LEPIN lokaiahn Krihso me kawehwehdiong “werennansapw” nan Kawehwe en Sampah Kapw kak dokedoke soangsoangen mehn peidaid kan. (Wiewia 8:​28, 29, 38) Ahpw, e mwomwen me ohlen Idiopiao dakedake werennansapw ehu me laudsang werennansapw kan me re kin doadoahngki ong mahwen oh weir kan. Medewehla ekei kahrepe kan me kitail kak ndahki met.

Ohlen Idiopiao wia lapalap men me kin seiloak doh. Ih “ohl men me ahneki manaman pahn Kandehsi, lih nanmwarkien Idiopia, oh me kin apwahpwalih eh dipwisou kesempwal kan koaros.” (Wiewia 8:27) Sudan oh palieir en Isip nan atail ahnsou wia kisehn Idiopia en mahso. Mendahki ohlo ele sohte dake soangen mehn peidaid ehute erein eh seiloako pwon, e kakete wahda soahng tohto me anahn ong seiloak reireio. Ekei mehn peidaid kan me re kin doadoahngki ni mwehin tepin Kristian ko pwehn wahda pahsinse kan kin mie daia pahieu oh pohn ihmw. Nin duwen me ehu pwuhk (Acts—An Exegetical Commentary) koasoia, “soangen werennansapw wet anahne laud pwehn kak wahda ehd kan oh soahng teikan, pwe seiloako en kansenamwahu, oh pwe aramas akan en kak seiloakla wasa doh.”

Ohlen Idiopiao wie wadawad ni ahnsou me Pilip kohla reh. Paipel mahsanih me “Pilip eri tangala limwahn werennansapwo oh rong [ohlen Idiopiao] wadewadek ni ngihl laud pwuhken soukohp Aiseia.” (Wiewia 8:30) Werennansapw kan me re kin seiloangki sohte wiawihda pwehn tang marahra. Pwehki soangen werennansapw pwukat kin tang wawai, met kahrehda ohlen Idiopiao kak wadawad oh Pilip kak tang oh pwakihedi.

Ohlen Idiopiao “luke Pilip en douda oh mwohndi reh.” (Wiewia 8:31) Werennansapw kan me re kin doadoahngki ong weir, irail me kin dake ko kin kesihnen. Ahpw nan werennansapw me wiawihda ong seiloak, mie wasa me ohlen Idiopiao oh Pilip kak mwohd ie.

Pwehki dahme Wiewia irelaud 8 mahsanih oh dahme poadopoad teikan koasoia, me keren neitail sawasepen Paipel kan kin kasalehda kilelen ohlen Idiopiao eh dakedake werennansapw laud ehu a kaidehn me tikitik me re kin doadoahngki ong mahwen de weir kan.