1. Dahme kasalehda me Paipel kin kesempwal ong Sises?

 MEDEWEHLA ia pahn mwomwen ni atail rong Sises eh ketin padahk. E kin ketin kalapw doadoahngki Nting Sarawi kan oh e kin taman koaros! Ni mehlel, Sises ketin doadoahngki iren Paipel kan nan eh mahsen kan me tepin kileldi mwurin eh papidaisla, oh ekei mwohnte eh pwoula. b (Deud. 8:3; Mel. 31:5; Luk 4:4; 23:46) Oh erein sounpar siluh elep nanpwungen mwekid riau pwukat, Sises kin kalapw ketin wadek, doadoahngki, oh kawehwehda Nting Sarawi kan ong aramas akan.—Mad. 5:17, 18, 21, 22, 27, 28; Luk 4:16-20.

2. Ni eh kekeirda, dahme sewese Sises en uhdahn mwahngihala mwahu Paipel? (Menlau kilang kilel ni kilin Kahn Iroir wet.)

² Sounpar tohto mwohn eh ketin tepida eh doadoahk en kalohk, Sises kin kalapw ketin wadek oh rong meteikan koasoia duwen Mahsen en Koht. Nan imweo, ele e kin karonge Mery oh Sosep doadoahngki Paipel ni arail peneineio kin koasoakoasoipene rahn koaros. c (Deud. 6:6, 7) Kitail kak kamehlele me Sises kin ketin iang eh peneineio kohla nan sinakokeo ni rahnen Sapad koaros. (Luk 4:16) Ni eh ketiket wasao, e kin ketin rong kanahieng wadawad en Paipel. Mwuhr, Sises ketin sukuhlki en pein wadek Nting Sarawi ko. Eri, Sises sohte mwahngihalahte duwen Paipel ahpw e pil ketin poakohng oh mweidohng en kamwakid eh wiewia kan. Karasepe, tamanda dahme wiawi nan tehnpas sarawio ahnsou me Sises sounparte 12. Sounpadahk ko me uhdahn ese duwen Kosonned en Moseso uhdahn “pwuriamweikihla [en Sises] koahiek  en wehwehki ire kan oh eh pasapeng kan.”—Luk 2:46, 47, 52.

3. Dahme kitail pahn koasoiapene nan iren onop wet?

³ Kitail pil kak esehla oh poakohng Mahsen en Koht ni atail kin kaukaule wadek Paipel. Ahpw ia duwen atail kak paiekihda laud dahme kitail wadek? Kitail kak sukuhlkihsang dahme Sises mahsanihong irail me ese Kosonnedo, iangahki sounkawehwehn kosonned ko, Parisi ko oh Sadusi ko. Kaunen pelien lamalam kan kin kalapw wadek Paipel, ahpw irail sohte kin paiekihda dahme re wadek. Sises ketin kasansalehda soahng siluh me ohl pwukat anahne wia pwe ren uhdahn paiekihda Paipel. Dahme e mahsanihong irail pahn sewese kitail en kamwahwihala atail koahiek (1) en wehwehki dahme kitail wadek, (2) pwehn diar ire kesempwal sang Mahsen en Koht, oh (3) en mweidohng Mahsen en Koht en kamwakid kitail.

4. Dahme Luk 10:25-29 padahkihong kitail duwen atail wadek Mahsen en Koht?

⁴ Kitail men wehwehki wehwehn dahme kitail wadek nan Mahsen en Koht. Pwe ma soh, ele kitail sohte uhdahn pahn paiekihda atail wadawad. Karasepe, medewehla ni Sises eh mahmahseniong “ohl emen me samanih Kosonnedo.” (Wadek Luk 10:25-29.) Ni ohlo eh idek dahme e anahne pwehn alehdi mour soutuk, Sises ketin sewese ih en diar pasapengo nan Mahsen en Koht. Sises keinemwe reh: “Dahme ntingdi nan Kosonnedo? Ia duwen omw kin wadek?” Ohlo kak kihda pasapeng pwung sang ni eh doadoahngki iren Paipel kan duwen en poakohng Koht oh mehn mpe. (Lip. 19:18; Deud. 6:5) Ahpw tehk dahme e koasoia mwurin mwo: “Ihs me uhdahn mehn mpei?” Ohlo kasalehda me e sohte wehwehki ia uhdahn wehwehn dahme e wadek. Imwilahn met, e sohte ese ia duwen eh pahn doadoahngki ni pwung iren Paipel ko nan eh mour.

