IREN ONOP 32
Kahlemengih Siohwa—En Madamadau Toupahrek
“Aramas koaros en ese amwail madamadau toupahrek.”—PIL. 4:5.
KOUL 89 Rong, Peik, oh Ale Kapai
AUDEPEN ONOP a
Mehnia tuhke me ke men wia? (Menlau kilang parakrap 1)
1. Ni ahl dah me Kristian kan anahne duwehte tuhke pwoat? (Pil kilang kilel.)
“KISINIENG sohte kin kauwehla tuhke pwoat me matamat.” Lepin kahs wet kasalehda kesempwalpen tuhke kan en kin matamat erein kisinieng laud pwe en kehlailte. Kitail pil anahne materek de ahneki madamadau toupahrek ni ahnsou me atail mour apwalla pwehn doulahte papah Siohwa ni peren. Ia duwen? Kitail anahne toupahrek ni atail irair kan ar wekila, oh sang ni atail kin wauneki ahn meteikan madamadau oh pilipil.
2. Irair dah kan me pahn sewese kitail ni atail irair kan eh wekila, oh dahme kitail pahn koasoiapene nan iren onop wet?
2 Nin duwen sapwellimen Siohwa ladu kei, kitail men madamadau toupahrek. Kitail pil men aktikitik oh kadek. Nan iren onop wet, kitail pahn kilang ia duwen irair pwukat eh sewese ekei Kristian kan en dadaur pahn irair kan me wekila. Kitail pahn pil kilang ia duwen irair pwukat eh kak sewese kitail. Ahpw keieu, kitail pahn sukuhlkihsang Siohwa oh Sises, me kin ketin wia mehn kahlemeng unsek, duwen madamadau toupahrek.
SIOHWA OH SISES KETIN MADAMADAU TOUPAHREK
3. Ia duwen atail ese me Siohwa kin ketin madamadau toupahrek?
3 Siohwa pil ketin mwarenki lengileng wet “Paip” pwehki e kin ketin kehlail oh tengeteng. (Deud. 32:4) Ahpw, e pil kin ketin toupahrek ni sapwellime madamadau. Ni soahng kan nan sampah wet eh wekila, Siohwa kin ketin toupahrek oh tehk mwahu me soahng koaros me e ketin inoukihda pahn pweida. Siohwa ketin kapikkitailda rasehng ih, me pil kak toupahrek ni atail irair kan eh wekila. E ketikihda kaweid sansal kan nan Paipel me kin sewese kitail en wiahda pilipil mwahu ong kahpwal sohte lipilipil me kitail lelohng. Pein sapwellime mehn kahlemeng oh kaweid kan me e ketikihong kitail sewese kitail en ese me ni eh ketin wia atail “Paip,” e pil kin ketin toupahrek.
4. Menlau kihda ehu karasepen Siohwa eh ketin madamadau toupahrek. (Lipai 5:7, 11)
4 Sapwellimen Siohwa ahl akan kin unsek oh toupahrek. E sohte kin ketin lemeiong aramas akan. Karasepe, medewehla ia duwen Siohwa eh ketin kasalehda madamadau toupahrek ong mehn Israel ko. E sohte ketin kasik arail meirong kan en duwepenehte, sohte lipilipil ma ekei kepwehpwe de semwehmwe. Nan ekei irair, e ketin mweidohng emenemen en kihda meirong me e kakohng.—Wadek Lipai 5:7, 11.
5. Menlau kihda ehu karasepen Siohwa eh ketin aktikitik oh poakehla meteikan.
5 Sapwellimen Siohwa aktikitik oh poakehla meteikan kin kamwakid en ketin madamadau toupahrek. Karasepe, Siohwa ketin kasalehda ia uwen eh aktikitik ni ahnsou me e pahn kereniong ketin kasohrehla aramas suwed kan nan Sodom. Ni eh ketin doadoahngki sapwellime tohnleng kan, Siohwa mahsanihong ohl lelepeko Lohd en tangala ni nahna kan. Lohd masak kohla wasao. Eri e peki me ih oh eh peneineio en kohla Soar, kisin kahnimw ehu me Siohwa ketin pilada en kasohrehla. Siohwa kakete ketin idingkihong Lohd en idawehnte dahme E mahsanihong. Ahpw e ketin mweidohng Lohd en kohla Soar, oh E sohte kasohrehla kahnimwo. (Sen. 19:18-22) Sounpar epwiki kei mwuhr, Siohwa ketin poakehla mehn Ninipe kan. E ketin kadarala soukohp Sona Ninipe pwehn padahkihong aramas suwed ko me irail oh arail kahnimwo pahn kasohrala. Ahpw ni ahnsou me mehn Ninipe ko koluhla, Siohwa ketin poakeirailla oh sohte kasohrehla kahnimwo.—Sona 3:1, 10; 4:10, 11.
