1. Dahme kahrehda aramas tohto rahnpwukat sohte kin likih Paipel?

 ARAMAS tohto rahnwet sohte ese ihs me irail kak likih. Irail sohte ese ma aramas akan me re wauneki, karasepe, soun politik, sains de pesines kan, kin ahnsou koaros song en wiahda dahme mwahu ong irail. Patehng met, irail sohte kin wauneki kaunen pelien lamalam kan me kin nda me dene irail Kristian kei. Eri e sohte kapwuriamwei me irail sohte kin likih Paipel, pwuhk me kaunen pelien lamalam pwukat kin nda me irail kin peikiong.

2. Nin duwen me Melkahka 119:160 mahsanih, dahme kitail kak kamehlele?

² Nin duwen sapwellimen Siohwa ladu kei, kitail kamehlele me ih “Koht en mehlel” oh kin ahnsou koaros ketin kupwurki dahme mwahu ong kitail. (Mel. 31:5, NW; Ais. 48:17) Kitail ese me kitail kak likih dahme kitail wadek nan Paipel, me ‘sapwellimen Koht mahsen pwon me mehlel.’ (Wadek Melkahka 119:160.) Kitail pwungki dahme emen ohl me samanih poadopoad en Paipel ntingihdi: “Sohte mehkot me Koht ketin mahsanih likamw de sohte pahn pweida. Sapwellimen Koht aramas akan kak likih dahme e ketin mahsanih pwehki irail likih ih.”

3. Dahme kitail pahn koasoiapene nan iren onop wet?

³ Ia duwen atail kak sewese meteikan en likih Paipel duwehte kitail? Kitail pahn medewe kahrepe siluh me kitail kak likih Paipel. Kitail pahn koasoiapene me dahme Paipel mahsanih sohte wekila, me kokohp kan en Paipel pweidahr, oh Paipel ahneki manaman en wekidala mouren aramas.

4. Dahme kahrehda ekei aramas medewe me Paipel wekila?

⁴ Siohwa Koht ketin doadoahngki ohl lelepek 40 pwehn ntingihada pwuhk kan en Paipel. Ahpw doaropwehn mahs ko me irail ntingihdi loale sohte mi rehtail rahnwet. Ihte me mi rehtail iei copy kan. Met kahrehda ekei aramas kin medewe ma dahme kitail wadek nan Paipel rahnwet kin duwehte dahme ohl ko ntingihdi. Mie pak ke medewe ia duwen atail kak kamehlele met?

5. Ia duwen sounnting ko ar wiahda copy en Palien Paipel ni Lokaiahn Ipru? (Menlau kilang kilel ni kilin Kahn Iroir wet.)

⁵ Pwehn pere audepen Paipel, Siohwa ketin mahsanihong sapwellime aramas akan en wiahda copy kan. E ketin kaweid nanmwarkien Israel kan en wiahda pein neirail copy kan en Kosonnedo, oh e ketin idihada mehn Lipai kan en padahkihong aramas akan duwen Kosonnedo. (Deud. 17:18; 31:24-26; Neh. 8:7) Mwurin mehn Suhs kan kalipilipala Papilon, pwihn en sounnting koahiek kei tepida wiahda copy en Palien Paipel ni Lokaiahn Ipru. (Esra 7:6) Ohl pwukat kin kanahieng arail doadoahk. Kedekedeo, soun copy kan tepida wadek kaidehn lepin lokaia kante ahpw pil mesen nting kan pwe irail en tehk mwahu me soahng koaros me irail copy kin pwung. Ahpw pwehki irail sohte unsek, mie kisin sapwung kei nan ekei copy ko. Ahpw irail wiahda copy tohto en nting ko, kahrehda sapwung ko me wiawihda kak dierekda mwuhr. Ia duwen?

6. Ia duwen arail kak diarada sapwung kan nan copy en Paipel kan?

⁶ Mie ahl mwahu ehu me saman kan rahnwet kin doadoahngki pwehn diarada sapwung kan me sounnting kan wiahda ni arail copy nting en Paipel. Karasepe: Medewehla me ohl epwiki kei ntingihda copy en ehu pali en nting ko. Emen irail wiahda kisin sapwung ehu. Ehu elen diarada sapwungo iei en kapahrekihpene dahme e ntingihdio ong dahme meteikan ntingihdi. Duwehte met, sang ni arail kapahrekihpene doaropwehn mahs en Paipel kan, saman kan kak diarada sapwung kan me sounnting men wiahda.

