1. Dahme me tohto rahnwet kin nsenohki?

 MWEIN ke kin kilang me aramas tohto rahnwet kin nsenohkihte pein irail laudsang meteikan. Karasepe, ekei kin doadoahngki social media pwehn suweiki pein irail oh dahme re kin wiewia. Ahpw, me malaulau rahnpwukat me kin men kalinganahla Siohwa Koht. Nan iren onop wet, kitail pahn koasoiapene ia wehwehn en kin kalinganahla Siohwa oh dahme pahn kin kamwakid kitail en wia met. Kitail pil pahn sukuhlki ia duwen atail kak patohwanohng Siohwa lingan me e ketin warohng oh ia duwen pein ih pahn ketin kalinganahla mware ni ahnsou kohkohdo.

IA WEHWEHN EN KALINGANAHLA SIOHWA?

2. Ia duwen Siohwa eh ketin kasalehda sapwellime lingan ni Nahna Sainai? (Pil kilang kilel ni Kahn Iroir wet.)

² Paipel kasalehda me Siohwa iei Koht emen me inenen lapalap kowahlahpie. Rahn keite mwurin Siohwa ketin kapitala wehin Israel sang Isip, e ketin kasalehiong irail sapwellime lingan. Medewehla mehn Israel rar rar kei ar pokonpene ni tepin Nahna Sainai pwe ren rong dahme Koht pahn ketin mahsanihong irail. Depwek mosul ehu pa kipehdi nahnao. Oh ediniei moron ehu koaduhpwaldi nahnao oh pwehlo rerada, oh ni ahnsowohte, lioal tepida piripir, nansapwe pos, oh ngilen sowi laud ehu kadirehla nan wehwe. (Eks. 19:​16-18; 24:17; Mel. 68:8) Medewehla uwen mehn Israel ko ar pwuriamweila ni Siohwa eh ketin kasalehda sapwellime lingan lapalap.

3. Ia wehwehn en kalinganahla Siohwa?

³ Aramas akan pil kak kalinganahla Siohwa. Ehu ahl en kalinganahla Siohwa iei sang ni atail kin padahkihong meteikan duwen sapwellime manaman lapalap oh irair kaselel kan. Kitail  pil kak kalinganahla Koht sang ni atail kin kapingahki sapwellime sawas ong soahng kan me kitail wiahda. (Ais. 26:12) Nanmwarki Depit wia mehn kahlemeng mwahu ni eh kin kalinganahla Siohwa. Nan kapakap me e wia mwohn mwomwohdiso en Israel, Depit patohwanohng Koht: “Komwi me lapalahpie oh roson, manaman, lingan, oh wahu. Sapwellimomwi mehkoaros me mi pahnlahng oh nin sampah.” Mwurin eh kapakapo, “pokono eri kapinga KAUN-O.”—1 Kron. 29:​11, 20.

4. Ia duwen Sises eh ketin kalinganahda Siohwa?

⁴ Ni Sises eh patopato sampah, e patohwan kalinganahla Semeo sang ni eh padahkihong aramas akan me Siohwa iei me ketikihong ih manaman en wiahda manaman kapwuriamwei kan. (Mark 5:​18-20) Sises pil patohwan kalinganahla Siohwa sang ni mwomwen eh ketin padahngki duwen Semeo oh mwomwen eh wiewia ong meteikan. Ehu ahnsowo, Sises ketin padapadahk nan sinakoke ehu. Nanpwungen me rongorong ko, mie lih emen me ngehn suwed mi reh erein sounpar 18. Ngehn suwedo kahrehiongehr paliwereo en uhdahn kospene oh sohte kak inenda. Ia uwen kaweikek! Limpoak kamwakid Sises en ketila karanih liho oh ni kadek, mahsanih: “Lih, ke maiauda sang omw soumwahwen.” Ih eri ketikihdi limeo pohn liho, oh liho mwadangete inenda oh “tepida kalinganahda Koht.” (Luk 13:​10-13) Liho ahneki kahrepe mwahu en kalinganahda Siohwa, pil duwehte kitail.

DAHME KIN KAMWAKID KITAIL EN KALINGANAHLA SIOHWA?

