1. Dahme ke kin medewe ni omw kin medewehla duwen Siohwa?

 MIE pak me ke song medewehla ia mwomwen Siohwa? Ni omw kin kapakap ong ih, dahme ke kin medewe? Mendahki kitail sohte kak kilang Siohwa, Paipel kawehwehda ih ni soangsoangen ahl kei. Siohwa kin ketin rasehng “ketipin ehu oh mehn sansar ehu” oh “kisiniei me kin kamwomwala wasa.” (Mel. 84:​11, NW; Ipru 12:29) Esekiel kawehwehda nan kaudiahl ehu me Siohwa ketin rasehng takai sapair pwoat, mete lingaling ehu, oh ahia lingaling pwoat. (Esek. 1:​26-28) Ekei kawehwe pwukat me pid duwen Siohwa ele kahrehiong kitail en pwuriamweikihla de pil kahrehiong kitail en pehm me sohte katepatail.

2. Dahme kakete kahrehiong kitail en apwalki karanihala Siohwa?

² Pwehki kitail sohte kak kilang Siohwa, e kak apwal ong kitail en kamehlele me e ketin poakohng kitail. Ekei aramas kin medewe me Siohwa sohte kak ketin poakohng irail pwehki soahng suwed kan me re lelohng. Mwein ele sohte arail pahpa me poakohng irail. Siohwa ketin mwahngih soangen pepehm pwukat oh ese dahme kahrehda e apwal ong kitail en karanihala ih. Pwehn sewese kitail, e ketin kasalehda sapwellime irair kaselel kan nan sapwellime Mahsen.

3. Dahme kahrehda kitail anahne tehk mwahu sapwellimen Siohwa limpoak?

³ Siohwa kin ketin limpoak. Paipel mahsanih me “Koht iei limpoak.” (1 Sohn 4:8) Soahng koaros me e kin ketin wia kin poahsoankihda limpoak. Sapwellimen Koht limpoak uhdahn mwahu oh kehlail me kahrehda e sohte kin ketin kasalehiongete irail kan me kin poakohng ih ahpw pil ong irail kan me sohte kin poakohng ih. (Mad. 5:​44, 45) Nan iren onop wet, kitail pahn tehk mwahu mwomwen Siohwa oh sapwellime limpoak. Atail kalaudehla atail sukuhlki duwen atail Kohto, ih uwen laud en atail pahn poakohng ih.

 SIOHWA UHDAHN KETIN POAKOHNG KITAIL

4. Dahme sapwellimen Siohwa limpoak kin wiahiong uhk? (Pil kilang kilel.)

⁴ “Siohwa me diren limpoak.” (Seims 5:11) Nan Paipel, e ketin kapahrekihong pein ih nohno limpoak men. (Ais. 66:​12, 13) Song medewehla nohno men me kin apwalih mwahu nah kisin seri men ni limpoak. E kin koledi ni keneinei oh kihdi pohn pwukie ko oh koasoiong ni ngihl kadek oh kansenamwahu. Ni ahnsou me serio kin sengiseng de medekla, e kin tehk mwahu dahme e anahne. Ni ahnsou me kitail kin pwunodada, kitail kak likih sapwellimen Siohwa limpoak. Sounmelkahkao ntingihedi: “Ni ahnsou me I kin pwunodada oh pahtoula, komw kin ketin kansenamwahwihiehla oh kapereniehda.”—Mel. 94:19.

