1-2. Ia duwen pahpa nohno kan ar pahn mwekidki ni seri men eh idek peidek kan duwen dahme re kin kamehlele?

 ME TOHTO pahn pwungki me apwalihada seri uhdahn doadoahk laud. Ma kowe pahpa de nohno men, ke uhdahn kin doadoahk laud pwehn kakehlaka en noumw serio pwoson oh Siohwa kin kupwurperenki met. (Deud. 6:​6, 7) Ni noumw serio eh kekeirda, ele e pahn tepida idek peidek kan duwen dahme kumwail kin kamehlele, duwehte dahme kahrehda Siohwa sohte ketin kupwurki kitail en wia soahng kei.

² Ke kakete medewe me noumw serio idek peidek pwukat pwehki e sohte uhdahn pwoson Koht oh Paipel. Ahpw ni arail kekeirda, re anahne idek peidek kan pwehn kakehlaka ar pwoson. (1 Kor. 13:11) Eri ke sohte anahne masak. Ni arail idek peidek kan, ke kak doadoahngki ahnsowo pwehn sewese irail en sukuhlki en medewe mwahu oh eri kakehlaka ar pwoson Koht oh Paipel.

3. Dahme kitail pahn koasoiapene nan iren onop wet?

³ Nan iren onop wet, kitail pahn koasoiapene ia duwen pahpa nohno kan ar kak sewese neirail serio de seri kan en (1) kakairada eh pwoson Koht oh Paipel, (2) wehwehki dahme kahrehda peikiong kosonned en Paipel kan me pid dahme pwung oh sapwung kin wia kamwahuparail, oh (3) sukuhlki ia duwen ar pahn kawehwehiong meteikan dahme re kamehlele. Kitail pahn pil koasoiapene dahme kahrehda e mwahu ong seri kan en idek peidek oh soahng kan me ke kak iangih noumw serio wia me pahn kihong uhk ahnsou mwahu en koasoia duwen dahme Kristian kan kin kamehlele.

 SEWESE NOUMW SERIO EN KAKAIRADA EH PWOSON KOHT OH PAIPEL

4. Peidek dah kan me seri men ele ahneki, oh dahme kahrehda?

⁴ Noumw seri kan sohte pahn pwoson Koht ihte pwehki ke ahneki pwoson. Ke sohte ipwidihte pwoson Siohwa. Oh met pil duwehte noumw serio. Eri noumw serio pahn ele tepida idek peidek kan me duwehte: ‘Ia duwen ei ese me mie Koht? I kak uhdahn kamehlele dahme Paipel mahsanih?’ Ni mehlel, Paipel kangoangehki kitail en doadoahngki atail “koahiek en madamadau” oh en “kasawih pwungen mehkoaros.” (Rom 12:1; 1 Des. 5:21) Ahpw, ia duwen omw kak sewese noumw serio en kakehlaka eh pwoson?

5. Dahme pahpa nohno kan kak wia pwehn sewese serio kakairada eh pwoson Paipel? (Rom 12:2)

⁵ Kangoange noumw serio en kamehlelehiong pein ih padahk mehlel. (Wadek Rom 12:2.) Ni noumw serio eh idek peidek kan, doadoahngki ahnsowo pwehn kasalehiong ih ia duwen eh kak diar pasapeng kan sang ni eh doadoahngki mehn roporop kan me duwehte Watch Tower Publications Index oh Sawas ong Wia Roporop en Sounkadehdehn Siohwa kan. Nan sawas ong wia roporopo, pahnangin oaralap “Paipel,” e kak rapahkihda “Kohsang rehn Koht” pwehn diar mehn kadehde kan me Paipel sohte wiahte pwuhk ehu me aramas ntingihda. Ahpw e wia “Mahsen en Koht.” (1 Des. 2:13) Karasepe, e kak wia roporop en kahnimw en mehn Asiria ko en Ninipe mahso. Ekei sounsamanih Paipel en mahso koasoia me kahnimw en Ninipe sohte mie. Ahpw mpen pahr 1850, sounroporop kan diarada kahnimw en Ninipe mahso wasa loal pahn pwehl, me kasalehda me Paipel kin pwung. (Sep. 2:​13-15) Pwehn diarada ia duwen kasohralahn Ninipe eh kapwaiada kokohp en Paipel, e kak kilang artikelo “Ke Kin Ese Duwen Met?” nan Kahn Iroir en November 2021. Kangoange noumw serio en kapahrekiong dahme neitail sawasepen Paipel kan koasoia ong dahme pwuhk teikan koasoia. Met pahn sewese noumw serio en kakehlaka eh pwoson dahme Paipel mahsanih.

