1-2. Dahme kahrehda kitail kin iang towehda Katamano nan pahr koaros?

 KERENIONG sounpar 2,000 samwalahro, Sises ketikihda sapwellime mour ong kitail oh met ritingadahng kitail elen alehdi mour soutuk. Nipwongo mwohn Sises eh ketin pwoula, e ketin kehkehlingkihong sapwellime tohnpadahk ko ren tamataman sapwellime meirong wet sang ni ar pahn wia kataman ehu me pidada pilawa oh wain.—1 Kor. 11:23-26.

² Kitail kin peikiong sapwellimen Sises kehkehliko pwehki kitail uhdahn poakohng ih. (Sohn 14:15) Sounpar koaros erein ahnsoun Katamano, kitail kin kasalehda atail kalahnganki dahme e ketin wiahiong kitail ni atail wiahda ahnsou en medemedewe oh kapakapki wehwehn sapwellime pwoula. Kitail pil kin kalaudehla atail kalohk oh nantihong luke me tohto ren iang kitail ni ahnsou kesempwal wet. Oh kitail kin koasoanehdi en dehr mweidohng mehkot en irekitaildihsang iang towehda Katamano.

3. Dahme kitail pahn koasoiapene nan iren onop wet?

³ Nan iren onop wet, kitail pahn koasoiapene ahl siluh me sapwellimen Siohwa aramas akan kin wia uwen ar kak en kataman sapwellimen Sises pwoula: (1) ni ar wia Katamano duwehte me Sises ketin padahkihong irail, (2) ni ar luke meteikan ong Katamano, oh (3) ni ar iang towehda Katamano mendahki irair apwal akan.

4. Dahme kitail kin sukuhlki nan pahr koaros ni ahnsoun Katamano, oh dahme kahrehda kitail en dehr sohla kesempwalki padahk mehlel pwukat? (Luk 22:19, 20)

⁴ Nan pahr koaros ni Katamano, kitail kin rong padahk me poahsoankihda Paipel me kin sapengala peidek tohto ni sansal. Kitail kin sukuhlki dahme kahrehda aramas akan anahne pweinen pweipwei sapahlo oh ia duwen mehlahn aramas tehmen eh kak pwainla dipen me tohto. Padahko kin katamankihong kitail dahme pilawao oh waino kin dokedoke oh ihs me pahn tungoale. (Wadek Luk 22:19, 20.) Oh kitail kin doudouloale kapai ong irail kan me ahneki koapworopwor en mour kohkohlahte nin sampah. (Ais. 35:5, 6; 65:17, 21-23) Kitail dehr sohla kesempwalki padahk mehlel pwukat. Aramas lik kei sohte kin wehwehki mepwukat, oh re sohte kin wehwehki uwen kesempwal en sapwellimen Sises meirongo. Irail pil sohte kin wia Katamanpen sapwellime pwoula ni soangen mwohmwo me Sises ketin kasalehda. Dahme kahrehda?

