Pahpa oh nohno kin uhdahn poadidiong pelien lamalam en Kadolik. Ahpw ni ahnsou me ira sukuhlkihsang nan Paipel me mwaren Koht iei Siohwa, ira koaros wiahla Sounkadehdehn Siohwa ngoang kei. Pahpa sohla parada sansal en Sises kan. Ahpw e uhd doadoahngki eh koahiek en kapinte en wiahda wasa ehu ni imwato tepin aht Wasahn Kaudok nan San Juan del Monte, nan Manila, Philippines.

Mwurin ei ipwidi nan 1952, ei pahpa nohno tepida padahkihong ie duwen Siohwa, duwehte me ira kin wiahiong riei pwutak pahmen oh serepein silimen me laudsang ie. Ni ei wie kekeirda, pahpa kin kangoange ie en wadekala ehu irelaud en Paipel ehuehu rahn, oh e kin onop rehi doadoahngki neitail sawasepen Paipel kan. Mie ahnsou kan me pahpa oh nohno kin luke sounapwalih kan me kin seiloak oh wiliepen ohpis en Sounkadehdehn Siohwa kan en mihmi ni imwato. Nin duwen peneinei ehu, se kin uhdahn perenki rong oh pil ale kangoang laud sang arail koasoia dahme kin wiawihong irail. Met kin kamwakid kiht koaros en wiahkihla doadoahk en kalohk me keieu kesempwal nan aht mour.

I sukuhlki soahng tohto sang mehn kahlemeng en ei pahpa oh nohno me kin uhdahn lelepek ong Siohwa. Mwurin ei nohnou mehkihla soumwahu laud ehu, ngehi oh ei pahpao tepida pioneer nan 1971. Ahpw nan 1973 ni ahnsou me I sounpar 20, ei pahpao mehla. Mehlahn ei pahpa oh nohnou kahrehda ien pehm me I uhdahn kelehpwla. Ahpw koapworopwor “likilik oh teng” me mi nan Paipel sewese ie en ahnekihte madamadau pwung, mi karanih Siohwa, oh sohte nohn nsensuwed laud. (Ipru 6:19) Sohte werei mwurin ei pahpao mehla, I wiahla pioneer tohrohr men oh pekederla ni dekehn Coron, kisehn wehin Palawan, me uhdahn dohsang kahnimw laud kan.

I sounpar 21 ahnsou me I lella Coron. Pwehki I tikida nan kahnimw, I pwuriamweiki me ekeite  wasa pohn dekeo me kin doadoahngki lioal oh paip en pihl. Mehn peidaid kan pil malaulau. Mendahki mie brother keite wasao, sohte me iang ie pioneer oh ekei pak I kin kelehpw kalohk. Nan keieun sounpwongo, I uhdahn kin loaleidkihda ei peneineio oh pil kompoakepahi kan. Nipwong kan, I kin kilangdahng pahnlahng oh pilen mesei ka kin kereker. I men uhdihsang wia ei pwukoau oh pwurala uhdahn ei wasao.

Erein ahnsou ko, I kin padahkihong Siohwa audepen ei mohngiong. I kin tamanda ire kangoang kan me I wadek sang nan Paipel oh neitail sawasepen Paipel kan. I kin kalapw tamanda Melkahka 19:14. I esehda me Siohwa pahn ketin wia “silepei oh sounkomourpei” ma I kin doudouloale soahng kan me kin kaperenda ih, duwehte wiepen nin lime kan oh sapwellime irair kaselel kan. Artikelo “You Are Never Alone” a nan Watchtower uhdahn kin sewese ie. I kin pwurupwurehng wadek. Ni ei kin kelehpwla, I kin pehm me Siohwa kin ketin ieiang ie, oh soangen ahnsou ko kin wia ahnsou tohrohr kei ong ie pwehn kapakap, wia ei onop, oh doudouloale.

Sohte werei mwurin ei lella Coron, I wiahla elder men. Pwehki ngehite me elder wasao, I tepida wia Sukuhl ong Sapwellimen Koht Doadoahk, Mihting en Kalohk, Pwuhk Study en Mwomwohdiso, oh Onop en Kahn Iroir nan wihk kan. I pil kin wia kapahrek ong wehipokon wihk koaros. Eri, solahr ei ahnsou en medewe me I kin kelekelehpw!

