1. Ia atail pepehm duwen Siohwa eh ketin mweidohng kitail en kapakap ong ih?

 SOUNKAPIKPEN lahng oh sampah ketikihong kitail kisakis kesempwal ehu. E ketin mweidohng kitail en kapakap ong ih. Nna medewehla: Kitail kak padahkihong Siohwa dahme mi nan mohngiongitail ni lokaia oh ahnsou sohte lipilipil, oh kitail sohte anahne wiahda koasoandi ong iahd me kitail en wia met. Kitail kak kapakapohng ih ni ahnsou me kitail mi nan imwen wini de nan imweteng, oh kamehlele me Samatail limpoako pahn ketin karonge kitail. Kitail kin uhdahn kalahnganki kisakis wet.

2. Ia duwen Nanmwarki Depit eh kasalehda me e kesempwalki kisakis en kapakap?

² Nanmwarki Depit kin kesempwalki kisakis en kapakap. E koulkihong Siohwa: “Komw ketin kupwurehla ei tungoal kapakap duwehte warpwohmwahu.” (Mel. 141:1, 2) Ni mwehin Depito, samworo kan kin kaunopada ni keneinei meirong en warpwohmwahu pwehn doadoahngki ong kaudok. (Eks. 30:34, 35) Depit men medewe mwahu dahme e pahn koasoia nan eh kapakap ong Siohwa, duwehte irail kan me kin kaunopada mwahu meirong en warpwohmwahwo. Ih met me kitail pil men wia. Kitail men atail kapakap en kaperenda Siohwa.

3. Ia pahn atail madamadau ni atail kapakap ong Siohwa, oh dahme kahrehda?

³ Ni atail kin kapakap ong Siohwa, kitail anahne uhdahn wauneki. Medewehla kaudiahl kapwuriamwei ko me Aiseia, Esekiel, Daniel oh Sohn alehdi. Kaudiahl ko wekpeseng, ahpw mie mehkot nanpwungarail me duwepenehte. Kokohp ko koaros kasalehda me Siohwa ketin wia Nanmwarki men me inenen lemmwin kowahlap. Aiseia “kilangada Siohwa eh ketiket pohn mwoahl ileile ehu.” (Ais. 6:1-3, NW) Esekiel kilangada  Siohwa ketiket pohn kuruma ehu nanleng, oh “marain lingaling ehu . . . me duwehte ahia pwoat” kapilpene ih. (Esek. 1:26-28, NW) Daniel kilangada “Mehmeno me ahneki mour poatopoat” likawih likou pwetepwet oh mpwul en kisiniei kohkohsang ni mwoaleo. (Dan. 7:9, 10) Oh Sohn kilangada Siohwa eh ketiket pohn mwoahl ehu oh ahia ehu me duwehte emerald kapilpene. (Kaud. 4:2-4) Ni atail medewehla duwen lingan en Siohwa, e kin katamankihong kitail duwen atail kisakis kaselel en kapakap oh pil kesempwalpen en wauneki ih. Ahpw dahme kitail anahne kapakapki?

4. Dahme kitail sukuhlkihsang tepin mahsen kan me Sises mahsanih nan kapakapo me kileldi nan Madiu 6:9, 10?

⁴ Wadek Madiu 6:9, 10. Nan sapwellime Kapahrek en Pohn Dohl, Sises ketin padahkihong sapwellime tohnpadahk ko ia duwen arail pahn kapakap ni ahl ehu me pahn kaperenda Koht. Mwurin eh mahsanih “Eri, iet duwen amwail pahn kin kapakap,” Sises tepida ketin kasalehda ire kesempwal kan me pidada kupwuren Siohwa, me iei kasarawihlahn mware, ketidohn Wehio me pahn kasohrehla koaros me kin uhwong Koht, oh duwen kapai kan me Koht ketin kupwurki ong sampah oh aramas akan ni ahnsou kohkohdo. Ni atail kin nda soahng pwukat nan atail kapakap, kitail kin kasalehda me kitail kesempwalki kupwuren Koht.