5. Ia wehwehn sapwellimen Siohwa limpoak loalopwoat ong uhk?

⁵ Siohwa kin ketin loalopwoat. (Mel. 103:8) E sohte pahn ketin uhdihsang poakohng kitail ni atail wiahda mehkot sapwung. Wehin Israel kin pwurupwurehng kansensuwedihada Siohwa. Ahpw e ketin kasalehiong sapwellime aramas akan me koluhla limpoak loalopwoat ni eh mahsanih soahng pwukat: ‘I kesempwalkin uhk, poakohng uhk, oh waunekin uhk.’ (Ais. 43:​4, 5) Sapwellimen Koht limpoak sohte wekila. Kitail kak koapworopworki met ahnsou koaros. Mehnda ma kitail wiahda dihp laud ehu, Siohwa sohte pahn ketin likidmelieikitailla. Ni atail koluhla oh pwurala rehn Siohwa, kitail pahn kilang me e pil kin ketin poakohng kitail. E inoukihda me e pahn ketin “mahkikihong kitail dipatail kan.” (Ais. 55:7) Paipel mahsanih me kitail pahn ahneki ‘ahnsoun nsenamwahu . . . sang rehn Siohwa.’—Wiewia 3:19.

6. Dahme Sekaraia 2:8 padahkihong kitail duwen Siohwa?

⁶ Wadek Sekaraia. 2:8. Pwehki e ketin poakohng kitail, Siohwa ketin mwahngih atail pepehm oh kupwurki perei kitail. E kin ketin kupwurtoutoula ni atail medekla. Eri kitail kak kamehlele me e pahn ketin sapengkitailla ni atail kapakapki: “Komw ketin sinsile ie duwen omwi kin ketin sinsile pein silangomwien.” (Mel. 17:8) Mese wia wasa kesempwal ehu ni paliwar. Eri ni Siohwa eh ketin kapahrengkihong kitail silangio, e mwomwen me e kin ketin mahsanih, ‘Mehmen me kamedekeikumwailla, nei aramas akan, kin kamedekihala dahme kesempwal ong ie.’

7. Dahme kahrehda ke anahne kakehlaka omw likih sapwellimen Siohwa limpoak?

 ⁷ Siohwa ketin kupwurki ken kamehlele me e ketin poakohng uhk. Ahpw e mwahngih me pwehki soahng kan me wiawihong uhk mahso, ke kakete medewe ma e ketin poakohng uhk. De ele ke kin lelohng irair kan ahnsou wet me kin kasonge omw likih sapwellimen Siohwa limpoak. Dahme pahn sewese omw likih met? Sang ni omw sukuhlki ia duwen Siohwa eh ketin kasalehiong Sises, me keidi kan, oh kitail koaros sapwellime limpoak.

IA DUWEN SIOHWA EH KETIN KASALEHDA SAPWELLIME LIMPOAK

8. Dahme kahrehda Sises kamehlele ahn Semeo limpoak?

⁸ Siohwa oh sapwellime Ohlo kin mihmihpene wereisang me aramas riemen kin wia. Erein sounpar lik lik kei me ira kin ketiket nanleng, ira uhdahn karanihala oh poakohngala emenemen. Nan Madiu 17:​5, kitail wadek me Siohwa ketin kasalehda sapwellime limpoak ong Sises. Siohwa kak ketin mahsanih, ‘Ih menet me I kin kupwurperenki.’ Ahpw e kupwurki kitail en ese uwen eh ketin poakohng Sises, eri e ketin ekerki ih “nei Pwutak kompoake.” Siohwa ketin kupwurperenki Sises, ahpw mehlel pwehki eh toukihda moure. (Ep. 1:7) Oh Sises sohte peikasalki ma Semeo ketin poakohng. E uhdahn kamehlele ahn Semeo limpoak. E kin pwurupwurehng kasalehda me e kin kamehlele me Semeo ketin poakohng.—Sohn 3:35; 10:17; 17:24.