7. Ia uwen soun copy en Paipel tohto ar kin kanahieng arail doadoahk?

⁷ Irail kan me kin copy doaropwehn mahs kan en Paipel kin uhdahn kanahieng pwe en pwung. Tehk karasepen met. Palien Paipel ni Lokaiahn Ipru me keieu wereila wiawihda nan pahr 1008 de 1009. Copyo adaneki Leningrad Codex. Ahpw me keren, irail diarada doaropwehn mahs en Paipel tohto me mpen sounpar 1,000 wereisang Leningrad Codex. Mwein ekei kin medewe me mwurin arail pwurupwurehng copy doaropwehn mahs en Paipel kan daulih sounpar 1,000, dahme ntingdi nan Leningrad Codex uhdahn pahn weksang dahme ntingdi nan doaropwehn mahs ko. Ahpw met sohte mehlel. Ni me saman kan ar kapahrekihpene doaropwehn mahs kan oh me kapw kan, irail diarada kisin wekila keite ni lepin lokaia kan oh wehwehn lokaia ko duweduwehte.

8. Ia wekpeseng en copy kan en Palien Paipel ni Lokaiahn Krihs oh copy teikan?

⁸ Tepin Kristian ko pil wiahda copy en Palien Paipel ni Lokaiahn Ipru. Irail kin kanahieng ni arail wiahda copy kan en pwuhk 27 en Palien Paipel ni Lokaiahn Krihs, me irail kin doadoahngki ong arail mihting kan oh ong arail doadoahk en kalohk. Emen ohl saman me kapahrekihpene doaropwehn mahs en Palien Paipel ni Lokaiahn Krihs oh pwuhk teikan sang ahnsowo koasoiahki doaropwehn Paipel  kan: “Mie [doaropwehn mahs en Palien Paipel ni Lokaiahn Krihs] rahnwet me tohtohsang pwuhk teikan . . . oh audepe kan kin unsek sang pwuhk teikan.” Ehu pwuhk (Anatomy of the New Testament) koasoia: “Kitail kak kamehlele me dahme kitail kin wadek nan kawehwe mwahu en [Palien Paipel ni Lokaiahn Krihs] en rahnwet kin kasalehda audepen ire kohte me sounnting kan mahs ntingihdi.”

9. Nin duwen me Aiseia 40:8 mahsanih, dahme mehlel me pid audepen Paipel?

⁹ Erein sounpar epwiki kei, soun copy tohto kin doadoahk laud oh kin kanahieng arail wiahda copy kan en Paipel. Ihme kahrehda kitail naineki Paipel ehu me pwung me kitail kak wadek oh onopki rahnwet. b Kitail ese me Siohwa me ketin tehk mwahu me sapwellime mahsen kin pwung, oh me kitail kak naineki rahnwet. (Wadek Aiseia 40:8.) Ei mehlel, ekei kak nda me mehnda audepen Paipel sohte wekila, met sohte wia mehn kadehde me Koht me ketin kaweid ntingdi en Paipel. Eri met kitail pahn koasoiapene mehn kadehde kei me Paipel pwilisang rehn Koht.

10. Menlau kihda ehu karasaras duwen kokohp ehu me pweida me kasalehda mehlelpen 2 Piter 1:21. (Menlau kilang kilel kan.)

¹⁰ Mie kokohp tohto nan Paipel me pweidahr. Ekei kokohp pwukat ntingdi sounpar epwiki kei mwohn ar pweidahr. Poadopoad kadehdehda me kokohp pwukat pweida. Met sohte kapwuriamwei pwehki kitail ese me Siohwa me ketin kaweid ntingdahn kokohp en Paipel kan. (Wadek 2 Piter 1:21.) Medewehla kokohp kan me pid kahnimw en Papilon eh lohdi. Nanpwungen pahr 778 oh 732 Mwohn Krais, soukohp Aiseia kohpada me kahnimw en Papilon, me uhdahn kehlail ahnsowo, pahn lohdi. E pil koasoia me ohl men me adaneki Sairus pahn kalowehdi kahnimwo, oh e kawehwehda ia duwen eh pahn wia met. (Ais. 44:27–45:2) Aiseia pil kohpada me Papilon pahn kedekedeo ohla oh tehnla. (Ais. 13:19, 20) Ih met me wiawi. Mehn Media oh Persia kan kalowehdi Papilon nan pahr 539 Mwohn Krais, oh wasao me wia kahnimw  laud ehu mahso, met tehnla douluhl.—Menlau kilang kisin kasdo The Bible Foretold the Fall of Babylon nan pwuhken Pereperenki Mour Kohkohlahte!, iren mehn kasukuhl 03 ire 5.