5. Siohwa kin ketin karonge kitail ni atail peki reh atail anahn akan?

⁵ Mwurin ire pwukat, Sises ketin kasalehda me e pil mwahu en kapakapki atail anahn kan. Kitail kak peki rehn Siohwa en ketikihong kitail atail mehn ketihnain en rahno, en ketin mahkohng dipatail kan, pere kitail sang kasongosong kan, oh kapitkitailsang me suwedo. (Mad. 6:11-13) Ni atail peki rehn Siohwa soahng pwukat, kitail kin kasalehiong ih me kitail pohnese atail anahne sapwellime sawas oh me kitail men kaperenda ih.

6. Kitail anahne kapakapkihte soahng kan me kileldi nan sapwellimen Sises kapakapo? Menlau kawehwehda.

⁶ Sises sohte kupwurki sapwellime tohnpadahk kan en alasangete lokaia ko nan kapakapo. Nan kapakap teikan me Sises ketin wia, e ketin kasalehda ire teikan me kesempwal ong  ih ni ahnsowo. (Mad. 26:39, 42; Sohn 17:1-26) Duwehte met, kitail kak kapakapki dahme kitail kin pwunodki. Ni atail pahn wiahda pilipil ehu, kitail kak kapakapki erpit oh dehde. (Mel. 119:33, 34) Ni atail pahn tepida wia pwukoa ehu, kitail kak kapakapki sawas en wehwehki ia duwen atail pahn wia pwukoao. (Lep. Pad. 2:6) Pahpa nohno kan kak kapakapki neirail seri kan, seri kan kak kapakapki arail pahpa nohno kan, oh kitail koaros kak oh anahne kapakapki neitail tohnsukuhl en Paipel kan oh pil irail kan me kitail tuhwong nan kalohk. Ahpw ni atail kin kapakap ong Siohwa, kitail en dehr kin pekihte sawas.

7. Dahme kahrehda kitail anahne kapinga Siohwa nan atail kapakap?

⁷ Kitail anahne tamataman en kapinga Siohwa nan atail kapakap kan. Sohte emen me warohng ale kaping laudsang atail Koht. Ih me ketin “kupwur mwahu oh diren mahk.” E pil ketin ‘kalahngan, limpoak, kanengamah, kadek oh loalopwoat.’ (Mel. 86:5, 15) Kitail uhdahn ahneki kahrepe mwahu en kapinga Siohwa pwehki soangen irair kan me e sapwellimanki oh dahme e kin ketin wia.

8. Ia ekei soahng kan me kitail kak kalahngankihong Siohwa? (Melkahka 104:12-15, 24)

⁸ Patehng atail en kapinga Siohwa nan atail kapakap kan, kitail anahne kalahngankihong ih soahng mwahu kan me e kin ketikihda. Karasepe, kitail kak kalahngankihong poh kaselel kan me kitail kin kilang ni rohs kan, soangsoangen mwenge iou, oh kompoakepatail keren kan. Samatail limpoako ketikihong kitail soahng pwukat oh me tohtohsang pwehn kaperenda kitail. (Wadek Melkahka 104:12-15, 24.) Kesempwalsang met, kitail en kalahngankihong Siohwa kaweid koaros me e ketikihong kitail pwehn kakehlakahda atail pwoson oh pil atail koapworopwor ong ahnsou kohkohdo.

9. Dahme kak sewese kitail en tamataman en kalahngan ong Siohwa? (1 Deselonika 5:17, 18)

⁹ E kak mengei en manokehla kalahngankihong Siohwa soahng koaros me e ketin wiahiong kitail. Dahme kak seweseiuk en tamataman? Ke kak ntingihedi soahng kan me ke kapakapki, oh mwuhr tehksapahlih dahme ke ntingihedi ko oh kilang ia duwen Siohwa eh ketin sapengala omw kapakapo. Kowe eri kapakap  oh kalahngankihong ih sapwellime sawas. (Wadek 1 Deselonika 5:17, 18.) Medewehla met: Ni meteikan ar kin kalahngan ong kitail, kitail kin perenki oh pehm me irail poakohng kitail. Duwehte met, ni atail kin tamataman en kalahngankihong Siohwa eh ketin sapengala atail kapakap kan, met kin kaperenda kupwure. (Kol. 3:15) Ahpw, ia pil ehu kahrepe kesempwal me kitail en kalahngankihong atail Koht?

