1-2. Kahpwal dah kan me sapwellimen Siohwa ladu kan ele kin lelohng?

 KAHPWAL laud kan kak mwadangete wekidala atail mour. Karasepe, brother lelepek men me adaneki Luis a esehda me e kanser. Toahkte padahkihong me e pahn momourkihte sounpwong keite. Monika oh eh pwoudo kin kedirepw ni ara papah Siohwa. Eri ehu rahno, Monika esehda me eh pwoudo, me wia elder men, kin wiewia dihp erein ahnsou werei. Olivia, sister kiripw men, anahne tangasang imweo pwehki melimel ehu me kohkohlahng eh wasao. Ni ahnsou me e pwurala, e esehda me melimelo kauwehla imweo. Ni ahnsoukiste, mouren irail pwukat mwadangete wekila. Mie pak mehkot suwed wiawihong uhk me mwadangete wekidala omw mour?

² Nin duwen sapwellimen Siohwa ladu lelepek kei, kitail pil kin ahneki kahpwal kan oh soumwahuda, duwehte me aramas koaros kin wia. Kitail pil kin dadaur pahn uhwong de kalokolok sang irail kan me kin kailongki sapwellimen Koht aramas akan. Mendahki Siohwa sohte kin ketin pere kitail sang soangen kahpwal pwukat, e ketin inoukihda en sewesei kitail. (Ais. 41:10) Pwehki sapwellime sawas, kitail kak ahnekihte peren, wiahda pilipil mwahu kan, oh loalopwoatohngete ih pil ni ahnsou kan me keieu apwal. Nan iren onop wet, kitail pahn koasoiapene ahl pahieu me Siohwa kin ketin sewese kitail ni ahnsou me soahng suwed kan kin wiawi nan atail mour. Kitail pahn pil koasoiapene dahme kitail anahne wia pwehn paiekihda sawas me e ketikihda.

 SIOHWA PAHN KETIN PEREIUK

3. Ni atail lelohng kahpwal laud ehu, dahme kitail kakete diarada me e apwal en wia?

³ Kahpwalo. Ni atail kin lelohng kahpwal laud ehu, ele kitail kin diarada me e apwal en ahneki madamadau pwung oh wiahda pilipil kan. Dahme kahrehda? Pwehki kitail kakete uhdahn nsensuwedla de pwunod. Kitail kakete sehsehla dahme kitail pahn wia. Tehk ia ahn sister riemeno me kitail koasoiapene mwoweo ara pepehm erein ara kahpwal ko. Olivia koasoia: “Mwurin melimelo kauwehla imweio, I sehsehla dahme I pahn wia.” Monika ndahki eh pwoudo pitihedi: “I uhdahn nsensuwedla. I uhdahn pehm me ei mohngionge ohla. E apwal ong ie en wia ei doadoahk en ehuehu rahn. I sohte douluhl medewe me met kak wiawihong ie.” Ia duwen Siohwa eh ketin inoukihda en ketin sewesei kitail ni atail nsensuwedla?

4. Nin duwen me Pilipai 4:​6, 7 mahsanih, dahme Siohwa ketin inoukihong kitail?

⁴ Ia duwen Siohwa pahn ketin sewese kitail. E ketin inoukihda en ketikihong kitail dahme Paipel kahdaneki “sapwellimen Koht popohl.” (Wadek Pilipai 4:​6, 7.) Popohl wet kin dokedoke pepehm en meleilei me kitail ahneki ihte pwehki atail nanpwungmwahu keren rehn reh. Popohl wet “inenen siksang madamadau en aramas koaros” oh e uhdahn kaselel sang dahme kitail kak medewehla. Karasepe, mie pak me ke kapakap ngidingid ong Siohwa oh mwuri ke pwuriamweikihla pwehki ke pehmw me ke ahneki meleilei? Ke ahneki pepehmo pwehki Siohwa ketikihong uhk ‘sapwellime popohl.’

5. Ia duwen sapwellimen Koht popohl eh kin pere atail madamadau oh mohngiong?

⁵ Pilipai 4:7 pil mahsanih me sapwellimen Koht popohl ‘pahn pere omw mohngiong oh omw kehl en madamadau.’ Uhdahn wehwehn lepin lokaiao “pere” ong sounpei kin dokedoke sounsilasil kan me kin pere kahnimw ehu pwehn dehr lelohng keper. Aramas akan me kin kousoan nan kahnimw ehu me mie sounsilasil kan sohte kin perki mehkot pwehki re ese me sounsilasil ko pahn pere irail. Duwehte met, ni ahnsou me sapwellimen Koht popohl kin pere atail mohngiong oh madamadau, kitail kin ahneki meleilei oh ese me kitail sohte anahne perki mehkot. (Mel. 4:8) Duwehte Ana, mehnda ma atail irairo sohte mwadangete wekila, kitail kak ahnekihte meleilei. (1 Sam. 1:​16-18) Oh ni atail kin ahneki meleilei, kitail kin kalapw esehda me e mengei en ahneki madamadau pwung oh wiahda pilipil mwahu kan.

