1. Ia ahn ekei pepehm duwen en mour kohkohlahte?

 ARAMAS tohto kin tehk mwahu dahme re kin kang oh kalapw eksersais pwe ren ahneki roson mwahu. Ahpw irail ese me ahneki roson mwahu oh eksersais sohte pahn ireiraildihsang mahla oh mehla. Ele irail medewe me en mour kohkohlahte sohte kak wiawi. Ahpw Sises mahsanih me aramas kak ahneki “mour soutuk,” duwehte me kileldi nan Sohn 3:16 oh 5:24.

2. Dahme Sohn irelaud 6 mahsanihki duwen mour soutuk? (Sohn 6:​39, 40)

² Sises ketin wiahda manaman ehu ni eh ketin kamwenge aramas kid kid kei. a Met inenen kapwuriamwei, ahpw dahme e mahsanih rahno mwuri pil uhdahn kapwuriamweisang. Pokono idawehnla ih Kapernaum, karanih oaroahr en Kalili, wasa me e mahsanihong irail me aramas kak iasada oh ahneki mour soutuk. (Wadek Sohn 6:​39, 40.) Medewehla dahme met kak wiahiong kompoakepahmw kan oh omw peneinei me melahr. Mahsen en Sises ko kasalehda me aramas tohto me melahr kak iasada oh kowe oh irail kan me ke poakohng kak ahneki mour soutuk. Ahpw dahme Sises mahsanih mwuhr nan Sohn irelaud 6 kin apwal ong me tohto en wehwehki. Dahme Sises mahsanih?

3. Nin duwen me Sohn 6:51 mahsanih, dahme Sises ketin kasalehda duwen pein ih?

 ³ Mwurin Sises eh kamwengehla pokono, re medewehla duwen manna me Siohwa ketikihda ong mehn Israel ko nan sapwtehn. Ni mehlel, Paipel kahdaneki mannao “kisin saken nanleng.” (Mel. 105:40; Sohn 6:31) Sises uhd mahsanih duwen soahng kan me pokono eseier duwen manna pwehn padahkihong irail mehkot kesempwal. Mendahki ni manaman ehu Koht ketikihda manna, irail kan me tungoale kedekedeo mehla. (Sohn 6:49) Weksang met, Sises kamwarenki pein ih “pilawa mehlel sang nanleng,” “pilawa me Koht ketikihda,” oh “pilawahn mour.” (Sohn 6:​32, 33, 35) Sises ketin kasalehda wekpeseng en mannao oh ih. E mahsanih: “Ngehi me pilawa momour me kohdihdo sang nanleng. Ma mehmen tungoale pilawa wet, e pahn mour kohkohlahte.” (Wadek Sohn 6:51.) Mehn Suhs ko pwonopwonkihda met. Ia duwen Sises eh kak mahsanih me ih me “pilawa” me kohdihdo sang nanleng me mwahusang mannao me Koht ketikihong arail pahpa kahlap ako? Sises eri mahsanihong irail: “Pilawa me I pahn kihda iei udukei.” Ia wehwehn met? E kesempwal ong kitail en wehwehki met pwehki pasapengo kasalehda ia duwen kitail oh irail kan me kitail poakohng kak ahneki mour soutuk. Kitail pahn kilang ia wehwehn dahme Sises mahsanih.

PILAWAHN MOUR OH UDUKE

4. Dahme kahrehda ekei uhdahn pwuriamweikihla dahme Sises mahsanih?

⁴ Ekei me rongorong Sises uhdahn pwuriamweila ni eh mahsanih duwen eh pahn ketikihda ‘udukeo pwe sampah en mourkihla.’ Mwein re medewe me e uhdahn kupwurki irail en tungoale uhdahn udukeo. (Sohn 6:52) Ahpw Sises pil mahsanih mehkot me uhdahn kapwuriamweisang. E mahsanih: “Ma kumwail sohte pahn tungoale uduken Nein-aramas oh nim ntah, kumwail sohte ahneki mour.”—Sohn 6:53.