5. Kahrepe dah kan me kitail ahneki en wauneki Siohwa?

⁵ Kitail kin kalinganahla Siohwa pwehki kitail kin wauneki ih. Mie kahrepe tohto me kitail kin waunekihki. Siohwa iei me keieu manaman; sohte irepen sapwellime manaman. (Mel. 96:​4-7) Sapwellime erpit laud kin sansalda sang ni soahng kan me e ketin wiahda. E ketikihong kitail mour oh soahng koaros me kitail anahne pwehn momour. (Kaud. 4:11) E kin ketin loalopwoat. (Kaud. 15:4) Soahng koaros me e kin ketin wia kin pweida, oh e kin ahnsou koaros ketin kapwaiada sapwellime inou kan. (Sos. 23:14) Ihme kahrehda soukohp Seremaia koasoiahki Siohwa: “Sohte emen me duwehte komwi nanpwungen me loalokong koaros en wehi kan de nanpwungen ar nanmwarki kan”! (Ser. 10:​6, 7) Ei mehlel, kitail ahneki kahrepe mwahu en wauneki Samatailo nanleng. Ahpw kitail sohte kin waunekihte Siohwa, kitail pil kin poakohng ih.

6. Dahme kahrehda kitail kin poakohng Siohwa?

⁶ Kitail kin kalinganahla Siohwa pwehki kitail uhdahn poakohng ih. Kitail kin poakohng Siohwa pwehki sapwellime irair kaselel tohto. E kin ketin kadek kalahngan oh kin poakehla aramas. (Mel. 103:13; Ais. 49:15) E kin ketin mwahngih ni atail medekla. (Sek. 2:8) E kin ketin sewese kitail en esehla oh kompoakepahnkihla Ih. (Mel. 25:14; Wiewia 17:27) Oh e kin ketin aktikitik; e “kin ketin mahsendihdo [“maliedi,” NW] oh ireirong nanleng oh sampah. E kin ketin pwekada me semwehmwe kan sang nanpwel.” (Mel. 113:​6, 7) Pwehki kahrepe pwukat koaros, kitail kin men kalinganahla atail Koht lapalapo.—Mel. 86:12.

7. Ahnsou mwahu dah me kitail ahneki?

⁷ Kitail kin kalinganahla Siohwa pwehki kitail men meteikan en esehla ih. Me tohto sehse dahme mehlel duwen Siohwa. Dahme kahrehda? Pwehki Sehdan karotongelahr arail madamadau sang ni eh kihpeseng likamw kan duwen Ih. (2 Kor. 4:4) Sehdan pil kamehlelehiong aramas akan me Siohwa kin ketin engieng pahrail, sohte kin ketin nsenohki  irail, oh kin ketin kahrehda lokolok laud ong tohnsampah. Ahpw kitail ese dahme mehlel duwen atail Koht! Kitail ahneki ahnsou mwahu en padahkihong meteikan dahme mehlel duwen Koht oh sewese irail en pil kalinganahla. (Ais. 43:10) Melkahka irelaud 96 kin koasoakoasoia duwen atail en kalinganahla Siohwa. Ni atail koasoiapene ekei iretikitik pwukat, medewehla ekei ahl akan me kitail kak patohwanohng Siohwa lingan me e ketin warohng.

IA DUWEN ATAIL KAK PATOHWANOHNG SIOHWA LINGAN ME E KETIN WAROHNG?

8. Ia ehu ahl me kitail kak kalinganahla Siohwa? (Melkahka 96:​1-3)

⁸ Wadek Melkahka 96:​1-3. Kitail kak kalinganahla Siohwa ni atail kin koasoia duwen ih. Iretikitik pwukat padahkihong kitail en ‘kouliong Siohwa,’ “kapinga mware,” oh “kalohki duwen sapwellime lingan ong tohn wehi kan.” Kitail kak kalinganahla Samatailo nanleng ni atail wia soahng pwukat koaros. Sapwellimen Siohwa ladu kan mahso sohte kin pweiek en padahkihong meteikan duwen sapwellime irair kaselel kan oh soahng mwahu koaros me e ketin wiadahr ong irail. (Dan. 3:​16-18; Wiewia 4:29) Ia duwen atail pil kak wia met?

9-10. Dahme ke sukuhlkihsang dahme wiawihong Angelena? (Pil kilang kilel.)

⁹ Medewehla dahme wiawihong sister men me adaneki Angelena a me kin mi nan Wehin Amerika. E uhdahn eimah ni eh koasoia duwen Siohwa ni eh wasahn doadoahko. Pwehki e ahpwtehn tepida doadoahk wasao, ih oh ekei me pil saik wereila wasao iang mihting ehu nan wasahn doadoahko. Nan mihtingo, koaros kak koasoiahda duwen pein irail. Angelena kaunopada kilel kei (slide) pwehn kasalehiong irail peren me e ahneki nin duwen Sounkadehdehn Siohwa men. Ahpw mwohnte eh ahnsou en koasoi, emen tohndoadoahk ko koasoiahda duwen ih oh nda me e tikida nan peneinei ehu me wia Sounkadehdehn Siohwa kei. Ohlo tepida kauwe Sounkadehde kan. Angelena koasoia: “I uhdahn salohda. Ahpw I pein medewehla: ‘Ia duwe, I pahn mweidohng emen en kinehda likamw duwen Siohwa? De I pahn uhpalih Siohwa?’”