6. Dahme kitail kak wia pwehn paiekihda sapwellimen Koht popohl? (Pil kilang kilel.)

⁶ Dahme kitail anahne wia. Duwehte tohn kahnimw kan ar kin eker sounsilasil kan pwehn pere irail, kitail pil kak peki Siohwa en  ketin sewese kitail. Ia duwen? Kapakap lao ke alehdi sapwellimen Koht popohl. (Luk 11:9; 1 Des. 5:17) Luis, me kitail koasoiapene mwoweo, koasoia ia duwen ih oh eh pwoudo, Ana, kak dadaur ni ara esehda me sounpwong keite luhwe me Luis pahn momourki. E koasoia: “Nan soangen ahnsou me duwehte met, e uhdahn apwal en wiahda pilipil kan me pid epwelpen roson oh soahng teikan. Ahpw kapakap sewesei kiht erein ahnsou apwal wet.” Luis oh eh pwoudo koasoia me ira pwurupwurehng kapakap ngidingid oh peki Siohwa en ketikihong ira popohl, meleilei, oh erpit pwehn wiahda pilipil mwahu kan. Oh ira alehdi sapwellime sawas. Ma ke lelohng kahpwal ehu, poadidiong kapakap, oh ke pahn ale sapwellimen Siohwa popohl ni eh pere omw mohngiong oh madamadau.—Rom 12:12.

SIOHWA PAHN KETIN KATENGEIUKEDI

7. Ele ia pahn atail pepehm ni atail lelohng kahpwal laud ehu?

⁷ Kahpwalo. Ni atail kin lelohng kahpwal laud ehu, kitail kakete sohla ahneki pepehm, madamadau, de wiewia me kitail kin ahneki mahso. Duwehte sohp ehu nan melimel eh kin pwungpwungdengkiseli ilok kan, atail pepehm pil kak wekiwekidekseli. Ana me kitail koasoiapene mwowe, koasoia me e ahneki soangsoangen pepehm tohto mwurin Luis eh mehla. E koasoia: “Ekei pak I kin pehm me I mworusala oh poakeiehla. I pil kin lingeringerkihda me e mehla.” Ekei ahnsou, Ana kin pehm me e kelekelehpw oh nsensuwedkihla me e anahne wiahda pilipil ong soahng kan me Luis kin apwalih mwahu. E pehm me ekei pak e kin mi nan melimel ehu nansed. Ia duwen Siohwa eh kin ketin sewesei kitail ni ahnsou me soangen pepehm pwukat kin tepida poweikitaildi?

8. Nin duwen me Aiseia 33:6 mahsanih, dahme Siohwa ketin kamehlelehiong kitail?

⁸ Ia duwen Siohwa pahn ketin sewesei kitail. E ketin inoukihong kitail me e pahn katengeikitaildi. (Wadek Aiseia 33:6.) Ni ahnsou me mie melimel ehu nansed, sohp ehu kakete tepida pwungpwungdekseli. Pwe sohpo en kak mwamwahute, mie soahng kei ni pengepengen sohpo me kin katengehdi pwehn dehr nohn mwekimwekid. Pwehki met, aramas akan nan sohpo sohte pahn lelohng keper nan arail seiloak. Ahpw, mehn katengehdi sohp tohto kin keieu doadoahk mwahu ni ahnsou me sohpo kin tangatang kohwei. Duwehte met, Siohwa pahn ketin katengeikitaildi ni atail pousehlahte papah ih ni lelepek ni ahnsou apwal kan.