5. Dahme kahrehda kitail kak kamehlele me Sises sohte kupwurki aramas en nim ntah?

⁵ Ni mwehin Nohao, Koht ketin kehkehlingkihong aramas akan ren dehr tungoale nta. (Sen. 9:​3, 4) Siohwa ketin pwurehng ketikihda kehkehlik wet nan sapwellime Kosonnedo ong mehn Israel. Mehmen me tungoale nta “solahr pahn wia kisehn sapwellimen Koht aramas akan” de re pahn kamakamala. (Lip. 7:27) Sises padahkihong mehn Suhs ko en peikiong kosonned koaros me Koht ketikihong irail. (Mad. 5:​17-19) Eri, Sises sohte mwahn kupwurki irail en tungoale uhdahn udukeo de nim ntah. Ahpw sang eh mahsen kapwuriamwei ko, Sises kupwurki padahkihong aramas ako ia duwen arail kak ahneki “mour soutuk.”—Sohn 6:54.

6. Ia duwen atail ese me Sises ketin doadoahngki karasaras ehu nan Sohn 6:53?

⁶ E sansal me Sises ketin doadoahngki karasaras ehu ni eh mahseniong pokono. Sises ketin doadoahngki karasaras ni ahnsou me e mahsanihong lihen Sameriao: “Mehmen me nimasang pihl me I pahn kihong ih sohte pahn pwurehng men nimpilda, ahpw pihl me I pahn kihong ih pahn wiahla utuhnpihl ehu loale me kin pwepwengkda pwe en kihong ih mour soutuk.” (Sohn 4:​7, 14) b Sises sohte mahmahsanih me lihen Samariao pahn nimsangte pihl en pwarer ehu oh pahn mour kohkohlahte. Duwehte met, e pil sohte mahmahsanih me pokono me e mahmahsaniong nan  Kapernaum pahn mour kohkohlahte ma re tungoale uhdahn udukeo oh nim ntah.

WEKPESENG EN AHNSOU RIAU

7. Dahme ekei kin koasoiahki duwen dahme Sises mahsanih nan Sohn 6:53?

⁷ Ekei kin nda me nan Sohn 6:​53, Sises ketin kawehwehda dahme aramas akan anahne wia ni Sak en Soutik en Kauno pwehki ni ahnsowo, e ketin doadoahngki lepin lokaia kan me kereniong duwehte dahme e mahsanihong pokono. (Sohn 6:53; Mad. 26:​26-28) Irail koasoia me dene koaros me iang Sak en Soutik en Kauno anahne tungoale pilawao oh nim waino me kin pahs ong irail. Ia duwe, met pwung? E kesempwal kitail en esehda ma met pwung de sapwung pwehki nan sounpar koaros, aramas rar kei kin pokonpene pwehn wia Kataman wet. Kitail pahn kilang me wehwehn dahme Sises mahsanih nan Sohn 6:53 uhdahn weksang dahme e mahsanih ni Sak en Soutik en Kauno.

8. Ia ekei wekpeseng kan en ahnsou riau ko? (Pil kilang kilel kan.)

⁸ Kitail pahn tehkpene wekpeseng riau en ahnsou riau ko. Keieu, iahd oh ia wasa me Sises mahsanih mahsen kan me kileldi nan Sohn 6:​53-56? E mahsanih met ong pokon en mehn Suhs kei nan Kalili nan pahr 32. Met wiawi mpen sounpar 2 mwohn eh ketin wiahda Sak en Soutik en Kauno nan Serusalem. Keriau, ihs me e mahseniong? Pali laud en irail kan me rongorong ih nan Kalili kin nsenohkihte arail anahn en war a kaidehn  arail anahn en esehla Koht. (Sohn 6:26) Ni mehlel, ni Sises eh mahsanih duwen soahng ehu me re apwalki wehwehki, re mwadangete sohla pwoson ih. Pil ekei sapwellime tohnpadahk kan uhdihsang idawehn ih. (Sohn 6:​14, 36, 42, 60, 64, 66) Irail pwukat uhdahn weksang wahnpoaron lelepek 11 ko me pato rehn Sises nan pahr 33 ni eh ketin wiahda Sak en Soutik en Kauno. Ni ahnsowo, sapwellime wahnpoaron loalopwoat ko kin patopatohte reh mendahki re sohte uhdahn wehwehki soahng koaros me e ketin padapadahngki. Weksang pali laud en pokono nan Kalili, wahnpoaron lelepek pwukat uhdahn kamehlele me Sises iei Sapwellimen Koht Ohl me ketidihdo sang nanleng. (Mad. 16:16) Sises ketin kapinga irail oh mahsanih: “Kumwail me kin mihmihte rehi nan ei apwal akan.” (Luk 22:28) Wekpeseng pwukat kasalehda me nan Sohn 6:​53, Sises sohte songosong en ketin kawehwehda dahme pahn kin wiawi ni Sak en Soutik en Kauno. Pil miehte wekpeseng teikan en ahnsou riau pwukat.

