1. Dahme Siohwa ketin wia mwurinte Adam oh Ihp dipada? (Senesis 3:15)

 MWURINTE Adam oh Ihp dipada, Siohwa ketin wiahda kokohp kesempwal ehu pwehn ketikihda koapworopwor ong kadaudokara kan. Dahme e ketin mahsanih kileldi nan Senesis 3:15.​—Wadek.

2. Dahme kahrehda kokohp wet kesempwal?

² Kokohpo kileldi nan keieun pwuhken Paipel. Ahpw pwuhk teikan koaros nan Paipel kin pidada kokohp wet. Duwehte kuluh de wehia eh kin kolpene doaropwehn pwuhk ehu, mahsen kan me kileldi nan Senesis 3:15 kin kolpene audepen pwuhk kan koaros nan Paipel pwehn kasalehda oaralap ehu, me iei, Koht pahn ketin poaronehdo Sounkomour men pwehn kasohrehla Tepilo oh irail me suwed kan koaros me kin idawehn ih. * Ia uwen met eh wia kapai laud ehu ong irail kan me kin poakohng Siohwa!

3. Dahme kitail pahn koasoiapene nan iren onop wet?

³ Nan iren onop wet, kitail pahn sapengala peidek pwukat me pid kokohp en Senesis 3:15: Ihs irail kan me mi nan kokohpo? Ia duwen kokohpo eh pweida? Oh ia duwen atail paiekihda kokohp wet?

4. Ihs me ‘serpento,’ oh ia duwen atail ese met?

⁴ Irail kan me mi nan kokohpo nan Senesis 3:14, 15 iei “sineiko,” de serpento, “nein” serpento, “liho,” oh “nein” de kadaudok en liho. Paipel sewese kitail en wehwehki emenemen irail. * Kitail pahn tepida koasoia duwen “sineiko.” Uhdahn sineik men sohte kak wehwehki dahme Siohwa ketin mahsanih nan mwetuwel en Ihden. Eri uhdahn pahn mie emen me loalokongsang pwe Siohwa en ketin kadeikada. Ihs mwo? Kaudiahl 12:9 kawehwehda ni sansal ihs serpento. E mahsanih me “serpent en mahso” iei Sehdan me Tepil. Ahpw ihs irail kan me wia nein de kadaudok en serpento?

5. Ihs irail kan me wia kadaudok en serpento?

⁵ Ekei pak Paipel kin doadoahngki lepin lokaiao “kadaudok” pwehn karasahda irail kan me kin uhdahn kasalehda madamadau oh wiewia en samarailo. Eri kadaudok en serpento iei irail ngehn akan oh aramas akan me kin pelian Siohwa Koht oh uhwong Sapwellime aramas akan, duwehte Sehdan. Irail pwukat pil iangahki tohnleng ko me kesehla arail pwukoa kan nanleng ni mwehin Nohao, oh pil aramas suwed kan me kin mwekid pahrekiong samarailo Tepil.​—Sen. 6:1, 2; Sohn 8:44; 1 Sohn 5:19; Sud 6.

6. Dahme kahrehda “liho” kaidehn Ihp?

⁶ Met kitail pahn koasoiapene duwen “liho.” Liho kaidehn Ihp. Dahme kahrehda? Medewehla ehu kahrepe. Kokohpo mahsanih me kadaudok en liho pahn “kamwutepene” moangen serpento. Kitail pil koasoiapene me serpento iei ngehn suwedo Sehdan, oh sohte kadaudok en Ihp soh unsek men me pahn kak kamwutepene ih. Eri ia duwen Sehdan eh pahn kasohrala?

7. Nin duwen me Kaudiahl 12:1, 2, 5, 10 kasalehda, ihs liho me kileldi nan Senesis 3:15?

 ⁷ Kaimwiseklahn pwuhken Paipel padahkihong kitail ihs liho. (Wadek Kaudiahl 12:1, 2, 5, 10.) Lih menet sohte kohsang sampah. Maramo mi pahn neh ko oh nihn en usu 12 mi pohn moange. E kaipwidi seri men me weksang seri koaros, me iei Wehin Koht. Wehio mi nanleng, eri liho pil mi nanleng. Liho karasaraskihong sapwellimen Siohwa pwihn nanleng me wiawihkihda sapwellime ngehn lelepek kan.​—Kal. 4:26.

