IREN ONOP 7
KOUL 15 Kapinga Sapwellimen Siohwa Mesenih
Sapwellimen Siohwa Mahk—Ia Wehwehn Met ong Kowe
“Komw uhdahn kin ketin mahkohng aramas.”—MEL. 130:4, NW.
DAHME KITAIL PAHN SUKUHLKI
Kitail pahn koasoiapene ekei karasaras kan nan Paipel me kawehwehda ahl tohrohr me Siohwa kin ketin mahkohng kitail. Iren onop wet pahn sewese kitail en kalaudehla atail kalahnganki sapwellime mahk.
1. Dahme kahrehda eh apwal en ese wehwehn ni emen eh nda me e mahkohng uhk?
“I MAHKOHNG UHK.” Ele ke kin uhdahn nsenamwahula ni omw rong emen eh nda lokaia pwukat, ahpw mehlel ma ke ese me ke nda de wia mehkot me kamedekihala ih! Ahpw ia uhdahn wehwehn lepin lokaiao “I mahkohng uhk?” Ia duwe, aramaso me ke kansensuwedihala koasoakoasoia me ke wiewiahte kompoakepah mwahu? De e ndinda me e solahr men koasoia duwen dahme wiawi? Ahn aramas mahk kin kak wekpeseng.
2. Ia duwen sapwellimen Siohwa mahk eh kawehwehdi nan Paipel? (Pil kilang nting tikitik kan me mi pah.)
2 Mwomwen Siohwa eh kin ketin mahkohng kitail aramas soh unsek kan kin uhdahn weksang mwomwen atail kin mahkohng emenemen. Sohte me kak mahk ni ahl me Siohwa kin ketin wia. Sounmelkahkao ndahki Siohwa: “Komw uhdahn kin ketin mahkohng aramas, kahrehda aramas akan kin lemmwikin komwi.” a (Mel. 130:4, NW) Ei, Siohwa “uhdahn kin ketin mahkohng aramas.” Ih me kin ketin kasalehiong kitail ia uhdahn wehwehn mahk. Nan ekei wasa ni lokaiahn Ipru, sounnting en Paipel kan kawehwehda mwomwen Siohwa eh kin ketin mahk ni ar doadoahngki lepin lokaia ehu me re sohte kin doadoahngki pwehn kawehwehda mwomwen aramas eh kin mahkohng emen.
3. Ia duwen sapwellimen Siohwa mahk eh weksang atail? (Aiseia 55:6, 7)
3 Ni Siohwa eh kin ketin mahkohng emen, ahn aramaso dihp kin sohrala douluhl. Kitail kak ahnekihte nanpwungmwahu keren rehn Siohwa. Kitail kalahnganki me Siohwa uhdahn kin ketin mahkohng kitail oh pwurupwurehng wia met.—Wadek Aiseia 55:6, 7.
4. Ia duwen Siohwa eh ketin sewese kitail en ese ia uhdahn wehwehn en mahk?
4 Ma sapwellimen Siohwa mahk weksang atail, ia duwen kitail aramas soh unsek kei kak wehwehki wehwehn en uhdahn mahk? Siohwa kin ketin doadoahngki karasaras kaselel kan pwe en sewese kitail en wehwehki ia duwen eh kin ketin mahkohng kitail. Nan iren onop wet, kitail pahn tehkpene ekei karasaras pwukat. E pahn kasalehiong kitail duwen Siohwa eh kin ketikihsang dihp oh ni ahnsowohte mweidohng kitail en pwurehng wiahla kompoakepah keren. Ni atail tehk karasaras pwukat, e pahn kalaudehla atail poakohng oh kalahnganki Samatailo me kin ketin kadek oh mahk, me kin ketin kasalehda sapwellime mahk ni soangen ahl tohto.
SIOHWA KIN KETIKIHSANG DIPATAIL
5. Dahme kin wiawi ni Siohwa eh ketin mahkikihong dipatail kan?
5 Nan Paipel, dihp kin duwehte wisik toutou ehu. Nanmwarki Depit kawehwehda dipe kan ni ahl wet: “I mwopwlahr nan ahd en dipei kan, dipei kan katoutouwihielahr, I solahr kak wahda.” (Mel. 38:4) Ahpw Siohwa kin ketin mahkikihong dipen irail kan me koluhla. (Mel. 25:18; 32:5) Lepin lokaiahn Ipru me kawehwehdi ong “mahkikihong” kin wehwehki en “pwekada” de “wahda.” Eri ni Siohwa eh ketin mahkohng dipatail kan, e kin ketikihsang atail wisik toutouo. E kin mwomwen me kitail weuwa wisik toutou ehu pohn pwopwetail ahpw e ketin pwekasang rehtail.