KE PIL IANG PIDADA MET

9. Pwihn dahieu me mahsen en Sises ko ni Sak en Soutik en Kauno dokedoke?

⁹ Erein Sak en Soutik en Kauno, Sises ketikihong sapwellime wahnpoaron ko pilawa me sohte doal ihs oh mahsanihong irail me pilawao kin wehwehki kahlape. Ih eri ketikihong irail waino oh mahsanih me e kin wehwehki “ntahn inou lapo.” (Mark 14:​22-25; Luk 22:20; 1 Kor. 11:24) Met uhdahn kesempwal. E ketin kahdaneki met “inou lap kapwo,” oh irail kante me pahn iang Sises kaunda Wehin Koht me iang kisehn inou lap wet, kaidehn aramas koaros. (Ipru 8:​6, 10; 9:15) Wahnpoaron ko sohte wehwehki soahng koaros duwen inou lapo, ahpw irail pahn kereniong keikihdi sapwellimen Koht manaman oh wiahla kisehn inou lap kapwo pwehn iang Sises ket nanleng.—Sohn 14:​2, 3.

10. Ia pil ehu wekpeseng en dahme Sises mahsanih nan Kalili oh dahme e mahsanih ni Sak en Soutik en Kauno? (Pil kilang kilel.)

¹⁰ Dahme Sises mahsanih ni Sak en Soutik en Kauno kin dokedoke “kisin pwihn sihpw.” Sapwellime wahnpoaron lelepek ko me iang ih ahnsowo iei me tepin wiahla kisehn pwihn tikitik wet. (Luk 12:32) Iei irail me Sises mahsanihong en tungoale pilawao oh waino. Meteikan me pahn wiahla kisehn pwihn wet mwuhr pil anahne tungoale pilawao oh waino ni arail pahn kin wia katamanpen Sak en Soutik en Kauno. Irail pwukat me pahn iang Sises mi nanleng. Eri met pil ehu wekpeseng en dahme Sises mahsanih ni Sak en Soutik en Kauno oh dahme e mahsanih ahnsou me e mahseniong pokono nan Kalili. Dahme e mahsanih nan Kapernaum kin dokedoke aramas tohto.

11. Dahme Sises mahsanih nan Kalili me kasalehda eh sohte mahmahsanih duwen pwihnen aramas keite?

¹¹ Pali laud en aramas akan me Sises mahseniong nan Kalili men alehte kanarail mwenge sang ih. Ahpw, e ketin song en sewese irail en wehwehki me mie mehkot me kesempwal sang mwenge. Mehkotet iei me pahn kahrehiong irail en kak ahneki mour soutuk. Sises pil mahsanih me aramas akan me melahr kak iasada ni imwin rahn oh mour kohkohlahte. E sohte mahmahsanih duwen pai kaselel ehu me ekeite aramas pahn alehdi, duwehte me e ketin wia mwuhr ni Sak en Soutik en Kauno. Ahpw e mahmahsanih duwen mehkot kaselel me aramas koaros kak ahneki. E mahsanih: “Ma mehmen tungoale pilawa wet, e pahn mour kohkohlahte . . . Pilawa me I pahn  kihda iei udukei pwe sampah en mourkihla.”—Sohn 6:51. c

