Mary oh ehu pwoudo, John, a mi nan sahpw ehu me aramas tohto sang Phillipines kin kohla kousoan oh doadoahk ie, oh ira kin perenki kalohk ong irail. Erein soumwahu lusuluso COVID-19, Mary tepida onop Paipel rehn aramas kan kaidehn sangete ni sahpw me e kousoan ieo ahpw pil rehn aramas kan nan sahpw teikan. Ia duwen eh wia met?

Mary pahn kin idek rehn nah tohnsukuhl ko, “Mie emen me ke ese me men onop Paipel?” Ma irail nda ei, e pahn idek ma e kak tuhwong irail. En idek peidek mengei wet kin kalapw imwila mwahu. Dahme kahrehda? Pwehki aramas akan me kin kesempwalki Mahsen en Koht kin kalapw men ehukihong arail peneinei oh kompoakparail kan dahme re kin sukuhlki. Eri, ia duwen nein Mary tohnsukuhl en Paipel ko ar mwekid peideko?

Nein Mary tohnsukuhl en Paipelo, Jasmin padahkihong meh pahmen me pil men onop Paipel. Emen rehrail me adaneki Kristine, uhdahn perenki eh onop en Paipelo me kahrehda e peki rehn Mary en onop reh pak riau nan wihk ehu. Ni Mary eh idek reh ma e ese emen me men onopki Paipel, Kristine nda, “Ei, I pahn padahkihong uhk kompoakepahi kan.” Erein wihk keite, Kristine sewese Mary en tuhwong kompoakepah pahmen ko me men onop. Mwuhr, Kristine pil padahkihong ih kompoakepah teikan oh ekei irail pil wia soahngohte.

Kristine pil men eh peneineio nan Phillipines en sukuhlki duwen Paipel. Eri, e koasoiong nah serepeino me adaneki Andrea. Nin tapio, Andrea kin medewe me, ‘Pelien lamalam en Sounkadehde kan ehusoahng, irail sohte kin kamehlele Sises, oh irail kin doadoahngkihte Kadehde Mering.’ Ahpw mwurinte ehu onop, e esehda me dahme e kin medewehki Sounkadehde kan sapwung. Ahnsou koaros me e kin sukuhlki mehkot kapw sang nan Paipel, e pahn kin nda, “Met kohsang nan Paipel, eri e uhdahn mehlel!”

Mwuhr, Andrea padahkihong Mary duwen kompoakepah riemen oh ienge tohndoadoahk men me tepidahr onop. Pil mie emen lih me rianiki ahn Andrea pahpao, me adaneki Angela. E maskun oh kin ahnsou koaros rong ni Mary eh onopehng Andrea, ahpw Mary sohte ese duwen met. Eri ehu rahno, Angela peki rehn Andrea ma e kak idek rehn Mary en pil onop Paipel reh. Angela uhdahn perenki dahme e sukusukuhlki. Erein sounpwong ehute, e wadlikihala iren Paipel tohto oh men onop pak pahieu nan wihk ehu! Andrea sewese ih en tepida iang towehda mihting kan nan videoconference.

 Ni Mary eh esehda me ahn Kristine pwoudo, Joshua, kin mihmi seli karanih ira erein ara onop ko, Mary idek reh ma e men iang ira onop. Joshua nda, “I pahn rongorongete, ahpw ke dehr idek peidek rehi, pwe ma ke pahn, I pahn kohkohla.” Erein minit limaute me e iang ira onop, e idek peidek tohtohsang Kristine oh e men pousehlahte onop Paipel.

Peidek mengei me Mary ideko, kahrehiong en ahnekihda onop en Paipel tohto. Eri e wiahda koasoandi kan pwe ienge Sounkadehde kan en onop Paipel rehn ekei. Patpene koaros, Mary tepida onop Paipel rehn aramas 28 nan sahpw pahieu.

Jasmin, tepin tohnsukuhl en Paipel me kitail koasoiapene, papidaisla nan April 2021. Kristine papidaisla nan May 2022 oh pwurala Phillipines rehn eh peneineio. Tohnsukuhl riemen me Kristine padahkihong Mary, pil papidaisla. Angela papidaisla sounpwong keite mwuri, oh met e wia pioneer men. Ahn Kristine pwoudo, Joshua, oh neira serepeino, Andrea, oh pil tohnsukuhl en Paipel teiko kin pousehlahte onop Paipel oh karanihala Siohwa.

Ni mwein Sises oh wahnpoaron ko, aramas tohto kin padahkihong arail peneinei oh kompoakparail kan dahme irail sukuhlki duwen Sises. (Sohn 1:​41, 42a; Wiewia 10:​24, 27, 48; 16:​25-33) Idek rehn noumw tohnsukuhl en Paipelo oh pil meteikan me men sukuhlki duwen Paipel, “Mie emen me ke ese me men onopki Paipel?” Ma ke idek peidek mengei wet, ele ke pahn pil diarada aramas tohto me men onopki Paipel.