¹⁰ Ni ohlo eh nek koasoi, Angelena kapakap ni mwotomwot nan kapehde. Ih eri ndaiong ohlo ni kadek: “Ei irairo pil duwehte ahmw. I pil tikida wia emen Sounkadehdehn Siohwa, oh I wiewiahte emen leledo  rahnwet.” Mendahki ahnsowo ekis kapwunod, Angelena meleileite. E kasalehiong ienge tohndoadoahk ko kilel en ih oh kompoakepah kan arail pereperen papah Siohwa oh ni wahu kawehwehda dahme e kin kamehlele. (1 Pit. 3:15) Dahme wiawi mwurin mwo? Ni ahnsou me Angelena nek koasoi, ohlo meleileidi. Ohlo pil koasoiahda soahng mwahu kan me wiawihong ih ni ahnsou me e pwulopwul oh iang patehng Sounkadehde kan. Angelena koasoia: “E uhdahn konehng kitail en uhpalih Siohwa. E wia pwais kaselel ehu en padahkihong meteikan dahme mehlel duwen ih.” Kitail pil kak kapinga Siohwa ni meteikan ar kauwe. Met uhdahn wia pwais kaselel ehu.

11. Ia duwen tohnkaudok mehlel kan mahso oh pil nan atail ahnsou ar kin idawehn kaweid en Melkahka 96:8?

¹¹ Wadek Melkahka 96:8. Kitail kak kalinganahla Siohwa sang ni atail patohwanohng soahng kesempwal kan rehtail. Tohnkaudok mehlel kan kin ahnsou koaros kawauwih Siohwa ni ahl wet. (Lep. Pad. 3:9) Karasepe, mehn Israel kan kin kihda mwohni oh soahng kesempwal kan pwehn sewese kauwada oh pil apwalih tehnpas sarawio. (2 Nan. 12:​4, 5; 1 Kron. 29:​3-9) Ekei sapwellimen Sises tohnpadahk ko kihda “ar dipwisou kan” pwehn sewese ih oh sapwellime wahnpoaron ko ong dahme re anahne. (Luk 8:​1-3) Oh Paipel pil kasalehda me ni ekei Kristian ko ar lelohng lehk laud ehu, riarail Kristian kan me mi wasa teikan kadarala mwohni. (Wiewia 11:​27-29) Rahnwet kitail pil kak kalinganahla Siohwa sang ni atail kin toukihda atail sawas en mwohni.

12. Ia duwen atail sawas en mwohni eh kin kalinganahla Siohwa? (Pil kilang kilel.)

¹² Medewehla ehu karasepen atail sawas en mwohni eh kin kalinganahla Siohwa. Nan pahr 2020, Zimbabwe lelohng apwal en pihl ahnsou werei. Aramas daulih rar kereniong mehla pwehki sohte kanarail mwenge, iangahki sister men me adaneki Prisca. Ahpw mendahki irairo uhdahn apwal, Prisca kin doulahte wia eh koasoandi en kalohk Niesil oh Nialem koaros, pil ni ahnsoun deipwel. Mehn mpe ko kin kauwe pwehki eh sohte kin koadoahke eh mwahto ahpw kin kohlahte kalohk. Re kin nda, “Ke pahn duhpekla.” Prisca uhdahn kamehlele me Siohwa pahn ketin apwalih ih, eri e kin ahnsou koaros sapengki, “Siohwa sohte kin ketin likidmeliehla sapwellime ladu kan.” Sohte pwand mwurin  mwo, e alehdi mwenge oh soahng teikan me e anahne pwehki soangen sawas kan me emenemen kitail kin kihda. Mehn mpe ko uhdahn pwuriamweikihla oh ndaiong, “Koht kin ahnsou koaros ketin seweseiuk, eri se men kalaudehla at sukuhlki duwen ih.” Meh isimen tepida iang towehda mihting kan en mwomwohdiso.

