1-2. Ia duwen irair en aramas eh duwehte mwahnakapwo nan parakrap 1?

 MEDEWEHLA mwahnakapw men me tikida nan peneinei ehu me kepwehpwe. Ahpw ehu rahno, eh papah nohno mehla. E uhdahn nsensuwedla. Ahpw, pil mie soahng ehu me kansensuwed sang met. E esehda me eh pahpa nohno doadoahngkihla mwohni laudsang dahme re naineki oh kihong ih nan pweipwand laud. Eri sohte mwohni me e sohsohki. Ahpw e anahne pwainla ahn eh papah nohno pweipwand ko koaros oh mie irail kan me men en mwadang pwainla. E sohte pahn kak pwainla pweipwand ko koaros.

² Atail irair kak duwehte ahn mwahnakapwo. Atail tepin pahpa nohno, Adam oh Ihp, unsek oh kousoan nan paradais kaselel ehu. (Sen. 1:27; 2:​7-9) Ira kak ahneki mour nsenamwahu kohkohlahte. Ahpw mehkot suwed wiawi. Adam oh Ihp dipada. Pwehki met, Siohwa ketikihsang ira nan mwetuwel en Ihden oh ira sohla kak mour kohkohlahte. Dahme neira seri kan sohsohki sang ira? Paipel mahsanih: “Sang rehn aramas tehmen [Adam] dihp leledohng sampah oh mehla sang ni dihp, ihme kahrehda mehla lelohngehr aramas koaros pwe irail koaros dipadahr.” (Rom 5:12) Kitail sohsohki dihp sang Adam, me imwikihla mehla. Dihp wet me kitail sohsohki duwehte pweipwand laud ehu, mehkot me sohte emen rehtail kak pwainla.—Mel. 49:8.

 3. Dahme kahrehda dipatail kan kak duwehte “pweipwand”?

³ Sises ketin kapahrekiong dihp “pweipwand.” (Mad. 6:​12, ntp; Luk 11:4) Ni atail kin dipada, e kin duwehte atail pweipwand  ong Siohwa. Ahpw pweinen dihp iei mehla. Ma Siohwa sohte ketin koasoanehdi ahl ehu en mahkohng dipatail kan, kitail pahn anahne mehla pwehn pwainla dipatail kan, oh e pahn sohte atail koapworopwor en pwurehng mourda.—Rom 6:​7, 23.

 4. (a) Ma sohte sawas, dahme pahn wiawihong aramas dipan kan koaros? (Melkahka 49:​7-9) (b) Nan Paipel, dahme lepin lokaiao “dihp” kin dokedoke? (Menlau kilang koakono “ Dihp.”)

⁴ Pein kitail sohte kak kapwurehdo soahng koaros me Adam oh Ihp luhssang. (Wadek Melkahka 49:​7-9.) Ma sohte sawas, e sohte pahn mie atail koapworopwor en iasada de mour ni ahnsou kohkohdo. Kitail pahn mehla oh sohte kak pwurehng mourda, duwehte mahn kan ar kin mehla.—Ekl. 3:19; 2 Pit. 2:12.

 5. Ia duwen Samatail limpoako eh sewese kitail en pwainla dipatail kan? (Menlau kilang kilel ni Kahn Iroir wet.)

⁵ Medewehla mwahnakapwo me kitail koasoiapene nin tapio. Ia pahn eh pepehm ma ohl kepwehpwe men men pwainla eh pweipwand ko koaros? Ei mehlel, mwahnakapwo pahn uhdahn kalahnganki oh pahn pwungki kisakis sapan wet. Duwehte met, Samatail limpoako, Siohwa, ketikihong kitail kisakis ehu me pwainla dihp me kitail sohsohki sang Adam. Sises ketin kawehwehda ni ahl wet: “Koht uhdahn ketin poakohng sampah ihme e ketikihdohki sapwellime Iehros, pwe mehmen me kin kasalehda eh pwoson ih en dehr mwomwla ahpw en ahneki mour soutuk.” (Sohn 3:16) Kisakis wet pil kahrehiong kitail en kak ahneki nanpwungmwahu rehn Siohwa.

