriamweikihla, pwe re sohte wehwehki kasukuhl sang manaman en lopwon en pilawao pwe mohngiongirail saikinte kak wehwehki.” (Mark 6:​50-52) Tohnpadahk ko sohte wehwehki me Siohwa ketikihongehr Sises manaman en wia laudsang en ketikihda pilawa. Ahpw mwurinte mwo, Sises pwurehng mahsanih duwen manaman en ketikihda pilawao, oh padahkihong kitail pil ehu mehn kasukuhl.

8-9. Dahme kahrehda pokono rapahki Sises? (Sohn 6:​26, 27)

⁸ Rahno mwuri, pokono kohla wasa me Sises ketin kamwenge irailo, ahpw Sises oh wahnpoaron ko sohte mi mwo. Eri aramas ako douda pohn pwoht ehu oh seiloakla Kapernaum pwehn rapahki Sises. (Sohn 6:​22-24) Ia duwe, irail wia met pwehki re men kalaudehla arail sukuhlki duwen Wehio? Soh. Ihte me re mwahuki Sises en ketikihong irail pil ekei pilawa. Ia duwen atail ese met?

⁹ Tehk dahme wiawi ni ahnsou me pokono diar Sises limwahn Kapernaum. Sises mahsanihong irail me re kolahng rapahki ih pwehki re anahne mwenge. Mendahki irail “kangehr lopwon en pilawa ko oh medkihla,” Sises mahsanih me mwengeo “mwenge me kin kiteila.” E ketin mahsanihong irail me re anahne doadoahk ong “mwenge me kin mihmi ong mour soutuk.” (Wadek Sohn 6:​26, 27.) Sises mahsanih me Semeo pahn ketikihda soangen mwenge pwukat. Ni ahnsou me aramas ako rong me mie mwenge me kak kihong irail mour soutuk, ele irail uhdahn pwuriamweikihla! Soangen mwenge dah me kak wia met, oh ia duwen arail kak alehdi?

10. “Sapwellimen Koht doadoahk” dah me aramas akan anahne sukuhlki?

¹⁰ Mehn Suhs ko men ese dahme irail anahne wia pwe ren alehdi soangen mwenge wet. Ele irail medemedewe duwen “doadoahk” kan me Kosonned en Moseso koasoia me re anahne wia. Sises mahsanihong irail: “Iet sapwellimen Koht doadoahk, kumwail en kasalehda amwail pwoson meno me e ketin poaronehdo.” (Sohn 6:​28, 29) Irail anahne pwoson Sises me Koht ketin poaronehdo pwe ren “ahneki mour  soutuk.” Sises ketin mahsaniher met mwoweo. (Sohn 3:​16-18, 36) Pil ahnsou teikan, Sises mahsanih dahme anahn pwehn alehdi mour soutuk.—Sohn 17:3.

11. Ia duwen mehn Suhs ko ar kasalehda me re nsenohkihte en alehdi kanarail mwenge? (Melkahka 78:​24, 25)

¹¹ Mehn Suhs ko sohte kamehlele me irail anahne pwoson Sises. Irail keinemwe reh: “Dahme komw pahn ketin wiahda pwehn wia kilel ehu, pwe sen kilang oh kamehlele komwi?” (Sohn 6:30) Irail koasoia me arail pahpa kahlap ako ni mwehin Moseso alehdi manna me irail kin kang rahn koaros. (Neh. 9:15; wadek Melkahka 78:​24, 25.) E sansal me irail nsenohkihte en alehdi kanarail mwenge. Oh ni Sises eh mahsanih “pilawa mehlel sang nanleng,” me weksang manna oh kak kihong irail mour soutuk, irail sohte pil idek ia wehwehn met. (Sohn 6:32) Irail nohn medemedewehte arail anahn en war me kahrehda irail sohte rong dahme Sises ketin padapadahkihong irail pwe ren alehdi mour soutuk. Dahme kitail kak sukuhlkihsang met?

DAHME KITAIL EN KEIEU KESEMPWALKI

12. Ia duwen Sises eh ketin kasalehda dahme keieu kesempwal?

¹² Iet ehu mehn kasukuhl kesempwal ong kitail me dierek nan Sohn irelaud 6. Peikiong Koht oh ahneki nanpwungmwahu reh iei me kitail en keieu kesempwalki. Ni ahnsou me Sises lelohng kasongosong sang Sehdan, e pil kasalehda me en peikiong Siohwa kin kesempwalsang mwenge. (Mad. 4:​3, 4) Oh nan sapwellime kapahrek en Pohn Dohlo, e kasalehda uwen kesempwal en ahneki nanpwungmwahu rehn Koht. (Mad. 5:3) Eri, kitail kak pein idek rehtail, ‘Mwomwen ei mour kasalehda me I kin kesempwalki ei nanpwungmwahu rehn Siohwa laudsang en kaitarala ei anahn en war kan?’

