1. Ia kupwuren Siohwa rahnwet?

 RAHNWET kupwuren Koht iei me rongamwahu en Wehio en lohkiseli nan sampah pwon. (Mark 13:10; 1 Tim. 2:3, 4) Sapwellimen Siohwa doadoahk met, oh e uhdahn kesempwal me e ketin pilada sapwellime Ohlo en kaweid doadoahk wet. Kitail kak kamehlele me pwehki Sises me ketin kaukaweid kitail, doadoahk en kalohko pahn nek nin duwen me Siohwa ketin kupwurki mwohn imwio eh leledo.​—Mad. 24:14.

2. Dahme kitail pahn koasoiapene nan iren onop wet?

² Nan iren onop wet, kitail pahn kilang ia duwen Sises eh ketin doadoahngki ‘ladu lelepek oh loalokongo’ pwehn kihda kaweid sang Mahsen en Koht oh koasoanehdi sapwellime tohnpadahk kan ong doadoahk en kalohk me keieu laud nan poadopoad. (Mad. 24:45) Kitail pahn pil kilang dahme emenemen kitail kak wia pwehn utung Sises oh ladu lelepeko.

3. Manaman dahieu me Sises ketin alehdi?

³ Sises kin ketin kaukaweid doadoahk en kalohko. Ia duwen atail kak kamehlele met? Mwohnte eh ketidahla nanleng, Sises ketin tuhwong ekei sapwellime tohnpadahk lelepek ko pohn nahna ehu nan Kalili. E mahsanihong irail: “Manaman koaros kohiengieier nanleng oh sampah.” Tehk dahme e mahsanih mwurinte met: “Kumwail eri kohwei oh padahkihong aramas en wehi koaros pwe ren wiahla nei tohnpadahk.” (Mad. 28:18, 19) Eri, likin pwukoa teikan me e sapwellimanki, Sises pil ketin alehdi manaman en kaweid doadoahk en kalohko.

4. Dahme kahrehda kitail kak kamehlele me Sises kin ketin kaukaweidte doadoahk en kalohko?

 ⁴ Sises mahsanih me doadoahk en kalohk oh katohnpadahk pahn wiawi nan “wehi koaros” oh e pahn ketin ieiang sapwellime tohnpadahk kan “rahn koaros lao lel ni kaimwiseklahn koasoandi en mwehio.” (Mad. 28:20) Mahsen ko kasalehda ni sansal me doadoahk en kalohko pahn pousehlahte wiawi pahn sapwellimen Sises kaweid lao lel atail ahnsou.

5. Ia duwen atail kin sewese kapwaiada Melkahka 110:3, NW?

⁵ Sises sohte ketin pwunodki me tohndoadoahk kan sohte pahn itar erein kaimwiseklahn koasoandi en mwehiet. E mwahngih me dahme sounmelkahkao kohpada pahn pweida: “Sapwellimomwi aramas akan pahn perenki toukihda pein irail ni rahn me komw ketin kapokonepene sounpei kan.” (Mel. 110:3, NW) Ma ke kin iang kalohki rongamwahwo, ke kin utung Sises oh ladu lelepeko oh kin sewese kapwaiada kokohpo. Doadoahko wiewiawi, ahpw mie kahpwal kan.

6. Ia ehu kahpwal me sounkalohki Wehio kan kin lelohng rahnwet?

⁶ Ehu kahpwal me sounkalohki Wehio kan kin lelohng iei uhwong sang meteikan. Irail me kesehla oh uhwongada kaudok mehlel, kaunen pelien lamalam kan, oh kaunen koperment kan kin ndaiong aramas tohto soahng likamw kan duwen atail doadoahko. Ma soangen likamw ko pitihedi atail peneinei, meteikan me kitail ese, oh iengatail tohndoadoahk kan, irail kakete kasonge kitail en uhdihsang papah Siohwa oh uhdihsang kalohk. Nan ekei sahpw, atail imwintihti kan kin kamasak, peiong, de koledi oh salihedi riatail Kristian kan nan imweteng. Kitail sohte kin pwuriamweikihla met. Sises ketin kohpada: “Wehi koaros pahn kailongkin kumwail pwehki mwarei.” (Mad. 24:9) Atail kin lelohng soangen kailok pwukat kadehdehda me Siohwa kin ketin kupwurkin kitail. (Mad. 5:11, 12) Tepilo me kin kahrehda uhwong pwukat. Ahpw Sises uhdahn ketin kehlailsang Sehdan! Pwehki sapwellimen Sises sawas, rongamwahwo lellahr rehn aramas en wehi koaros. Tehk mehn kadehde wet.