 6. Dahme kitail pahn koasoiapene nan iren onop wet, oh dahme kahrehda?

⁶ Ia duwen atail kak paiekihda kisakis kaselel wet me kahrehiong kitail en kak ale mahkpen dipatail kan? Pwehn sapengala peideko, kitail pahn koasoiapene lepin lokaia kan me Paipel doadoahngki oh ia wehwehn. Atail doudouloale dahme Siohwa ketin wiadahr pwehn mahkohng kitail, atail kalahngan ong ih pahn laudla.

ALE KUPWURAMWAHU EN KOHT

 7. (a) Dahme Adam oh Ihp pil luhssang? (b) Nin duwen kadaudok en Adam oh Ihp, dahme kitail uhdahn anahne? (Rom 5:​10, 11)

⁷ Ni ahnsou me Adam oh Ihp dipada, ira sohla kak mour kohkohlahte. Ira pil sohla ahneki nanpwungmwahu rehn Samarao, Siohwa. Mwohn ara dipada, Adam oh Ihp wia kisehn sapwellimen Koht peneinei. (Luk 3:38) Ahpw ni ahnsou me ira sapeikiong Siohwa, e sohte ketin mweidohng ira en wiahte kisehn  sapwellime peneinei. Met wiawi mwohn ara nainekihda seri. (Sen. 3:​23, 24; 4:1) Eri nin duwen kadaudokara, kitail anahne ale kupwuramwahu sang Siohwa. (Wadek Rom 5:​10, 11.) De kitail anahne kakairada nanpwungmwahu keren reh. Nin duwen me ehu dikseneri en Paipel koasoia, lepin lokaiahn Krihs me kadoadoahk ong ‘ale kupwuramwahu sang Koht’ kak wehwehki en “kompoakepahnkihla imwintihti men.” E kapwuriamwei me Siohwa me ketin tiengla mwowe pwe met en kak wiawi. Ia duwen?

KOASOANDI EN TOMW

 8. Dahme Siohwa ketikihda?

⁸ Tomw iei koasoandi ehu me Siohwa ketikihda pwe aramas dipan kan en kak pwurehng ahneki nanpwungmwahu reh. E ketin koasoanehdi ahl ehu pwehn kapwurehdo dahme Adam kasalongehla sang ni eh ketikihda uwen pweipwei ehu me pahrekiong dahme salongala. Palien Paipel ni Lokaiahn Krihs pil koasoia duwen Siohwa eh ketin wiahda pwe emenemen aramas en kak ahneki popohl oh nanpwungmwahu reh.—Rom 3:25.

 9. Koasoandi dahieu me Siohwa ketin wiahda pwe mehn Israel kan en kak ale mahkpen diparail kan?

⁹ Siohwa ketikihda ahl ehu me mehn Israel kan kak ale mahkpen diparail oh kak ahneki nanpwungmwahu reh. Mehn Israel kan kin anahne kasarawih rahn tohrohr ehu nan pahr koaros. Re kin kahdaneki rahno Rahnen Tomw. Rahno, samworo lapalapo pahn kin wiliandi mehn Israel kan oh meirongki mahn akan. Ahpw meirong en mahn sohte kak kihsang douluhl dipen emen pwehki aramas mwahusang mahn akan. Ahpw erein mehn Israel kan me koluhla kin wiewia meirong me Siohwa ketin kupwurki, e pahn ketin kupwurki mahkohng diparail kan. (Ipru 10:​1-4) Meirong kan me re kin wia ni Rahnen Tomw oh ni ahnsou teikan, sewese mehn Israel ko en pohnese me irail aramas dipan kei oh me irail anahne mehkot me laudsang met pwehn uhdahn pwaindi diparail kan.

10. Dahme Siohwa ketin wia pwe aramas akan en kak ale mahkpen diparail kan?

¹⁰ Dahme Siohwa ketin wia pwe aramas akan en kak ale mahkpen diparail kan? E ketin koasoanehdi pwe sapwellime Ohlo me e ketin poakohng en “meirongala pak ehute pwe en alehda dipen me tohto.” (Ipru 9:28) Sises ketikihda “moure nin duwen pweinen pweipwei sapahl ehu ong aramas tohto.” (Mad. 20:28) Ia wehwehn pweinen pweipwei sapahl?