6. Ia duwen pahpa nohno kan ar kak kamwakid en neirail serio eh koahiek en madamadau? Menlau kihda ehu karasaras. (Pil kilang kilel.)

⁶ Kamwakid en noumw serio eh koahiek en madamadau. Rapahki ahnsou mwahu kan en koasoiaiong noumw serio duwen Paipel de duwen pwoson Koht. Soangen ahnsou pwuko ele kak wiawi erein amwail mwemweitla wasahn nekinek dipwisou en mahs kan (museum), nan mwetuwel ehu, de ohpis en Sounkadehdehn Siohwa kan. Karasepe, ni amwail mwemweitla ni museum ehu, sohte lipilipil ma kumwail pein kohla de kilang nan kisin kasdo ehu, ke kak kasalehiong noumw serio ia duwen dipwisou ehu de mwekid ehu me wiawi mahso eh pahrekiong mehkot nan Paipel. Met kak sewese noumw  serio en kilang me dahme Paipel mahsanih kin mehlel. Ele ke kak padahkihong noumw serio duwen pelin takai me kahdaneki Moabite Stone. Pelin takai wet mihmihkiher sounpar 3,000 oh mwaren Siohwa ntingdi powe. Lepin takai wet mi nan Louvre museum en France. Pil ehu, copy en pelin takai wet mi wasa me adaneki “The Bible and the Divine Name” nan poasen kaun en Sounkadehdehn Siohwa kan nan Warwick, New York. Pelin takai wet kasalehda me Nanmwarki en Mohap, Mesa, uhwongada Israel. Oh met pil pahrekiong dahme Paipel mahsanih. (2 Nan. 3:​4, 5) Ni noumw serio eh kilangehr mehn kadehde me dahme Paipel mahsanih kin pwung, eh pwoson pahn kehlailla.—Pil kilang 2 Kronikel 9:6.

7-8. (a) Dahme kitail kak sukuhlkihsang mwohmw kaselel kan me kitail kin kilang nan kepikipik? Menlau kihda ehu karasaras. (Pil kilang kilel.) (b) Peidek dah kan me kak sewese noumw serio en kakehlaka eh pwoson Sounkapikadao?

⁷ Kangoange noumw serio en medemedewe duwen soahng kapwuriamwei kan. Erein amwa alialu wasa kaselel ehu me diren tuhke de doadoahk nan mwetuwel, sewese noumw serio en kilang mwomwen kepikipik kan eh pwurupwurehng pwarada nan soahng teikan. Sewese noumw serio en wehwehki me mie emen me uhdahn loalokong wiairailda. Karasepe, soahng tohto me kitail kin kilang kin mwomwen pinipin. Saintis kan kin onopki laud mepwukat. Saintis men me adaneki Nicola Fameli kawehwehda me ni ahnsou me ke kin wadek pinipin en soahng ehu, ke pahn diarada soangsoangen nempe kei. Nempe pwukat kin kahdaneki Fibonacci sequence. Kitail kak kilang pinipin en soahng tohto nan ekei mwutumwut en usu kan, ni pwili ehu me adaneki nautilus, ni tehn tuhke kan, oh wahnrohs me adaneki sunflower. a