“Mahkikihong” (Mel. 32:5)
6. Ia uwen doh en Siohwa eh kin ketikihsang dipatail kan?
6 Paipel doadoahngki pil ehu karasaras pwehn kasalehda me Siohwa kin ketikihsang rehtail dipatail kan. Melkahka 103:12 mahsanih: “Duwen mesenleng oh kepinleng ara dohpeseng, ih duwen eh kin ketin kadohwaneweisang kitail dipatail kan.” Palimese oh palikapi uhdahn dohpeseng. Met wehwehki me Siohwa kin uhdahn ketin kadohwaneweisang kitail dipatail kan. Ia uwen met eh kamehlelehiong kitail uwen laud en sapwellimen Siohwa mahk!
“Duwen mesenleng oh kepinleng ara dohpeseng” (Mel. 103:12)
7. Ia duwen Paipel eh ketin kawehwehda dahme Siohwa kin ketin wiahiong dipatail kan? (Maika 7:18, 19)
7 Mendahki Siohwa, ni karasaras, kin ketin kadohwaneweisang kitail dipatail kan, ia duwe, e kin ketin kolokolete? Soh. Nanmwarki Esekaia ntingihdi duwen Siohwa: “Komw ketin kesehla dipei kan koaros mwurimw.” (Ais. 38:9, 17, NW) Met wehwehki me Siohwa kin ketin kesehla dipen me koluhla kan oh sohte kin pwurehng tehk. Met pil kak wehwehki: “Komw ketin kahrehiong dipei kan en mwomwen me e sohte wiawi.” Paipel pil kasansalehda met ni eh doadoahngki ehu karasaras me kileldi nan Maika 7:18, 19. (Wadek.) Iretikitik pwukat kasalehda me Siohwa kin ketin kesehla dipatail kan oh kakihrala nan kepin madau. Mahso, sohte emen kak kihdahsang mehkot me kihrlahr nan kepin madau.
“Komw ketin kesehla dipei kan koaros mwurimw” (Ais. 38:17, NW)
“Komw pahn ketin tiakedi dipat oh kakihrala nan kepin madau” (Maika 7:19)
8. Dahme kitail sukuhlkier?
8 Paipel kadehdehda ni sansal me ni Siohwa eh ketin mahkohng kitail, e kin ketikihsang douluhl dipatail kan eri kitail solahr anahne suwedki. Nin duwen me Depit koasoia, uhdahn “meid pai irail akan me aleier mahkpen arail wiewia suwed kan oh diparail kan pweipweila; meid pai aramas emen me Siohwa sohte pahn ketin tamataman dipe.” (Rom. 4:7, 8) Met uhdahn mahk mehlel!
SIOHWA KIN KETIN KAMWAKELEHSANG DIPATAIL
9. Ia duwen Paipel eh sewese kitail en wehwehki me Siohwa kin uhdahn ketin mahkohng kitail?
9 Pwehki pweinen pweipwei sapahlo, Siohwa kak ketin kamwakelehsang dipen me koluhla kan. Tehk ia duwen Paipel eh kawehwehda dahme Siohwa kin ketin wia. Nan Paipel, kitail wadek me Siohwa kin ketin kamwakelehda oh widensang dihp kan. Met kin kahrehiong me dipano en mwakelekella. (Mel. 51:7; Ais. 4:4; Ser. 33:8) Pein Siohwa ketin kawehwehda ni ahl wet: “Mehnda ma kumwail weitahtahkilahr dipamwail kan, ahpw I pahn kamwakeleikumwailda duwehla sinoh. Mehnda ma dipamwail wiahla mwahi weitahta douluhl, ahpw kumwail pahn pwetepwetala duwehla wunen sihpw.” (Ais. 1:18) E uhdahn apwal en kamwakelehsang mwahi weitahta ni likou. Siohwa ketin doadoahngki karasaras wet pwehn kamehlelehiong kitail me dipatail kan kak uhdahn kamwakelda oh sohla sansal.
“Mehnda ma kumwail weitahtahkilahr dipamwail kan, ahpw I pahn kamwakeleikumwailda duwehla sinoh” (Ais. 1:18)
10. Ia duwen Paipel eh kawehwehda uwen laud en Siohwa eh kin ketin mahkohng kitail?
10 Nin duwen me kitail koasoiapene nan iren onop en mwoweo, dihp pil kin duwehte “pweipwand.” (Mad. 6:12, ntp; Luk 11:4) Eri atail pweipwand kin lalaudla ahnsou koaros me kitail wiahda dihp. Kitail uhdahn pweipwand laud ong Siohwa! Ahpw ni Siohwa eh ketin mahkohng kitail, e kin mwomwen me e ketikihsang pweipwand me kitail wiahdao. E sohte ketin idingki me dihp kan me e ketin mahkohngehr anahne pwurehng pweipweila. Duwehte aramas emen eh kin nsenamwahula ni eh sohla eh pweipwand, kitail pil kin nsenamwahula ni Siohwa eh kin ketin mahkohng kitail.
