1-2. (a) Iahd me kitail kin keieu apwalki mahkohng emen? (b) Ia duwen Denise eh kasalehda mahk?

 KE KIN apwalki mahkohng meteikan? Me tohto rehtail kin apwalki wia met, ahpw keieu ni emen eh nda de wiahiong kitail mehkot me uhdahn kamedek. Ahpw mie soahng kei me kitail kak wia pwe kitail en sohla lingeringer oh mahkohng meteikan. Karasepe, medewehla dahme wiawihong sister men me adaneki Denise, a me kasalehda mahk laud. Nan pahr 2017, Denise oh eh peneineio ahpwtehn neksang arail mwamwaitih poasen kaun kapw en Sounkadehdehn Siohwa kan. Ni arail pwurupwurala ni imwarailo, weren ohl emen loiong wararailo. Denise lipwongmasala nan aksidento. Ni ahnsou me e kehnda wasa, e esehda me nah seri ko uhdahn ohla laud oh eh pwoudo, Brian, mehla. Ni eh kin tamanda ahnsowo, Denise koasoia, “I uhdahn nsensuwedla laud oh sohte wehwehki dahme wiewiawi.” Mwuhr, e esehda me nan aksidento, ohl me tangahki sidohsao sohte sakau de kang wini en kasahliel, de pil seukautih pwehki eh kilikilang nah sehlpwohn de soahng teikan. Eri, Denise kapakap oh peki Siohwa en ketikihong ih meleilei pwehn kak powehdi eh pepehm.

² Ohl me loiong irailo selidi oh ale kopwung pwehki eh kemehla ahn Denise pwoudo nan aksidento. Ma mwoalen kopwungo diarada me e sapwung, e pahn uhdahn selidi nan imweteng. Ahpw mwoalen kopwungo padahkihong Denise me dahme e pahn koasoia nan kopwungo iei me pahn kasalehda ma ohlo pahn selidi de soh. Denise koasoia: “E mwomwen me emen alehte kihpeseng ei ohla ko oh wudekiong diren soahl powe, pwehki I anahne pwurehng koasoiahda ahnsou keieu suwed  me wiawihong ieo.” Wihk keite mwurin mwo, Denise mwohd nan mwoalen kopwungo oh koasoiahda mwohn ohl me kahrehiong eh peneineio kahpwal laud dahme e koasoanehdi. Dahme e nda? Denise peki rehn sounkopwungo en mahkohng ohlo. b Ni ahnsou me e nek koasoi, sounkopwungo tepida sengiseng oh nda: “Erein sounpar 25 me I wiahki sounkopwung, ehdin ei rong soahnge eh wiawi nan mwoalen kopwung wet. Ehdin ei rong peneinei me lelohng kahpwalo peki ien mahkohng me wiahda sapwungo. Ehdin ei rong emen eh koasoia duwen limpoak oh mahk.”

 3. Dahme kamwakid Denise en kasalehda mahk?

³ Dahme sewese Denise en kasalehda mahk? E kin doudouloale duwen Siohwa eh kin ketin kasalehda mahk. (Maika 7:18) Ni atail kin uhdahn kalahnganki me Siohwa ketin mahkohng kitail, met pahn kamwakid kitail en mahkohng meteikan.

 4. Dahme Siohwa ketin kupwurki kitail en wia? (Episos 4:32)

⁴ Siohwa ketin kupwurki kitail en mahkohng meteikan ni mehlel duwehte eh kin ketin mahkohng kitail. (Wadek Episos 4:32.) E ketin kasik me kitail en kin men mahkohng irail kan me kin kamedekeikitailla. (Mel. 86:5; Luk 17:4) Nan iren onop wet, kitail pahn koasoiapene soahng siluh me pahn sewese kitail en kalaudehla atail kin kasalehda mahk.