⁸ Nan sukuhl, noumw serio kakete sukuhlki duwen mwohmw teikan me e kalapw kilang nan kepikipik. Karasepe, pali laud en tuhke kan me kitail kin kilang, lukope ko kin kohda, rah laud ko kohpeseng, rah tikitik kin uhsang, oh ni rah tikitiko mie rah me tikitiksang kin uhsang oh e kin kohkohpeseng. Soangen mwohmw wet pil kin mi ni soahng teikan. Ahpw ihs me ketin kapikada soangen mwohmw kaselel pwukat? Ni noumw serio eh medemedewe laud duwen soahng kaselel kan me Siohwa ketin kapikada, met pahn kalaudehla eh pwoson Koht. (Ipru 3:4) Ni noumw serio eh lalaudla, ke pil anahne sewese ih en wehwehki dahme kahrehda e kesempwal en peikiong sapwellimen Koht kehkehlik kan. Pwehn wia met, ke kak idek reh peidek wet, “Ma Koht ketin kapikkitailda, ia duwe, ke medewe e uhdahn ketin mwahngih dahme kitail anahne wia pwehn nsenamwahu?” Eri ke kak kawehwehiong me Koht ketikihong kitail  Paipel pwehn kasalehiong kitail ia duwen atail kak nsenamwahu.

SEWESE KALAUDEHLA EH KALAHNGANKI KOSONNED EN PAIPEL ME PID DAHME PWUNG OH SAPWUNG

9. Dahme kakete kahrehda noumw serio en idek peidek kan duwen ekei kosonned kan en Paipel?

⁹ Ekei pak, noumw serio kakete idek soahng kan me Paipel mahsanih me sapwung. Song en diarada dahme kahrehda e idek soangen peidek ko. Ia duwe, e apwalki kamehlele me dahme Paipel mahsanih kin mehlel? De e sehse ia duwen eh pahn kawehwehiong meteikan dahme e kin kamehlele? Sohte lipilipil soangen irair dah, ke kak sewese noumw serio en wehwehki dahme kahrehda e mwahu ong kitail en peikiong sapwellimen Siohwa kehkehlik kan. Eri pwehn wia met, ke kak onopki reh pwuhko, Pereperenki Mour Kohkohlahte! b

10. Ia duwen omw kak sewese noumw serio en medemedewe duwen eh nanpwungmwahu rehn Siohwa?

¹⁰ Kangoange noumw serio en kesempwalki eh nanpwungmwahu rehn Siohwa. Ni omw onop Paipel reh, doadoahngki peidek kan oh karasaras kan nan pwuhko Pereperenki Mour Kohkohlahte! pwehn wehwehki eh pepehm duwen soahng kan. (Lep. Pad. 20:5) Karasepe nan mehn kasukuhl 8, e kapahrekiong Siohwa kompoakepah mwahu men, me kin kihong kitail mehn kataman kan me kak pere oh wia kamwahupatail. Mwurin amwa koasoiapene 1 Sohn 5:​3, ele ke kak idek, “Atail ese me Siohwa wia kompoakepah mwahu men, ia pahn atail pepehm duwen dahme e ketin mahsanihong kitail en wia?” Ele met kak wia peidek mengei ehu, ahpw omw idek kakete sewese noumw serio en wehwehki me Siohwa kin ketikihong kitail kehkehlik kan pwehki E ketin poakohng kitail.—Ais. 48:​17, 18.

11. Ia duwen omw kak sewese noumw serio en kalaudehla eh kesempwalki kaweid kan en Paipel? (Lepin Padahk 2:​10, 11)

¹¹ Koasoiapene ia duwen en doadoahngki kaweid en Paipel kan eh wia kamwahupatail. Ni amwa wadekpene Paipel oh iren rahn kan, koasoiapene ia duwen kaweid kan en Paipel eh sewesehier omw peneinei. Karasepe, noumw serio kin kilang kamwahupen amwail kin doadoahk laud oh en kin mehlel? (Ipru 13:18) Ele ke pil kak kawehwehda ia duwen kaweid en Paipel eh sewese kumwail en ahneki roson mwahu oh nsenamwahu. (Lep. Pad. 14:​29, 30) Ni amwa koasoiapene kaweid pwukat, e pahn sewese kalaudehla en serio eh kalahnganki kaweid kan en Paipel.—Wadek Lepin Padahk 2:​10, 11.