6. Menlau kihda ekei karasepen Sises eh kahlemengih sapwellimen Siohwa madamadau toupahrek.
6 Sises kin kahlemengih sapwellimen Siohwa madamadau toupahrek. E ketin pekederdo nin sampah pwehn kalohk ong “sihpw salongala kan en wehin Israel.” Ahpw e ketin kasalehda madamadau toupahrek ni eh kalohk ong aramas akan. Karasepe, lih emen me kaidehn mehn Israel peki en ketin kamwahwihala nah serepeino me ‘ngehn suwed men tiadahr powe.’ Ni kadek, Sises ketin kapwaiada ahn liho pekipeko oh kamwahwihala nah serepeino. (Mad. 15:21-28) Medewehla pil ehu karasaras. Nindoken eh tepida sapwellime doadoahk en kalohk, Sises mahsanih: “Mehmen me kahmahmkin ie . . . , I pil pahn kahmahmki.” (Mad. 10:33) Ahpw ia duwe, e ketin likidmeliehla Piter, me kahmahmkihla ih pak siluh? Soh. Sises mwahngih me Piter uhdahn koluhkihla dahme e wiao oh me ih ohl lelepek men. Mwurin eh ketin iasada, Sises ketin kamehlelehiong Piter me e ketin mahkohngehr oh poakepoakehte.—Luk 24:33, 34.
7. Nin duwen me Pilipai 4:5 mahsanih, dahme kitail men meteikan en medewehkin kitail?
7 Kitail kilangehr me Siohwa Koht oh Sises Krais kin ketin madamadau toupahrek. Ia duwen kitail? Siohwa ketin kasik kitail en ahneki madamadau toupahrek. (Wadek Pilipai 4:5.) Ehu kawehwe koasoiahki iretikitik wet: “Kasalehda ni omw wiewia me ke kin madamadau toupahrek.” Kitail kak pein idek rehtail: ‘Aramas kin wiahkin ie emen me kin madamadau toupahrek oh kanengamah? De irail kin wiahkin ie emen me kakos, lemei, de keptakai? I kin ngihtehtehki me meteikan en wiahte dahme I medewe? De I kin rong meteikan oh kapwaiada dahme re men wia ni ahnsou me kak?’ Uwen laud en atail kin kasalehda madamadau toupahrek, ih uwen laud en atail kin kahlemengih Siohwa oh Sises. Kitail pahn koasoiapene wasa riau me e kesempwal kitail en madamadau toupahrek—ni ahnsou me atail irair kan wekila oh ni ahnsou me ahn meteikan madamadau oh pilipil weksang atail.
MADAMADAU TOUPAHREK NI AHNSOU ME IRAIR KAN WEKILA
8. Dahme kak sewese kitail en madamadau toupahrek ni ahnsou me atail irair kan wekila? (Pil kilang dahme ntingdi pah.)
8 Kitail anahne madamadau toupahrek ni atail irair kan wekila. Wekidekla pwukat kak kahrehda kahpwal kan me kitail sohte kasik. Ele kitail kak ahnekihda soumwahu laud ehu me kitail sohte kasik. De wekidekla ehu me mwadang wiawi nan koperment wasa me kitail kin mi ie kakete kahrehiong atail mour en uhdahn apwal. (Ekl. 9:11; 1 Kor. 7:31) E pil kak apwal ong kitail ma sapwellimen Siohwa pwihn peki kitail en papah ni ehu ahl tohrohr de ehu wasa tohrohr. Sohte lipilipil kahpwal dah, kitail kak wia soahng pahieu pwukat: (1) pohnese me omw irair en ahnsou wet wekila, (2) kilengwohng ahnsou kohkohdo, (3) medemedewe soahng mwahu kan, oh (4) wia soahng kan ong meteikan. b Kitail pahn koasoiapene ia duwen ekei riatail Kristian kan paiekihda arail wia soahng pwukat.
