IREN ONOP 3
KOUL 35 ‘Pilada Dahme Keieu Kesempwal’
Wiahda Pilipil me Pahn Kaperenda Siohwa
“Pwe kumwail en loalokong, keieu kumwail pahn lemmwiki KAUN-O. Ma kumwail pahn ese Me Sarawio, eri, mie amwail dehdehki.”—LEP. PAD. 9:10.
DAHME KITAIL PAHN SUKUHLKI
Ia duwen atail en doadoahngki loalokong oh koahiek en dehdehki pwehn wiahda pilipil pwung kan.
1. Kahpwal dah me kitail koaros kin lelohng?
RAHN koaros kitail anahne wiahda pilipil kan. Ekei kin mengei en wiahda, duwehte dahme kitail pahn kang nimenseng de iahd me kitail en meir. Ahpw nan ekei irair, e kin apwal en wiahda pilipil. E kakete kamwakid atail roson, atail nsenamwahu, irail kan me kitail poakohng, de atail kaudok. Kitail men wiahda pilipil kan me pahn mwahuong kitail oh atail peneinei. Keieu kesempwal, kitail en koapworopworki me atail pilipil kan pahn kaperenda Siohwa.—Rom 12:1, 2.
2. Dahme ke kak wia pwehn wiahda pilipil pwung?
2 Ke kak wiahda pilipil pwung ehu ma ke (1) esehda ire mehlel kan, (2) tehk ia sapwellimen Siohwa madamadau ong irairo, oh (3) medewe mwahu duwen pilipil kan. Iren onop wet pahn koasoia kahk siluh pwukat me kitail anahne wia oh pahn pil sewese kitail en kilang ia duwen atail kak kaiahnehda atail koahiek en dehdehki.—Lep. Pad. 2:11.
ESEHDA IRE MEHLEL KAN
3. Menlau kawehwehda dahme kahrehda ke anahne esehda ire mehlel kan mwohn omw wiahda pilipil ehu.
3 Keieun kahk me ke anahne wia pwehn wiahda pilipil pwung ehu iei esehda ire mehlel kan. Dahme kahrehda met kesempwal? Medewehla emen me kohla rehn toahkte men pwehki e ahneki soumwahu laud ehu. Ia duwe, toahkteo pahn wiahda pilipil ehu ong wini dah me e pahn kihong me soumwahwo ni eh saikinte kilang de idek reh peidek kan? Uhdahn soh. Ke pil pahn wiahda pilipil mwahu kan ma ke medewe mahs ire mehlel kan me dokedoke omw irairo. Ia duwen omw kak wia met?
4. Nin duwen me Lepin Padahk 18:13 mahsanih, dahme ke kak wia pwehn esehda ire mehlel kan? (Pil kilang kilel.)
4 Ke kin kalapw esehda ire mehlel kan sang omw idek peidek kan. Karasepe, medewehla ma ke alehdi luhk en iang kamadipw ehu. Ke pahn iang towehda? Ma ke sohte ese ihs me wiahda de dahme e pilahnehda ong kamadipwo, ke pahn anahne idek reh soangen peidek kan me duwehte: “Ia wasa oh iahd me kamadipwo pahn wiawi? Aramas depe pahn iang? Ihs me pahn pwukoahki dahme wiawi ni kamadipwo? Ihs me pahn iang? Soahng dah kan me ke pilahnehda en wiawi? E pahn mie sakau en wai?” Pasapengpen peidek pwukat pahn seweseiuk en wiahda pilipil pwung.—Wadek Lepin Padahk 18:13.
Esehda ire mehlel kan sang omw idek peidek kan (Menlau kilang parakrap 4) a
5. Dahme ke anahne wia mwurin omw esehda ire mehlel kan?
5 Mwurin omw esehda ire mehlel kan, medewehla mwahu duwen irairo. Karasepe, ia duwen ma ke esehda me ekei aramas me pahn iang kamadipwo sohte kin peikiong sapwellimen Siohwa koasoandi kan de pahn mie sakau en wai ahpw sohte me pahn tehk mwahu me aramas ako sohte nim daulihala? Ke medewe kamadipwo pahn kamwoarongehda wasa? (1 Pit. 4:3) De ia duwen ma kulok me kamadipwo pahn wiawi pahn kahrehiong uhk ken sohte iang towehda mihting en mwomwohdiso de kalohk? Ni omw medewehlahr dahme pahn wiawi, e pahn mengei ong uhk en wiahda pilipil mwahu ehu. Ahpw pil mie ehu mehkot me ke anahne wia. Ke esehier omw pepehm ong irairo; ahpw ia sapwellimen Siohwa pepehm ong met?—Lep. Pad. 2:6.