7. Dahme kadehdehda me Kaudiahl 14:6, 7 pweidahr?

⁷ Pil ehu kahpwal me kitail kin lelohng nan kalohk iei me aramas kin lokaiahki soangsoangen lokaia kan. Nan Kaudiahlo me e ketikihong wahnpoaron Sohn, Sises ketin kohpada me nan atail ahnsou, rongamwahwo pahn powehdi kahpwal wet. (Wadek Kaudiahl 14:6, 7.) Ia duwen? Kitail kin kihong aramas tohto ni uwen me kitail kak arail ahnsou en mwekidki rongamwahwo. Rahnwet, aramas nan sampah pwon kak wadek neitail sawasepen Paipel kan nan neitail website en jw.org pwehki mehn sawas pwukat kin wiawihda ni lokaia daulih kid! Mweimwei kohda me pwuhko Pereperenki Mour Kohkohlahte!​—me kitail kin keieu doadoahngki nan doadoahk en katohnpadahk—​en wiawihda ni lokaia daulih 700! Kisin kasdo kan me poahsoankihda kaweid en Paipel kan pil kin wiawihda ong me salengepon kan, oh pwuhk kan ni braille ong me maskun kan. Kitail kilang kokohp en Paipel kan ar pweidahr. Aramas akan “sang ni lokaia koaros en wehi kan” kin sukuhlki en lokaiahki “lokaia min” en Paipel. (Sek. 8:23; Sep. 3:9, NW) Soahng pwukat koaros pweidahr pahn kaweid en atail kaun Sises Krais.

8. Dahme wiawiher nan atail doadoahk en kalohk?

⁸ Rahnwet, aramas daulih 8,000,000 nan sahpw 240 kin iang kisehn sapwellimen Siohwa pwihn, oh nan ehuehu pahr aramas kid kid kei kin papidaisla! Ahpw kesempwalsang nempe pwukat iei irair kan en Kristian, “mour kapw,” me tohnpadahk kapw pwukat kin  kakairada. (Kol. 3:8-10) Me tohto uhdihsang wia tiahk samin, tiahk lemei, lipilipilki aramas, oh uhki wehi. Kokohpo me kileldi nan Aiseia 2:4 (NW) pweidahr; irail “sohla pahn sukuhlki mahwen.” Ni atail kin doadoahk laud pwehn pwuhriong nan mour kapw, kitail kin sewese kainangihedo ong nan sapwellimen Koht pwihn aramas akan oh kadehdehda me kitail kin idawehn atail kaun Sises Krais. (Sohn 13:35; 1 Pit. 2:12) Dahme kahrehda met kin wiawi? Pwehki Sises kin ketikihong kitail sawas me kitail anahne.

9. Nin duwen me Madiu 24:45-47 mahsanih, dahme Sises ketin kohpada pahn wiawi ni imwin ahnsou?

⁹ Wadek Madiu 24:45-47. Sises ketin kohpada me ni imwin ahnsou, e pahn ketin idihada “ladu lelepek oh loalokong” men pwehn kihda kaweid sang Mahsen en Koht. Eri kitail en kasik me laduwo pahn doadoahk laud nan atail ahnsou. Met uhdahn mehlel. Sises ketin doadoahngki pwihn tikitik en ohl keidi kei pwehn kin kihong sapwellimen Koht aramas akan oh irail kan me men rong “kanarail mwenge ni ahnsou me konehng.” Ohl pwukat sohte kin wiahkin irail kaun kei me kin kaunda ahn meteikan pwoson. (2 Kor. 1:24) Ahpw, irail pohnese me Sises Krais me “sounkaweid oh kaunen” sapwellime aramas akan.​—Ais. 55:4.

