1-2. (a) Ia atail pepehm ni atail kin medewehla sapwellimen Sises mour oh kalohk? (b) Dahme kitail pahn koasoiapene nan iren onop wet?

 NI AHNSOU me aramas me kitail poakohng mehla, kitail kin uhdahn loaleidki! Nin tapio, mweinele kitail kin medek ni atail kin medewehla rahn kei mwohnte eh mehla, ahpw mehlel ma e wie lokolok mwohn eh mehla. Ahpw mwurin ahnsou kei, kitail kin pwurehng tepida nsenamwahula, ni atail kin medewehla soahng kan me e padahkihong kitail de soahng kan me e wia de nda pwehn kangoange de kaperenih kitail.

² Duwehte met, kitail kin nsensuwedla ni atail kin wadek sapwellimen Sises lokolok oh pwoula. Erein ahnsoun Kataman, kitail kin koasoanehdi ahnsou en medemedewe sapwellime pweinen pweipwei sapahlo. (1 Kor. 11:24, 25) Ahpw, kitail kin uhdahn peren ni atail medewehla mehkoaros me Sises ketin mahsanih oh wia ni eh ketiket nin sampah. Met pil kin kangoange kitail ni atail kin medewehla dahme e ketin wiewia ni ahnsou wet oh dahme e pahn ketin wiahiong kitail ni ahnsou kohkohdo. En doudouloale mepwukat oh sapwellime limpoak ong kitail kak kamwakid kitail en kasalehda atail kalahngan ni soangen ahl akan, duwehte me kitail pahn tehkpene nan iren onop wet.

3. Soangen kahrepe dah kan me kitail kak kalahnganki pweinen pweipwei sapahlo?

³ Ni atail kin medewe sapwellimen Sises mour oh pwoula kitail kin kalahnganki. Erein sapwellime doadoahk en kalohk, e kin ketin padahkihong aramas akan kapai kan me Wehin Koht pahn wahdo. Kitail uhdahn kalahnganki padahk mehlel pwukat duwen Wehio. Kitail kalahnganki pweinen pweipwei  sapahlo pwehki e ritingada elen atail pahn kompoakepahnki Siohwa oh Sises. Irail akan me kin pwoson Sises pil ahneki koapworopwor en mour kohkohlahte oh pwurehng tuhwong irail akan me re poakohng me melahr. (Sohn 5:28, 29; Rom 6:23) Sohte mehkot me kitail wiahda pwe kitail en warohng kapai pwukat; de pil kitail sohte kak kasapahlkihong Koht oh Krais dahme ira ketin wiahiong kitail. (Rom 5:8, 20, 21) Ahpw kitail kak kasalehiong ira uwen atail kalahnganki met. Ia duwen?

4. Ia duwen Mery mehn Makdala eh kasalehda eh kalahnganki dahme Sises ketin wiahiong ih? (Menlau kilang kilel.)

⁴ Medewehla mehn kahlemeng en lihen Suhs men me adaneki Mery mehn Makdala. E kin wie lokolok laud pwehki ngehn suwed isimen kin kaloke. Mwein e pil medewe me sohte me kak sewese ih. Medewehla uwen eh kalahnganki Sises eh ketin kasaledekihala sang pahn manaman en ngehn suwed ko! Eh kalahngan kamwakid ih en wiahla sapwellime tohnpadahk oh doadoahngki eh ahnsou, kehl oh dipwisou kan pwehn utung Sises nan kalohk. (Luk 8:1-3) Mendahki Mery uhdahn kalahnganki dahme Sises ketin wiahiong ih, mweinele e pil sehse me sapwellime kisakis me keieu laudo kohkohdo. E pahn ketin toukihda sapwellime mour ong aramas, “pwe mehmen me kin kasalehda eh pwoson ih” en kak ahneki mour soutuk. (Sohn 3:16) Ahpw Mery kasalehda eh kalahngan ong Sises sang ni eh loalopwoatete. Ni Sises eh medemedek pohn tuhkehn kalokoloko, Mery kesikesihnen limwah, pwehki e nsenohki Sises oh men kansenamwahwih meteikan me mi wasao. (Sohn 19:25) Mwurin Sises eh ketin pwoula, Mery oh lih riemen wahdo mehn kapwohtik kei ni sousowo. (Mark 16:1, 2) Mery alehdi keting laud pwehki eh loalopwoat. E tuhwong Sises me ketin iasada oh pato ong ih—kapai ehu me pali laud en tohnpadahk ko sohte ahneki.—Sohn 20:11-18.

