Ekei tikida nan soangen tiahk kan me ohl tohto sohte kin kesempwalki lih akan. Karasepe, Hans, emen sounapwalih me kin seiloak nan Bolivia, koasoia me ekei ohl tikida nan tiahk kan me kin kangoange ohl akan en kin pohnmwahso. Ohl pwukat kamehlele me irail pohnangin lih oh kin mwamwahliki lih. Shengxian, elder men nan Taiwan, koasoia: “Wasa me I kin kousoan ieo, ohl tohto medewe me lih akan en dehr kasalehda arail lamalam. Ma ohl emen koasoia dahme lih emen medewehki mehkot, ienge ohl akan kakete kilengdiong ih.” Ekei ohl kin kasalehda arail lipilipilki lih ni ahl teikan. Karasepe, irail ele kin wia soangen kamwan kan me kasalehda arail mwamwahliki lih.

Kitail kalahnganki me sohte lipilipil soangen tiahk dah me ohl emen tikida loale, e kak wekila. E kak powehdi madamadauo me dene ohl akan kesempwal sang lih akan. (Ep. 4:​22-24) Met kak wiawi ma re kin alasang sapwellimen Siohwa mehn kahlemeng. Nan artikel wet, kitail pahn koasoiapene ia sapwellimen Siohwa wiewia ong lih akan, ia duwen brother kan ar kak sukuhlki en alasang Siohwa nan arail wiewia ong lih kan, oh ia duwen elder kan ar kak tiengla mwowe oh kasalehda arail wauneki sister kan.

IA SAPWELLIMEN SIOHWA WIEWIA ONG LIH AKAN?

Siohwa ketin wiahda mehn kahlemeng unsek ong mwomwen atail wiewia ong lih akan. Nin duwen Sahm limpoak men, e kin ketin poakohng sapwellime seri kan koaros. (Sohn 3:16) Oh lih Kristian lelepek kan kin rasehng sapwellime serepein kesempwal kei. Tehk ekei ahl akan me kileldi pah duwen Siohwa eh kin ketin kasalehda eh poakohng oh wauneki lih akan.

Sapwellime wiewia ong irail kin pahrek. Siohwa ketin kapikada ohl oh lih rasehng ih. (Sen. 1:27) E sohte ketin wiahda ohl akan en loalokong sang de koahiek sang lih akan, de ketin kupwurperenki ohl akan laudsang lih akan. (2 Kron. 19:7) E ketin kapikada ohl oh lih en ahneki soangen koahiektehieu  pwehn kak wehwehki padahk mehlel en Paipel oh alasang sapwellime irair kaselel kan. Siohwa pil kin ketin kesempwalki ohl oh lih akan me kin pwoson ih. E ketikihong ohl oh lih akan koapworopwor en mour kohkohlahte nin sampah, de koapworopwor en iang papah nin duwen nanmwarki oh samworo kei nanleng. (2 Pit. 1:​1, ntp.) Eri, e sansal me Siohwa sohte kin ketin lipilipilki lih akan.

E kin ketin karonge irail. Siohwa kin ketin nsenohki duwen pepehm oh kahpwal kan me lih akan kin ahneki. Karasepe, e ketin karonge oh sapengala ahn Resel oh Ana ara kapakap. (Sen. 30:22; 1 Sam. 1:​10, 11, 19, 20) Siohwa pil ketin doadoahngki sounnting kan en Paipel en ntingihedi koasoipen ohl akan me kin rong lih akan. Karasepe, Eipraam kapwaiada sapwellimen Siohwa kaweid oh rong eh pwoudo, Sara. (Sen. 21:​12-14) Nanmwarki Depit pil rong Apikail. Ni mehlel, e medewe me Siohwa me ketin poaronehla Apikail en koasoiong ih. (1 Sam. 25:​32-35) Sises, me kin ketin kahlemengih ni unsek irair kaselel kan en Semeo nanleng, kin karonge ineo, Mery. (Sohn 2:​3-10) Mehn kahlemeng pwukat kasalehda me ehu ahl me Siohwa kin ketin kasalehda eh wauneki lih akan iei sang ni eh kin ketin karonge irail.