12. Ia duwen pahpa men eh sewese nah pwutako en wehwehki kamwahupen en idawehn kaweid kan en Paipel?

¹² Steve, pahpa men nan France, kawehwehda ia duwen ih oh eh pwoudo ara sewese neira pwutak pwulopwulo, Ethan, en wehwehki me Siohwa kin ketin wiahda kosonned kan pwehki e ketin poakohng kitail. E koasoia: “Se kin idek reh soangen peidek pwukat, ‘Dahme kahrehda Siohwa ketin kupwurki kitail en peikiong kehkehlik wet? Ia duwen met eh kasalehda me e ketin poakohng kitail? Dahme pahn wiawi ma ke sohte kapwaiada kaweido?’” Arail koasoiapene soahng pwukat sewese Ethan en kakairada pwoson kehlail me dahme Siohwa ketin mahsanih me pwung. E pil koasoia: “At mehn akadei iei en sewese Ethan en kilang me erpit me mi nan Paipel uhdahn siksang erpit en aramas.”

13. Ia duwen pahpa nohno kan ar kak sewese neirail serio en kapwaiada kaweid kan en Paipel? Menlau kihda ehu karasaras.

¹³ Kaiahne noumw serio en kapwaiada kaweid kan en Paipel. Karasepe, ele noumw serio anahne wadek pwuhk ehu nan sukuhl. Aramas kan me mi nan pwuhko ele kin wia soahng kan me Siohwa mahsanih me sapwung, karasepe re kin wia tiahk samin me pid wia nsenen pwopwoud  oh lemei. Oh pwuhko ntingdi ni ahl ehu me ele wiahiong soahng pwukat en sohte uhdahn suwed. Ke kak idek rehn noumw serio duwen sapwellimen Siohwa pepehm ni aramas akan ar kin nda de wia soahng kan pwukat. (Lep. Pad. 22:​24, 25; 1 Kor. 15:33; Pil. 4:8) Met kak sewese ih en kilang dahme kahrehda e wia elen loalokong en peikiong Siohwa. Oh ma sounpadahko de tohnsukuhl teikan idek ia eh pepehm duwen pwuhko, e pahn kak kawehwehda dahme e kin kamehlele.

KAIAHNE NOUMW SERIO EN KOASOIA DUWEN DAHME E KIN KAMEHLELE

14. Oaralap dahieu me kakete apwal ong me pwulopwul men en koasoiaiong meteikan, oh dahme kahrehda?

¹⁴ Ekei pak me pwulopwul kan ele kin masak koasoiaiong meteikan duwen dahme re kamehlele. Karasepe, re kakete masak ni arail en kawehwe dahme kahrehda re sohte kin kamehlele padahk me dene aramas kohsang mahn. Dahme kahrehda? Arail sounpadahko kakete nda me padahk me dene aramas kohsang mahn mehlel. Dahme kak sewese noumw serio en uhdahn kamehlele me dahme e kin kamehlele uhdahn mehlel?

15. Dahme kak sewese Kristian pwulopwul men en eimahki dahme e kin kamehlele?

¹⁵ Sewese noumw serio en kalaudehla eh eimahki dahme e kin kamehlele. Noumw serio sohte anahne namenengki eh kamehlele me mie Sounkapikada men. (2 Tim. 1:8) Saintis tohto pil kamehlele me soahng kan me momour sohte pein miehla. Saintis pwukat kilang mehn kadehde kan me mie emen me uhdahn loalokong me ketin kapikada soahng kapwuriamwei pwukat. Imwilahn met, re sohte kamehlele padahk me dene aramas kohsang mahn, me sukuhl tohto kin padahngki. Ehu ahl me ele kak sewese noumw serio en kakehlaka eh pwoson oh eimah iei en diarada dahme kamehlelehiong Kristian teikan me mour kapikipikda. c

16. Ia duwen pahpa nohno kan ar kak sewese serio en koasoiahda dahme kahrehda e kamehlele me mie Sounkapikada men? (1 Piter 3:15) (Pil kilang kilel.)