5. Ia duwen kapakap oh wadawad ni wawai eh kak sewese kitail en wehwehki mwahu dahme kitail wadek?

⁵ Kitail kak wehwehki mwahu Mahsen en Koht ma kitail kakairada atail ahnla wadek mwahu Paipel. Iet ekei iren sawas me kak seweseiuk. Kapakap mwohn omw tepida wadek Paipel. Kitail anahne sapwellimen Siohwa sawas pwehn wehwehki Paipel, eri kitail kak peki sapwellime manaman en sewese kitail en medemedewe dahme kitail wadek. Mwuri wadek ni wawai. Met pahn seweseiuk en wehwehki dahme ke wadewadek. Ele ke pahn diarada me e mwahu en wadek ni ngihl laud de wadek iangahki ni omw rong ngilen wadawad en Paipel. Ni omw rong ngilen wadawado oh kilang nan doaropwe, met kak seweseiuk en wehwehki, tamataman, oh sukuhlki soahng tohto sang dahme ke wadek nan Mahsen en Koht. (Sos. 1:8) Ni omw nek wadawad, pwurehng kapakap oh kalahngankihong Siohwa kisakis en sapwellime Mahsen oh peki sapwellime sawas pwehn doadoahngki dahme ke wadek.

6. Dahme kahrehda en kin idek rehmw peidek kan oh ntingihdi kisin ire kan kak seweseiuk ni omw wadawad? (Menlau pil kilang kilelo.)

⁶ Iet ekei soahng riau me kak seweseiuk en wehwehki mwahu Paipel. Pein idek rehmw peidek kan duwen dahme ke wadek. Ni omw wadek soahng ehu nan Paipel, pein idek: ‘Ihs me ireo koasoakoasoia? Ihs me koasoakoasoi? Ihs me e koasoakoasoiong, oh dahme kahrehda? Ia wasa oh iahd me soahngo wiawi?’ Soangen peidek pwukat pahn seweseiuk  en medewe oh idawehn ire kesempwal en dahme ke wadek. Patehng met, ntingihdi kisin ire kan erein omw wadek. Ni omw kin ntingihdi dahme ke wadek, ke kin kalaudehla omw medewe oh met kin seweseiuk en wehwehki mwahu. Nting pil kin seweseiuk en tamataman dahme ke wadek. Ke kak ntingihdi peidek kan, oh ntingihdi soahng kan me ke diar ni omw wia roporop, oaralapihada ire kesempwal kan, ntingihdi ia duwen omw kak doadoahngki dahme ke wadek, de ntingihdi ia omw pepehm duwen dahme ke wadek. En ntingihdi soahng pwukat kak seweseiuk en kilengwohng Mahsen en Koht nin duwen sapwellime kisinlikou ong uhk.

7. Irair dah me kitail anahne ni atail wadek Paipel, oh dahme kahrehda? (Madiu 24:15)

⁷ Sises ketin kasansalehda irair kesempwal ehu me kitail anahne ma kitail men wehwehki dahme kitail wadek nan Mahsen en Koht—loalokong. (Wadek Madiu 24:15.) Dahkot loalokong? Met iei koahiek en wehwehki ia duwen ire ehu eh dokedoke ehu ire tohrohr oh ia duwen eh weksang ire teio oh pwehn wehwehki dahme sohte nohn sansal. Sises pil ketin kasalehda me kitail anahne loalokong pwehn kasawihada mwekid kan me kin kapwaiada kokohp en Paipel. Kitail pil anahne irair wet pwe kitail en kak uhdahn paiekihda soahng koaros me kitail wadek nan Paipel.

8. Ia duwen atail kak wadek Paipel ni loalokong?

⁸ Siohwa kin ketikihong sapwellime ladu kan loalokong. Eri kapakap ong ih oh peki en ketin seweseiuk en kakairada irair wet. (Lep. Pad. 2:6) Dahme ke kak wia pwehn pahrekiong dahme ke kapakapki? Tehk mwahu dahme ke wadek, oh tehk ia duwen met eh pidada soahng teikan me ke ese. Doadoahngki neitail sawasepen Paipel kan pwehn seweseiuk wia met. Karasepe, ke kak doadoahngki Sawas ong Wia Roporop en Sounkadehdehn Siohwa kan. Pwuhk pwukat pahn seweseiuk en ese wehwehn  iren Paipel ehu oh kilang ahl dah kan me ke kak doadoahngki nan omw mour. (Ipru 5:14) Ni omw wadek ni loalokong, omw wehwehki Paipel pahn laudla.