E ketin likih irail. Karasepe, Siohwa ketin likih de koapworopworki Ihp en iang sewese apwalih sampah pwon. (Sen. 1:28) Sang ni eh wia met, e ketin kasalehda me e ketin wiahki Ihp sounsawas kesempwal men, a kaidehn emen me mi pahnangin Adam. Siohwa pil ketin likih me lih soukohp ko Depora oh Ulda en kaweid sapwellime aramas akan, iangahki sounkopwung men oh nanmwarki men. (Sounkopwung 4:​4-9; 2 Nan. 22:​14-20) Rahnwet, Siohwa kin ketin likih lih Kristian kan en iang wia sapwellime doadoahk. Sister lelepek pwukat kin papah nin duwen sounkalohk, pioneer, oh misineri kei. Irail kin sewese pilahnehda, kauwada, oh apwalih Wasahn Kaudok kan oh ohpis en Sounkadehdehn Siohwa kan. Ekei irail kin papah nan Pedel; a ekei kin papah nan ohpis en kawehwe kan. Sister pwukat rasehng karis en sounpei laud ehu me Siohwa kin ketin doadoahngki pwehn kapwaiada kupwure. (Mel. 68:11) E sansal me Siohwa sohte kin ketin wiahki lih akan aramas luwet de soakoahiek kei.

IA DUWEN BROTHER KAN AR KAK SUKUHLKI EN ALASANG EN SIOHWA WIEWIA ONG LIH AKAN?

Brother kan, pwehn esehda ma kitail kin alasang Siohwa nan atail wiewia ong riatail lih Kristian kan, kitail anahne kasawih kanahieng mwomwen atail madamadau oh wiewia. Pwehn wia met, kitail anahne sawas. Duwehte misihn en X-ray ehu me kak diarada soumwahu ehu nan mohngiong en aramas emen, kompoakepatail mwahu kan oh Mahsen en Koht kak sewese kitail en esehda ma atail pepehm ong lih akan kin kaperenda Siohwa de soh. Dahme kitail kak wia pwehn ale sawas?

Peki sawas rehn kompoakepahmw mwahu men. (Lep. Pad. 18:17) Kitail kak idek rehn kompoakepatail men me kitail kin likih, me pil kin kadek oh toupahrek, soangen peidek duwehte met akan: “Ia omw madamadau duwen ei wiewia ong sister kan? Irail kak pehm me I kin waunekin irail? Mie mehkot I kak wia pwehn kamwahwihala mwomwen ei wiewia ong irail?” Ma kompoakepahmwo nda me mie soahng kan me ke kak kamwahwihala, dehr lingeringerda de kihda kahrepe kan. Ahpw inengieng wiahda wekidekla kan me anahn.

Onopki Mahsen en Koht. Ahl me keieu mwahu en esehda ma atail wiewia ong sister kan kin mwahu iei en doadoahngki Mahsen en Koht pwehn sewese kitail en kasawih mwahu atail madamadau oh wiewia kan. (Ipru 4:12) Ni atail onopki Paipel, kitail sukuhlki duwen ohl akan me kin kadek ong lih akan oh pil ohl akan me sohte kin. Kitail kak kapahrekihpene arail wiewia ong atail wiewia ong lih akan. Patehng met, atail kapahrekihpene iren Paipel kan kak sewese kitail en dehr doadoahngki iren Paipel ehute pwehn utungada madamadau sapwung ehu duwen lih akan. En tehkada iren Paipel tohto kak sewese kitail en kak wehwehki ia sapwellimen Koht madamadau ong lih akan. Karasepe, nin duwen me 1 Piter 3:7 mahsanih, ohl akan en kin kihong lih akan ‘wahu pwehki irail me luwet duwehte dahl kopwukopw ehu.’ b Ia duwe, met wehwehki me lih akan soaloalokong de soakoahiek  sang ohl akan? Uhdahn soh! Kapahrekihpene dahme Piter koasoia ong dahme Kalesia 3:​26-29 mahsanih, me iei, Siohwa ketin pilada lih akan oh pil ohl akan en iang Sises kaunda sang nanleng. Ni atail onopki Mahsen en Koht oh idek rehn kompoakepatail mwahu men ong dahme e medewehki atail wiewia ong lih akan, kitail kak sukuhlki en kasalehda wahu me konehng riatail sister kan.

