1. Ia duwen atail kin paiekihda atail kin iang towehda Kataman en pwoulahn Krais pahr koaros?

 ELE ke pil pwungki me pweinen pweipwei sapahlo uhdahn kisakis kaselel ehu! (2 Kor. 9:15) Pwehki Sises ketin meirongkihla moure, ke kak ahneki nanpwungmwahu keren rehn Siohwa Koht. Ke pil kak ahneki koapworopwor en mour soutuk. Ia uwen eh konehng me kitail en kasalehda atail kalahnganki pweinen pweipwei sapahlo oh pil Siohwa me ketikihda met pwehki e uhdahn ketin poakohng kitail! (Rom 5:8) Pwehn sewese kitail en kin kalahngankihte oh dehr manokehla dahme Siohwa oh Sises ketin wiahda ong kitail, Sises ketin kehkehlingki me kitail en kin iang towehda Kataman en eh pwoula pahr koaros.—Luk 22:​19, 20.

2. Dahme kitail pahn koasoiapene nan iren onop wet?

² Nan pahret, Katamano pahn wiawi Rahn Kaunop, April 12, 2025. Kitail koaros pilahn en iang towehda. Kitail pahn uhdahn paiekihda ma kitail wiahda ahnsou erein wihk kan mwohn oh mwurin Katamano pwehn doudouloale a dahme Siohwa oh Sapwellimeo ketin wiahda ong kitail. Nan iren onop wet, kitail pahn koasoiapene dahme pweinen pweipwei sapahlo kin padahkihong kitail duwen Siohwa oh Sapwellimeo. Nan iren onop en mwuhr, kitail pahn sukuhlki ia duwen atail kak paiekihda pweinen pweipwei sapahlo oh ia duwen atail kak kasalehda atail kalahnganki.

DAHME PWEINEIN PWEIPWEI SAPAHLO PADAHKIHONG KITAIL DUWEN SIOHWA

3. Ia duwen pwoulahn ohl tehmen eh kak kasaledekihala aramas tohto sang dihp oh mehla? (Pil kilang kilel.)

³ Pweinen pweipwei sapahlo kin padahkihong kitail duwen sapwellimen Siohwa pwung pahrek. (Deud. 32:4) Ia duwen? Medewehla met: Pwehki Adam sapeik, kitail sohsohki dihp me imwikihla mehla. (Rom 5:12) Pwehn kasaledekkitailsang dihp oh  mehla, Siohwa ketin poaronehdo Sises pwehn kihda pweinen pweipwei sapahlo. Ahpw ia duwen meirong en ohl unsek tehmen eh kak kasaledekihala aramas tohto sang dihp oh mehla? Wahnpoaron Pohl kawehwehda: “Pwe nin duwen sapeik en aramas tehmen [Adam] eh imwikihla aramas tohto ar wiahla aramas dipan kei, ih pil duwen peik en aramas tehmen [Sises] eh imwikihla aramas tohto ar pahn wiahla aramas pwung kei.” (Rom 5:19; 1 Tim. 2:6) Pohl kin koasoakoasoia me pwehki ohl unsek tehmen sapeikiong Koht, aramas koaros dipan oh anahne mehla. Eri, pwe kitail en saledeksang dihp oh mehla, ohl unsek tehmen anahne peikiong Koht.

4. Dahme kahrehda Siohwa sohte ketin mweidohng kadaudok en Adam kan me kin peikiong Ih ren mour kohkohlahte?

⁴ Ia duwe, Sises uhdahn anahne pwoula pwehn doareikitailla? Dahme kahrehda Siohwa sohte ketin mweidohng kadaudok en Adam kan me kin peikiong Ih ren mour kohkohlahte? Ong aramas soh unsek kan, mwein met pahn wia elen kadek oh toupahrek. Ahpw ong Siohwa, e sohte pahn pwung en wia met. Pwehki e pahn mwomwen me Adam sohte wiahda dihp laud oh kadaudoke kan sohte dipan. Met sohte mehlel.

5. Dahme kahrehda kitail kak uhdahn kamehlele me Siohwa pahn ahnsou koaros ketin wia dahme pwung?

⁵ Pil ehu, ma Siohwa sohte ketikihda pweinen pweipwei sapahlo, oh mweidohng kadaudok en Adam kan en mour kohkohlahte mendahki irail soh unsek, eri Siohwa pahn ketin pohnsehsehla pein sapwellime koasoandi kan ong dahme pwung oh sapwung. Imwilahn met, aramas akan kakete pwunodki me ele e pahn ketin pwurehng pohnsehsehla sapwellime koasoandi kan oh sohte kapwaiada dahme e mahsanih e pahn ketin wia ni ahnsou kohkohdo. Irail pil kakete peikasalki me Siohwa pahn ketin kapwaiada sapwellime inou kan koaros. Ahpw kitail sohte anahne pwunodki me met pahn wiawi. Dahme kahrehda? Pwehki Siohwa ketin wiahda dahme pwung pahrek mendahki e anahne ketin meirongkihla Sapwellimeo pwehn wia met. Eri kitail kak uhdahn kamehlele me e pahn kin ahnsou koaros ketin wia dahme pwung.