9. Mehnia lepin lokaia me kawehwehda sapwellimen Siohwa limpoak ong me keidi kan? Menlau kawehwehda. (Rom 5:5)

⁹ Siohwa pil kin ketin kasalehda sapwellime limpoak ong me keidi kan. (Wadek Rom 5:5.) Tehk lepin lokaiao “pwilidohngehr.” Ehu dikseneri en Paipel koasoia me met kin duwehte “pillap ehu me kin pwilidohng kitail.” Karasaras wet kasalehda uwen laud en Siohwa eh ketin poakohng me keidi kan! Me keidi kan ese me Koht “ketin poakohng” irail. (Sud 1) Wahnpoaron Sohn kasalehda arail pepehm ni eh ntingihedi: “Kilang uwen lauden limpoak me Sahmo ketin kasalehiong kitail, pwe kitail en adaneki sapwellimen Koht seri kan!” (1 Sohn 3:1) Ia duwe, Siohwa kin ketin poakohng me keidi kante? Soh, Siohwa ketin kasalehiong kitail koaros sapwellime limpoak.

10. Dahme kadehdehda me Siohwa uhdahn ketin poakohng uhk?

¹⁰ Dahme kin keieu kamehlelehiong uhk sapwellimen Siohwa limpoak? Pweinen pweipwei sapahlo—wiewiahn limpoak me keieu laud nin sampah! (Sohn 3:16; Rom 5:8) Siohwa ketikihda sapwellime Ohl kompoako, mweidohng en pwoukihla aramas koaros pwe kitail en ale mahkpen dipatail kan oh kitail en kak wiahla kompoakepah. (1 Sohn 4:10) Uwen laud en atail doudouloale pweipwei me Siohwa oh Sises ketin pwainla, ih uwen laud en atail kak wehwehki uwen ara ketin poakohng emenemen kitail. (Kal. 2:20) Pweinen pweipwei sapahlo sohte wiawi pwehki met wia kosonned ehu. Kisakis en limpoak ehu met. Siohwa ketin kasalehiong kitail sapwellime limpoak sang eh ketin tounmeteikihla dahme keieu kesempwal ong ih—Sises. Siohwa ketin mweidohng sapwellime Ohlo en lokolok oh pwoula pwehki kitail.

11. Dahme kitail sukuhlkihsang Seremaia 31:3?

¹¹ Siohwa sohte kin ketin poakohng kitailte, ahpw e pil ketin padahkihong kitail uwen laud en eh ketin poakohng kitail. (Wadek Seremaia 31:3.) Siohwa ketin kakerenihkitailla reh pwehki eh poakohng kitail. (Pil kilang Deuderonomi 7:​7, 8.) Sohte mehkot de mehmen kak katohreikitailsang limpoak wet. (Rom 8:​38, 39) Ia duwen limpoak wet eh kamwakid uhk? Wadek Melkahka 23, oh kilang ia duwen Depit eh mwekidki sapwellimen Siohwa limpoak oh ia duwen met eh kamwakid uhk.

 IA DUWEN SAPWELLIMEN SIOHWA LIMPOAK EH KAMWAKID UHK?

12. Ia duwen omw pahn kawehwehda Melkahka 23?

¹² Wadek Melkahka 23:​1-6. Nan Melkahka 23, Depit kasalehda eh koapworopworki me Siohwa ketin poakohng oh nsenohki ih. E kawehwehda nanpwungmwahu keren me ih oh Siohwa me e kin ekerki Silepe ahneki. Depit sohte kin pwunodki ni eh mweidohng Siohwa en ketin kahluwa ih, oh e kin uhdahn likih Ih. Depit ese me Siohwa pahn kin ketin kasalehiong ih sapwellime limpoak rahn koaros. Dahme kahrehiong ih en uhdahn koapworopworki met?

13. Dahme kahrehda Depit uhdahn likih me Siohwa pahn ketin apwalih ih?

¹³ “Solahr me I pahn anahne.” Depit pehm me e kin epwelmwahu pwehki ahnsou koaros Siohwa kin ketikihong ih dahme e anahne. Depit pil ese me Siohwa wia kompoakepah oh me e kin ketin kupwurperenki ih. Ihme kahrehda e uhdahn kamehlele me sohte lipilipil dahme pahn wiawihong ih ahnsou kohkohdo, Siohwa pahn ketin pousehlahte apwalihala eh anahn akan koaros. Pwehki Depit likih me Siohwa ketin poakohng oh pahn apwalih, met sewese ih en dehr pwunod ahpw en kin peren oh nsenamwahu.—Mel. 16:11.