5. Mwurin pali laud en wahnpoaron ko ar mehla, ia duwen aramas akan ar tepida wia katamanpen pwoulahn Sises?

⁵ Mwurinte pali laud en sapwellimen Sises wahnpoaron ko mehla, Kristian likamw kan miehla nan mwomwohdiso. (Mad. 13:24-27, 37-39) Re koasoia “soahng kan me kin kapirekihala me mehlelo pwe en kihsang tohnpadahk kan pwe ren idawehnirailla.” (Wiewia 20:29, 30) Ehu “soahng kan me kin kapirekihala me mehlelo” me re tepida padahngki, iei me dene Sises sohte toukihda kahlepeo “pak ehute pwe en alehda dipen me tohto,” nin duwen me Paipel mahsanih, ahpw dene me eh meirongo kin anahne pwurupwurehng wiawi. (Ipru 9:27, 28) Rahnwet aramas tohto kamehlele padahk likamw wet. Re kin kohpene sarawi nan wihk koaros oh ekei pak rahn koaros, pwe ren kasarawi sapwellimen Sises meirongo me pelien lamalam en Kadolik kin kahdaneki “Meirong en Mihsa.” b Ekei pelien lamalam sohte kin kalapw wia katamanpen pwoulahn Sises oh pali moron en arail tohn sarawi kan sohte kin uhdahn wehwehki wehwehn sapwellimen Sises meirongo. Mweinele ekei kin medewe, ‘I kak uhdahn ale mahkpen dipei kan pwehki sapwellimen Sises pwoula?’ Dahme re kin idengki met? Pwehki re kin rong me ke sohte kak ale mahkpen dipomw sang ni pwoulahn Sises. Ia duwen sapwellimen Sises tohnpadahk mehlel kan ar apwalihala irair wet?

6. Dahme pwihn en tohnsukuhl en Paipel ehu wehwehkihda nan pahr 1872?

⁶ Nan pahr 1870 samwa, pwihn en tohnsukuhl en Paipel ehu me Charles Taze Russell kin apwalih tepida onopki Paipel ni keneinei. Irail men ese padahk mehlel duwen kesempwalpen sapwellimen Sises meirongo oh mwomwen ar pahn wia katamanpen sapwellime pwoula. Nan pahr 1872, re wehwehkihda me e mehlel Sises ketikihda pweinen pweipwei sapahl ehu ong aramas koaros. Re sohte kolokolete dahme re diarada. Ahpw, re padahkihong meteikan ni ar doadoahngki pwuhk oh nuhspehpa kan. Mwurinte mwo, re alasang tepin Kristian ko oh tepida wia Katamano pak ehu nan sounpar ehu.

7. Ia duwen atail paiekihda roporop me tepin tohnsukuhl en Paipel ko wiahda?

⁷ Rahnwet kitail kin paiekihda roporop me Kristian mehlel pwukat wiahda mahso. Ia duwen? Siohwa ketin sewese kitail  en wehwehkihla dahme sapwellimen Sises meirongo kin wehwehki oh dahme met pahn wiahiong kitail oh aramas koaros. (1 Sohn 2:1, 2) Kitail pil sukuhlkihdi me Paipel kasalehda koapworopwor riau ong aramas akan me kin kaperenda Koht—ekei mour soutuk nanleng a aramas rar teikan mour soutuk nin sampah. Kitail kin karanihala Siohwa ni atail kin medewehla uwen eh ketin poakohng kitail oh uwen laud en atail paiekihda meirong en Siseso. (1 Pit. 3:18; 1 Sohn 4:9) Eri duwehte riatail me lelepek kan mahso, kitail kin luke aramas akan ren iang kitail wia Katamano duwehte me Sises ketin kasalehda.

8. Soahng dah kan me sapwellimen Siohwa aramas akan kin wia pwehn luke meteikan ong Katamano? (Menlau kilang kilel.)

⁸ Erein sounpar tohto sapwellimen Siohwa aramas akan kin luke meteikan ong Katamano. Mwohnte pahr 1881, mie pakair ehu nan Kahn Iroir me luke brother oh sister kan ren tuhpene nan imwen brother men nan Allegheny, Pennsylvania ong ahnsou tohrohr wet. Mwuhr, ehuehu mwomwohdiso pein wia Kataman wet. Nan March 1940, pakair kowohng sounkalohk kan me re kak luke meteikan nan ar wasahn kalohk me perenki rong. Nan pahr 1960, iei tepin ahnsou me Pedel wiahda doaropwehn luhk ong mwomwohdiso kan. Sang ahnsowo kohla, doaropwehn luhk lik kei kohpesengier. Dahme kahrehda kitail kin doadoahk laud en luke aramas akan?