9. Ire mehlel kesempwal dah sang mahsen en Koht me Sadusi ko pohnsehsehla?

⁹ Sadusi kan uhdahn wehwehki tepin pwuhk limau en Palien Paipel ni Lokaiahn Ipru, ahpw re pohnsehsehla ire mehlel kesempwal kan me kileldi nan pwuhk ko. Karasepe, medewehla dahme Sises mahsanih ni Sadusi ko ar idek reh duwen kaiasada. E keinemwe rehrail: “Kumwail sou kin wadek nan pwuhken Moses, nan koasoipen tuhke tekateko, me Koht ketin mahsanihong ih: ‘Ngehi me Koht en Eipraam oh Koht en Aisek oh Koht en Seikop’?” (Mark 12:18, 26) Mendahki Sadusi ko kin wadek ireo pak tohto, sapwellimen Sises iren keinemweo kasalehda me irail pohnsehsehla ire mehlel kesempwal en Paipelo—padahk en kaiasada.—Mark 12:27; Luk 20:38. d

10. Dahme kitail anahne tehk kanahieng ni atail wadawad?

¹⁰ Dahme kitail kak sukuhlki? Ni atail wadawad, kitail men tehk kanahieng dahme iretikitik ehu de koasoiepen Paipel ehu uhdahn kak padahkihong kitail. Kitail sohte men wehwehkihte soahng mengei kan ahpw pil padahk loal de ire kesempwal oh ire mehlel teikan. Ire pwukat me rir pwehki re sohte mengei en sansalda.

11. Nin duwen me 2 Timoty 3:16, 17 mahsanih, ia duwen omw kak diar ire kesempwal kan nan Paipel?

¹¹ Ia duwen omw kak diar ire kesempwal kan ni omw wadek Paipel? Tehk dahme 2 Timoty 3:16, 17 mahsanih. (Wadek.) Iretikitik wet mahsanih me, “Nting Sarawi unsek . . . mwahu ong” (1) padahk, (2) peneu, (3) kapwungala soahng kan, oh (4) kaiahn. Ke kak paiekihda soahng pahieu pwukat pil sang pwuhken Paipel kan me ke sohte kin kalapw wadek. Tehk kanahieng iren Paipelo pwehn kilang dahme e padahkihong uhk duwen Siohwa, duwen kupwure, de duwen sapwellime kaweid kan. Medewehla ia duwen met eh mwahu ong peneu. Wia met sang ni omw tehk ia duwen iretikitik ko ar seweseiuk en ese oh soikala wiewia de madamadau sapwung kan oh en lelepekohngete Siohwa. Tehk kanahieng ia duwen omw kak doadoahngki ireo en kapwungala soahng kan, de kapwungala madamadau sapwung ehu, ele ehu me emen koasoia nan kalohk. Oh rapahki soangen kaiahn dah me iretikitik ko kihda me kak kaiahneiuk en kilengwohng soahng kan duwehte me Siohwa kin ketin wia. Ni omw doadoahngki soahng pahieu pwukat, ke pahn diar ire kesempwal kan me kak seweseiuk ken paiekihda laud omw wadawad en Paipel.

12. Dahme kahrehda Sises keinemwe rehn Parisi ko peideko “Kumwail sohte kin wadek?”

¹² Sises pil idek iren keinemweo “Kumwail sohte kin wadek?” pwehn kasalehda madamadau sapwung me Parisi ko ahneki ong Paipel. (Mad. 12:1-7) e Ahnsowo Parisi ko kin nda me sapwellimen Sises tohnpadahk kan kin kauwehla Sapad. Ni Sises eh ketin sapeng, e doadoahngki karasepen Paipel riau oh mahsanih iretikitik ehu sang pwuhken Oseia pwehn kasalehda me Parisi ko sohte wehwehki dahme kahrehda kosonned en Sapad wiawihda oh sohte kin kasalehda mahk. Dahme kahrehda ohl pwukat sohte mweidohng Mahsen en Koht en wekidirailla? Pwehki irail kin wadek Mahsen en Koht ni aklapalap oh men rapahki sapwung. Arail madamadau irehdi irail en wehwehki dahme re wadek.—Mad. 23:23; Sohn 5:39, 40.