6. Ia pil ehu irair kaselel me kamwakid Siohwa en ketin poaronehdo sapwellime Ohlo? (1 Sohn 4:​9, 10)

⁶ Pil mie ehu irair kaselel me keieu kamwakid Siohwa en ketin poaronehdo Sises pwehn pwoukinkitailla. Met iei sapwellime limpoak ong kitail. (Sohn 3:16; wadek 1 Sohn 4:​9, 10.) Siohwa ketin poaronehdo sapwellime Ohlo pwehn pwoukinkitailla pwehki e ketin kupwurki kitail en mour kohkohlahte oh pil wiahla kisehn sapwellime peneinei. Medewehla met: Ni Adam eh dipada, e sohla wia kisehn sapwellimen Siohwa peneinei. Pwehki met, kitail sohte wia kisehn sapwellime peneinei ni ahnsou me kitail ipwidi. Ahpw pwehki pweinen pweipwei sapahlo, Siohwa ketin mahkohng dipatail kan oh pahn ehu  rahn ketin wiahkihla eh peneinei koaros me kin pwoson oh peikiong ih. Pil ahnsou wet kitail kak ahneki nanpwungmwahu keren rehn Siohwa oh pil rehn riatail Kristian kan. Ei mehlel, Siohwa uhdahn ketin poakohng kitail!—Rom 5:​10, 11.

7. Ia duwen lokolok me Sises lelohng eh sewese kitail en wehwehki mwahu uwen laud en Siohwa eh ketin poakohng kitail?

⁷ Kitail kak wehwehkihla mwahu ia uwen laud en Siohwa eh ketin poakohng kitail ma kitail kin medewehla uwen weirek laud me e sapwellimanki ni eh mahsanih sapwellime Ohlo eh lelohng lokolok. Sehdan nda me dene sohte ladu en Koht emen pahn loalopwoatohngete Ih ni ahnsou me apwal en wia met. Pwehn kadehdehda me Sehdan likamw, Siohwa ketin mweidohng Sises en lelohng lokolok laud mwohn eh pwoula. (Sohp 2:​1-5; 1 Pit. 2:21) Siohwa ketin mahsanih aramas ako ar kapailoke Sises, sounpei kan keme, oh pasuradahng ni tuhkehn kalokoloko. Ih eri pil mahsanih sapwellime Ohl kompoako pwoula ni ahl ehu me uhdahn kamedek. (Mad. 27:​28-31, 39) Siohwa sapwellimanki manaman en kauhdi soahng pwukat koaros en wiawi. Karasepe, ni aramas ako ar nda: “Koht en ketin doarehla ih met ma E kin ketin kupwurperenki ih,” Siohwa kak ketin wia met. (Mad. 27:​42, 43) Ahpw ma e ketin wia met, eri Sises sohte pahn kak toukihda moure nin duwen pweinen pweipwei sapahl ehu oh e sohte pahn mie atail koapworopwor. Eri Siohwa ketin mweidohng Sapwellimeo en dadaur pahn lokolok lao e pwoula.

8. Siohwa ketin medengkihla ni eh mahsanih Sapwellimeo eh lokolok? Menlau kawehwehda. (Pil kilang kilel.)

⁸ Kitail en dehr medewe me pwehki Koht me keieu manaman, met wehwehki me sohte eh pepehm. Kitail kapikipikda rasehng ih me kak pehm soahng kan. Eri e pil kak ketin pehm soahng kan. Paipel mahsanih me kupwure kin ‘nsensuwedla’ oh ‘toutoula.’ (Mel. 78:​40, 41) Pil medewehla koasoipen Eipraam oh Aisek. Taman me Siohwa ketin mahsanihong Eipraam en meirongkihla nah iehroso. (Sen. 22:​9-12; Ipru 11:​17-19) Medewehla soangen pepehm me Eipraam ahneki ahnsou me e kaukaunop en kemehla nah pwutako. Pil medewehla ia uwen nsensuwed oh weirek laud me Siohwa ketiki ni eh mahsanih aramas ako ar kaloke oh kemehla sapwellime Ohlo!—Menlau kilang kisin kasdou Imitate Their Faith—Abraham, Part 2 nan jw.org.