10. Nin duwen me 1 Piter 2:21 mahsanih, dahme kahrehda mie kahrepen atail en kalahngankihong Siohwa eh ketin poaronehdo Sises nin sampah?

¹⁰ Wadek 1 Piter 2:21. Kitail anahne kalahngankihong Siohwa eh ketin poaronehdo sapwellime Ohlo pwehn padahkih kitail. Ni atail kin wadek duwen Sises, kitail kin sukuhlki soahng tohto duwen Siohwa oh ia duwen atail pahn kaperenda ih. Ma kitail kin kasalehda atail pwoson meirong en Krais, kitail kak ahneki nanpwungmwahu keren rehn Siohwa Koht oh ahneki popohl Reh.​—Rom 5:1.

11. Dahme kahrehda kitail kin kapakap ni mwaren Sises?

¹¹ Kitail kin kalahngankihong Siohwa me kitail kak kapakap ong ih pwehki sapwellime Ohlo. Siohwa ketin doadoahngki Sises pwehn ketikihong kitail dahme kitail kapakapki. Siohwa kin ketin karonge oh pil sapengala atail kapakap kan me kin wiawi ni mwaren Sises. Sises mahsanih: “Sohte lipilipil dahme kumwail peki ni edei, I pahn wiahda, pwe Sapwellimeo en kalinganahda Sahmo.”​—Sohn 14:13, 14.

12. Ia pil ehu kahrepen atail en kalahngankihong Siohwa sapwellime Ohlo?

¹² Siohwa kin ketin mahkohng dipatail kan pwehki pweinen pweipwei sapahlo me Sises wiahda. Paipel kawehwehda me Sises iei atail ‘samworo lapalap me ketidiong ni palimaun en mwoahl en Koht lapalap nanleng.’ (Ipru 8:1) Sises iei “sounsawaspatail” rehn Sahmo. (1 Sohn 2:1) Kitail kin uhdahn kalahnganki me Siohwa ketikihda Samworo Lapalap men me kin wehwehki atail soh unsek oh kin “pekipek reh pwehki kitail.” (Rom 8:34; Ipru 4:15) Kitail aramas soh unsek kei, eri ma sohte meirong en Sises, kitail sohte kak kapakap ong Siohwa. Ele ke pil iang pwungki me atail kapakap sohte kin uhdahn itar en kasalehda atail kalahnganki kisakis kaselel me Siohwa ketikihong kitail​—kisakis en sapwellime Ohlo!

13. Nipwongo mwohn eh pwoula, ia duwen Sises eh ketin kasalehda me e poakohng sapwellime tohnpadahk ko?

¹³ Nipwongo mwohn eh pwoula, Sises ketin kapakapki sapwellime tohnpadahk kan erein ahnsou reirei, pekipeki Semeo “en ketin sinsile irail pwehki me suwedo.” (Sohn 17:15) Met kasalehda ia uwen Sises eh ketin poakohng irail. Mendahki e mwahngih me e pahn kereniong lelohng lokolok laud, e ketin nsenohkihte sapwellime tohnpadahk ko.

14. Ia duwen atail kak kasalehda me kitail poakohng riatail Kristian kan?

¹⁴ Pwehn alasang Sises, kitail en dehr medemedewehte duwen atail anahn kan. Ahpw, kitail en kaukaule kapakapki riatail Kristian kan. Ni atail kin wia met, kitail kin kapwaiada sapwellimen Sises kehkehliko en limpoakpene, oh kitail kin kasalehiong Siohwa uwen atail poakohng riatail Kristian kan. (Sohn 13:34) Atail kapakapki riatail Kristian kan pahn sewese irail. Mahsen en Koht padahkihong kitail me “kapakap ngidingid en aramas pwung men kin manaman.”​—Seims 5:16.