11. Menlau kawehwehda ia duwen Daniel 2:41-43 eh kin pweida rahnwet.

¹¹ Kokohp en Paipel kan sohte pweidahte mahso; kitail kin kilang kokohp kan ar pweipweida rahnwet. Karasepe, medewe duwen pweidahn ahn Daniel kokohpo duwen Kaunda Kehlail en Britain-Amerika. (Wadek Daniel 2:41-43.) Kokohpo kohpada ni pwung me Kaunda Kehlail en Britain-Amerika pahn “kehlail” ni ekei wasa oh “mengei en ohla” ni ekei wasa. Met kin uhdahn pweida. Britain oh Amerika kin uhdahn kehlail. Ira me keieu wiahda soahng tohto pwehn kana nan mahwen riau en sampah pwon oh kin doulahte kehlail ni mahwen. Ahpw ara manaman kin luwetala pwehki towe kan, me kin kalapw uhwong kaunen pesines kan oh koperment. Me keren, emen saman en palien politik koasoia: “Wehin Amerika kin wia wehi ehu en Democracy me kin keieu uhpene nan palien politik.” Oh me keren, Britain kin uhpene pwehki towe kan sohte kin pwungkipene duwen ia pahn mwomwen nanpwungen Britain oh European Union. Ire pwukat kin kahrehda apwal ong Kaunda Kehlail en Britain-Amerika en mwadang wiahda pilipil kan.

12. Dahme kokohp en Paipel kan kin kamehlelehiong kitail?

¹² Kokohp en Paipel tohto me pweidahr kin kakehlaka atail likih sapwellimen Koht inou kan ong ahnsou kohkohdo. Atail pepehm duwehte ahn sounmelkahkao me kapakapohng Siohwa: “I weikengkilahr awiawih komwi en komouriehla; I likih mehlel sapwellimomwi mahsen.” (Mel. 119:81) Sang nan Paipel, ni kadek Siohwa ketikihong kitail “koasoandi mwahu en ahnsou kohkohdo oh koapworopwor.” (Ser. 29:11, NW) Atail koapworopwor ong ahnsou kohkohdo sohte kin poahsoandahsang dahme aramas kin nantihong wia, ahpw sang ni sapwellimen Siohwa inou kan. Kitail en pousehlahte kalaudehla atail likih Mahsen en Koht sang ni atail kin onopki mwahu kokohp en Paipel kan.

13. Nin duwen me Melkahka 119:66, 138 mahsanih, ia pil ehu kahrepe me kitail kak likih Paipel?

¹³ Pil ehu kahrepe me kitail kak likih Paipel iei pwehki e kin sewese aramas akan me kin idawehn eh kaweid kan. (Wadek Melkahka 119:66, 138.) Karasepe, pwopwoud kan me kereniong mweipeseng, kin nsenamwahu ahnsouwet pwehki re kin kapwaiada kaweid en Paipel. Neirail seri kan kin nsenamwahu nan peneinei en Kristian, wasa me arail pahpa nohno kan kin apwalih oh poakohng irail.—Ep. 5:22-29.