5. Ia duwen atail kak kasalehda me kitail kalahnganki mehkoaros me Siohwa oh Sises ketin wiahiong kitail?

 ⁵ Kitail pil kak kasalehda atail kalahnganki mehkoaros me Siohwa oh Sises ketin wiahiong kitail ni atail doadoahngki atail ahnsou, kehl oh mwohni pwehn papah Siohwa. Karasepe, kitail kak toukihda pein kitail en iang kauwada de kin apwalih mwahu ihmw kan me kitail kin doadoahngki ong kaudok en Siohwa.

6. Dahme kahrehda kitail kak nda me pweinen pweipwei sapahlo wia kisakis ehu ong emenemen kitail?

⁶ Ni atail kin medewehla uwen Siohwa oh Sises ara ketin poakohng kitail, met kin kamwakid kitail en poakohng ira. (1 Sohn 4:10, 19) Atail poakohng ira kin ahpwte laudla ni atail wehwehkihda me Sises ketin pwoukinkitailla. Wahnpoaron Pohl pohnese met oh kasalehda eh kalahngan ni eh ntingkilahng mehn Kalesia kan: “Sapwellimen Kohto . . . ketin poakohng ie oh pangala pein ih ong ie.” (Kal. 2:20) Pwehki pweinen pweipwei sapahlo, Siohwa kak ketin kakerenihiukala reh pwe ken wiahla kompoakepah. (Sohn 6:44) Met sou kansenamwahu ong uhk en ese me Siohwa ketin mwahngiher mehkot mwahu rehmw oh ketin pwainla pweipwei laud ehu pwe ken kak wiahla kompoakepah? Met sou kalaudehla omw poakohng Siohwa oh Sises? Eri, kitail pein idek rehtail, ‘Dahme limpoak wet pahn kamwakid ie I en wia?’

7. Nin duwen me kilelo kasalehda, ia duwen kitail koaros kak kasalehda me kitail poakohng Siohwa oh Sises? (2 Korint 5:14, 15; 6:1, 2)

⁷ Atail poakohng Koht oh Krais kin kamwakid kitail en poakohng meteikan. (Wadek 2 Korint 5:14, 15; 6:1, 2.) Ehu elen kasalehda atail limpoak iei sang ni atail kin ngoangki  iang kalohk. Kitail kin koasoiong aramas koaros me kitail tuhwong. Kitail sohte kin soikala koasoiong aramas akan pwehki re kohsang ehu wehi de keinek. Kitail pil kin koasoiong koaros mehnda ma re kepwehpwe oh sukuhl, de semwehmwe oh sohte sukuhl. Ni atail kin wia met kitail kin kapwaiada kupwuren Siohwa me “soangen aramas koaros en komourla oh esehla loalokong pwung en me mehlel.”—1 Tim. 2:4.

8. Ia duwen atail kak kasalehda me kitail poakohng riatail Kristian kan?

⁸ Kitail pil kin kasalehda atail poakohng Koht oh Krais ni atail kin poakohng riatail Kristian kan. (1 Sohn 4:21) Kitail kin uhdahn nsenohki ar anahn kan oh kin sewese irail nan ar apwal akan. Kitail kin kansenamwahwih irail ni emen me re poakohng mehla, oh mwemweitla rehrail ni ar soumwahu oh wia uwen atail kak en kangoange irail ni ar mworusala. (2 Kor. 1:3-7; 1 Des. 5:11, 14) Kitail pousehlahte kapakapkin irail oh tamataman me “kapakap ngidingid en aramas pwung men kin manaman.”—Seims 5:16.

9. Ia pil ehu elen atail kak kasalehda me kitail poakohng riatail Kristian kan?

⁹ Kitail pil kin kasalehda atail poakohng riatail Kristian kan ni atail kin nantihong kolokol popohl rehrail. Kitail kin nantihong kahlemengih sapwellimen Siohwa mahk. Ma Siohwa kupwurki mweidala sapwellime Ohlo en pwoukihla dipatail kan, kitail sou anahne mwadang mahkohng riatail Kristian kan ni ar wiahiong kitail dihp? Kitail sohte men duwehte ladu suwedo me mi nan ehu sapwellimen Sises karasaras ko. Mendahki mwurin en laduwo soumaso irisala eh pweipwand laudo, laduwo sohte mahkohng en iengeo pweipwand tikitiko. (Mad. 18:23-35) Ma mie sawehwe nanpwungen kowe oh emen nan mwomwohdiso, ke kak tiengla mwowe oh wiahda popohl mwohn omw iang towehda Katamano? (Mad. 5:23, 24) Ma ke wia met, ke pahn kasalehda me ke uhdahn poakohng Siohwa oh Sises.