9. Ia duwen neitail mehn roporop kan kak sewese kitail en kaunda atail pepehm ni ahnsou apwal kan? (Pil kilang kilel.)

⁹ Dahme kitail anahne wia. Ni omw kin toutoukihla omw pepehm kan, wia uwen omw kak koaros en doulahte kapakap, iang towehda  mihting kan, oh iang kalohk. Ei mehlel, ele ke sohte kak wia soahng koaros me ke kin wia mahso, ahpw tamataman me Siohwa sohte ketin kasik kitail en wia laudsang dahme kitail kakohng. (Pil kilang Luk 21:​1-4.) Patehng met, wiahda omw ahnsou en pein onop oh doudouloale. Dahme kahrehda? Sang sapwellime pwihn, e ketikihong kitail artikel oh kisin kasdo kaselel kan me kak sewese kaunda atail pepehm erein ahnsou apwal kan. Pwehn diarada dahme ke anahne, ke kak doadoahngki mehn roporop kan ni pein omw lokaia, me duwehte JW Library^® app, Watch Tower Publications Index, oh Sawas ong Wia Roporop en Sounkadehdehn Siohwa kan. Monika, me kitail koasoiapene mwoweo, koasoia me e kin doadoahngki mehn roporop pwukat ni ahnsowohte me eh nsensuwedo kin laudla. Karasepe, e kin rapahki lepin lokaiao “lingeringer.” Oh ekei ahnsou, e kin rapahki lepin lokaia ko “pangala” de “loalopwoat.” Ih eri kin wadek lao e nsenamwahula. E koasoia: “Ni ei kin tepida wia ei roporop I kin uhdahn pwunod. Ahpw ni ei kin doulahte wadawad, I kin pehm me mwomwen Siohwa kin ketin pwoaleiehdi. Oh ni ei kin wadawad, I kin wehwehkihda me Siohwa ketin mwahngih ei pepehm koaros me wekpeseng, oh e pahn ketin sewese ie.” Mehn sawas pwukat sang Siohwa kak seweseiuk en kaunda omw pepehm lao ke ahneki popohl.—Mel. 119:​143, 144.

SIOHWA PAHN KETIN SEWESEIUK

10. Ele ia pahn atail pepehm mwurin atail lelohng kahpwal laud ehu?

¹⁰ Kahpwalo. Ma kahpwal laud ehu wiawihong kitail, ele mie rahn kei me paliwaratail oh atail pepehm kin luwetala. Atail pepehm kak duwehte sountang men me kin tang marahra mahso ahpw e medekla oh met e kin alu sikel. E kakete apwal ong kitail en wia soahng kan me kitail kin mengeiki wia mahso, de ele kitail sohla men wia soahng kan me kin kaperenih kitail mahso. Duwehte Elaisa, kitail kakete pehm me e nohn apwal ong kitail en pwourda. Kitail men memeirte. (1 Nan. 19:​5-7) Dahme Siohwa ketin inoukihda me e pahn ketin wia ni ahnsou me kitail luwet?

11. Ia pil ehu ahl me Siohwa kin ketin sewesei kitail? (Melkahka 94:18)

¹¹ Ia duwen Siohwa pahn ketin sewesei kitail. E ketin inoukihda en sewesei kitail. (Wadek Melkahka 94:18.) Duwehte sounmwadong men me ohla kin anahne sawas pwehn kak mwekidseli, ele kitail anahne sawas pwehn doulahte papah Siohwa. Ni soangen ahnsowo, Siohwa ketin kamehlelehiong kitail: “Ngehi, KAUN-O, amwail Koht; ngehi me  kin kakehlakei kumwail, oh mahmahsanihong kumwail, ‘Kumwail dehr masak, pwe I pahn sewesei kumwail.’” (Ais. 41:13) Nanmwarki Depit alehdi sawas wet. Ni eh lelohng kahpwal kan oh kahpwal sang eh imwintihti kan, e patohwanohng Siohwa: “Palimaun en nin limomwi me kin utung ie.” (Mel. 18:​35, NW) Ahpw ia duwen Siohwa eh kin ketikihda sawas?

12. Ihs me Siohwa kak ketin doadoahngki pwehn sewesei kitail ni ahnsou me kitail luwet?

¹² Siohwa kalapw ketin sewesei kitail ni eh kin ketin doadoahngki meteikan. Karasepe, ni ahnsou me Depit kin pehm me e luwet, kompoakepaho Sonadan kin mwemweitla reh pwehn kakehlaka oh kangoange ih. (1 Sam. 23:​16, 17) Duwehte met, Siohwa ketin doadoahngki Elisa en sewese Elaisa. (1 Nan. 19:​16, 21; 2 Nan. 2:2) Rahnwet, Siohwa kakete doadoahngki atail peneinei, kompoakepatail, oh elder kan pwehn sewesei kitail. Ahpw, ni atail kin nsensuwedla, ele kitail kin men tohrohr sang meteikan. Kitail kin men kelehpwla. Koaros kin ahneki soangen pepehm wet. Dahme kitail kak wia pwehn ale sapwellimen Siohwa sawas?