IA DUWEN ELDER KAN AR KAK KASALEHDA ARAIL WAUNEKI SISTER KAN?

Brother kan nan mwomwohdiso pil kak sukuhlki en wauneki sister kan sang ni arail idawehn mehn kahlemeng en elder limpoak kan. Ia duwen elder kan ar kak tiengla mwowe oh wauneki sister kan? Tehk duwen ekei ahl en wia met.

Irail kin kapinga sister kan. Wahnpoaron Pohl wiahda mehn kahlemeng mwahu ong elder kan en alasang. E kapinga ekei sister mwohn meteikan nan nah kisinlikowo me e ntingkilahng mwomwohdiso en Rom. (Rom 16:12) Ke kak medewehla ia uwen sister ko ar peren ni ahnsou me mwomwohdisou wadek kisinlikowo? Duwehte met, elder kan kin kapinga laud sister kan pwehki arail irair mwahu kan oh pil doadoahk me irail kin wia ong Siohwa. Met sewese sister kan en ese me mwomwohdisou kin wauneki oh kesempwalki irail. Ahn elder men eh lokaiahn kangoang iei me sister kan uhdahn anahne ni arail kin pousehlahte papah Siohwa ni lelepek.—Lep. Pad. 15:23.

Ni elder kan ar kin kapinga sister kan, irail anahne en kin mehlel oh koasoia soahng mwahu ehu me re wiahda. Dahme kahrehda? Emen sister me adaneki Jessica koasoia: “E kin mwahu en rong brother kan ar ndaiong sister men ‘doadoahk mwahu.’ Ahpw e kin keieu kangoange kiht ni brother kan ar kapingahkin kiht soahng ehu me se wia, duwehte at padahkihong nait seri kan en mwohndi nennenla ni mihting kan de pil at kin wiahda ahnsou en pwekada tohnsukuhl en Paipel men pwehn iang mihting.” Ni elder kan ar kapinga sister kan ong soahng ehu me re wiahda, met kin kahrehiong sister kan en pehm me mwomwohdiso kin anahne oh pil kesempwalkin irail.

Irail kin rong sister kan. Elder kan me aktikitik kin pohnese me kaidehn irail kelehpw me ese  dahme mwahu. Elder aktikitik kan kin peki sister kan en ehukihong irail arail madamadau oh re kin rong kanahieng ni sister kan ar koasoi. Ni arail wia met, elder kan kin kangoange sister kan, oh pein irail pil kin paiekihda. Ia duwen? Emen elder me adaneki Gerardo, me kin papah nan Pedel, koasoia: “I kin peki rehn sister kan en kasalehda arail madamadau ong soahng ehu pwehki e kin sewese ie en kamwahwihala ei doadoahk. Irail kin wia doadoahko wereisang pali laud en brother kan.” Nan mwomwohdiso, sister tohto kin papah nin duwen pioneer kei, eri irail kin esehla soahng tohto duwen aramas akan nan wasahn kalohk. Emen elder me adaneki Bryan koasoia: “Riatail sister kan ahneki soangen irair kaselel oh koahiek tohto me sapwellimen Siohwa pwihn kin anahne. Eri sukuhlsang irail!”

Elder kan me ahneki erpit en dehr kin pohnsehsehla ahn sister kan madamadau. Dahme kahrehda? Emen elder me adaneki Edward koasoia: “Ahn sister men eh madamadau oh koahiek kak sewese brother men en wehwehki mwahu duwen irair ehu, oh pil kak sewese brothero en wehwehki pepehm en meteikan.” (Lep. Pad. 1:5) Mehnda ma elder men sohte kak doadoahngki ahn sister men eh madamadau, e kak kalahngankihongete sistero eh ehukihong ih eh madamadau oh dahme e ese oh wehwehki.