TEHK IA SAPWELLIMEN SIOHWA MADAMADAU ONG IRAIRO
6. Nin duwen me Seims 1:5 mahsanih, dahme kahrehda kitail anahne kapakapki sapwellimen Siohwa sawas?
6 Peki Siohwa en ketin seweseiuk wehwehki sapwellime madamadau ong irair ehu. Siohwa ketin inoukihda me e pahn ketikihong kitail erpit en esehda ma pilipil ehu pahn kaperenda ih. E kin ketin “sapankihong aramas koaros erpit oh e sohte kin ketin rapahki sapwung.”—Wadek Seims 1:5.
7. Ia duwen omw kak esehda sapwellimen Siohwa madamadau duwen irair ehu? Menlau kihda ehu karasaras.
7 Ni omw kapakapkier sapwellimen Siohwa kaweid, tehk kanaiehng sapwellime pasapeng. Pwehn karasahda: Ma ke salongala erein omw seiseiloak, ke pahn kakete peki sawas sang emen me kin kousoan wasao. Ahpw ia duwe, ke pahn kohkohla mwohn eh koasoia mehkot? Uhdahn soh. Ke pahn rong kanaiehng eh kaweid. Duwehte met, mwurin omw peki erpit sang Siohwa, song en dehdehki sapwellime pasapeng sang omw diar mehnia kosonned de ire mehlel en Paipel kan me dokedoke omw irairo. Karasepe, ni omw medemedewehte ma ke pahn iang towehda kamadipwo me kitail koasoiapene mwoweo, ke kak tehk dahme Paipel mahsanihki duwen kamadipw kamwoarong kan, werek suwed, oh anahn en mwohneki Wehin Koht sang en wia dahme ke men wia.—Mad. 6:33; Rom 13:13; 1 Kor. 15:33.
8. Dahme ke kak wia ma ke anahne sawas pwehn diarada dahme ke raparapahki? (Pil kilang kilel.)
8 Ahpw, ele ekei pak ke anahne sawas pwehn diarada dahme ke raparapahki. Ke kakete ale kaweid sang brother de sister koahiek men. Ahpw ke pahn pil paiekihda ni omw wia pein omw roporop. Mie iren sawas tohto nan neitail mehn roporop kan, me duwehte Sawas ong Wia Roporop en Sounkadehdehn Siohwa kan oh Scriptures for Christian Living. Tamataman me omw mehn akadeio iei en wiahda pilipil ehu me pahn kaperenda Siohwa.
Tehk ia sapwellimen Siohwa madamadau (Menlau kilang parakrap 8) b
9. Ia duwen atail kak tehk me atail pilipilo pahn kaperenda Siohwa? (Episos 5:17)
9 Ia duwen atail kak tehk me atail pilipilo pahn kaperenda Siohwa? Keieu, kitail anahne esehla duwen ih. Paipel mahsanih, “Ma kumwail pahn ese Me Sarawio, eri, mie amwail dehdehki.” (Lep. Pad. 9:10) Ei, atail dehdehki mwahu kin kohsang atail esehla sapwellimen Siohwa irair kan, kupwure, oh dahme e ketin poakohng de kalahdeki. Pein idek rehmw, ‘Sang dahme I ese duwen Siohwa, pilipil dah me I kak wiahda me pahn kaperenda ih?’—Wadek Episos 5:17.
10. Dahme kahrehda kaweid kan en Paipel kesempwalsang tiahk en peneinei de sahpw?
10 Pwehn kaperenda Siohwa, ekei pak kitail anahne wia mehkot me pahn kamedekihala irail me karanih kitail. Karasepe, ekei pahpa nohno kin idingkihong neirail serepein en pwoudikihda ohl emen me kepwehpwe de me kak pwainda kepwe tohto mehnda ma e sohte kin mwohneki mahs eh nanpwungmwahu rehn Siohwa. E sohte sapwung me re men neirail serepeino en ahneki mour nsenamwahu, ahpw e kak pein idek reh: “Ohl menet pahn sewese ien kakairada nanpwungmwahu kehlail rehn Siohwa?” Ia sapwellimen Siohwa pepehm ong irair wet? Pasapengo mi nan Madiu 6:33. Wasao, Sises ketin kangoangehki Kristian kan en pousehlahte “rapahki mahs Wehio.” Mendahki kitail wauneki atail pahpa nohno kan oh aramas akan nan atail wasa, dahme keieu kesempwal ong kitail iei en kaperenda Siohwa.
MEDEWE MWAHU DUWEN PILIPIL KAN
11. Irair dah me Pilipai 1:9, 10 mahsanih me pahn seweseiuk en kasawih omw pilipil kan?
11 Ni omw tehk kaweid kan en Paipel me pidada omw pilipilo, ke anahne kasawih mwahu omw pilipil kan. (Wadek Pilipai 1:9, 10.) Omw koahiek en dehdehki pahn seweseiuk en medewehla ia imwilahn ehuehu omw pilipil ko. Ekei pak e kak mengei en wiahda pilipilo. Ahpw kaidehn pilipil koaros kin mengei. Omw dehdehki pahn seweseiuk en wiahda pilipil pwung pil ni ahnsou me irairo apwal.