13. (a) Dahme kahrehda e sohte sapwung en pereperenki mwenge? (b) Dahme kitail anahne kanahieng? (1 Korint 10:​6, 7, 11)

¹³ E sohte sapwung en kapakapki dahme kitail anahne oh en perenki soahng kan. (Luk 11:3) Paipel mahsanih me e mwahu ong aramas emen “en mwenge oh nim oh pereperenki wahn eh doadoahk,” oh me met “kohsang nin limen Koht.” (Ekl. 2:24; 8:15; Seims 1:17) Ahpw kitail anahne kanahieng en dehr mweidohng kepwe kan en wiahla me keieu kesempwal nan atail mour. Kitail kak sukuhlki met sang dahme wahnpoaron Pohl ntingkilahng Kristian ko. E koasoia mehn kahlemeng suwed me mehn Israel ko wia ni arail mi nan sapwtehno, iangahki dahme wiawi karanih Nahna Sainai. E katamankihong Kristian ko en ‘dehr inengieng soahng suwed kan duwehte me [mehn Israel ko] kin inengieng.’ (Wadek 1 Korint 10:​6, 7, 11.) Siohwa ketikihong mehn Israel ko mwenge. Ahpw pwehki arail mehwohn mwenge, met wiahla “soahng suwed kan” de suwed ong irail. (Nemp. 11:​4-6, 31-34) Ni ahnsou me irail kaudokiong kouwolo, mehn Israel ko kasalehda me irail kesempwalki en mwengemwenge, niminim, oh pereperen laudsang en peikiong Siohwa. (Eks. 32:​4-6) Pohl koasoia mehn kahlemeng pwukat pwehn katamankihong Kristian ko me momour kaimwiseklahn mwohn ohlahn Serusalem oh eh tehnpas sarawio kasohrala nan pahr 70. Kitail pil momour kerenlahng imwin koasoandi wet eh pahn kasohrala, eri e uhdahn kesempwal ong kitail en tehk kanahieng ahn Pohl mehn katamano.

14. Dahme Paipel mahsaniheki mwenge nan sampah kapwo?

¹⁴ Ni Sises eh padahkihong kitail en kapakapki ‘atail tungoal me itar ong rahnwet,’ e pil ketin padahkihong kitail en kapakapki kupwuren Koht en wiawi “nin sampah duwen eh  kin wiawi nanleng.” (Mad. 6:​9-11) Ia pahn mwomwen sampah ni ahnsowo? Paipel kin kasalehda me kupwuren Koht nin sampah kin pidada mwenge mwahu. Aiseia 25:​6-8 padahkihong kitail me e pahn mie diren mwenge iou ong aramas en perenki. Melkahka 72:16 mahsanih: “Reken wahn pilawa en kin wiewiawihte nan wehiet; wahnsahpw en kin kipehdi dohl akan.” Ia duwe, ke kasikasik ahnsowo me ke pahn wiahda soangsoangen pilawa de soangsoangen mwenge kan? Patehng met, ke kak padokedi omw mwetuwel en wain oh pereperenki. (Ais. 65:​21, 22) Oh aramas koaros nin sampah pahn perenki soahng kaselel pwukat.

15. Dahme irail kan me iasada nan sampah kapwo pahn sukuhlki? (Sohn 6:35)

¹⁵ Wadek Sohn 6:35. Pwurehng medewehla aramas ko me kang pilawa oh mwahmw ko me Sises ketikihda. Mendahki tohtohn irail sohte kasalehda me re sohte pwoson Sises, re kakete iasada oh ele ke kak tuhwong ekei irail. (Sohn 5:​28, 29) Ahpw, irail pahn anahne sukuhlki wehwehn mahsen en Sises ko: “Ngehi me pilawahn mour. Mehmen me kohdo rehi sohte mwahn pahn men mwengehda.” Irail pahn anahne kakairada pwoson me Sises ketin tounmeteikihla moure ong irail. Ni ahnsowo, irail kan me iasada oh seri kan me ipwidi nan sampah kapwo, pahn sukuhlki padahk mehlel duwen Siohwa oh kupwure. Kitail uhdahn pahn perenki padahkihong irail duwen soahng kapwuriamwei pwukat! Atail sewese meteikan en kakairada nanpwungmwahu rehn Siohwa pahn kaperensang atail kang soangen mwenge iou koaros nan sampah kapwo.

16. Dahme kitail pahn koasoiapene nan iren onop en mwuhr?

¹⁶ Kitail koasoiapenehr wasa kis nan Sohn irelaud 6, ahpw mie soahng tohto me Sises ketin padahngki duwen “mour soutuk.” Mehn Suhs ko me Sises mahseniong anahne rong kanahieng dahme e mahsanih, oh kitail pil anahne wia met. Kitail pahn pousehlahte koasoiapene Sohn irelaud 6 nan iren onop en mwuhr.