13. Soangen madamadau dah me kitail anahne ni atail wadek Paipel, oh dahme kahrehda?

¹³ Kitail sukuhlkihsang sapwellimen Sises mahsen ko me kitail anahne ahneki madamadau pwung ni atail kin wadek Paipel. Weksang Parisi ko, kitail anahne aktikitik oh men sukuhl sang Paipel. Kitail anahne ‘ni mpahi ale mahseno . . . pwe en poadada loalatail.’ (Seims 1:21) Ma kitail aktikitik, kitail pahn mweidohng Mahsen en Koht en wekidkitaillla. Iren kasukuhl sang nan Paipel duwen mahk, poakehla meteikan, oh limpoak pahn kak wekidkitailla ihte ma kitail soikala madamadau en aklapalap oh men rapahki sapwung.

14. Ia duwen atail kak ese ma kitail kin mweidohng Paipel en wekidkitailla? (Menlau pil kilang kilel kan.)

¹⁴ Mwomwen atail wiewia ong meteikan kak kasalehda ma kitail kin mweidohng Mahsen en Koht en wekidkitailla. Pwehki Parisi ko  sohte mweidohng Mahsen en Koht en wekidala arail madamadau, irail kin “kadeik irail kan me sohte dipada.” (Mad. 12:7) Duwehte met, mwomwen atail kin medewe oh atail wiewia ong meteikan kin kasalehda ma kitail mweidohng Mahsen en Koht en wekidkitailla. Karasepe, kitail kin kalapw koasoia soahng mwahu kan duwen meteikan, de kitail kin mwadang kasalehda arail sapwung kan? Kitail kin kasalehda mahk oh mwadang mahkohng meteikan, de kitail kin kauwe meteikan oh kolokol lingeringer? Atail pasapeng ong peidek pwukat kak kasalehda ma kitail kin mweidohng dahme kitail wadek en wekidala atail madamadau, pepehm, oh wiewia kan.—1 Tim. 4:12, 15; Ipru 4:12.

15. Ia sapwellimen Sises pepehm duwen Mahsen en Koht?

¹⁵ Sises ketin poakohng Mahsen en Koht, oh mahsen kan nan Melkahka 40:8, (NW) kohpada ia sapwellimen Sises pepehm duwen Mahsen en Koht. E mahsanih: “Maing ei Koht, I kin perenki wia kupwuromwi, Oh sapwellimomwi kosonned kin mihmi loaleiet.” Pwehki Sises ketin poakohng Mahsen en Koht, e kin peren oh pousehlahte papah Siohwa. Kitail pil kak peren oh pweida ma kitail kin wadek oh esehla poakohng Mahsen en Koht.—Mel. 1:1-3.

16. Dahme ke pahn wia pwehn uhdahn paiekihda omw wadek Mahsen en Koht? (Menlau kilang koakono “ Mahsen en Sises Kak Seweseiuk en Wehwehki Dahme Ke Wadek.”)

¹⁶ Pwehn pahrekiong sapwellimen Sises mahsen kan oh eh mehn kahlemeng, kitail pahn kamwahwihala atail koahiek en wadawad Paipel. Kitail kak kamwahwihala atail wehwehki iren Paipel kan sang ni atail kapakap, wadawad ni wawai, idek peidek kan oh ntingihdi kisin ire kan. Kitail kak doadoahngki loalokong sang ni atail tehk mwahu dahme kitail wadek oh doadoahngki neitail sawasepen Paipel kan. Kitail kak sukuhlki en doadoahngki mwahu Paipel, pil ire kan me kitail sohte nohn ese, sang ni atail rapahki ire kesempwal kan me sohte nohn sansal. Oh kitail kak mweidohng Mahsen en Koht en wekidkitailla sang ni atail ahnekihte madamadau pwung ni atail wadek Paipel. Ni atail kin wia uwen atail kak koaros pwehn wia soahng pwukat, kitail pahn sukuhlki soahng tohto sang atail wadawad en Paipel oh kalaudehla atail karanihala Siohwa.—Mel. 119:17, 18; Seims 4:8.