12. Dahme kitail anahne wia pwehn alehdi mour soutuk?

¹² Ia duwe, Sises mahmahsanih me aramas koaros pahn alehdi mour soutuk? Soh, irail kante me ‘tungoale pilawao,’ de me kin pwoson ih, pahn paiekihda. Aramas tohto rahnwet kin nda me re pwoson Sises oh iei ih me arail sounkomour. (Sohn 6:29) Ahpw ekei nan pokono me kin pwoson Sises nin tapio sohla idawehn ih. Dahme kahrehda?

13. Dahme emen anahne wia pwehn wiahla sapwellimen Sises tohnpadahk?

¹³ Pali laud en aramas akan nan pokono kin idawehnte Sises pwehki e kin ketikihda dahme irail men ale. Irail men en ketin kamwahwihala arail soumwahu kan, ketikihda mwenge ni soh isepe, oh padahngki dahme re men rong. Ahpw Sises ketin kasalehda me e sohte ketido sampah pwehn ketikihong irail dahme irail men ale. E ketido pwehn padahkihong irail dahme re anahne wia pwehn wiahla sapwellime tohnpadahk mehlel. Irail anahne ‘kohla reh,’ me wehwehki ren rong oh peikiong soahng koaros me e ketin padahngki.—Sohn 5:40; 6:44.

14. Dahme kitail anahne wia pwehn alehdi kapai kan sang uduk oh ntahn Sises?

¹⁴ Sises ketin padahkihong irail me sang ni eh ketin meirongkihla uduke oh ntah, e pahn ketikihda elen arail pahn kak mour kohkohlahte. Irail anahne kamehlele met. Soangen pwoson wet uhdahn kesempwal ong mehn Suhs ko, oh pil kesempwalte ong kitail rahnwet. (Sohn 6:40) Ei, pwe kitail en alehdi kapai  kan sang uduk oh ntahn Sises, nin duwen me Sohn 6:53 mahsanih, kitail anahne pwoson pweinen pweipwei sapahlo. Aramas tohto kak alehdi kapai wet.—Ep. 1:7.

15-16. Soahng kesempwal dah kan me kitail sukuhlkihsang Sohn irelaud 6?

¹⁵ Kitail sukuhlki soahng tohto sang Sohn irelaud 6 me uhdahn kesempwal oh kak kangoange kitail koaros. Kitail sukuhlki me Sises uhdahn ketin nsenohki aramas akan. Ni eh ketiket Kalili, e ketin kamwahwihala soumwahu kan, padahngki duwen Wehio, oh tehk mwahu me aramas ako mwengehla. (Luk 9:11; Sohn 6:​2, 11, 12) Kesempwal sang met, e ketin padahkihong irail me ih me “pilawahn mour.”—Sohn 6:​35, 48.

¹⁶ Irail kan me Sises ketin kahdaneki “sihpw teikan” sohte kin oh sohte konehng tungoale pilawa oh wain me kin kohda ni Sak en Soutik en Kauno nan pahr koaros. (Sohn 10:16) Ahpw, irail kin paiekihda arail tungoale, ni karasaras, “pilawahn mour.” Irail kin wia met sang ni arail kasalehda arail pwoson meirong en pweinen pweipwei sapahlo me Sises ketikihda oh soahng kaselel kan me met kin kahrehda en kak wiawi. (Sohn 6:53) Weksang met, irail kan me anahne tungoale pilawao oh waino kin kadehdehda me irail wia kisehn inou kapw lapo oh ahneki koapworopwor en iang kaunda nan Wehio nanleng. Eri, sohte lipilipil ma kitail iang me keidi kan de sihpw teikan, e uhdahn kesempwal kitail en sukuhlki dahme kileldi nan Sohn irelaud 6. E padahkihong kitail me kitail koaros anahne pwoson laud pweinen pweipwei sapahlo pwe kitail en kak mour kohkohlahte.