DEHR POHNSEHSEHLA OMW PEPEHM KAN

 5. Nin duwen me Lepin Padahk 12:18 mahsanih, ia atail pepehm ni emen eh kansensuwedihkitailla?

⁵ Ele kitail kin uhdahn nsensuwedkihla dahme emen nda de wiahiong kitail, ahpw mehlel ma aramaso wia kompoakepatail keren men de tohn atail peneinei. (Mel. 55:​12-14) Ekei pak, kitail kin uhdahn lingeringer de medekla me kahrehda e mwomwen me kitail dokdi. (Wadek Lepin Padahk 12:18.) Ele kitail kin song ekihla de pohnsehsehla atail medeko. Ahpw atail wia met kakete duwehte atail dokdi ahpw mweidohng naipo en mihmihte nan ohlao. Duwehte met, kitail sohte kak kasik me atail medeklao pahn mwahula ma kitail pohnsehsehla.

 6. Dahme kitail kakete wia ni emen eh kansensuwedihkitailla?

⁶ Ni emen eh kansensuwedihkitailla, ele kitail kin tepte lingeringer. Paipel mahsanih me kitail kin kakete lingeringerkihda soahng ehu. Ahpw e pil katamankihong kitail en dehr mweidohng atail lingeringer en kaunkitailda. (Mel. 4:4; Ep. 4:26) Dahme kahrehda? Pwehki atail lingeringer kin kalapw kahrehiong kitail en wia mehkot suwed. Oh e sohte kin imwila mwahu. (Seims 1:20) Tamataman me nin tapio, kitail kakete lingeringerda, ahpw kitail kak pilada ma kitail pahn lingeringerte de sohla lingeringer.

 7. Soangen pepehm dah teikan me kitail kin ahneki ni emen eh kamedekeikitailla?

⁷ Ele kitail pil kin ahneki soangen pepehm teikan ni emen eh kamedekeikitailla. Karasepe, sister men me adaneki Ann koasoia: “Ni ahnsou me I tikitik, ei pahpao kohkohsang ei nohnou oh pwoudkihla lih me kin apwalih ieo. I kin pehm me e keseiehla. Ni ahnsou me ira nainekihda seri, e mwomwen me seri ko wilianiehdi. Eri I tikida ahneki pepehm me sohte me men nainekin ie.” Emen sister me adaneki Georgette koasoiahda ia eh pepehm ni ahnsou me eh pwoudo kauwehdih. E nda: “Se kin kompoakepahnki emenemen sangete ni at tikitiko. Se pil kin pioneerpene! Loaleiet uhdahn ohla.” Pil sister men me adaneki Naomi koasoia:  “Uhdahn I sohte medewe me ei pwoudo pahn kamedekeiehla. Eri ahnsou me e wehkada me e kin kilikilang kilel oh kasdo suwed oh ekihsang ie, I uhdahn pehm me e pitihedi.”

 8. (a) Ia ekei kahrepe kan me kitail en mahkohng meteikan? (b) Kamwahu dah kan me kohsang atail kin kasalehda mahk? (Menlau kilang koakon “ Ia Duwen Ma Emen Wiahiong Kitail Mehkot me Uhdahn Suwed?”)

⁸ Kitail sohte kak kaunda dahme meteikan kin ndaiong de wiahiong kitail, ahpw kitail kak song en kaunda mwomwen atail pahn mwekidki. Oh dahme keieu mwahu en wia iei en mahkohng. Dahme kahrehda? Pwehki kitail kin poakohng Siohwa, oh e kin ketin kupwurki kitail en kasalehda mahk. Ma kitail kin kolokolete atail lingeringer oh sohte mahk, kitail kakete wiahda mwekid en pweipwei oh lelohng lokolok. (Lep. Pad. 14:​17, 29, 30) Tehk dahme emen sister me adaneki Christine koasoia: “Ni ei kin lingeringerda de nsensuwedla, I sohte kin kalapw sirei. I kin men kang mwenge kan me sohte mwahu ong roson en paliwar. I sohte kin meir mwahu, oh e uhdahn apwal ong ie en kaunda ei pepehm kan, oh met kin kauwe ei mouren pwopwoud oh ei nanpwungmwahu rehn meteikan.”