8. Ihs me wia pali keieu kesempwal en kadaudok en liho, oh iahd me met wiawi? (Senesis 22:15-18)

⁸ Mahsen en Koht pil padahkihong kitail ihs me wia pali keieu kesempwal en kadaudok en liho. Kadaudoko wia emen kadaudok en Eipraam. (Wadek Senesis 22:15-18.) Nin duwen me kokohpo kasalehda, Sises ketin wia kadaudok en ohl lelepek menet. (Luk 3:23, 34) Ahpw kadaudok menet uhdahn pahn anahne kehlailsang aramas pwe en kak kamwutepene Sehdan me Tepil. Eri, ni Sises eh mpen sounpar 30, e ketin keikihdi sapwellimen Koht manaman. Ni ahnsowohte, e ketin wiahla pali keieu kesempwal en kadaudok en liho. (Kal. 3:16) Mwurin Sises eh pwoula oh iasada, Koht ketin “kamwarehki lingan oh wahu” oh ketikihong “manaman koaros . . . nanleng oh sampah,” pil iangahki manaman en ‘kauwehla doadoahk en Tepilo.’​—Ipru 2:7; Mad. 28:18; 1 Sohn 3:8.

9-10. (a) Ihs irail kan me pil iang wia kisehn kadaudok en liho, oh iahd me met wiawi? (b) Dahme kitail pahn koasoiapene mwurin met?

⁹ Ahpw likin Sises, mie irail teikan me pil iang kisehn kadaudok en liho. Wahnpoaron Pohl kawehwehda ihs irail ni eh padahkihong Kristian keidi kan en mehn Suhs oh mehn liki kan: “Ma kumwail sapwellimen Krais, eri kumwail uhdahn kadaudok en Eipraam, oh kumwail kak ale sohso me inoupe wiawihong Eipraam.” (Kal. 3:28, 29) Ni Siohwa eh kin ketin keiekihdi Kristian men sapwellime manaman, aramaso kin wiahla kisehn kadaudok en liho. Eri, kadaudok en liho iei Sises Krais oh ienge meh 144,000 ko me pahn iangih kaunda. (Kaud. 14:1) Irail pwukat koaros kin song en alasang madamadau oh wiewia kan en Samarailo, Siohwa Koht.

¹⁰ Pwehki kitail eseier ihs irail kan me kileldi nan Senesis 3:15, kitail pahn uhd koasoiapene dahme Siohwa ketin wiadahr pwehn kapwaiada kokohp wet, oh ia duwen atail kak paiekihda met rahnwet.

11. Ia wehwehn ‘keimwen nehn’ kadaudok en liho eh pahn ohla?

¹¹ Nin duwen me kokohpo nan Senesis 3:15 mahsanih, serpento pahn kauwehla ‘keimwen nehn’ kadaudok en liho. Met wiawi ni ahnsou me Sehdan doadoahngki mehn Suhs oh mehn Rom ko en kemehla sapwellimen Koht Ohlo. (Luk 23:13, 20-24) Duwehte emen me sohla kak alu pwehki keimwen neho ohla erein ahnsou kis, Sises pil sohla kak ketin wia mehkot pwehki e seridi nan sousou erein rahn siluh.​—Mad. 16:21.

12. Ia duwen oh iahd me Sises pahn ketin kamwutepene moangen serpento?

¹² Kokohpo nan Senesis 3:15 kasalehda me Sises sohte pahn ketikette nan sousou. Dahme kahrehda? Pwehki kokohpo kasalehda me kadaudoko pahn kamwutepene moangen serpento. Met wehwehki me Sises anahne ketin iasada. Oh ih met me wiawi! Ni kesiluh en rahn mwurin eh pwoula, Sises ketin iasada oh ketidahla nanleng nin duwen ngehn emen. Eri ni ahnsou me Koht ketin  koasoanedier, Sises pahn kamwutepene Sehdan. (Ipru 2:14) Irail kan me pahn iang Krais kaunda pahn iangih ketikihsang nin sampah koaros me kin uhwong Koht, me iei kadaudok en serpento.​—Kaud. 17:14; 20:4, 10. *

13. Ia duwen atail kin paiekihda pweidahn kokohpo?

¹³ Ma kowe emen sapwellimen Koht ladu, ke kin iang paiekihda pweidahn kokohp wet. Sises ketido sampah nin duwen aramas men. Ni unsek, e ketin kahlemengih Semeo. (Sohn 14:9) Eri ni atail sukuhlki duwen Sises, kitail pil esehla oh poakohngala Siohwa Koht. Kitail pil kin paiekihda sapwellimen Sises padahk kan oh sang eh kin ketin kaweid mwomwohdiso en Kristian rahnwet. E ketin padahkihong kitail ia duwen atail en mour ni ahl ehu me pahn kaperenda Siohwa. Oh kitail koaros kak paiekihda pwoulahn Sises, de ohlahn keimwen neho. Ia duwen? Ni Sises eh ketin iasada, e patohwanohng Siohwa nin duwen meirong unsek ehu eh ntao me “kamwakeleikitailsang dihp koaros.”​—1 Sohn 1:7.