9. Ia duwen pwopwoud misineri ehu ara dadaur pahn kahpwal me ira sohte kasik?
9 Pohnese me omw irair en ahnsou wet wekila. Emanuele oh Francesca alehdi pwukoahn misineri nan ehu sahpw. Ni ahnsou me ira tepida esehda lokaiao oh esehla Kristian ko nan ara mwomwohdiso kapwo, soumwahu lusulus en COVID-19 tepida oh ira anahne dehr patehng meteikan. Eri en Francesca nohnou mehla ni soh kasikpe. Francesca uhdahn men mi rehn eh peneineio, ahpw e sohte kak seiloak pwehki soumwahu lusuluso. Dahme sewese en dadaur pahn kahpwal pwukat koaros? Keieu, Emanuele oh Francesca kapakapki erpit pwehn dadaurete ehuehu rahn oh dehr nohn mworusala. Siohwa ketin sapengala ara kapakap ko ni ahnsou me konehng ni eh doadoahngki sapwellime pwihn. Karasepe, ira ale kangoang sang dahme emen brother koasoia nan kisin kasdo ehu: “At mwadang en ale pwukoa kapw kan, ih uwen at mwadang pwurehng ahneki peren. Eri se kak wia uwen at kak koaros nan irair me se mi loale ahnsou wet.” c Keriau, ira pilada en kamwahwihala ara kalohk doadoahngki delepwohn oh ira pil tapiada onop en Paipel ehu. Kesiluh, ira mweidohng riara Kristian kan en sawas. Sister men me kadek kin kadaralahng ira iren Paipel mwotomwot ehuehu rahn erein sounpar ehu. Ma kitail pil kin perenki wekidekla kapw kan, kitail pahn kak perenki dahme kitail kak wia.
10. Ia duwen emen sister eh mwekidki wekidekla laud me wiawi nan eh mour?
10 Kilengwohng ahnsou kohkohdo, oh medewe soahng mwahu kan. Christina, sister en Romania me kin mi Sapan, nsensuwedla ni mwomwohdisohn lokaiahn wai me e kin iango sohla. Ahpw, e sohte medemedewe dahme wiawio. Eri, e pilada en kohla ni mwomwohdisohn Sapan sang ni eh wia uwen eh kak en kalohk doadoahngki lokaiahn Sapan. E peki rehn lih emen me kin iangih doadoahk mahso en sewese ih kamwahwihala eh lokaiahn Sapan. Liho pwungki en doadoahngki Paipel oh kisin pwuhko Pereperenki Mour Kohkohlahte! pwehn padahkihong Christina lokaiahn Sapan. Christina sohte esehlahte lokaiahn Sapan ahpw liho men kalaudehla eh ese Paipel. Ni atail kin kilengwohng ahnsou kohkohdo oh ahneki madamadau pwung, wekidekla kan me kitail sohte kasik kak wahdo kapai kan me kitail pil sohte kasik.
11. Dahme sewese pwopwoud ehu me ahneki kahpwal en mwohni?
11 Wia soahng kan ong meteikan. Pwopwoud ehu me kin kousoan nan sahpw me atail doadoahko keinapwidi, tepida ahneki kahpwal en mwohni ni ahnsou me sahpwo epwelen mwohnihda. Dahme ira wia? Keieu, ira kihsang soahng kan me sohte nohn kesempwal nan ara mour. Mwuri, ira sohte medemedewehte ara kahpwal kan, ahpw ira pilada en medemedewe en sewese meteikan sang ni ara wiahda ahnsou laud nan kalohk. (Wiewia 20:35) Ohl pwopwoudo koasoia: “Pwehki se wiahda ahnsou laud nan kalohk, se sohte kin nohn medemedewe duwen at kahpwal kan oh at ahnsou en wia dahme Koht kupwurki ong kiht laudla.” Ni ahnsou me atail irair kan wekila, kitail anahne tamataman ia uwen eh kesempwal en pousehlahte sewese meteikan, ahpw mehlel sang ni atail kalohk.