 9. Dahme kahrehda kitail en sohla lingeringer?

⁹ Mehnda ma aramaso me kamedekeikitailla sohte mwahn pekimahk rehtail, kitail kak wiahiong kahpwalo en tikitikla. Ia duwen? Georgette, me kitail koasoiapene mwoweo, koasoia: “I anahne ahnsou werei pwehn sohla lingeringer pahn ei pwoud en mahso, ahpw ihme I wia. Mwurin mwo, I uhdahn meleileidi.” Ni atail kin uhdihsang lingeringer, kitail sohla kin mweidohng pepehm wet en kauwehla atail wiewia ong meteikan. Kitail pil kin wiahiong pein kitail mehkot mwahu, me iei, kitail sohla kin medemedewehte dahme wiawio oh kitail kin pwurehng ahneki peren. (Lep. Pad. 11:17) Ahpw dahme ke pahn wia ma ke saikinte men kasalehda mahk?

POWEHDI OMW LINGERINGER DE NSENSUWED

10. Dahme kahrehda kitail anahne mweidohng ahnsou pwe kitail en sohla lingeringer de nsensuwed? (Pil kilang kilel kan.)

¹⁰ Dahme kak seweseiuk en sohla lingeringer de nsensuwed? Ehu ahl iei en mweidohng ahnsou en mwahula. Mwurin emen  me ohla laud alehda wini, e kin anahne ahnsou pwehn mwahula. Duwehte met, kitail pil anahne ahnsou pwehn uhdahn mahkohng emen.—Ekl. 3:3; 1 Pit. 1:22.

11. Ia duwen kapakap eh kak seweseiuk en kasalehda mahk?

¹¹ Kapakap oh peki Siohwa en ketin seweseiuk en kasalehda mahk. c Ann, me kitail koasoiapene mwoweo, kawehwehda ia duwen kapakap eh sewese ih. E koasoia: “I peki rehn Siohwa en ketin mahkohng emenemen kiht nan ei peneineio pwehki soahng kan me se nda de wia me sapwung. Ngehi eri ntingla rehn ei pahpao oh eh pwoudo oh ndaiong me I mahkohng ira.” Ann kasalehda me e sohte mengei en wia met. Ahpw e koasoia: “I koapworopworki me ei nantihong en kahlemengih sapwellimen Siohwa mahk pahn kamwakid ei pahpao oh eh pwoudo en kalaudehla ara esehla Siohwa.”

12. Dahme kahrehda kitail anahne likih Siohwa a kaidehn atail pepehm kan? (Lepin Padahk 3:​5, 6)

¹² Likih Siohwa, a kaidehn omw pepehm kan. (Wadek Lepin Padahk 3:​5, 6.) Siohwa kin ahnsou koaros ketin mwahngih dahme keieu mwahu ong kitail. (Ais. 55:​8, 9) Oh e sohte pahn ketin kasik me kitail pahn wia mehkot me pahn kamedekeikitailla. Eri, ni eh kin ketin kangoange kitail en kasalehda mahk, kitail kak kamehlele me en peikiong pahn wia kamwahupatail. (Mel. 40:4; Ais. 48:​17, 18) Ahpw ma kitail likih pein atail pepehm kan, ele kitail sohte pahn kak kasalehda mahk. (Lep. Pad. 14:12; Ser. 17:9) Naomi, me kitail koasoiapene mwoweo, koasoia: “Ni tapio, I kamehlele me I sohte anahne mahkohng ei pwoudo pwehki eh kin kilang kilel suwed. I perki me e pahn pwurehng kamedekeiehla de manokehla uwen laud en kahpwal me e wiahdao. Oh I medewe me Siohwa ketin wehwehki ei pepehm. Ahpw I tepida esehda me mehnda ma Siohwa ketin mwahngih ei pepehm, met sohte wehwehki me e ketin iang pwungkin ie. E ketin mwahngih ei pepehm oh me I anahne ahnsou pwehn sohla lingeringer, ahpw e pil ketin kupwurki ien kasalehda mahk.” d

 KAKAIRADA MADAMADAU PWUNG

13. Nin duwen me Rom 12:​18-21 mahsanih, dahme kitail anahne wia?

¹³ Ni atail kin mahkohng emen me uhdahn kamedekeikitailla, kitail men wia laudsang en piladahte en dehr koasoia dahme wiawi. Ma riatail Kristian men me kamedekeikitailla, atail mehn akadei iei en wiahda popohl. (Mad. 5:​23, 24) Kitail kin pilada en powehkihdi atail lingeringer kadek kalahngan oh atail nsensuwed mahk. (Wadek Rom 12:​18-21; 1 Pit. 3:9) Dahme kak sewese kitail en wia met?