“Mahkikihong kiht dipat akan” (Mad. 6:12)
11. Ia wehwehn ni Paipel eh mahsanih me dipatail kan “irihrsang”? (Wiewia 3:19, ntp)
11 Siohwa sohte kin ketin kapwowihalahte atail pweipwand kan de dipatail kan; e kin ketin irisasang. (Wadek Wiewia 3:19, ntp.) Pwehn karasahda met, medewehla emen eh ntingihieng lain ehu pohn omw pweipwando. Ahpw, koaros kak kilangete nempe ko pahn laino. En irisasang mehkot weksang met. Pwehn wehwehki karasaras wet, kitail anahne tamataman me pihl kin mi nan soangen ingk me mehn mahs ko kin doadoahngki oh kin mengei en irihrsang. Emen kakete ale mehn dahlimw me wisekesek oh limwihasang nting ko. Eri ni pweipwand ehu eh kin “irihrsang,” e kin salongala douluhl. Aramas solahr kak kilang lipwen nting ko. E mwomwen me pweipwando sohte douluhl wiawi. Kitail uhdahn kin kalahnganki atail ese me ni Siohwa eh kin ketin mahkohng dipatail kan, e kin mwomwen me dipatail ko sohte douluhl wiawi!—Mel. 51:9.
“Pwe dipamwail kan en irihrsang” (Wiewia 3:19, ntp)
12. Dahme kitail sukuhlkihsang karasaras en depwek mosulo?
12 Pil mie ehu ahl tohrohr me Siohwa ketin kawehwehda duwen eh ketin kasohrehla douluhl dipatail kan. E ketin mahsanih: “I pahn irisasang omw sapeik kan duwehte depwek ehu eh pwaindi oh dipomw kan duwehte depwek mosul ehu eh pwaindi.” (Ais. 44:22, NW) Ni Siohwa eh kin ketin mahk, e mwomwen me e ketin doadoahngki depwek mosul ehu pwehn karirala dipatail kan pwe pein ih oh pil kitail en sohla kilang.
“I pahn irisasang omw sapeik kan duwehte depwek ehu eh pwaindi” (Ais. 44:22, NW)
13. Ia atail pepehm ni Siohwa eh ketin mahkohng dipatail kan?
13 Dahme karasaras pwukat padahkihong kitail? Ni Siohwa eh kin ketin mahkohng dipatail kan, kitail en dehr medewe me kitail pahn suwedki dipatail ko erein atail mour. Sapwellimen Sises nta pwainla douluhl dipatail kan. Ni Siohwa eh kin ketin mahkohng kitail, e kin mwomwen me kitail sohte douluhl wiahda dihp. Ih met mwomwen Siohwa eh kin ketin mahkohng kitail ni atail kin koluhkihla dipatail kan.
SIOHWA KETIN PWUREHNG KOMPOAKEPAHNKIN KITAIL
Mahk me Samatailo nanleng kasalehiong kitail kahrehda kitail en ahneki nanpwungmwahu reh (Menlau kilang parakrap 14)
14. Dahme kahrehda kitail kak likih me Siohwa uhdahn pahn ketin mahkohng kitail? (Pil kilang kilel kan.)
14 Ni Siohwa eh uhdahn ketin mahkohng kitail, kitail kak kamehlele me kitail kak pwurehng kompoakepahnki ih. Pwehki sapwellimen Siohwa mahk kin unsek, kitail sohla anahne suhsuwedkihte atail sapwung kan. Kitail sohte anahne perki me Siohwa ketin engiengte pahtail oh kin ketin rapahki ahl ehu pwehn kaloke kitail. Met sohte mwahn pahn wiawi. Dahme kahrehda kitail kak likih Siohwa ni eh mahsanih me e ketin mahkohng kitail? Siohwa ketin mahsanihong soukohp Seremaia: “I pahn mahkikihong diparail kan oh I solahr pahn tamanda arail sapwung kan.” (Ser. 31:34) Pohl doadoahngki lepin lokaia pwukat ni eh koasoia: “I solahr pahn tamanda diparail kan.” (Ipru 8:12) Ahpw ia uhdahn wehwehn met?