12. Ia duwen mehn kahlemeng en wahnpoaron Pohl eh kak sewese kitail en madamadau toupahrek nan atail kalohk?
12 Nan atail doadoahk en kalohk, kitail anahne madamadau toupahrek. Aramas akan me kitail kin kalohk ong ahneki madamadau wekpeseng duwen Koht oh re kohsang soangsoangen wasa kan oh tiahk. Wahnpoaron Pohl kin madamadau toupahrek, oh kitail kak sukuhlsang eh mehn kahlemeng. Sises ketin idihada Pohl nin duwen “wahnpoaron men ong mehn liki kan.” (Rom 11:13) Eri Pohl kin kalohk ong mehn Suhs kan, mehn Krihs kan, aramas me neksang sukuhl, tohn kousapw kan, kaunen koperment kan, oh nanmwarki kan. Pwehn sair mohngiong en soangsoangen aramas pwukat koaros, Pohl wiahla “soahng koaros rehn soangen aramas koaros.” (1 Kor. 9:19-23) E medemedewe laud wasa me aramas ako kohsang oh dahme re kin kamehlele. Met sewese ih en madamadau toupahrek oh koasoiong emenemen ni ahl ehu me pahn kakerenihirailla rehn Koht. Kitail pil kak kamwahwihala atail kalohk ma kitail kin madamadau toupahrek oh song en medewehda ahl me keieu mwahu en sewese emenemen aramas.
WAUNEKI AHN METEIKAN MADAMADAU
Ma kitail madamadau toupahrek, kitail pahn wauneki ahn meteikan madamadau (Menlau kilang parakrap 13)
13. Keper dah me 1 Korint 8:9 mahsanih me kitail kak soikala ma kitail wauneki ahn meteikan madamadau?
13 Madamadau toupahrek pil kin sewese kitail en wauneki ahn meteikan madamadau. Karasepe, ekei riatail sister kan perenki doadoahngki makeup, a meteikan soh. Ekei Kristian kan perenki nim ekis sakau en wai, ahpw meteikan pilada en dehr nim. Kristian koaros men ahneki roson mwahu ahpw re kin pilada soangsoangen wiepen roson mwahu. Ma kitail kin ahnsou koaros medewe me kitail kin pwung oh song en idingkihong riatail Kristian kan en wia dahme kitail kin wia, kitail kak kadipekelekelih meteikan oh kahrehda saminimin. Kitail uhdahn sohte men wia met! (Wadek 1 Korint 8:9; 10:23, 24) Kitail pahn koasoiapene mehn kahlemeng riau me kasalehda ia duwen kapwaiada kaweid kan oh ire mehlel kan en Paipel eh kak sewese kitail en toupahrek oh ahnekihte popohl.
Ma kitail madamadau toupahrek, kitail pahn wauneki ahn meteikan madamadau (Menlau kilang parakrap 14)
14. Kaweid en Paipel dah kan me kitail anahne tamataman ni atail wiahda pilipil ong atail likou oh kapwat?
14 Likou oh kapwat. Siohwa sohte ketin padahkihong kitail dahme kitail anahne likawih, ahpw e ketikihong kitail ire mehlel kan pwehn idawehn. Kitail anahne likouda ni ahl me kin kawauwih Koht, kasalehda madamadau toupahrek, wahu, oh “madamadau pwung.” (1 Tim. 2:9, 10; 1 Pit. 3:3) Eri, kitail sohte men likouda ni ahl me aramas akan pahn medemedewehte mwomwatail. Kaweid en Paipel kan pahn pil sewese elder kan en dehr pein wiahda kosonned kan me pid likou oh sidail en pitenmoang. Karasepe, elder kan nan ehu mwomwohdiso men sewese ekei brother pwulopwul me alasang mwomwen sidail en seisei me me pwulopwul tohto ahneki, me mwotomwot oh uhdahn ping. Ia duwen elder ko ar kak sawas oh sohte wiahda kosonned? Sounapwalih me kin seiloako kaweidki me elder ko en padahkihong brother ko, “Ma ke mi wasahn padahko oh me rongorong kan tetehkte mwomwomw a kaidehn dahme ke koasokoasoia, mie kahpwal me pid omw likou oh omw kapwat.” Kawehwe mengei wet sewese brother pwulopwul ko en wehwehki dahme irail anahne wia oh elder ko sohte anahne wiahda kosonned ehu. d
Ma kitail madamadau toupahrek, kitail pahn wauneki ahn meteikan madamadau (Menlau kilang parakrap 15)
