Paipel kasalehda ni sansal me Siohwa kak ketin kohpada dahme pahn wiawi ahnsou kohkohdo. (Ais. 45:21) E sohte kawehwehda ni oaritik ia duwen de iahd me Siohwa kin ketin wia met de uwen laud me e ketin pilada en mwahngih duwe. Eri, kitail sohte wehwehki soahng koaros duwen Siohwa eh kin kak ketin kohpada duwen ahnsou kohkohdo. Ahpw mie soahng kei me kitail wehwehki.

Siohwa kak ketin wia sohte lipilipil dahme e ketin kupwurki wia, ahpw ekei pak e ketin pilada en dehr wia. Pwehki sohte irepen sapwellime erpit, e kak ketin kohpada duwen soahng koaros me e ketin kupwurki en kohpada. (Rom 11:33) Ahpw pwehki e kak ketin kaunda kupwure, e pil kak ketin pilada en dehr esehda dahme pahn wiawi.

Siohwa kin ketin kapwaiada kupwure. Ia duwen met eh sewese kitail en wehwehki me e kak ketin kohpada duwen ahnsou kohkohdo? Aiseia 46:10 mahsanih: “Sangete nin tapio I kasalehda dahme pahn wiawi mwuhr, I kohpada mahsie dahme pahn wiawi. I mahsanih me ei koasoandi kan uhdahn pahn pweida, pwe mehkoaros me I kupwurki uhdahn pahn pweida.”

Eri Siohwa kak ketin kohpada duwen ahnsou kohkohdo pwehki e sapwellimanki manaman en kahrehiong soahng kan en wiawi. Siohwa sohte anahne ketin diarada dahme pahn wiawi ni ahnsou kohkohdo, duwehte me kitail kin wia ni atail pahkala ni imwin pwuhk ehu pwehn esehda dahme pahn wiawi ni imwio. Ahpw, Siohwa kak ketin koasoanehdi me mehkot ehu pahn wiawi ni ahnsawi oh eri kahrehiong en wiawi ni ahnsowo eh leledo.—Eks. 9:​5, 6; Mad. 24:36; Wiewia 17:31.

Pwehki kahrepe wet, Paipel doadoahngki lepin lokaia kan duwehte “kaunopadahr,” “wiadahr,” oh “kupwuredahr” pwehn kawehwehda dahme Siohwa kin ketin wia ong ekei mwekid kan ong ahnsou kohkohdo. (2 Nan. 19:25; Ais. 46:​11, NW) Kawehwehn lepin lokaia pwukat kohsang lokaiahn Ipru ehu me kak wehwehki “sounwia dahl.” (Ser. 18:​3, 4) Duwehte sounwia dahl koahiek men eh kak wiahda sah kaselel ehu sang pwehl, Siohwa kak ketin wiahda, de kahrehiong, soahng kan en kapwaiada kupwure.—Ep. 1:11.

Siohwa kin ketin mweidohng aramas akan en pein wiahda arail pilipil. E sohte kin ketin koasoanehdi dahme pahn wiawihong mouren emenemen aramas. E pil sohte kin ketin kahrehiong aramas mwahu kan en wia soahng ehu me pahn kahrehiong irail imwila suwed. E ketin mweidohng koaros en pein pilada dahme irail men wia, ahpw e kin ketin padahkih irail en weweidki mour pwung.

Medewehla karasaras riau. Keieun karasaraso iei me pid mehn Ninipe ko. Siohwa ketin kohpada me arail kahnimwo pahn kasohrala pwehki arail wiewia suwed kan. Ahpw ni towe ko ar koluhla, Siohwa ketin “wekidala kupwure, oh sohte ketikihong irail apwal laud me e ketin kaunopadahng irail.” (Sona 3:​1-10) Siohwa ketin wekidala kupwure ong dahme e ketin kohpadahr ong mehn Ninipe ko pwehki irail pilada en wekidala arail mour mwurin arail rong sapwellime kehkehliko.

Keriaun karasaras iei me pid kokohpo duwen ohl me adaneki Sairus, me pahn kapitala mehn Suhs ko oh ruwese onohnsapahldahn sapwellimen Siohwa tehnpas sarawio. (Ais. 44:26–45:4) Nanmwarki Sairus en Persia kapwaiada kokohp wet. (Esra 1:​1-4) Ahpw Sairus sohte kin kaudokiong Koht mehlelo. Siohwa ketin doadoahngki Sairus en kapwaiada kokohp wet, ahpw e ketin mweidohng Sairus en pein pilada ihs me e pahn kaudokiong.—Lep. Pad. 21:1.

Ei mehlel, kaidehn ihte soahng pwukat me Siohwa kin ketin medemedewe ni eh kin ketin kohpada duwen ahnsou kohkohdo. Sohte aramas emen kak uhdahn wehwehki sapwellimen Siohwa madamadau oh wiewia kan koaros. (Ais. 55:​8, 9) Ahpw, dahme Siohwa ketin kasalehda kin kakehlakahla atail pwoson me e kin ahnsou koaros ketin wia dahme pwung—iangahki en kohpada duwen ahnsou kohkohdo.