15. Dahme kahrehda riatail Kristian kan anahne kitail en kapakapkin irail?

 ¹⁵ Riatail Kristian kan kin anahne kitail en kapakapkin irail pwehki irail anahne dadaur pahn kahpwal tohto. Kitail kak peki Siohwa en ketin sewese irail dadaur pahn soumwahu, kahpwal laud kan duwehte rerrer en sahpw de melimel, mahwen, kalokolok, de pil kahpwal teikan. Kitail pil kak kapakapki riatail Kristian kan me kin doadoahk laud pwehn sewese irail kan me anahne sawas. Ele ke ese ekei me pil kin lokolongki soangen kahpwal pwukat. Ke kak ndahla adarail nan omw kapakap. Kitail kin kasalehiong riatail Kristian kan limpoak mehlel sang ni atail peki rehn Siohwa en ketin sewese irail dadaurete.

16. Dahme kahrehda kitail anahne kapakapki irail kan me kin tiengla mwohtail?

¹⁶ Irail kan me kin tiengla mwohtail nan mwomwohdiso kin uhdahn kalahnganki atail kin kapakapkin irail, oh kapakap pwukat kin sewese irail. Wahnpoaron Pohl ese me e anahne meteikan en kapakapki ih. E ntingihedi: “Kumwail pil kapakapkin ie, pwe mahsen kan en kak pwildohng ie ni ei kin kihpeseng eweiet, pwe I en kak eimah koasoi ni ei kin kasalehda rir sarawi en rongamwahwo.” (Ep. 6:19) Pil rahnwet, mie riatail tohto me kin tiengla mwohtail. Kitail kin kasalehda me kitail poakohng irail sang ni atail peki Siohwa en ketin kapaiahda arail doadoahk.

17-18. Iahd me kitail kakete wiliandi meteikan oh kapakap, oh dahme kitail anahne tamataman?

¹⁷ Ekei pak, ele mie me peki kitail en kapakap. Karasepe, sister men me pahn wia onop en Paipel rehn emen ele peki rehn sister me iangiho en kapakap. Sister me iangiho ele sohte nohn ese duwen tohnsukuhl en Paipelo, eri ele e pahn men kapakap mwurin onopo. Ni ahl wet, e pahn ese dahme e pahn nda ni eh kapakapki tohnsukuhlo.

¹⁸ Ele brother men pahn kapakap ni ahnsoun tuhpenehn kalohk oh ni mihting en mwomwohdiso ehu. Brother kan me ahneki pwais kaselel wet anahne tamataman kahrepen mihting kan. Kapakap kaidehn ahnsoun kapwungala mwomwohdiso de wia pakair kan. Pali laud en mihting en mwomwohdiso kan, koul oh kapakap kin reireikihte minit limau,  eri brothero me pahn wia kapakap en dehr ‘kapakap reirei,’ ahpw mehlel ni tepidahn mihtingo.​—Mad. 6:7.

19. Dahme pahn sewesei kitail en onopada ong sapwellimen Siohwa rahnen kadeik?

¹⁹ Kitail anahne kalaudehla atail kesempwalki kapakap nan atail mour pwehki sapwellimen Siohwa rahnen kadeik kerendohr. Me pid met, Sises mahsanih: “Kumwail eri pousehlahte pepehd oh ahnsou koaros kapakapki sawas ni ngidingid pwe kumwail en kakohng pitsang mepwukat koaros me uhdahn pahn wiawi.” (Luk 21:36) Ma kitail kin kaukaule kapakap, atail pwoson pahn kehlail oh kitail pahn onopada ni ahnsou me rahnen sapwellimen Koht kadeik pahn leledo.

20. Ia duwen atail kapakap kan kak duwehte warpwohmwahu?

²⁰ Dahme kitail koasoiapenehr? Kitail kin uhdahn kesempwalki kisakis en kapakap. Me keieu kesempwal me kitail en kapakapki iei soahng kan me kin pidada kupwuren Siohwa. Kitail pil kin kalahnganki sapwellimen Koht Ohlo oh kaundahn sapwellime Wehi, oh pil kin kapakapki riatail Kristian kan. Oh kitail pil kak kapakapki atail anahn en ehuehu rahn oh pil atail pwoson en kin kehlail. Ni atail kin medemedewe mwahu dahme kitail pahn nda nan atail kapakap kan, kitail kin kasalehda me kitail kesempwalki kisakis wet. Atail kapakap kan pahn duwehte warpwohmwahu ong Siohwa me e “kin ketin kupwurperenki.”​—Lep. Pad. 15:8.