14. Dahme kitail anahne nantihong wia, oh dahme kahrehda?

¹⁴ Siohwa kin ketin pilada en kilangwohngete soahng mwahu kan rehn aramas. Kitail anahne nantihong kahlemengih Siohwa oh rapahki soahng mwahu kan rehn aramaso me kamedekeikitailla. (2 Kron. 16:9; Mel. 130:3) Ma kitail kin rapahkihte soahng suwed kan rehn aramas, eri ihme kitail pahn diar. Ahpw ni atail kin rapahki soahng mwahu kan rehn meteikan, e pahn mengei ong kitail en mahkohng irail. Karasepe, brother men me adaneki Jarrod koasoia,  “I kin mengeiki mahkohng brother men ma I kin medewehte soahng mwahu tohto me I perenki reh, a kaidehn eh sapwung kan.”

15. Dahme kahrehda e mwahu en padahkihong emen me ke mahkohngehr ih?

¹⁵ Pil ehu me kesempwal me kitail en wia iei en padahkihong aramaso me kitail mahkohngehr. Dahme kahrehda? Tehk dahme Naomi, me kitail koasoiapene mwoweo, nda: “Ei pwoudo kin idek rehi, ‘Ke mahkohngieiehr?’ I pahn kin kereniong nda ‘I mahkohng uhk,’ ahpw I sohte kak. I esehda me I saikinte uhdahn mahkohng ih sang nan ei mohngiong. Ahpw mwuhr, I kakehr nda ‘I mahkohng uhk.’ Ni ahnsou me I mahkohng ei pwoudo, pilen mese kohda. I uhdahn pwuriamweikihla uwen at nsenamwahula mwurin mwo. Sang ahnsowo, I esehla en pwurehng likih ih, oh se pil pwurehng kompoakepahnkihla emenemen.”

16. Dahme ke sukuhlkier duwen en kasalehda mahk?

¹⁶ Siohwa ketin kupwurki kitail en kasalehda mahk. (Kol. 3:13) Ahpw ele kitail pil kin apwalkihte wia met. Kitail kak wia met ma kitail sohte pohnsehsehla atail pepehm kan oh nantihong en sohla lingeringer. Eri kitail kak kakairada madamadau pwung.—Menlau kilang koakono “ Soahng Siluh me Ke Kak Wia Pwehn Mahkohng Meteikan.”

MEDEMEDEWE KAMWAHU KAN ME KOHSANG OMW KASALEHDA MAHK

17. Kamwahu dah kan me kohsang atail kin kasalehda mahk?

¹⁷ Mie kahrepe tohto me kitail en kin kasalehda mahk. Medewehla ekei kahrepe. Keieu, kitail kin kahlemengih oh kaperenda Samatailo, Siohwa, me kin ketin kadek kalahngan. (Luk 6:36) Keriau, kitail kin kalahngankihong Siohwa eh ketin mahkohng kitail. (Mad. 6:12) Oh kesiluh, e kin mwahuong atail roson oh pil atail nanpwungmwahu keren rehn meteikan.

18-19. Dahme kak imwikihla atail kin kasalehda mahk?

¹⁸ Ni atail kin mahkohng meteikan, soahng mwahu kan kakete wiawi ni atail sohte kasik. Karasepe, medewehla dahme wiawihong Denise me kitail koasoiapene mwoweo. Denise sohte ese me ni ahnsowo, ohl me kahrehda aksidento pilahnedahr en kemehla pein ih mwurin eh kopwungo. Ahpw ohlo uhdahn mwekidkihda ahn Denise mahkohng ih me kahrehda e tepida onop Paipel rehn Sounkadehdehn Siohwa kan.

¹⁹ Ele kitail kin medewe me mahkohng emen wia ehu rehn mehkan me keieu apwal en wia—ahpw e pil kakete wia soahng ehu me kin keieu katingih kitail. (Mad. 5:7) Ihme kahrehda, kitail en kin wia uwen atail kak koaros en kahlemengih sapwellimen Siohwa mahk.