10-11. Ia duwen elder kan ar kak kasalehda me re poakohng Siohwa oh Sises? (1 Piter 5:1, 2)

¹⁰ Ia duwen elder kan ar kak kasalehda me re poakohng Siohwa oh Sises? Ehu ahl kesempwal iei apwalih anahn en sapwellimen Sises sihpw kan. (Wadek 1 Piter 5:1, 2.) Sises ketin kasalehiong Piter kesempwalpen met. Mwurin Piter eh kahmahmkihla Sises pak siluh, mweinele Piter uhdahn men kadehdehda me e poakohng Sises. Mwurin Sises eh ketin iasada, e keinemwe rehn Piter: “Saimon nein Sohn, ke poakohng ie?” Kitail kak kamehlele me Piter pahn wia uwen eh kak koaros en kadehdehda me e poakepoake eh Soumaso. Sises mahsanihong Piter: “Apwalih nei kisin sihpw kan nin duwen silepe men.” (Sohn 21:15-17) Eri, erein en Piter mour, e kin apwalih mwahu sapwellimen Kauno sihpw kan oh kadehdehda me e poakohng Sises.

¹¹ Elder kan, erein ahnsoun Katamano, ia duwen amwail kak kadehdehda me kumwail kesempwalki sapwellimen Sises mahsen ko ong Piter? Kumwail kak kasalehda uwen amwail poakohng Siohwa oh Sises sang ni amwail kin kaukaule wiahda ahnsou en kangoange riamwail Kristian kan oh nantihong sewese irail kan me sohla iang kalohk oh mihting ren pwurodo rehn Siohwa. (Esek. 34:11, 12) Kumwail pil kak nantihong kangoange tohnsukuhl en Paipel kan oh me kapw kan me iang towehda katamano. Kitail kasamwo irail pwehki kitail koapworopworki me re pahn wiahla sapwellimen Sises tohnpadahk.

12. Dahme kahrehda atail medemedewe sapwellimen Sises mahsen ko nipwongo mwohn eh ketin pwoula, kak kihong kitail eimah? (Sohn 16:32, 33)

¹² Nipwongo mwohn Sises eh ketin pwoula, e mahsanihong sapwellime tohnpadahk ko: “Kumwail pahn ahneki kahpwal nin sampah, ahpw kumwail eimah! Pwe I kalowedier sampah.” (Wadek Sohn 16:32, 33.) Dahme sewese Sises en kak eimahiong sapwellime imwintihti kan oh lelepekte lao e ketin pwoula? E likih Siohwa. Pwehki Sises mwahngih me sapwellime tohnpadahk ko pahn lelohng soangen kasongosongkohte, e patohwan peki Siohwa en ketin sinsile irail. (Sohn 17:11) Dahme kahrehda met kihong kitail eimah? Pwehki Siohwa ketin kehlailsang atail imwintihti kan koaros. (1 Sohn 4:4) Siohwa kin ketin mahsanih mehkoaros. Kitail kamehlele me ma kitail likih Siohwa, kitail kak powehdi masak oh kin eimah.

13. Ia duwen Sosep mehn Arimadea eh kasalehda eimah?

¹³ Medewehla mehn kahlemeng en Sosep mehn Arimadea. Mehn Suhs kan kin wauneki. Ih emen tohn Sanedrin, mwoalen kopwung en mehn Suhs kan. Ahpw, erein sapwellimen Sises doadoahk en kalohk, Sosep sohte kin eimah. Sohn nda me e wia “emen sapwellimen Sises tohnpadahk ko, ahpw ni rir, pwehki eh masak mehn Suhs ako.” (Sohn 19:38) Mendahki Sosep kin perenki rohng en Wehio, e ekihsang aramas teikan me e pwoson Sises. Mweinele e masak me aramas ako pahn sohla wauneki ma re esehda me ih sapwellimen Sises tohnpadahk. Ahpw Paipel mahsanihong kitail me mwurin Sises eh ketin pwoula, Sosep eri, “eimah pwarala rehn Pailet oh pekihda kahlap en Siseso.” (Mark 15:42, 43) Met Sosep sohla kin ekieki me e wia emen tohnpadahk.