10. Mehnia rehn pwuhk ko nan kilelo me seweseiuk en tepida papah Siohwa?

¹⁰ Sang pahr 1919 ladu lelepeko kin kaunopada soangsoangen sawasepen Paipel kan pwehn sewese me kapw kan en tepida sukuhlki padahk mehlel en Paipel. Nan pahr 1921 laduwo wiahda pwuhko The Harp of God pwehn sewese me kapw kan en sukuhlki padahk mengei en Paipel kan. Pwehki ahnsou kin wekiwekla, irail pil wiahda pwuhk teikan. Mehnia rehn pwuhk pwukat me seweseiuk en esehla oh poakohngala Samatailo nanleng? Pwuhko  “Let God Be True,” Padahk Mehlel me Kahluwalahng Mour Soutuk, Ke Kak Mour Kohkohlahte Nan Paradais Nin Sampah, Loalokong Me Pahn Kahluwalahng Mour Soutuk, Dahme Paipel Uhdahn Padahngki?, Dahme Paipel Kak Padahkihong Kitail?, de neitail pwuhk kapwo Pereperenki Mour Kohkohlahte!? Pwuhk pwukat koaros wiawihda pwehn sewesei kitail katohnpadahk. Oh re wiawihda ni ahnsou me kitail keieu anahne.

11. Dahme kahrehda e kesempwal kitail koaros en kalaudehla atail sukuhlki duwen Siohwa oh Paipel?

¹¹ Kaidehn irail me kapw kante me anahne uhdahn esehla duwen Siohwa oh Paipel. Kitail koaros anahne wia met. Wahnpoaron Pohl ntingihedi: “Mwenge kekeluwak iei ong aramas koahiek kan.” Pohl pil kapatahiong me atail doadoahngki dahme kitail sukuhlkihsang Paipel pahn sewese kitail en “ese wekpeseng en dahme pwung oh dahme sapwung.” (Ipru 5:14) E kak uhdahn apwal en peikiong sapwellimen Siohwa koasoandi kan ahnsou wet pwehki aramas tohto kin wia tiahk samin. Ahpw Sises ketin tehk mwahu me kitail sukuhlki soahng kan me kitail anahne pwe atail pwoson en kehkehlailte. Kitail kin alehdi kaweid wet sang Mahsen en Koht Paipel. Pahn sapwellimen Sises kaweid, ladu lelepeko kin kaunopada oh kihpeseng kaweid pwukat me rasehng mwenge.

12. Duwehte Sises, ia duwen atail kin kalinganahla mwaren Koht?

¹² Duwehte Sises, kitail kin kalinganahla mwaren Koht ni ahl me warohng mwaro. (Sohn 17:6, 26) Karasepe, nan 1931, kitail tepida doadoahngki ahd wet me kohsang nan Paipel, Sounkadehdehn Siohwa kan. Atail wia met kasalehda uwen atail kesempwalki mwaren Koht, oh me kitail men aramas akan en esehkin kitail mwar wet. (Ais. 43:10-12) Oh sangete nan October en pahro, mwar wet kin pwarada ni ehuehu kilin neitail Kahn Iroir  kan. Patehng met, New World Translation of the Holy Scriptures kapwurehiong mwaren Koht ni wasa kan nan Paipel me e uhdahn pahn mi ie. Met uhdahn weksang pwihn en Kristian likamw kan me kihsang mwaren Siohwa nan neirail kawehwehn Paipel tohto!