14. Ia duwen Siohwa eh kin ketin apwalih kitail ni limpoak?

¹⁴ Siohwa kin ketin nsenohkin kitail ni limpoak, ahpw mehlel ni atail kin lelohng soahng suwed kan. Claire, a me kin papah nan Pedel daulih sounpar 20, sehse ia duwen eh pahn sewese eh peneineio ni ar lelohng kahpwal laud kei. Eh pahpao ahnekihda soumwahu en stroke, emen rie serepein ko piskenla, oh en eh peneineio pesines tikitiko sohla oh pil imwarailo. Ia duwen Siohwa eh ketin kasalehiong irail sapwellime limpoak? Claire koasoia: “Siohwa kin ketin tehk mwahu me ahnsou koaros ei  peneinei pahn alehdi dahme re anahne ehuehu rahn. Pali laud en ahnsou Siohwa kin ketikihong kiht laudsang dahme se anahne. I kin kalapw medewehla duwen Siohwa eh kin ketin sewesei kiht mahso, oh I sohte pahn manokehla sapwellime limpoak. Mehn kataman pwukat kin sewese ie I en dadaurete pahn kahpwal kan.”

15. Dahme kahrehda Depit kin kehlailda? (Pil kilang kilel.)

¹⁵ “E kin ketin kakehleiehda.”  Ekei pak, Depit kin nsensuwedla pwehki kahpwal oh lokolok koaros me e kin sohsohpai. (Mel. 18:​4-6) Ahpw, sapwellimen Siohwa limpoak oh epwel kin kakehlahda ih. Siohwa kin ketin kahluwahla kompoakepah menet me pwangada nan “mohsen dihp” oh “ni pihl mwakelekel.” Pwehki met, Depit kehlailda oh kak pousehlahte papah Siohwa ni peren.—Mel. 18:​28-32.

16. Ia duwen sapwellimen Siohwa limpoak eh kakehlaiukada?

¹⁶ Duwehte rahnwet, “pwehki sapwellimen Siohwa limpoak loalopwoat kitail sohte sohrala” ni atail kin lelohng kahpwal kan. (Koul Ked. 3:​22, NW; Kol. 1:11) Medewehla dahme wiawihong Rachel. E uhdahn nsensuwedla ni eh pwoudo eh kohkohlahsang ih oh Siohwa erein soumwahu lusulus en COVID-19. Dahme Siohwa ketin wiahiong ih? E koasoia: “Siohwa ketin tehk mwahu me I pehm sapwellime limpoak. E ketin kapilkiniepene kompoakepahi kan me kin mwemweitdo rehi, wahdo kenei mwenge, kadarodo kisinlikou oh iren Paipel kangoang kan, sireiong ie, oh kin pousehlahte katamankihong ie me Siohwa kin ketin nsenohkin ie. I kin kalahngankihong Siohwa eh ketikihong ie peneinei limpoak laud ehu.”

17. Dahme kahrehda Depit sohte kin “masak mehkot”?

¹⁷ “I sohte pahn masak mehkot, pwe komw ketin ieiang ie.” En Depit mour kin kalapw mi nan keper oh mie eh imwintihti kehlail tohto. Ahpw, sapwellimen Siohwa limpoak kin sewese ih en dehr perki mehkot oh kin pere ih. Depit kak pehm me Siohwa kin ketin ieiang ih nan irair koaros oh met kin kansenamwahwih. Kahrehda e kak koulki: “[Siohwa] ketin kasaledekihiehla sang nan ei masak koaros.” (Mel. 34:4) Mendahki ekei pak Depit kin uhdahn masepwehkada, e kin kak powehdi met pwehki e ese me Siohwa ketin poakohng ih.