14. Kihda ehu karasaras me kasalehda ia duwen doadoahngki kaweid en Paipel eh kin sewese aramas en mwahula.

¹⁴ Sang ni arail doadoahngki kaweid en Paipel kan, aramas akan me wiahda soahng suwed kan pil wekila. Medewehla ia duwen met eh sewese ohl emen me adaneki Jack me mi nan imweteng. c E kin wia tiahk lemei oh keper oh e iang kisehn irail kan me sensel me pahn kamakamala. Ahpw ehu rahno Jack iang onop en Paipel ehu. Brother kan me wia onopo uhdahn kadek oh met sair eh mohngiong, oh e pil tepida onop Paipel. Ni eh doadoahngki padahk mehlel en Paipel nan eh mour, eh wiewia kan mwahula oh e wiahla ohl kadek men. Kedekedeo, Jack  wiahla emen sounkalohk me saikinte papidais, oh mwuhr papidaisla. E kin ngoangki kalohki Wehin Koht ong tohn imweteng teikan oh sewese meh pahmen en esehla padahk mehlel. Ni ahnsou me e pahn kamakamala, Jack wekilahr. Emen nah sounrepenpwung koasoia: “Jack solahr wia aramaso me I ese sounpar 20 samwalahro. Padahk en Sounkadehdehn Siohwa kan wekidala eh mour.” Mendahki Jack kamakamala, eh mehn kahlemeng kin kasansalehda me kitail kak likih Mahsen en Koht, oh me e kak wekidala aramas en mwahula.—Ais. 11:6-9.

15. Ia duwen doadoahngki padahk mehlel en Paipel eh kin kasansalehda sapwellimen Siohwa aramas akan rahnwet? (Menlau kilang kilel.)

¹⁵ Sapwellimen Siohwa aramas akan kin miniminpene pwehki re kin doadoahngki padahk mehlel en Paipel nan arail mour. (Sohn 13:35; 1 Kor. 1:10) Atail popohl oh minimin kin uhdahn sansal pwehki pali laud en aramas rahnwet kin uhkipene palien politik, keinek, de ma irail lapalap de soh. Ohl pwulopwul men me adaneki Jean uhdahn pwuriamweikihla eh kilang minimin en Sounkadehdehn Siohwa kan. E tikida nan sahpw ehu nan Aperika. Ni mahwen ehu eh wiawi, e iangala sounpei ahpw mwuhr e tangala nan ehu sahpw me karanih wasao. Wasao e tuhwong Sounkadehdehn Siohwa kan. Jean koasoia: “I sukuhlki me irail me kin iang kaudok mehlel sohte kin iang pidada palien politik oh sohte kin uhpene. Ahpw irail kin limpoakpene.” E doula koasoia: “I kin doadoahngki ei mour pwehn peiki ehu wehi. Ahpw ni ei esehla padahk mehlel en Paipel, I pilada en doadoahngki ei mour pwehn papah Siohwa.” Jean uhdahn wekila. E sohla kin peiong aramas me weksang ih, ahpw e kin ehukihong koaros me e kin tuhwong padahk mehlel duwen popohl. Kaweid kan en Paipel kin sewese aramas tohto sang soangsoangen sahpw kan, oh met kin kadehdehda me kitail kak likih Mahsen en Koht.

16. Dahme kahrehda e kesempwal ong kitail en kakehlaka atail likih Mahsen en Koht?

¹⁶ Ni sampah wet eh susuwedla, atail likih padahk mehlel pahn lelohng kasongosong. Aramas akan ele pahn song en kahrehiong kitail en peikasalki ma Paipel kin mehlel de ma Siohwa ketin idihada pwihn ehu me kin kaweid sapwellime tohnkaudok kan rahnwet. Ahpw ma kitail kin kamehlele me sapwellimen Siohwa Mahsen kin ahnsou koaros mehlel, kitail pahn kak pelianda soangen kasongosong en pwoson. Kitail pahn ‘peikiong sapwellimen Siohwa kosonned kan lao lel’ ni imwi. (Mel. 119:112) Kitail sohte pahn “namenengki” en padahkihong meteikan duwen padahk mehlel oh kangoange irail en doadoahngki nan arail mour. (Mel. 119:46) Oh kitail pahn kak dadaurete pahn irair keieu apwal akan, me iangahki kalokolok, “ni kanengamah oh peren.”—Kol. 1:11; Mel. 119:143, 157.

17. Dahme atail iren pahr wet pahn katamankihong kitail?

¹⁷ Ia uwen atail kalahnganki me Siohwa ketin kasalehiong kitail padahk mehlel! Padahk mehlel kin sewese kitail en meleilei, oh padahkihong kitail ni sansal ia duwen atail pahn mour nan sampah suwed wet me kin pingiping. E kin kihong kitail koapworopwor mwahu ong ahnsou kohkohdo pahn kaundahn Wehin Koht. Atail iren pahr en 2023 en sewese kitail en kamehlele me Mahsen en Koht pwon me mehlel!—Mel. 119:160.