12-13. Ia duwen omw koahiek en dehdehki eh kak seweseiuk en wiahda pilipil pwung me pid duwen doadoahk me ke pahn ale?
12 Medewehla irair wet. Ke raparapahki doadoahk ehu pwehn apwalih omw peneinei. Mie doadoahk riau. Ke medewe duwen ire mehlel kan, me duwehte soangen doadoahk dahieu mwo, awahn doadoahko, uwen doh en wasahn doadoahko, oh soahng teikan. Doadoahk riau ko koaros sohte uhwong kaweid kan en Paipel. Ele ke pilada ehu pwehki ke mwahuki soangen doadoahko de doadoahko pweimwahu. Ahpw mie kahrepe teikan me ke anahne medewe mwohn omw wiahda pilipil ehu.
13 Karasepe, ehu doadoahk ko sohte pahn kauwehla ahnsoun omw mihting? E pahn kihsang ahnsou me ke anahne pwehn sewese omw peneinei ren nsenamwahu oh karanih Siohwa? Omw idek peidek pwukat pahn seweseiuk en mwohneki “dahme keieu kesempwal” me iei omw kaudok oh en omw peneineio anahn laudsang en wiahda mwohni laud. Eri ke kak wiahda pilipil ehu me Siohwa pahn ketin kapaia.
14. Ia duwen atail koahiek en dehdehki oh limpoak eh pahn sewese kitail en soikala kadipekelekele meteikan?
14 Atail koahiek en dehdehki pil pahn kahrehiong kitail en medewe ia duwen atail pilipil kan eh ele kamwakid meteikan pwe kitail en kak soikala “kadipekelekele meteikan.” (Pil. 1:10) Met pil kesempwal ni atail wiahda pilipil kan me duwehte atail likou oh kapwat. Karasepe, ele kitail mwahuki sidail en likou de kapwat ehu. Ahpw ia duwen ma meteikan nan mwomwohdiso de likin mwomwohdiso dipekelekelki? Atail koahiek en dehdehki pahn sewese kitail en wauneki arail pepehm. Limpoak pahn kamwakid kitail en kilang kamwahupen “meteio” oh en kin kasalehda wahu. (1 Kor. 10:23, 24, 32; 1 Tim. 2:9, 10) Eri kitail pahn wiahda pilipil ehu me pahn kasalehda atail poakohng oh wauneki meteikan.
15. Dahme ke anahne medewe mwohn omw wiahda pilipil kesempwal ehu?
15 Ma ke wiahda pilipil uhdahn kesempwal ehu, medewehla dahme ke pahn anahne wia pwehn kapwaiada pilipil wet. Sises ketin padahkihong kitail en “kapatahda uwen pweine.” (Luk 14:28) Eri medewe duwen ahnsou, kepwe kan, oh kehl me ke pahn anahne pwe pilipilo en pweida. Nan ekei irair, ele ke pahn koasoiaiong omw peneinei ko dahme emenemen anahne wia pwe pilipilo en kak pweida. Dahme kahrehda soangen koasoandi wet kesempwal? Ele met pahn seweseiuk en kilang me ke anahne wiahda wekidekla kan de mie pilipil teikan me mwahusang me. Oh ni omw padahkihong omw peneineio duwen omw pilipilo oh rong ar madamadau, irail pahn perenki seweseiuk pwe pilipilo en pweida.—Lep. Pad. 15:22.
WIAHDA PILIPIL EHU ME PAHN PWEIDA
16. Kahk dah kan me pahn seweseiuk pwe omw pilipilo en pweida? (Pil kilang koakono “ Ia Duwen en Wiahda Pilipil Pwung kan.”)
16 Ma ke idawehn kahk kan me kileldi powe, ke onopadahngehr en wiahda pilipil pwung ehu. Ke alehdier ire mehlel kan oh kilang kaweid kan en Paipel me pahn seweseiuk en wiahda pilipil ehu me pahn kaperenda Siohwa. Met ke kak peki rehn Siohwa en ketin seweseiuk pwe omw pilipilo en pweida.
17. Dahme pahn keieu seweseiuk en wiahda pilipil mwahu kan?
17 Mehnda ma ke pil wiahda pilipil mwahu kan mahso, tamataman me dahme pahn keieu seweseiuk en wiahda pilipil mwahu iei en likih, kaidehn omw loalokong de koahiek, ahpw erpit sang Siohwa. Ih kelehpw me kak ketikihong uhk loalokong mehlel oh koahiek en dehdehki me wia kisehn erpit. (Lep. Pad. 2:1-5) Siohwa kak ketin seweseiuk en wiahda pilipil kan me pahn kaperenda ih.—Mel. 23:2, 3.
KOUL 28 Wiahla Kompoakepahn Siohwa
