Pahpa wia emen elder nan pelien lamalam en United Church en Canada, eri wihk koaros e kin kadariehla oh riei serepeino en iang Santi sukuhl. Mwurin mwo, se kin iangih sarawi kuloak 11:00 ni menseng. Mwurin sawas, se kin iang Nohno kohla ni Wasahn Kaudok. E mengei ong kiht en kilang wekpeseng en pelien lamalam riau ko.

Nohno ehukihong kompoakepah keren ko, Bob oh Marion Hutcheson, dahme e sukuhlkihsang nan Paipel, oh ira pil wiahla Sounkadehde kei. Nan 1958, Brother oh Sister Hutcheson luke ie en iang ira oh neira pwutak silimeno kohla ni Mihting Tohrohro (Divine Will International Assembly) me wiawi nan New York City erein rahn waluh. Ni ei kin tamanda ahnsou ko, met I wehwehkihda me e sohte mengei ong ira en luke ie en iang irail, ahpw mihting tohrohro wiahla ehu ahnsou me keieu kaperen nan ei mour.

Ahnsou me I sounpar eisek samwa, se kin mi wasa ehu me se kin apwalihada kou, pwihk, sihpw, oh malek kan, oh I uhdahn perenki. I uhdahn men wiahla emen toahkte en mahn kan. Nohno koasoiaiong emen elder ko nan at mwomwohdisou duwen met. Ni kadek, eldero katamankihong ie me se miher ni “imwin rahn akan” oh idek ia duwen ei iang sukuhl laud erein sounpar kei eh pahn kamwakid ei  nanpwungmwahu rehn Siohwa. (2 Tim. 3:1) Pwehki met, I pilada en dehr kohla iang sukuhl laud.

I pil kin medemedewe dahme I pahn wia mwurin ei kesepwil sang high school. Mendahki I kin iang kalohk ni imwin wihk koaros, I sohte kin perenki oh sohte medewe me I pahn kak pioneer. Ni ahnsowo, ei pahpao, me kaidehn Sounkadehde men, oh rie ohl me tikitik sang ih, kin kangoange ie en kohla doadoahk nan kompani en insurance laud ehu nan Toronto. Rien ei pahpao ohlo ahneki pwukoa kesempwal ehu wasao, eri I pwungki kohla doadoahk wasao.

Nan Toronto, I kin doadoahngki pali laud en ei ahnsou ong doadoahk oh werekiong irail kan me kaidehn Sounkadehde kei, oh met kahrehda I sohla kin kaukaule towehda mihting kan oh iang kalohk. Nin tapio, I kin mi rehn ei pahpa kahlapo, me kaidehn emen Sounkadehde. Ahpw mwurin eh mehla, I anahne diarada wasa me ien mi ie.

I kin wiahki Brother oh Sister Hutcheson, me luke ie en iang mihting tohrohro nan pahr 1958, duwehte ei pahpa oh nohno. Ira luke ien mi ni imwarailo oh sewese ie en kakehlakahda ei nanpwungmwahu rehn Siohwa. Nan 1960, I iang neira pwutako, John, papidaisla. John tepida pioneer, oh met kangoange ie en kalaudehla ei doadoahk en kalohk. Brother kan nan mwomwohdisou kilang ei kekeirda, oh kedekedeo I idihdida ong pwukoahn sounsawas en Sukuhl ong Sapwellimen Koht Doadoahk. a

Nan 1966, I pwoudikihda Randi Berge, pioneer ngoang men me kin perenki papah ni wasa kan me anahn laud mie ong sounkalohk kan. At sounapwalih me kin seiloako kin nsenohkin kiht, oh kangoange sen kohla oh sewese mwomwohdiso en Orillia, me mi Ontario. Eri se mwadang keseula wasao.

Ni at lella Orillia, I iang Randi pioneer. Eh perenki doadoahko pil kahrehiong ie en pil perenki! Mwurin ei doadoahk laud pwehn wia pioneer mwahu men, I tepida perenkihla doadoahngki Paipel oh kilang aramas akan ar wehwehkihla. Ia uwen eh wia kapai kaselel ehu en sewese pwopwoud ehu nan Orillia en  wiahda wekidekla laud kan nan ara mour oh wiahla sapwellimen Siohwa ladu kei!

Erein at mwemweito nan Toronto, I tuhwong Arnold MacNamara, me wia emen brother ko me kin tiengla mwowe nan Pedel. E idek reht ma se men wiahla pioneer tohrohr kei. I mwadangete sapengki: “Uhdahn! Sohte lipilipil ia wasa, ahpw kaidehn Quebec!” I ahnekihda madamadau en aramas akan me kin lokaiahki lokaiahn wai nan Canada duwen wasa kan nan Quebec me aramas akan kin lokaiahki lokaiahn France. Ni ahnsou ko, aramas akan kin uhwong kopermento oh men Quebec en tohrohrasang Canada.