13. Dahme kitail anahne wia pwehn paiekihda sapwellimen Siohwa sawas? (Pil kilang kilel.)

¹³ Dahme kitail anahne wia. Song en dehr katohreiukla. Ni atail kin katohrekitailla, kitail kakete tepida medemedewehte pein kitail oh kahpwal kan me kitail kin lelohng. Soangen madamadau wet kak kahrehiong kitail en wiahda pilipil sapwung. (Lep. Pad. 18:1) Ei mehlel, kitail koaros anahne ahnsou en kelehpwla, ahpw mehlel ni ahnsou me kahpwal laud ehu wiawi nan atail mour. Oh ma ahnsou werei kitail kin katohrei kitail, kitail kakete soikala sawas sang irail me Siohwa kin ketin doadoahngki pwehn sewesei kitail. Eri mendahki e kin apwal en wia met erein kahpwal kan, ale sawas sang omw peneinei, kompoakepahmw, oh elder kan. Wiahki met me Siohwa kin ketin doadoahngki pwehn seweseiuk.—Lep. Pad. 17:17; Ais. 32:​1, 2.

SIOHWA PAHN KETIN KANSENAMWAHWIHIUK

14. Soangen irair dah kan me kak kahrehiong kitail en masepwehkada?

¹⁴ Kahpwalo. Ekei ahnsou kitail kakete masepwehkada. Nan Paipel, sapwellimen Koht ladu lelepek kan koasoia ahnsou kan me re kin pwunodada oh masepwehkada pwehki arail imwintihti kan de kasongosong teikan. (Mel. 18:4; 55:​1, 5) Duwehte met, kitail kakete lelohng uhwong nan sukuhl, wasahn doadoahk, sang atail peneinei, de sang koperment. Kitail  pil kakete masak me kitail pahn mehla pwehki kahpwal en roson ehu. Erein ahnsou pwukat, kitail kakete duwehla kisin seri men me anahne sawas. Ia duwen Siohwa kin ketin sawas nan soangen ahnsou pwukat?

15. Dahme Siohwa pahn ketin wiahiong kitail nin duwen me Melkahka 94:19 mahsanih?

¹⁵ Ia duwen Siohwa pahn ketin sewesei kitail. E pahn ketin kansenamwahwih oh kaloalamwahwih kitail. (Wadek Melkahka 94:19.) Melkahka wet ele kahrehiong kitail en medewehla kisin serepein men me masepwehkada oh sohla kak meir pwehki nansapwe kamasepwehk ehu. Kitail kak medewehla eh papaho eh kohla reh, pwekada, oh kolokol lao e meirla. Mendahki nansapweo mihmihte, en eh pahpao kansenamwahwih kahrehiong en pehm me e sohte anahne perki mehkot. Ni atail kin lelohng kahpwal kan me kamasepwehk, ele kitail kin anahne Samatailo nanleng en ketin kolkitaildi lao kitail meleileidi. Ia duwen atail kak alehdi soangen sawas wet sang rehn Siohwa?

16. Dahme kitail kak wia pwe Siohwa en ketin kansenamwahwih kitail? (Pil kilang kilel.)

¹⁶ Dahme kitail anahne wia. Kaukaule wiahda ahnsou ong Siohwa—kapakapohng ih oh wadek sapwellime Mahsen. (Mel. 77:​1, 12-14) Ma ke kin kaukaule wia met, ele ke pahn kin tepte peki sawas sang Semomwo nanleng. Padahkihong Siohwa dahme ke kin masak oh dahme ke kin pwunodki. Kowe eri wadek sapwellime Mahsen oh kilang ia duwen eh pahn ketin kansenamwahwihiuk. (Mel. 119:28) Ele ke pahn esehda me omw wadek ekei ire kan nan Paipel kak kansenamwahwihiuk ni omw masepwehkada. Karasepe, ke kak diar kangoang sang nan pwuhken Sohp, Melkahka, Lepin Padahk oh pil sapwellimen Sises mahsen kan nan Madiu irelaud 6. Ni omw kin kapakap ong Siohwa oh wadek sapwellime Mahsen, e pahn ketin kansenamwahwihiuk.

17. Dahme kitail kak kamehlele?

¹⁷ Kitail kak kamehlele me Siohwa pahn ketin ahnsou koaros sewesei kitail ni kahpwal laud ehu lelohng kitail. Kitail sohte pahn kelehpwla. (Mel. 23:4; 94:14) Siohwa ketin inoukihda me e pahn ketin pere, katengehdi, utung, oh kansenamwahwih kitail. Aiseia 26:3 mahsaniheki Siohwa: “Maing KAUN, komwi me kin ketikihdo popohl mehlel ong irail kan me nan kapehd kehlail oh tengeteng oh kin likih komwi.” Eri likih Siohwa oh wia uwen omw kak koaros pwehn paiekihda sawas kan me e kin ketikihda. Ma ke wia met, ke pahn alehdi kehl pil ni ahnsou apwal kan.