9. Dahme ke kak sukuhlkihsang Rom 8:​32, 38, 39 duwen sapwellimen Siohwa limpoak?

⁹ Pweinen pweipwei sapahlo padahkihong kitail me sohte emen me kin poakepoake kitail duwehte Siohwa kin ketin wia—pil kaidehn kisehtail de kompoakepatail keren kan. (Wadek Rom 8:​32, 38, 39.) Kitail kak uhdahn kamehlele me Siohwa ketin poakohng kitail laudsang atail poakohng pein kitail. Ke men mour kohkohlahte? Siohwa ketin kupwurki met en wiawi laudsang uhk. Ke men ale mahkpen dipomw kan? Siohwa ketin kupwurki mahkohng laudsang uhk. Ihte me e ketin kasik sang uhk iei en kasalehda omw kalahnganki kisakis en pweinen  pweipwei sapahlo, pwoson ih, oh peikiong. Pweinen pweipwei sapahlo uhdahn wia kisakis kesempwal ehu me kasalehda sapwellimen Siohwa limpoak laud ong kitail. Oh nan sampah kapwo, kitail pahn kalaudehla atail sukuhlki duwen sapwellime limpoak.—Ekl. 3:11.

DAHME PWEINEN PWEIPWEI SAPAHLO PADAHKIHONG KITAIL DUWEN SISES

10. (a) Dahme Sises keieu ketin pwunodki duwen eh pwoulao? (b) Ni ahl dah me Sises kadehdehda me Siohwa ketin pwung? (Pil kilang koakon “ Lelepek en Sises Kadehdehda me Siohwa Ketin Pwung.”)

¹⁰ Sises ketin nsenohki laud adamwahu en Semeo. (Sohn 14:31) Sises uhdahn ketin pwunodki me eh pwoula nin duwen ohl mwersuwed men me kin lahlahwe oh sohte wauneki Koht kak kahdsuwedihala mwaren Semeo. Ihme kahrehda e kapakap oh patohwan: “Ipa, ma kak, mweidohng kep wet en douluhlweisang ie.” (Mad. 26:39) Sang ni eh ketin lelepekte ong Siohwa lao lel mehla, Sises ketin kadehdehda ni unsek me dahme Sehdan ndahki Semeo uhdahn likamw.

11. Ia duwen Sises eh ketin kasalehda me e uhdahn poakohng aramas akan? (Sohn 13:1)

¹¹ Pweinen pweipwei sapahlo pil padahkihong kitail me Sises kin ketin nsenohki laud aramas akan, ahpw keieu sapwellime tohnpadahk kan. (Lep. Pad. 8:31; wadek Sohn 13:1.) Karasepe, Sises mwahngih me ekei soahng kan me e pahn ketin wia nin sampah pahn uhdahn apwal, ahpw mehlel ni eh pahn pwoula ni ahl kamedek ehu. Ahpw Sises ketin kapwaiada eh pwukoa nin sampah, kaidehn ihte pwehki Siohwa ketikihong ih pwukoa wet, ahpw pil pwehki e uhdahn poakohng aramas akan. Sises ketin kasalehda limpoak laud ong aramas akan sang ni eh ketin kalohk ong irail, padahki irail, oh sewese irail. Pil ni rahnen eh pwoulao, Sises ketin wiahda ahnsou en widenda patehnehn sapwellime wahnpoaron ko, padahki, kangoange, oh kansenamwahwihirailla. (Sohn  13:​12-15) Mwuhr ni eh ketiket pohn tuhkehn kalokoloko, e ketikihong loallapo me langalang limwah koapworopwor en mi nan Paradais, oh e pil ketin kasalehda eh nsenohki ineo ni eh peki Sohn en apwalih. (Luk 23:​42, 43; Sohn 19:​26, 27) Sapwellimen Sises limpoak laud ong aramas akan sansalda kaidehn sangete eh pwoukinirailla, ahpw pil sang sapwellime wiewia kadek ong irail.

12. Ia duwen Sises eh kin ketin sewesewese kitail ahnsou wet?

¹² Ei mehlel, Sises pwoula “pak ehute,” ahpw e ketin wiewiahte soahng tohto ong kitail. (Rom 6:10) Soahng dah kan? E kin pousehlahte ketin doadoahk laud pwehn ketikihong kitail soahng mwahu tohto me kitail kak paiekihda ahnsou wet pwehki pweinen pweipwei sapahlo. Medewehla dahme e kin ketin wiewia met. E kin ketin papah nin duwen atail Nanmwarki, Samworo Lapalap, oh tapwin mwomwohdiso. (1 Kor. 15:25; Ep. 5:23; Ipru 2:17) Ih me kin ketin apwahpwalih doadoahk en kapokonepene me keidi kan oh pokon kalaimwuno, doadoahk ehu me pahn nek mwohn kahn kamakam kohwahlapo eh imwisekla. b (Mad. 25:32; Mark 13:27) E pil kin ketin doadoahngki ladu lelepeko en kihkihdahte dahme kitail anahne pwehn papah Siohwa ni lelepek. (Mad. 24:45) Oh erein sapwellime Kaundahn Pahr Kido, e pahn ketin pousehlahte wiahda soahng kan ong kitail. Ei, ni Siohwa eh ketikihda sapwellime Ohlo ong kitail, E sohte ketikihdahte pwehn pwoukinkitailla, ahpw pwe en pil wiahiong kitail soahng tohto.