I uhdahn perenki ei kalohk nan Coron—ekei nei tohnsukuhl en Paipel kan kedekedeo papidaisla. Ahpw pil mie soangen kahpwal kei. Ekei pak, I anahne aluhki elep en rahn pwehn lella wasahn kalohko, oh I pil sehse ma mie wasahn pweidi ni ei lella wasao. Wasahn kalohk me mwomwohdisohn Coron kin apwalih pil iangahki deke tikitik tohto. I kin kalapw dake pwoht pwehn lella wasa ko pil ni ahnsou me nansed angin, mendahte I sehse pap! Siohwa kin ketin pere oh sewese ie nan soangen ahnsou apwal ko koaros. Mwuhr, I esehda me Siohwa ketin kaukaunop ie ong apwal kan me laudsang ahnsou ko nan ei pwukoa me I alehdi mwuhr.

Nan 1978, I pekederla Papua New Guinea, me mi paliepeng en Australia. Sahpw wet me diren nahna kan, oh e kereniong uwehte Spain. I inenen pwuriamweikihla ei esehda me mpen aramas silirar nan sahpwo kin lokaiahki lokaia daulih 800. Ahpw e mwahu pwe pali laud en irail kak lokaiahki lokaiahn Melanesian Pidgin, me re kin kahdaneki Tok Pisin.

Erein ahnsou kis, I kin iang mwomwohdisohn lokaiahn wai nan Port Moresby. Ahpw mwuhr, I keseula nan mwomwohdisohn lokaiahn Tok Pisin oh ale kasukuhl en esehla lokaiao. I kin doadoahngki dahme I sukuhlki nan kalohk. Met sewese ie en mwadang esehla lokaiao. Sohte pwand, I kakehr wia kapahrek ong wehi pokon ni lokaiahn Tok Pisin. I uhdahn pwuriamweila me sohte lel sounpar ehu mwurin ei lella Papua New Guinea, I alehdi pwukoahn sounapwalih me kin seiloak ong ekei mwomwohdisohn lokaiahn Tok Pisin nan wasa laud oh doh kan en sahpwo.

Pwehki mwomwohdiso ko dohpeseng, I anahne koasoanehdi mihting tohrohr kan oh seiloak pak  tohto. Nin tapio, I kin pehm me I kelehpwla pwehki I sahn wasao. I mi nan ehu sahpw tohrohr, lokaiahki ehu lokaia tohrohr, oh arail tiahk weksang dahme I ahn. Pwehki e uhdahn apwal en keid ni nahna kan pwehn lella ni ehuehu mwomwohdiso ko, I anahne dake sompihr kereniong wihk koaros. Ekei pak, ngehite me pahsinse pohn kisin sompihro. I esehda me ei seiloak dake sompihr pil uhdahn kamasepwehk duwehte ei dake pwoht!

Aramas malaulaute me naineki delepwohn, eri I kin ntinglahng mwomwohdiso ko. I kin kalapw lella wasa ko mwohn nei kisinlikou ko, eri I anahne rapahki Sounkadehde ko. Ahpw ahnsou koaros me I kin diar irail, irail kin uhdahn kasamwo ie me kahrehda I kin tamanda kahrepen ei wiahda soangen nanti laud pwukat koaros. I kin kilang Siohwa eh ketin sewese ie ni ahl tohto, oh ei nanpwungmwahu reh kin uhdahn laudla.

Ni tepin mihting me I iang towehda nan dekeo me adaneki Bougainville, pwopwoud ehu kohdo rehi, sirei oh idek, “Ke taman kiht?” I tamanda ei kalohk ong pwopwoude ni ahnsou me I tepin lella Port Moresby. I tepida onop Paipel rehra ahpw mwuhr peki emen brother en doula onop rehra. Met ira koaros papidaisla! Ih ehu kapai kaselel tohto me Siohwa ketikihong ie erein ei mi Papua New Guinea sounpar siluh.