13. Dahme kamehlelehiong uhk me Sises kin ketin doadoahngki ‘ladu lelepek oh loalokongo’ rahnwet? (Sohn 6:68)

¹³ Sang ni eh ketin doadoahngki ‘ladu lelepek oh loalokongo,’ Sises ketin wiahda pwihn ehu nin sampah pwehn utung kaudok min. Dahme ke medewehki pwihn wet? Ele ke ahnekihte soangen pepehmohte me wahnpoaron Piter ahneki ni eh patohwanohng Sises: “Ihs me se pahn kohla reh? Komw sapwellimanki mahsen en mour soutuk.” (Sohn 6:68) Ma kitail sohte iang wia kisehn sapwellimen Siohwa pwihn, ia wasa kitail pahn mi ie rahnwet? Sang ni eh ketin doadoahngki pwihn wet, Krais kin ketin tehk mwahu me kitail alehdi soahng koaros me kitail anahne pwehn lelepekohngete Koht. E pil kin ketin kaiahne kitail pwe kitail en koahiekla nan atail doadoahk en kalohk. E pil kin ketin sewese kitail en pwuhriong nan “mour kapw” pwe kitail en kaperenda Siohwa.​—Ep. 4:24.

14. Ia duwen omw paiekihda omw iang kisehn sapwellimen Siohwa pwihn erein soumwahu lusulus en COVID-19?

¹⁴ Sises kin ketikihda kaweid erpit ni ahnsou apwal. Kamwahupen kaweid wet sansalda ni ahnsou me soumwahu lusulus en COVID-19 tepida wiawi. Ni me tohto ar sehse dahme re pahn wia, Sises ketin tehk mwahu me kitail alehdi kaweid kan me pahn pere kitail. Kaweido kangoangehkin kitail en doadoahngki mehn pere mesatail ni atail mi nan pokon oh dehr karanih meteikan. Mehn kataman kohieng  elder kan en kaukaule koasoiong koaros nan mwomwohdiso pwehn tehk mwahu dahme irail anahne pwehn pere irail sang soumwahu oh en karanihte Siohwa. (Ais. 32:1, 2) Kitail pil kin alehdi kaweid oh kangoang teikan sang rohng kapw kan sang Pwihn me Kin Apwalih Mwomwohdiso nan Sampah Pwon.

15. Kaweid dahieu me kitail alehdi me pid atail pahn wia atail mihting kan oh kalohk erein soumwahu lusuluso, oh ia imwilahn met?

¹⁵ Erein soumwahu lusuluso, kitail pil alehdi kaweid mwahu kan ong atail en wia atail mihting en mwomwohdiso oh atail doadoahk en kalohk. Kitail mwadangete tepida iang towehda mihting kan oh mihting tohrohr kan ni atail doadoahngki Internet. Oh pali laud en atail kalohk, kitail kin ntingihada kisinlikou oh doadoahngki delepwohn. Siohwa ketin kapaiahda atail nannanti. Tohto ohpis en Sounkadehdehn Siohwa kan kin ripohtki me nempehn sounkalohk kan tohtohla. Ni mehlel, sounkalohk tohto kin lelohng soahng kaperen kan erein ahnsou wet.​—Menlau kilang koakono “ Siohwa Ketin Kapaia Atail Doadoahk en Kalohk.”

16. Dahme kitail kak kamehlele?

¹⁶ Ele ekei medewe me sapwellimen Siohwa pwihn kin daulihala kanahieng ni arail kihda kaweid me pid soumwahu lusuluso. Ahpw ahnsou koaros, e kin sansalda me kaweid pwukat wia kaweid erpit kei. (Mad. 11:19) Oh ni atail kin doudouloale duwen Sises eh ketin kaukaweid sapwellime aramas akan ni elen limpoak, kitail kamehlele me sohte lipilipil dahme pahn wiawi ni ahnsou kohkohdo, Siohwa oh Sapwellimeo pahn ketin ieiang kitail.​—Wadek Ipru 13:5, 6.

17. Ia omw pepehm duwen en mi pahn sapwellimen Sises kaweid?

¹⁷ Kitail uhdahn perenki me Sises iei atail kaun! Kitail kin iang pwihn ehu me sohte kin tohrohrkihpeseng tiahk, wehi, oh lokaia. Kitail kin alehdi kaweid tohto sang Mahsen en Koht, oh kitail kin alehdi soangen kaiahn koaros me kitail anahne pwehn wia doadoahk en kalohk. Emenemen kitail kin ale kaiahn pwehn pwuhriong nan mour kapw oh sukuhlki en limpoakpene. Kitail ahneki kahrepe mwahu tohto en pohlki me Sises iei atail kaun!