14. Dahme ke anahne wia ma ke kin masak aramas?

¹⁴ Mie pak ke kin masak aramas duwehte Sosep? Mie pak ke kin namenengki kasalehda me kowe emen Sounkadehdehn Siohwa nan sukuhl de doadoahk? Ke kin pweiek en wiahla sounkalohk de papidaisla pwehki ke pwunodki dahme meteikan pahn medewehkin uhk? Dehr mweidohng pepehm pwukat en kauhiukedihsang wia dahme ke ese me pwung. Kapakap ngidingidiong Siohwa. Peki en ketikihong uhk eimah ken wia kupwure. Ni omw kilang Siohwa eh ketin sapengala omw kapakap kan, ke pahn kehlailla oh omw eimah pahn laudla.—Ais. 41:10, 13.

15. Mwurin Sises eh ketin pwarohng sapwellime tohnpadahk ko, dahme ar peren kamwakid irail en wia? (Luk 24:52, 53)

¹⁵ Tohnpadahk ko uhdahn nsensuwedla ni Sises eh ketin pwoula. Medewehla ma kowe me mi nan arail irairo. Re sohte luhsangete kompoakparailo me re poakepoake ahpw re pil pehm me sohla ar koapworopwor. (Luk 24:17-21) Ahpw ni Sises eh ketin pwarohng irail, e ketin doadoahngki ahnsou en sewese irail en wehwehki me e ketin kapwaiada kokohp en Paipel. E pil ketikihong irail doadoahk kesempwal ehu ren wia. (Luk 24:26, 27, 45-48) Ni ahnsou me Sises ketidahla nanleng mwurin rahn 40, tohnpadahk ko sohla nsensuwed ahpw re uhd pereperen kowahlap. Re uhdahn peren pwe re eseier me ar Soumaso ketin ieias oh e pahn sewese irail nan doadoahk me e ketikihong irail. Ar peren kamwakid irail en sohte uhdihsang kapinga Siohwa.—Wadek Luk 24:52, 53; Wiewia 5:42.

16. Ia duwen atail kak alasang sapwellimen Sises tohnpadahk ko?

¹⁶ Ia duwen atail kak alasang sapwellimen Sises tohnpadahk ko? Kitail kak pereperen ni atail kaudokiong Siohwa, kaidehn ahnsoun Katamanohte ahpw erein pahro pwon. Met wehwehki me kitail anahne mwohneki mahs Wehin Koht nan atail mour. Karasepe, me tohto wekidala ar koasoandi en doadoahk pwe ren kin kaukaule iang kalohk, towehda mihting oh kaudok en peneinei. Ekei kin pilada ren sohte ahneki kepwe kan me meteikan medewe me anahn, pwe irail en kak kalaudehla ar papah nan mwomwohdiso de kak keseula wasa me mie anahn laud ong sounkalohki Wehio. Mendahki kitail kin anahne kanengamah pwehn pousehlahte papah Siohwa, e ketin inoukihda en kapaia kitail ma kitail kin mwohneki mahs Wehio nan atail mour.—Lep. Pad. 10:22; Mad. 6:32, 33.

17. Dahme ke koasoanehdi en wia ni erein Kataman wet? (Menlau kilang kilel.)

¹⁷ Kitail kasikasik en iang towehda Katamano, Niare April 4. Ahpw, dehr awih lao lel rahno pwehn medemedewe sapwellimen Sises mour oh pwoula oh limpoak me ih oh Siohwa ketin kasalehiong kitail. Isaneki ahnsou mwahu koaros en medemedewe mepwukat erein nan wihk kan mwohn oh mwurin Katamano. Karasepe, koasoanehdi ahnsou en wadek oh medemedewe mwekid kan me kileldi nan Doaropwehn Kasukuhl ong Mihting, April 2019 pali 4. Ni omw wia met, rapahki iren Paipel kan me kin kakehlaka omw kalahngan, limpoak, eimah oh peren. Mwuri, song medewehla ahl akan me ke kak kasalehda omw kalahngan. Ke kak kamehlele me Sises pahn ketin kesempwalki mehkoaros me ke wia pwehn tamataman ih erein ahnsoun Katamano.—Kaud. 2:19.