Mwohn ei kohkohsang Coron nan 1978, I tuhwong sister kaselel oh kadek men me adaneki Adel. E kin iang pioneer oh pil apwalih nah seri riemen, Samuel oh Shirley. Oh ni ahnsowohte, e kin pil apwalih eh nohno maho. Nan May 1981, I pwurala Philippines pwehn pwoudkihla Adel. Mwurin aht pwopwoudida, se kin pioneer oh pil apwalih aht kisin peneineio.

Mendahki mieier ei peneinei, I pwurehng wiahla pioneer tohrohr men nan 1983, oh alehdi pwukoa en papah pohn dekehn Linapacan Island, nan wehin Palawan. Aht peneineio pwon keseula wasa doh wet me sohte Sounkadehdehn Siohwa kan. Mpen sounpar ehu mwuri, ahn Adel nohnou mehla. Ahpw se doulahte soupisengki at doadoahk en kalohk me sewesei kiht erein ahnsou kansensuwedo. Se tepida onop Paipel rehn aramas tohto pohn Linapacan me kahrehda sohte pwand, se anahne wiahda Wasahn Kaudok tikitik ehu. Eri pein kiht me kauwada. Sounparte siluh mwurin aht lella wasao, se perenkihda kilang aramas 110 iang towehda Katamano, oh me tohto kekeirda oh papidaisla.

Nan 1986, I alehdi pwukoahn papah pohn dekehn Culion. Mie wasa me aramas tokutok kan kin kousoan ie pohn dekeo. Mwurin mwo, Adel pil wiahla pioneer tohrohr men. Nin tapio, se ekis perki kalohk ong aramas tokutok ko. Ahpw sounkalohk kan wasao kamehlelehiong kiht me aramas tokutok ko aleier wini oh e sohte nohn keper ong kiht. Ekei me tokutok ko kin iang towehda mihting kan ni imwen emen sister. Sohte pwand, se ahnla kalohk wasao oh ehukihong aramas akan me kin pehm me Koht oh pil meteikan sohte kin nsenohkin irail aht koapworopwor me mi nan Paipel. E kaperen en kilang aramas akan me  uhdahn soumwahu ar perenkihda laud ar esehda me ehu rahn re kak ahneki roson unsek.—Luk 5:​12, 13.

Ia duwen nait seri ko ar ahnla wekidekla kan ni at keseula Culion? Ngehi oh Adel lukehdo sister pwulopwul riemen sang Coron en mi reht pwe nait seri ko en kak ahneki werek mwahu. Samuel, Shirley, oh sister pwulopwul riemeno kin perenki arail doadoahk en kalohk, oh onop Paipel rehn seri tohto. Oh ngehi oh Adel kin onop Paipel rehn ahn seri ko pahpa oh nohno. Ni mehlel, mie ahnsou ehu me se kin onop rehn peneinei 11. Sohte pwand, se kin onop Paipel rehn aramas tohto me kahrehda se kak wiahda mwomwohdiso kapw ehu!

Nin tapio, ngehi kelehpw me elder wasao. Eri ohpis en Sounkadehdehn Siohwa kan me kin apwalih aht mwomwohdisou peki ie en wia mihting en wihk kan ong sounkalohk welimen nan Culion oh mwuhr pil wia soahngohte ong sounkalohk duwemen ko nan kousapw me adaneki Marily, me dohki awa siluh ma ke dake pwoht. Mwurin mihting kan, nin duwen peneinei ehu, se kin alu ni nahna kan erein awa tohto pwehn wia aht onop en Paipel kan nan kousapw ehu me adaneki Halsey.

Kedekedeo, me tohto iangala padahk mehlel nan Marily oh Halsey me kahrehda se kauwada Wasahn Kaudok kan nan wasa riau ko. Duwehte pohn dekehn Linapacan, riatail Kristian ko oh irail kan me men esehla padahk mehlel me kihda pali laud en kepwe ko oh pil wia doadoahko. Aramas 200 me kak mi nan Wasahn Kaudoko nan Marily, oh re pil kak kihpeseng en laudla. Met kahrehda se kak wia at mihting tohrohr kan wasao.

