NIESIL, January 18, 2023, pakair tohrohr ehu kohda nan jw.org me Brother Gage Fleegle oh Brother Jeffrey Winder idihdda pwehn iangala Pwihn me Kin Apwalih Mwomwohdiso nan Sampah Pwon. Brother riemen pwukat kin papah Siohwa ni lelepek erein sounpar tohto.

Brother Fleegle tikida nan paliepeng en Pennsylvania, U.S.A., rehn eh pahpa nohno me kin iang padahk mehlel. Ni ahnsou me e pwulopwul, eh peneineio keseula nan kisin kahnimw ehu me anahn laud mie ong sounkalohk. Sohte pwand mwurin mwo, e papidaisla November 20, 1988.

Ahn Brother Fleegle pahpa nohno kin ahnsou koaros kangoange en doadoahngki pali laud en eh ahnsou ong papah Siohwa. Irail kin kalapw luke sounapwalih me kin seiloak kan oh tohn Pedel kan en mwemweitla ni imwarailo, oh Brother Fleegle kak kilang ia uwen brother oh sister pwukat ar peren. Sohte pwand mwurin eh papidaisla, e tepida pioneer nan September 1, 1989. Sounpar riau mwuri, e lel eh mehn akadeio me e wiahda ni ahnsou me e sounpar 12—en iang papah nan Pedel. E tepida papah nan Pedel en Brooklyn ni October 1991.

Nan Pedel, Brother Fleegle kin doadoahk nan wasahn wiahda pwuhk (Bindery) erein sounpar waluh, oh mwurin mwo, e keseula nan palien kalohk, Service Department. Erein ahnsowo, e kin papah nan mwomwohdiso ehu me kin doadoahngki lokaiahn Russia erein sounpar kei. Nan pahr 2006, e pwoudikihda Nadia, me tepida iang ih papah nan Pedel. Ira iang papah nan ehu mwomwohdiso me kin doadoahngki lokaiahn Portuguese, oh erein sounpar eisek samwa, ira iang papah nan pil ehu mwomwohdiso me doadoahngki lokaiahn Spain. Mwurin sounpar tohto nan Service Department, Brother Fleegle uhd keseula nan ohpis en pwihn me kin apwalih palien  padahk kan, Teaching Committee, oh mwuhr, e iang doadoahk nan ohpis en pwihn me kin apwalih palien kalohk, Service Committee. Nan March 2022, e idihdda nin duwen sounsawas men ong Service Committee en Pwihn me Kin Apwalih Mwomwohdiso nan Sampah Pwon.

Brother Winder tikida nan Murrieta, California, U.S.A. E tikida nan padahk mehlel rehn eh pahpa nohno, oh e papidaisla nan March 29, 1986. Sounpwongohte mwuri, e pilada en wia sawasepen pioneer. E uhdahn perenki me kahrehda e men pousehlahte wia met. Mwurin eh wia sawasepen pioneer erein sounpwong kei, e tepida pioneer nan October 1, 1986.

Ni ahnsou me e pwulopwul, Brother Winder mwemweitla rehn rie pwutak riemen me kin papah nan Pedel ahnsowo. Met kahrehiong en men audehda doaropwehn iang doadoahk nan Pedel ni ahnsou me e laudla. Oh nan May 1990, e alehdi luhk en iang papah nan Pedel en Wallkill.

Nan Pedel, Brother Winder kin iang doadoahk nan palien doadoahk tohto, me iangahki Palien Kamwakel, Palien Mwetuwel, oh Ohpis en Pedel. E pwoudikihda Angela nan 1997, oh ira papah nan Pedel sangete ahnsowo. Nan pahr 2014, ira keseula Warwick, wasa me Brother Winder iang sawas ong kokoudahn poasen kaun en Sounkadehdehn Siohwa kan. Ni 2016, ira keseula Watchtower Educational Center nan Patterson, wasa me e doadoahk nan palien Audio/Video. Sounpar pahieu mwuhr, ira pwurala Warwick, oh Brother Winder kin iang doadoahk nan ohpis en Personnel Committee. Ni March 2022, e idihdda nin duwen sounsawas men ong palien Personnel Committee en Pwihn me Kin Apwalih Mwomwohdiso nan Sampah Pwon.

Kitail en kapakapki me Siohwa pahn ketin kapaiahda laud ohl pwukat me duwehte “kisakis kei” ni ara pousehlahte doadoahk laud ong Wehio.—Ep. 4:8.