Irail kin kaiahne sister kan. Elder kan me ahneki erpit kin isaneki ahnsou mwahu kan en kaiahne sister kan. Karasepe, irail kak kasukuhlih sister kan ong ia duwen arail kak wia mihting en tuhpenehn kalohk ni ahnsou me brother papidaisla men sohte iang kalohk. Irail kak kaiahne irail en doadoahngki dipwisou en doadoahk kan de misihn kan pwe irail en kak sewese kauwada de apwalih ihmw de wasahn kaudok kan nan sapwellimen Siohwa pwihn. Nan Pedel, sounapwalih kan kin kaiahnehda sister kan en apwalih soangsoangen pwukoa kan, iangahki en apwalih oh kamwakele Pedel, pwainda dipwisou kan, wia palien mwohni, wiahda soahng kan nan computer, oh soahng teikan. Ni elder kan ar kaiahne sister kan, irail kasalehda me irail kin wiahki sister kan aramas koahiek oh likilik kei.

Sister tohto kin doadoahngki kaiahn me irail alehsang elder kan ong kamwahupen meteikan. Karasepe, ekei sister kin doadoahngki dahme irail eselahr sang doadoahk en kou ihmw pwehn sewese meteikan en pwurehng kauwada imwarail kan mwurin kahpwal laud ehu wiawi. Ekei sister kin doadoahngki dahme irail sukuhlki duwen kalohk ong wehi pokon pwehn sewese kaiahne sister teikan pwe irail en pil kak iang wia doadoahko. Ia pepehm en sister kan duwen elder kan ar kaiahne irail? Sister men me adaneki Jennifer koasoia: “Ni ahnsou me I iang doadoahk en kauwada Wasahn Kaudok ehu, emen sounapwalih wiahda ahnsou en kaiahne ie. E kin tehk doadoahk me I kin wia, oh kin kapingahkin ie. I uhdahn perenki iang ih doadoahk pwehki I pehm me e kin likih oh kesempwalkin ie.”

KAMWAHUPEN WIAHKI SISTER KAN PENEINEI

Kitail kin poakohng riatail sister lelepek kan duwehte Siohwa kin ketin wia! Eri kitail en wiahkin irail atail peneinei. (1 Tim. 5:​1, 2) Kitail kin kesempwalki irail oh perenki iang irail doadoahk. Oh kitail kin uhdahn peren ni arail kehn me kitail kin poakohng oh utung irail. Emen sister me adaneki Vanessa koasoia: “I kin uhdahn kalahngankihong Siohwa ei wia kisehn sapwellime pwihn, me mie brother tohto me kin uhdahn kangoange ie.” Emen sister nan Taiwan koasoia: “I uhdahn kalahnganki me Siohwa oh sapwellime pwihn kin kesempwalki lih akan oh wauneki arail pepehm. Met kin kakehlaka ei pwoson oh kalaudehla ei kalahnganki ei pwais kaselel en iang kisehn sapwellimen Siohwa pwihn.”

Ia uwen Siohwa eh kin ketin kupwurperenkihda ni eh mahsanih ohl Kristian lelepek kan ar kin nsenohki en kesempwalki oh wauneki lih kan duwehte eh kin ketin wia! (Lep. Pad. 27:11) Emen elder sang Scotland me adaneki Benjamin koasoia: “Ohl tohto nan sampah rahnwet sohte douluhl kin wauneki lih akan. Eri, ni riat sister kan ar kohdo nan Wasahn Kaudok, se men tehk mwahu me irail kin pehm me se kin wauneki oh poakohng irail.” Kitail koaros en wia uwen atail kak en kahlemengih Siohwa sang ni atail kin poakohng oh wauneki riatail sister kan nin duwen me re warohng.—Rom 12:10.