18. Ia duwen omw ese me Siohwa ketin poakohng uhk eh kak kakehlakaiuk ni omw mihla nan irair kamasepwehk?

¹⁸ Ia duwen atail ese me Siohwa ketin poakohng kitail eh kin kakehlaka kitail ni atail mihla nan irair kamasepwehk kan? Pioneer men me adaneki Susi kawehwehda en ih oh eh pwoudo pepehm ni ahnsou me neira pwutako kemehla pein ih: “Ni ahnsou me mehkot kansensuwed ehu kin wiawi nan omw mour, ke kin uhdahn nsensuwedla oh pehm me pil ekei pahn wiawi. Ahpw sapwellimen Siohwa diren limpoak kin sewesei kiht en sohte perki mehkot.” Rachel, me kitail koasoiapene mwoweo, tamanda: “Ehu pwohngo ni ahnsou me I mworusala  oh I uhdahn pwunodada oh masepwehkada, I sengiseng oh kapakap ni ngihl laud ong Siohwa. Ni ahnsowohte I pehm eh ketin kansenamwahwihiehla oh kameleileiehdi, duwehte me nohno men kin wiahiong nah seri, ngehi eri meirla. I sohte pahn manokehla ahnsowo.” Elder men me adaneki Tasos mihmihki nan imweteng sounpar pahieu pwehki eh sohte iang sounpei. Ia duwen eh pehm sapwellimen Siohwa limpoak oh epwel? E koasoia: “Siohwa ketikihong ie laudsang dahme I anahne. Met kakehlaka ei koapworopwor me I uhdahn kak likih ih. Oh pil sang sapwellime manaman, Siohwa ketikihong ie peren mendahki ei mi nan imweteng wasa kansensuwed. Met sewese ien kilang me uwen laud en ei kin likih Siohwa, ih uwen laud en ei pahn pehm sapwellime limpoak. Ngehi eri tepida pioneer nan imweteng.”

KARANIHALA OMW KOHTO ME DIREN LIMPOAK

19. (a) Ia pahn mwomwen atail kapakap ni atail ese me Siohwa ketin poakohng kitail? (b) Mehnia rehn kawehwehpen sapwellimen Siohwa limpoak kan me ke pehmehr nan omw mour? (Menlau kilang koakono “ Mahsen kan me Sewese Kitail en Pehm Sapwellimen Siohwa Limpoak.”)

¹⁹ Koasoipen irail pwukat koaros me kitail koasoiapene kadehdehda me Siohwa “Koht en limpoak,” kin ketin ieiang kitail! (2 Kor. 13:11) E ketin nsenohkin kitail. Kitail kamehlele me “sapwellime limpoak poatopoat pahn sinsile” kitail. (Mel. 32:10) Uwen laud en atail kin doudouloale eh ketin poakohng kitail, ih uwen laud en atail pahn kilang eh ketin nsenohkin kitail oh kitail pahn karanihala ih. Kitail kak kapakap ong ih ni saledek oh patohwanohng ih ia uwen atail anahne sapwellime limpoak. Kitail kak ehukihong ih atail pwunod akan koaros, pwehki kitail kamehlele me e ketin mwahngih oh kupwurki sewese kitail.—Mel. 145:​18, 19.

20. Ia duwen sapwellimen Siohwa limpoak eh kin kakerenihkitailla reh?

²⁰ Duwehte atail kin keilahng mpen kisiniei ehu ni ahnsoun kopou, sapwellimen Siohwa limpoak kin kahrehiong kitail en keilahng mpe. Mendahki sapwellimen Siohwa limpoak uhdahn kehlail e pil kin kansenamwahu. Eri pereperen pwehki Siohwa ketin poakohng uhk. Oh kitail koaros en mwekidki sapwellime limpoak oh nda: ‘I kin poakohng Siohwa’!—Mel. 116:1.