PWEINEN PWEIPWEI SAPAHLO

11. (a) Nin duwen me Paipel mahsanih, dahme kahrehda pweinen pweipwei sapahlo anahne wiawihda? (b) Ihs kelehpw me kak pwainla pweipweio?

¹¹ Nin duwen me Paipel mahsanih, Siohwa ketin koasoanehdi pweipwei ehu me anahn pwe en pwainla dipatail kan oh pwe kitail en kak wiahla kompoakepah. Eri pweinen pweipwei sapahl dahieu me anahn pwe aramas akan en ahneki dahme Adam luhssang? Tamataman, Adam oh Ihp luhssang ara mour unsek oh sohla kak mour kohkohlahte. Eri uwen pweinen pweipwei sapahlo anahne pahrekiong dahme ira luhssang. (1 Tim. 2:6) Met kak pweipweilahte sang rehn ohl emen me (1) unsek; (2) kak mour kohkohlahte nin sampah; oh (3) men tounmeteikihla eh mour ong kitail. Mouren aramaso pahn pwainla dahme salongalao.

12. Dahme kahrehda Sises kak ketikihda dahme anahn pwehn pwainla pweinen pweipwei sapahlo?

¹² Medewehla kahrepe siluh me Sises kak ketin pwainla pweinen pweipwei sapahlo.  (1) E ketin unsek—“e sohte ketin wiahda dihp.” (1 Pit. 2:22) (2) Pwehki met, e kak mour kohkohlahte nin sampah. (3) E kupwurki pwoula oh tounmeteikihla moure pwehki kitail. (Ipru 10:​9, 10) Sises ketin wia ohl unsek men duwehte Adam, mwohn Adam dipada. (1 Kor. 15:45) Eri pwehki Sises pwoula, e kak ketin pwainla pweipweio me anahn pwehn wiliandi dahme Adam luhssang. (Rom 5:19) Sises ketin wiahla “Adam en keieun mwuhro.” Sohte anahne pil emen tohrohr me unsek en kohdo oh pwainla dahme Adam luhssang. Sises ketin pwoula “pak ehute.”—Ipru 7:27; 10:12.

13. Ia wekpeseng en koasoandi en tomw oh pweinen pweipwei sapahlo?

¹³ Eri ia wekpeseng en koasoandi en tomwo oh pweinen pweipwei sapahlo? Koasoandi en tomwo iei mwekid ehu me Koht ketin wia pwe aramas akan en kak pwurehng ahneki nanpwungmwahu reh. Pweinen pweipwei sapahlo iei pweipwei ehu me pwainla dipen aramas akan. Pweipwei wet iei sapwellimen Sises nta kesempwal me e ketikihda pwehn pwainla dipatail kan.—Ep. 1:7; Ipru 9:14.

SALEDEKLA OH PWUNGLA REHN KOHT

14. Dahme kitail pahn koasoiapene met, oh dahme kahrehda?

¹⁴ Ia duwen atail paiekihda dahme Siohwa ketin wiahiong kitail? Pwehn sapengala peideko, kitail pahn koasoiapene wehwehn lepin lokaia riau me Paipel doadoahngki me sewese kitail en wehwehki ia duwen atail paiekihda sapwellimen Siohwa mahk.

15-16. (a) Nan Paipel, ia wehwehn en saledekla? (b) Ia duwen met eh kamwakid kitail?

¹⁵ Paipel mahsanih me pwehki pweinen pweipwei sapahlo pweipweilahr, kitail saledekla. Wahnpoaron Piter kasalehda ni ahl wet: “Kumwail ese me kaidehn soahng kan me kak mwerpeseng, duwehte silper de kohl, me kasaledengkumwailla sang amwail elen mour soh katepe me kodoudou ong kumwail sang rehn samamwail mehn mahs ako. Ahpw kumwail saledengkihla nta kesempwal, duwehte ntahn sihmpwul men me sohte sapwung kis oh sohte mwahi kis iang, me iei ntahn Krais.”—1 Pit. 1:​18, 19.