13. Ia duwen atail wiewia eh kak kalinganahla Siohwa? (Melkahka 96:9)

¹³ Wadek Melkahka 96:9. Kitail kak kalinganahla Siohwa sang ni atail wiewia kan. Samworo kan anahne kin mwakelekel ni paliwararail ni arail papah nan sapwellimen Siohwa tehnpas sarawio. (Eks. 40:​30-32) Ahpw kesempwal sang en mwakelekel ni paliwar, atail wiewia kan anahne mwakelekel. (Mel. 24:​3, 4; 1 Pit. 1:​15, 16) Kitail anahne doadoahk laud en kapwuhrasang ‘mouren mahs,’—madamadau oh wiewia samin kan—oh pwuhriong nan “mour kapw,” me iei en ahneki soangen madamadau oh wiewia kan me kin kasalehda sapwellimen Siohwa irair kaselel kan. (Kol. 3:​9, 10) Pil aramas kan me wiahda soahng kan me uhdahn suwed pil kak wekila oh pwuhriong nan mour kapw pwehki sawas sang rehn Siohwa.

14. Dahme ke sukuhlkihsang dahme wiawihong Jack? (Pil kilang kilel.)

¹⁴ Medewehla dahme wiawihong Jack, ohl emen me aramas akan kin kahdaneki Tepilo pwehki e uhdahn lemei oh keper. Pwehki soahng suwed kan me e wiahda, mwoalen kopwung koasoanehdi en kamakamala. Ahpw erein eh awiawih ahnsoun eh kamakamalao, Jack pwungkihda en onop Paipel rehn brother men me kin kalohkla ni imwetengo me Jack selidi ie. Mendahki Jack wiahda soahng suwed tohto, e kapwuhrasang eh mour en mahs oh kedekedeo kak papidaisla. Jack uhdahn wekila me kahrehda rahn me e pahn kamakamalao, ekei tohndoadoahk en nan imwetengo sengiseng ni arail kamwurala. Emen kaun en imwetengo koasoia: “Mahso, Jack me keieu suwed wasaht. Met e iang me keieu mwahu.” Wihk ehu mwurin eh kamakamala, brother kan me kohla ni imwetengo pwehn wia mihting en wihko tuhwongada emen me ahpwtehn pahn iang towehda mihting. Dahme kamwakid ohlo en iang towehda? E uhdahn mwekidkihda Jack eh wekidala eh wiewia kan oh men ese dahme e anahne wia pwehn kaudokiong Siohwa. Ei mehlel, atail wiewia kak kalinganahla Samatailo nanleng!—1 Pit. 2:12.

 IA DUWEN SIOHWA EH PAHN KETIN KALINGANAHLA MWARE NI AHNSOU KOHKOHDO?

15. Ia duwen Siohwa eh pahn ni unsek ketin kalinganahla mwareo ni ahnsou kohkohdo? (Melkahka 96:​10-13)

¹⁵ Wadek Melkahka 96:​10-13. Kaimwiseklahn iretikitik kan en Melkahka irelaud 96 kasalehda me Siohwa ketin wia Sounkopwung oh Nanmwarki pwung men. Ia duwen Siohwa eh pahn ketin kalinganahla mwareo ni ahnsou kohkohdo? Sang ni eh pahn ketikihdo pwuhng pahrek. Ahnsou keren e pahn ketin kasohrehla Papilon Lapalap pwehki eh wiadahr soahng suwed kan oh padahki soahng likamw kan duwen ih. (Kaud. 17:​5, 16; 19:​1, 2) Ni ahnsou me Papilon Lapalap pahn sohrala, ekei aramas kakete pilada en tepida iang kitail kaudokiong Siohwa. Eri nan Armakedon, Siohwa pahn ketin kasohrehla ahn Sehdan koasoandi koaros, oh ketikihsang koaros me kin uhwong oh lahlahwe mware, ahpw e pahn ketin doarehla koaros me kin poakohng oh peikiong oh kin men kalinganahla ih. (Mark 8:38; 2 Des. 1:​6-10) Mwurin kaimwiseklahn kasongosong me wiawi mwurin Kaundahn Krais Pahr Kido, Siohwa pahn ni unsek ketin kasarawihla mwareo. (Kaud. 20:​7-10) Ni ahnsowo, “sampah pahn direkihla marain lingaling en KAUN-O, rasehng madau eh kin direkihla pihl.”—Apak. 2:14.

16. Dahme ke koasoanehdi teng en wia? (Pil kilang kilel.)

¹⁶ Ia uwen kaperen en ahnsowo me koaros me momour pahn kapinga Siohwa pwehki mwareo warohng linganla! Ahpw lao lel ahnsowo, kitail kak wia uwen atail kak en kalinganahla atail Koht sang ni atail koasoi oh wiewia kan. Pwehn sewese kitail en medemedewehte pwukoa kesempwal wet, Pwihn me Kin Apwalih Mwomwohdiso nan Sampah Pwon piladahr Melkahka 96:8 en wia atail iren pahr en 2025: ‘Kumwail kapinga lingan en mwaren Siohwa.’