9-10. Ihs me kin paiekihda ni atail nantihong luke meteikan ong Katamano? (Sohn 3:16)

⁹ Ehu kahrepen kitail kin doadoahk laud en luke aramas akan ong Katamano, iei kitail  men irail kan me tepin iang towehda ren sukuhlki padahk mehlel duwen dahme Siohwa oh Sises ketin wiadahr ong kitail koaros. (Wadek Sohn 3:16.) Kitail koapworopworki me dahme re rong oh kilang ni Katamano pahn kamwakid irail en kalaudehla dahme re sukuhlki oh wiahla ladu en Siohwa. Ahpw meteikan pahn pil iang paiekihda.

¹⁰ Kitail pil kin luke irail kan me sohla papah Siohwa. Kitail kin wia met pwehn katamankihong irail me Koht kin ketin poakohng irail. Me tohto kin mwekidki atail luhko oh kitail kin uhdahn perenkihda ni ar kohdo. Ni ar kin iang towehda Katamano, met kin katamankihong irail peren me re ahneki ni ar kin papah Siohwa mahso. Medewehla dahme Monica c wia. E pwurehng tepida iang kalohk erein soumwahu lusulus en COVID-19. Mwurin eh iang towehda Katamano nan pahr 2021, e koasoia: “Kataman en pahr wet uhdahn kesempwal ong ie. Mwurin sounpar 20, ehdin ei pwurehng tepida kalohk oh luke aramas ong Katamano. I wia uwen ei kak en luke meteikan pwehki I uhdahn kalahnganki dahme Siohwa oh Sises ketin wiahiong ie.” (Mel. 103:1-4) Sohte lipilipil ma aramas akan mwekidki atail luhko de soh, kitail wia uwen atail kak en luke aramas ong Katamano, pwehki kitail ese me Siohwa ketin kalahnganki atail kin nannanti.

11. Ia duwen Siohwa eh ketin kapaiahda atail nantihong luke aramas ong Katamano? (Akkai 2:7)

¹¹ Siohwa kin uhdahn ketin kapaia atail kin nantihong luke aramas akan ong Katamano. Nan pahr 2021, mendahki mie keinapwidi kan sang soumwahu lusulus COVID-19, aramas me iang towehda Katamano meh 21,367,603. Nempe wet kereniong pak riau elep en tohtohn Sounkadehdehn Siohwa kan nan sampah pwon! Ni mehlel, Siohwa sohte kin ketin nsenohkihte meh depe me iang towehda. E ketin nsenohki emenemen aramas me iang towehda. (Luk 15:7; 1 Tim. 2:3, 4) Kitail kak kamehlele me ni atail kin luke aramas akan, Siohwa kin ketin sewese kitail en diarada irail kan me ahneki mohngiong mehlel.—Wadek Akkai 2:7.

12. Dahme kak kahrehda en apwal ong kitail en iang towehda Katamano? (Menlau kilang kilel.)

¹² Sises ketin kohpada me ni imwin rahn akan, kitail pahn lelohng soangsoangen kahpwal kan—uhwong sang peneinei, kalokolok, mahwen, soumwahu lusulus oh soahng teikan. (Mad. 10:36; Mark 13:9; Luk 21:10, 11) Ekei pak, soahng pwukat kin kahrehda e apwal kitail en wia katamanpen pwoulahn Sises. Dahme riatail Kristian kan wia pwehn powehdi kahpwal pwukat, oh ia duwen Siohwa eh ketin sewese irail?