¹⁶ Sewese noumw serio en kak kawehwehda dahme kahrehda e kamehlele me mie Sounkapikada men. (Wadek 1 Piter 3:15.) Ke kak diar artikel kan nan jw.org me koasoia duwen kapikipik oh padahk me dene aramas kohsang mahn. Eri noumw serio kak pilada kawehwe kan me e ele pehm kak sewese meteikan en wehwehki me mie Sounkapikada men. Praktiski rehn noumw serio  ia duwen eh pahn kawehwehda met. Katamankihong ih me e sohte anahne akamaiong ienge tohnsukuhl kan. Kangoange ih en kawehwehda ni mengei oh sansal ma emen men koasoia duwen oaralapo. Karasepe, ienge tohnsukuhl men kakete nda: “I kin kamehlelehte dahme I kak kilang, oh I saikinte kilang Koht.” Kristian pwulopwul men kak sapeng: “Medewehla me ke alialu kohla nanwel ehu me dohsang kahnimw kan oh ke kilangada pwarer ehu me wiawihkihda takai. Dahme ke pahn medewe? Uhdahn mie emen me wiahda pwarero. Met pil duwehte sampah oh soahng koaros me momour. Uhdahn mie emen me kapikada soahng pwukat!”

17. Ia duwen pahpa nohno kan ar kak kangoange neirail seri kan en rapahki ahnsou mwahu en ehukihong meteikan duwen Paipel? Menlau kawehwehda.

¹⁷ Kangoange noumw serio en doadoahngki ahnsou mwahu pwehn padahkihong meteikan duwen Paipel. (Rom 10:10) Ke kak kapahrekiong kasukuhlih meteikan duwen Paipel en sukuhlki mehn keseng ehu. Keieu, tohnsukuhlo pahn sukuhlki koul kan me mengei en kesengki. Kedekedeo, e pahn mengeila. Duwehte met, Kristian pwulopwul men kak tepida kalohk ni ahl mengei ehu. Karasepe, e kakete idek rehn ienge tohnsukuhl men: “Ke ese me saintis kan kin kalapw alasang dahme re kilang nan kepikipik? I pahn kasalehwei kisin kasdo ehu.” Mwurin omw kasalehiong kisin kasdo ehu sang oaralapo Was It Designed?, e kakete nda: “Ma saintis kan kin ale kaping sang arail alasang kepikipik kan, ihs me konehng ale kapingpen kepikipik koaros?” Mwein ienge tohnsukuhlo pahn men kalaudehla eh sukuhlki duwen Siohwa.

POUSEHLAHTE SEWESE KAKEHLAKA EN NOUMW SERIO PWOSON

18. Ia duwen pahpa nohno kan ar kak pousehlahte kakehlaka en neirail serio pwoson Koht?

¹⁸ Kitail mi ni sampah ehu me diren aramas me sohte pwoson Siohwa. (2 Pit. 3:3) Eri pahpa nohno kan, ni amwail onop Paipel rehn noumwail serio, kangoange ih en onopki oaralap me pahn kalaudehla eh wauneki Mahsen en Koht oh kosonned kan me pid dahme pwung oh sapwung. Kamwakid eh koahiek en madamadau sang ni omw kasalehiong ih soahng kaselel kan en sapwellimen Siohwa kepikipik. Sewese en wehwehki kokohp kan en Paipel me pweidahier. Kesempwalsang met, iang noumw serio kapakap oh kapakapki ih. Ni omw wia met, ke kak kamehlele me Siohwa pahn ketin katingihiuk omw nannanti en sewese noumw serio en kakehlaka eh pwoson.—2 Kron. 15:7.