14. Ia duwen atail ese me kokohp me Siohwa ketin wiahda nan Ihden sohte pweidahte ahnsowo? Menlau kawehwehda.

¹⁴ Dahme Siohwa ketin mahsanih nan kokohpo nan Ihden kasalehda me kokohpo sohte pahn pweidahte ahnsowo. Ahnsou anahn pwe liho en wiahda kadaudoko me inoupe mie, pwe Tepilo en kihpene nah kan, oh kailok en wiawi nanpwungen pwihn riau wet. Kitail kin paiekihda atail ese duwen kokohp wet pwehki e kin katamankihong kitail me sampah wet me Sehdan kakaun pahn kailongki sapwellimen Siohwa tohnkaudok kan. Mwuhr Sises pil ketin katamankihong sapwellime tohnpadahk ko duwen met. (Mark 13:13; Sohn 17:14) Sangete sounpar 100 samwalahro, kitail uhdahn kilang pweidahn pali wet en kokohpo. Ia duwen?

15. Dahme kahrehda sampah wet kailongki kadaudok en liho laudsang mahs, ahpw dahme kahrehda sohte kahrepen atail en masak Sehdan?

¹⁵ Mwurinte Sises ketin nanmwarkihla nin duwen Mesaia nan pahr 1914, Sehdan piskensang nanleng. Met Sehdan mihier nin sampah oh awiawih ahnsou me e pahn kasohrala. (Kaud. 12:9, 12) Sangete ahnsowo, e kin uhdahn soupisek. E uhdahn lingeringer oh kin uhwong laud sapwellimen Koht aramas akan. (Kaud. 12:13, 17) Ihme kahrehda ahn Sehdan sampah uhdahn kailongki kitail laudsang mahs. Ahpw sohte kahrepen atail en masak Sehdan oh nah kan. Kitail kak ahneki soangen madamadauohte me wahnpoaron Pohl ahneki ni eh ntingihedi: “Ma Koht kin ketin ieiang kitail, ihs me pahn uhwong kitail?” (Rom 8:31) Kitail kak uhdahn likih Siohwa pwehki nin duwen me kitail kilangehr, pali laud en kokohpo nan Senesis 3:15 pweidahr.

16-18. Ia duwen Curtis, Ursula, oh Jessica arail paiekihda arail wehwehki duwen Senesis 3:15?

¹⁶ Sapwellimen Siohwa inowo nan Senesis 3:15 kak sewese kitail en dadaurete pahn soangen kahpwal koaros me lelohng kitail. Curtis, me wia misineri men nan Guam, koasoia: “Ekei pak, I kin lelohng kahpwal oh irair kansensuwed kan me kin uhdahn kasonge ei lelepek ong Siohwa. Ahpw ei doudouloale kokohpo nan Senesis 3:15 kin sewese ie en likihete Semeio nanleng.” Curtis kin kasikasik rahno me Siohwa pahn ketikihsang atail kahpwal kan koaros.

 ¹⁷ Sister men nan Bavaria me adaneki Ursula koasoia me eh wehwehki duwen Senesis 3:15 sewese ih en uhdahn kamehlele me Paipel pwilisang rehn Koht. E kilang ia duwen kokohp wet oh kokohp teikan koaros ar dokpene, oh met uhdahn kamwakid ih. E pil koasoia: “Ni ahnsou me I sukuhlki me Siohwa ketin mwadangete wiahda mehkot pwehn kihong kitail koapworopwor, ei poakohng ih uhdahn laudla.”

¹⁸ Jessica, sang Micronesia, koasoia: “I kak tamante ei pepehmo ni ahnsou me I tepin esehda me I diaradahr padahk mehlel! Kokohpo nan Senesis 3:15 pweipweidahr. E sewese ie en tamataman me lokolok kan me kitail kin lelohng rahnpwukat kaidehn ihme Koht ketin kupwurki ong kitail. Kokohp wet pil kalaudehla ei kamehlele me ei papah Siohwa kin imwikihla mour me keieu mwahu me I kak ahneki ahnsou wet, oh ahnsou kohkohdo pil pahn mwahu sang met.”

19. Dahme kahrehda kitail kak uhdahn kamehlele me kaimwiseklahn kokohpo pahn pweida?

¹⁹ Nin duwen me kitail kilangehr, kokohpo nan Senesis 3:15 pweipweidahr ahnsou wet. Kitail eseier ihs me kadaudok en liho oh kadaudok en serpento. Sises, me wia pali keieu kesempwal en kadaudok en liho, mwahudasangehr ohlahn keimwen neho oh met wialahr Nanmwarki kehlail men. Pilipilda en irail teikan me wia kisehn kadaudok en liho kereniong nek. Pwehki pali keieu en kokohpo pweidahr, kitail kak uhdahn kamehlele me kaimwiseklahn kokohpo, me iei Sises pahn ketin kamwutepene moangen serpento, pil pahn pweida. Sapwellimen Koht ladu kan pahn uhdahn peren ni ahnsou me Sehdan pahn kasohrala! Ahpw lao lel ahnsowo, kitail en dehr uhdi. Kitail kak likih atail Koht. E pahn ketin doadoahngki kadaudok en liho pwehn wiahda soahng mwahu tohto ong “wehi koaros.”​—Sen. 22:18.