¹⁶ Pwehki pweinen pweipwei sapahlo, kitail saledeksang dihp oh mehla me kin kahrehda lokolok laud. (Rom 5:21) Kitail uhdahn kalahngankihong Siohwa oh Sises me kitail saledeklahr pwehki sapwellimen Sises nta kesempwal.—1 Kor. 15:22.

17-18. (a) Ia wehwehn en pwungla rehn Siohwa? (b) Ia duwen atail kin paiekihda met?

¹⁷ Paipel mahsanih me sapwellimen Siohwa ladu kan pwunglahr reh. Met wehwehki me Siohwa sohte ketin kasik kitail en pwainla dipatail kan. Ni eh ketin wia met, e sohte ketin kauwehla sapwellime koasoandi en pwung pahrek. E ketin wiahkin kitail aramas pwung kei, kaidehn pwehki kitail me koadoahkihada. Pil ehu, Siohwa sohte ketin kupwurperenki dipatail kan. Ahpw Siohwa ketin kupwurki mahkohng dipatail kan pwehki kitail pwoson dahme ih oh Sises ketin wiahda pwehn ketikihda pweinen pweipwei sapahlo.—Rom 3:24; Kal. 2:16.

¹⁸ Ia wehwehn met ong emenemen kitail? Irail kan me pilipildahr en iang Sises kaunda nanleng pwunglahr rehn Koht nin duwen sapwellime seri. (Taitus 3:7; 1 Sohn 3:1) Irail aleier mahkpen diparail kan. E mwomwen me irail sohte mwahn wiahda dihp, eri irail warohng mi nan Wehin Koht. (Rom 8:​1, 2, 30) Irail teikan me pil pwunglahr rehn Koht pahn mour kohkohlahte nin sampah.  Siohwa ketin mahkohngehr diparail kan oh re wialahr kompoakepah. (Seims 2:​21-23) Pokon kalaimwuno, me pahn pitsang Armakedon, ahneki koapworopwor me re sohte mwahn pahn mehla. (Sohn 11:26) “Me pwung kan oh me sapwung kan” me melahr pahn iasada. (Wiewia 24:15; Sohn 5:​28, 29) Kedekedeo, sapwellimen Siohwa ladu kan koaros nin sampah pahn “ahneki saledek lingan en sapwellimen Koht seri kan.” (Rom 8:21) Kitail kin kasikasik ahnsowo me atail nanpwungmwahu rehn Samatailo Siohwa pahn unsekla.

19. Ia duwen atail irairo eh mwahula? (Pil kilang koakono “ Ia Wehwehn Met ong Kitail.”)

¹⁹ Ni mehlel, mahso atail irair duwehte ahn mwahnakapwo me kitail koasoiapene mwoweo, me luhssang soahng koaros oh sohsohki pweipwand laud ehu me e sohte kak pwainla. Ahpw Siohwa ketin sewesei kitail. Atail irairo wekila pwehki Siohwa ketikihda ahl ehu me kitail en ale mahkpen dipatail kan, oh Sises pwainla pweinen pweipwei sapahlo. Atail pwoson Sises Krais kasaledekitailsang dihp oh mehla. Ni Siohwa eh kin ketin mahkohng dipatail kan, e mwomwen me kitail sohte mwahn wiahda dihp. Ahpw me keieu kesempwalsang koaros, met kitail kak ahneki nanpwungmwahu rehn Samatail limpoako nanleng, Siohwa.

20. Dahme kitail pahn koasoiapene nan iren onop en mwuhr?

²⁰ Kitail kin uhdahn kalahngankihong Siohwa oh Sises ni atail doudouloale soahng koaros me ira ketin wiahiong kitail. (2 Kor. 5:15) Ma sohte sawas sang rehra, e pahn sohte douluhl atail koapworopwor! Nan iren onop en mwuhr, kitail pahn koasoiapene karasaras kei me kasalehda ia duwen atail kin paiekihda pweinen pweipwei sapahlo.