13. Ia duwen Siohwa eh ketin kapaia en Artem eimah oh eh koasoanehdi teng en wia Katamano erein eh wie sensel?

¹³ Selidi. Riatail kan me mi nan imweteng pwehki ar pwoson kin wia uwen ar kak en kataman pwoulahn Sises. Medewehla dahme Artem wia. Erein ahnsoun Kataman en pahr 2020, e selidi nan kisin pere ehu me tehlapki piht 183 (17 sq m) me ekei pak aramas limmen mi loale. Mendahki e selidi, e kak kihpene ekei soahng kan pwehn doadoahngki ong Katamano, oh e koasoanehdi en wia padahk en Katamano ong pein ih. Ahpw ienge tohn kalapwuhs ko kin sumwoak oh kalapw lokaia suwed. Dahme e wia? E peki ma re kak dehr sumwoak oh lokaia suwed erein awa ehu. Artem pwuriamweikihla me re  pwungki re sohte pahn sumwoak de lokaia suwed erein Katamano. E koasoia, “I peki ma I kak koasoiaiong irail duwen Katamano.” Mendahki re nda me re sohte men rong, mwurin ar kilang oh rong Artem eh wia Katamano, re ahpw idek reh mehkoaros duwen Katamano.

14. Ia duwen sapwellimen Siohwa aramas akan ar wia Katamano mendahki soumwahu lusulus en COVID-19?

¹⁴ Soumwahu lusulus en COVID-19. Ni ahnsou me soumwahu lusulus wet wiawi, sapwellimen Siohwa aramas akan sohte kak pokonpene wia Katamano. Ahpw met sohte kauhiraildihsang wia Katamano. d Mwomwohdiso kan me kak doadoahngki Internet wia Katamano nan online (videoconference). Ahpw ia duwen aramas rar kan me sohte kak doadoahngki Internet? Nan ekei wehi kan, mie koasoandi wiawihda pwe padahko en wiawi nan tv de redio. Patehng met, ohpis en Sounkadehdehn Siohwa kan rekord padahko ni lokaia daulih 500 pwe irail kan me mi wasa doh en kak wia Kataman wet. Brother lelepek kan eri koasoanehdi pwe  rekord pwukat en pekederla rehn irail kan me anahne.

15. Dahme ke sukuhlkihsang tohnsukuhl en Paipelo me adaneki Sue?

¹⁵ Uhwong sang peneinei. Ong ekei, kahpwal me keieu laud en iang towehda Katamano iei uhwong sang peneinei. Medewehla dahme emen tohnsukuhl en Paipel me adaneki Sue wia. Nan pahr 2021, rahn ehu mwohn Katamano, Sue ndaiong me kin onop Paipel reho me pwehki ekei tohn eh peneineio kin uhwong ih, e sohte pahn kak iang towehda Katamano. Me kin onop Paipel reho eri wadek Luk 22:44. Ih eri kawehwehiong me ni atail lelohng kahpwal akan, kitail en kahlemengih Sises ni atail kapakapohng Siohwa oh kin uhdahn likih Ih. Mandahn rahno, Sue eri kaunopada pilawao oh waino oh kilang prokram en Kaudok en Nimensengo nan jw.org. Ni soutiko, ni eh kelekelehpw nan eh pereo, e doadoahngki nah sehlpwohno pwehn rong Katamano. Mwurin mwo, Sue eri ntinglahng me kin onop Paipel reho: “Ke uhdahn kangoange ie aio. I wia uwen ei kak koaros en iang towehda Katamano oh Siohwa uhdahn ketin sewese ie. I sohte kak kasalehda uwen ei peren oh kalahnganki met!” Ke medewe Siohwa kak ketin seweseiuk ma ke lelohng nan soangen irairo?

16. Dahme kahrehda kitail kamehlele me Siohwa pahn ketin kapaia atail kin nantihong towehda Katamano? (Rom 8:31, 32)

¹⁶ Siohwa uhdahn ketin kalahnganki ni atail kin nantihong Kataman pwoulahn Sises. Kitail kak kamehlele me e pahn ketin kapaia kitail ni atail kin kasalehda me kitail kalahnganki dahme e ketin wiahiong kitailehr. (Wadek Rom 8:31, 32.) Eri, kitail koasoanehdi teng en iang towehda Kataman en pahr wet oh kitail kalaudehla atail papah Siohwa erein wihk kan mwohn oh mwurin Katamano.