DOULAHTE SUKUHLKI SOAHNG KAPW KAN

13. Ia duwen omw doudouloale eh kak seweseiuk en kalaudehla omw esehla sapwellimen Koht oh Krais limpoak ong kitail?

¹³ Ke kak pousehlahte sukuhlki duwen Siohwa Koht oh Krais Sises ara poakohng kitail ma ke kin doudouloalehte dahme ira ketin wiahiong kitail. Ele erein wihk kan mwohn oh mwurin Kataman en pahret, ke kak wadek kanahieng pwuhken Rongamwahu ko. Dehr wadekala irelaud tohto ahnsoukiste. Ahpw wadek ni wawai oh rapahki kahrepe teikan me kitail en poakohngki Siohwa oh Sises. Ehukihong meteikan dahme ke diarada nan omw wadawado.

14. Ia duwen atail wia roporop eh kak sewese kitail en pousehlahte sukuhlki duwen pweinen pweipwei sapahlo oh pil padahk teikan? (Melkahka 119:97) (Pil kilang kilel.)

¹⁴ Ma ke wereilahr nan padahk mehlel, ele ke kin medewe ma miehte soahng kapw kan me ke kak sukuhlki duwen sapwellimen Koht pwung pahrek, limpoak, oh pweinen pweipwei sapahlo. Ni mehlel, e pahn ahnsou koaros mie soahng  kapw kan me kitail kak sukuhlki. Eri, dahme ke kak wia? Wadek oh onopki soahng kaselel kan me mi nan neitail sawasepen Paipel kan. Ma ke diarada ire ehu me ke sohte uhdahn wehwehki, wia roporop. Oh erein rahno pwon, doudouloale dahme ke onopki oh sukuhlki duwen Siohwa, Sapwellimeo, oh ara limpoak ong uhk.—Wadek Melkahka 119:97.

15. Dahme kahrehda e kesempwal en song pousehlahte sukuhlki soahng kapw kan sang nan Paipel?

¹⁵ Dehr mworusala ma ke sohte diar mehkot kapw de kaperen ahnsou koaros me ke mwohndiong wadawad de wia roporop. Medewehla me kowe emen sounrapahki kohl. Ni kanengamah, sounrapahki kohl kan kin doadoahngkihla awa de rahn tohto mwohn arail diar kohl, pil kohl me keieu tikitik. Ahpw irail kin nannantihte pwehki kohl ko koaros kesempwal ong irail. Ahpw me kesempwal sang kohl iei soahng kapw koaros me kitail kin sukuhlki sang nan Paipel. (Mel. 119:127; Lep. Pad. 8:10) Eri, kanengamah oh idawehnte omw koasoandi en wadawad en Paipel.—Mel. 1:2.

16. Ia duwen atail kak kahlemengih Siohwa oh Sises?

¹⁶ Ni omw kin onop, medewe ia duwen omw kak doadoahngki nan omw mour dahme ke sukuhlki. Karasepe, kahlemengih sapwellimen Siohwa pwung pahrek nan omw wiewia ong meteikan. Kahlemengih sapwellimen Sises limpoak ong Semeo oh meteikan sang ni omw kin men wia dahme Siohwa ketin kupwurki oh sewese meteikan mehnda ma met pahn kahrehiong omw mour en apwalla. Oh pil kahlemengih Sises sang ni omw kin kalohk ong meteikan pwe irail en pil ahneki ahnsou mwahu en esehla soahng kapwuriamwei kan me Siohwa ketin wiewiahiong aramas akan oh kasalehda arail pwoson pweinen pweipwei sapahlo.

17. Dahme kitail pahn koasoiapene nan iren onop en mwuhr?

¹⁷ Ni atail kalaudehla atail wehwehki oh kalahnganki pweinen pweipwei sapahlo, atail limpoak ong Siohwa oh sapwellime Ohlo pahn pil laudla. Oh pwehki atail poakohng ira laudla, ara limpoak ong kitail pahn pil laudla. (Sohn 14:21; Seims 4:8) Eri, pousehlahte doadoahngki soahng koaros me Siohwa ketikihong kitail pwehn kalaudehla atail sukuhlki duwen pweinen pweipwei sapahlo. Nan iren onop en mwuhr, kitail pahn kalaudehla atail sukuhlki duwen kapai kan me kitail ahneki pwehki Sises pwoukinkitailla, oh ia duwen atail kak kasalehda atail kalahnganki sapwellimen Siohwa limpoak.