Nan 1993 ahnsou me nait seri ko laudla, ngehi oh Adel tepida wia pwukoahn sounapwalih me kin seiloak nan Philippines. Mwuhr nan pahr 2000, I iang towehda Sukuhl en Brother kan ong Pwukoa Tohrohr kan pwehn ale kasukuhl en wiahla sounpadahk ong sukuhlo. I sohte medewe me I warohng wia pwukoau, ahpw Adel kin kangoange ie ahnsou koaros. E katamankihong ie me Siohwa pahn ketikihong ie kehl pwehn kapwaiada pwukoa kapwo. (Pil. 4:13) Adel uhdahn kamehlele  met pwehki pein ih kin kapwaiada eh pwukoa mendahki e kin soumwahu.

Nan pahr 2006 ni ei wiahte pwukoahn sounpadahk, Adel diarada me e ahneki soumwahu ehu me adaneki Parkinson. Se inenen pwuriamweikihla met! Ni ei nda me I pahn uhdihsang wia ei pwukoau pwehn apwalih ih, Adel koasoia, “Menlau rapahkihda emen toahkte me kak sewese ei soumwahwe, oh I ese me Siohwa pahn ketin sewese kita en doulahte.” Erein sounpar weneu sang ahnsowo, Adel kin pousehlahte papah Siohwa oh sohte kaulim. Ni ahnsou me e sohla kak alu, e kin kalohk doadoahngki wheelchair. Ni eh sohla kak nohn lokaia, e kin pasapengki lepin lokaia ehu de riau nan mihting kan. Mwohnte eh mehla nan 2013, Adel kin kalapw alehdi kisinlikou en kangoang kan sang meteikan oh arail kalahnganki eh mehn kahlemeng kaselel en dadaurete. Daulih sounpar 30 me I pwoudiki lih lelepek oh limpoak menet, ahpw ni ahnsou me e mehla, I pil pwurehng ahneki pahtou laud oh pepehm en kelehpwla.

Adel men I en pousehlahte wia ei pwukoau, eri ih met me I wia. I kin doulahte soupisengki ei doadoahko, oh met sewese ie en dehr nohn kin loaloid. Sang 2014 lel 2017, I alehdi pwukoa en mwamwaitih mwomwohdisohn Tagalog nan wasa kan me atail doadoahko keinapwidi. Mwurin mwo, I pil kin mwamwaitih mwomwohdisohn Tagalog kan nan Taiwan, Wehin Amerika, oh Canada. Nan 2019, I kin wia kasukuhl ong Sukuhl ong Sounkalohki Wehio kan ni lokaiahn wai nan India oh Thailand. I diar peren laud nan pwukoa pwukat koaros. I kin keieu peren ni ei kin uhdahn soupisengkihla doadoahk en Siohwa.

Nan ehuehu pwukoa kapw me I alehdi, I kin karanihala riei Kristian kan me I tuhwong, eri e kin apwal en kohkohsang irail. Nan soangen ahnsou ko, I sukuhlki en uhdahn likih Siohwa. I kin kalapw kilang sapwellimen Siohwa sawas, oh met kin sewese ien men ahnla wekidekla kan nan ei irair kan. Rahnwet, ngehi emen pioneer tohrohr nan Philippines. I ahnlahr ei mwomwohdiso kapw, me wialahr ei peneinei me kin sewese oh apwalih ie. I kin uhdahn pohlki kilang Samuel oh Shirley ara kin kahlemengih pwoson en ara nohnou.—3 Sohn 4.

Mehlel, I lelohng kahpwal tohto nan ei mour, pil kilang ei pwoud kompoakeo lokolongki soumwahu laud oh mehla. I pil anahne ahnla wekidekla kapw tohto nan ei mour. Ahpw I kilangehr duwen Siohwa eh “sohte ketin dohsang emenemen kitail.” (Wiewia 17:27) E sohte apwal ong Siohwa en ketin sewese oh kakehlaka sapwellime ladu kan, pil ni wasahn kalohk doh kan. (Ais. 59:1) Siohwa, ei Paip, kin ketin ieiang ie erein ei mour, oh I uhdahn kalahngankihong ih. I sohte kin kelehpw.