15. Kosonned oh ire mehlel dah kan en Paipel me kak sewese kitail en wiahda pilipil kan ong atail roson? (Rom 14:5)
15 Epwelpen roson. Emenemen Kristian anahne pilada ia duwen eh pahn pein apwalih eh roson. (Kal. 6:5) Ni Kristian kan ar pilada epwelpen wini, irail anahne peikiong kosonned en Paipel en liksang nta oh wunahni. (Wiewia 15:20; Kal. 5:19, 20) Ahpw, irail kak pein pilada wiepen wini dah me re pahn ale. Ekei kin rapahkihte sawas sang imwen wini kan ahpw ekei kin rapahki sawas teikan. Ele kitail pein kamehlele me mie soangen wiepen wini ehu me kak sawas de keper, ahpw kitail anahne wauneki ahn riatail Kristian kan pwuhng pwe ren pein wiahda arail pilipil me pid palien wini. Eri kitail anahne tamataman ire pahieu pwukat: (1) Wehin Koht kelehpw me pahn kamwahwihala soangen soumwahu koaros. (Ais. 33:24) (2) Emenemen Kristian anahne “uhdahn kamehlele” dahme keieu mwahu ong ih. (Wadek Rom 14:5.) (3) Kitail sohte kin kadeik meteikan de wia mehkot me pahn kadipekelekelih irail. (Rom 14:13) (4) Kristian kan kin kasalehda limpoak oh wehwehki me minimin en mwomwohdiso kesempwalsang pein arail pilipil. (Rom 14:15, 19, 20) Ma kitail tamataman soahng pwukat, kitail pahn ahnekihte nanpwungmwahu keren rehn riatail Kristian kan oh sewese popohl en mie nan mwomwohdiso.
Ma kitail madamadau toupahrek, kitail pahn wauneki ahn meteikan madamadau (Menlau kilang parakrap 16)
16. Ia duwen elder men eh kak kasalehda madamadau toupahrek nan eh wiewia ong rie elder kan? (Pil kilang kilel kan.)
16 Elder kan anahne wiahda mehn kahlemeng mwahu en madamadau toupahrek. (1 Tim. 3:2, 3) Karasepe, elder men en dehr kasik me pein eh madamadau pahn ahnsou koaros pwung pwehki e laudsang elder teikan. E kamehlele me sapwellimen Koht manaman kak kamwakid emen elder en nda mehkot me pahn sewese irail en wiahda pilipil pwung. Oh ma pali laud en elder kan pwungki pilipil ehu me sohte uhwong kaweid en Paipel, elder men me madamadau toupahrek pahn utung pilipilo mehnda ma pein ih pwungki ehu pilipil tohrohr.
KAMWAHUPEN MADAMADAU TOUPAHREK
17. Ia duwen atail kin paiekihda atail madamadau toupahrek?
17 Ni atail kin madamadau toupahrek kitail kin paiekihda ni ahl tohto. Kitail kin ahneki nanpwungmwahu keren rehn riatail Kristian kan, oh mwomwohdiso kin ahneki popohl. Kitail kin perenki mwomwen sapwellimen Siohwa aramas akan oh arail tiahk. Oh e kaperen en ese me mendahki kitail koaros wekpeseng, kitail kin kaudokiong ih nin duwen peneinei ehu me kin miniminpene. Laudsang met, kitail perenki ese me kitail kin kahlemengih atail Kohto Siohwa me ketin madamadau toupahrek.
KOUL 90 Kangoange Emenemen
a Siohwa oh Sises kin ketin kasalehda madamadau toupahrek, oh ira kupwurki kitail en kakairada irair wet. Ma kitail kin madamadau toupahrek, e pahn mengeiong kitail en ahnla wekidekla kan nan atail mour, me duwehte wekilahn atail roson de atail doadoahk en mwohni. Kitail pahn pil sewese pwe meleilei oh miniminpenehn mwomwohdiso en mihmihte.
b Menlau kilang artikelo “How to Deal With Change” nan Awake! en 2016 No. 4.
c Menlau kilang kisin kasdou Interview With Brother Dmitriy Mikhaylov me mi pahn oaralapo “Siohwa Ketin Kawekala Kalokolok ni Kadehde” nan March-April 2021 Atail Mour en Kristian oh Kalohk—Doaropwehn Kasukuhl Ong Mihting.
d Pwehn kalaudehla omw wehwehki me pid duwen likou oh mehn ipwerek, menlau kilang pwuhko Pereperenki Mour Kohkohlahte! iren mehn kasukuhl 52.