“I solahr pahn tamanda arail sapwung kan” (Ser. 31:34)
15. Ia wehwehn Siohwa eh solahr ketin taman dipatail kan?
15 Nan Paipel, lepin lokaiao “tamataman” sohte kin ahnsou koaros dokedoke emen eh medemedewe mehkot me wiawi mahso. Ahpw, e kak wehwehki en emen eh wiewia mehkot. Loallap me langalang nin tuhkeo limwahn Sises peki: “Maing Sises, komw ketin taman ie ni omwi pahn ketilong nan sapwellimomwi Wehi.” (Luk 23:42, 43) E pekipeki Sises en ketin wiahiong ih mehkot ni ahnsowo. Dahme Sises sapengki kasalehda me e pahn ketin kaiasada loallapo. Eri ni Siohwa eh ketin mahsanih me e solahr taman dipatail kan, met wehwehki me e ketin mahkohng kitail oh e sohte pahn ketin kalokehkin kitail dipatail kan ni ahnsou kohkohdo.
16. Dahme Paipel kapahrekihong kitail?
16 Ni Siohwa eh ketin mahkohng kitail, kitail kin saledekla. Paipel doadoahngki pil ehu karasaras pwehn sewese kitail en wehwehki met. E mahsanih me pwehki kitail soh unsek, kitail wia “lidun dihp.” Ahpw ni Siohwa eh ketin mahkohng kitail, kitail duwehte lidu kei me ‘saledeksangehr dihp.’ (Rom 6:17, 18; Kaud. 1:5) Ni atail ese me Siohwa ketin mahkohngkitailehr, kitail kak peren duwehte lidu men me saledekla.
“Pwehki amwail kasaledeksangehr dihp” (Rom 6:18)
17. Ia duwen mahk eh kin kamwahwihala kitail? (Aiseia 53:5)
17 Wadek Aiseia 53:5. Paipel mahsanih me pwehki kitail dipan, kitail duwehte aramas me ahneki soumwahu keper ehu. Siohwa ketin kamwahwihkitailla pwehki pweinen pweipwei sapahl me sapwellime Ohlo kihda. (1 Pit. 2:24) Ni atail kin wiahda dihp, atail nanpwungmwahu rehn Siohwa kin ohla. Ahpw pwehki pweinen pweipwei sapahlo, e kak ketin mahkohng kitail oh kitail kak pwurehng ahneki nanpwungmwahu keren reh. Duwehte emen eh kin perenkihda eh mwahula sang soumwahu laud ehu, kitail pil kin peren ni atail nanpwungmwahu rehn Siohwa eh mwahula oh kitail pwurehng ale sapwellime kupwuramwahu.
“Lipwen ohla kan ni paliwere kaunsekihkitailla.” (Ais. 53:5)
IA WEHWEHN SAPWELLIMEN SIOHWA MAHK ONG KITAIL
18. Dahme kitail sukuhlkihsang karasaras ko duwen sapwellimen Siohwa mahk? (Pil kilang koakono “Ia Duwen Siohwa Eh Ketin Mahkohng Kitail.”)
18 Dahme kitail sukuhlkihsang karasaras ko duwen sapwellimen Siohwa mahk? Ni Siohwa eh ketin mahkohng dipatail kan, e kin mwomwen me kitail sohte mwahn wiahda dihp oh kitail kak kamehlele me e sohte pahn ketin kalokehkin kitail ni ahnsou kohkohdo. Eri kitail kak ahneki nanpwungmwahu rehn Samatailo nanleng. Ahpw kitail ese me mahk me kohsang rehn Siohwa iei kisakis me e ketikihong kitail pwehki e ketin poakohng kitail oh ketin kadek sapan, kaidehn pwehki kitail warohng.—Rom 3:24.
19. (a) Dahme kitail anahne kalahnganki? (Rom 4:8) (b) Dahme kitail pahn koasoiapene nan iren onop en mwuhr?
19 Wadek Rom 4:8. Kitail uhdahn kalahnganki me Siohwa kin ketin mahkohng kitail! (Mel. 130:4) Ahpw ma kitail men Siohwa en ketin mahkohng kitail, kitail anahne wia mehkot me kesempwal. Sises mahsanih: “Ma kumwail pahn kin mahkikihong aramas arail sapwung kan, Samamwail nanleng pil pahn ketin mahkohng kumwail.” (Mad. 6:14, 15) Eri kitail anahne kahlemengih Siohwa oh mahkohng meteikan. Iren onop en mwuhr pahn kasalehiong kitail ia duwen atail kak wia met.
KOUL 46 Se Kalahngankihong Komwi, Siohwa
a Lokaiahn Ipru doadoahngki lepin mahsen pwukat “uhdahn kin ketin mahkohng,” me kin wehwehki me ihte mahk mehlel en met, mendahki pil mie wehwehn mahk teikan. Kawehwehn Paipel tohto sohte kasansalehda ire kesempwal wet nan Melkahka 130:4.