Arnold sapengki, “Quebec kelehpw me ohpis en Sounkadehdehn Siohwa kan kadakadarla pioneer tohrohr kan ni ahnsou wet.” I mwadangete pwungki sen kohla. I ese me Randi pahn perenki papah wasao. Mwuhr, I esehda me pilipil wet wia ehu pilipil me keieu mwahu nan at mour!

Mwurin at iang kasukuhl en lokaiahn France erein wihk limau, ngehi oh Randi oh pil ehu pwopwoud kohla Rimouski, me mi mwail 336 paliepeng en palimese en Montreal. Mie soahng tohto me se anahne sukuhlki, oh met sansalda nan ehu mihting ahnsou me I wadek pakair kei. I pakairki me nan mihting tohrohr me se pahn wiao, mie “mahn ostris” tohto pahn iang towehda, a kaidehn “mehn Austria tohto.”

Nan Rimouski, kiht meh pahmeno iang sister kiripw pahmen oh pil brother oh sister Huberdeaus oh neira serepein riemen. Brother oh sister Huberdeaus kin rend ihmw laud ehu oh pioneer koaros me kin iang kousoan wasao kin iang pwain rendo. Se kahdaneki ihmwo White House pwehki mwohn ihmwo pwetepwet oh uhr ko pil pwetepwet. Aramas 12 oh 14 me kin kalapw mi mwo. Nin duwen pioneer tohrohr kei, ngehi oh Randi kin kohla kalohk nimenseng, mwurin souwas, oh ni soutik kan, eri se uhdahn kalahnganki me mie emen me kin ahnsou koaros iang kiht kalohk—pil ni soutik kan me kopou.

Se uhdahn karanihala pioneer lelepek pwukat oh re wiahla peneinei kei ong kiht. Ekei pak se kin mwohdpene limwahn kisiniei ehu de mie rahn kan me kiht koaros kin kuk. Emen brother ko sounkoul men, eri nipwong en Rahn Kaunop kan se kin kalapw koul oh kahlek.

Me tohto nan Rimouski perenki sukuhlki Paipel! Erein sounpar limaute, se perenki kilang ekei tohnsukuhl en Paipel kan kekeirda oh papidaisla. Mwomwohdisou kekeirda oh mie sounkalohk 35.

Nan Quebec, se alehdi kaiahn uhdahn mwahu nin duwen sounkalohk kei. Se kilang ia duwen Siohwa eh kin ketin sewesei kiht nan doadoahk en kalohk oh apwalihala at anahn kan. Patehng met, se sukuhlki en poakohng irail kan me kin lokaiahki lokaiahn France, arail lokaiao, oh arail tiahk—me sewesei kiht en pil perenki tiahk teikan.—2 Kor. 6:13.

Ni at sohte kasik, ohpis en Sounkadehdehn Siohwa kan peki sen keseula ni kisin kahnimw ehu me adaneki Tracadie, me mi limwahn sehd en New Brunswick. Met wia kahpwal ehu pwehki se ahpwtehn sainihla contract en rendih apartment ehu oh I pil pahn wia sounpadahk men erein lepin ahnsou ong sukuhlo. Patehng met, ekei nait tohnsukuhl en Paipel kan ahpwtehn wiahla sounkalohk kei oh ni ahnsowo se pil wiewia Wasahn Kaudok ehu.

Se kapakapki ni imwin wihk koaros duwen keseu wet oh se mwemweitla Tracadie, me uhdahn weksang  Rimouski. Ahpw se koasoanehdi me pwehki Siohwa ketin kupwurki sen kohla wasao, se pahn kohla. Se song kilang duwen sapwellimen Siohwa sawas oh se kilang eh ketikihsang ehuehu mehn kerempwa kan. (Mal. 3:10) Pwehki Randi ahneki nanpwungmwahu keren rehn Siohwa, sohte kin roporop, oh perenki kamwan, at keseuo sohte apwal.

Elder emente nan at mwomwohdiso kapwo oh ede Robert Ross. Ih oh eh pwoudo Linda wia pioneer kei wasao, oh ira pilada en mi mwo mwurin neira tepin serio ipwidi. Mendahki ira kin apwalih neira kisin pwutako, ira kin uhdahn kangoangei kiht pwehki ira kin kasamwo kiht oh ngoangki doadoahk en kalohk.

Mwurin at wia pioneer kei sounpar riau nan Tracadie, se pwurehng alehdi mehkot me se sohte kasik—luhk en papah nin duwen sounapwalih me kin seiloak. Se papah nan mwomwohdiso kan me kin doadoahngki lokaiahn wai erein sounpar isuh, mwuhr se pwurehng pwurala wasa kan me kin doadoahngki lokaiahn France nan Quebec. At sounapwalih en seiloak (district overseer) nan Quebec, Léonce Crépeault, kin kapinga ei padahk kan. Ahpw mwuhr e kin ahnsou koaros idek, “Ia duwen omw kin wiahiong omw padahk kan en mwahu ong amwail wasahn kalohk?” b Pwehki eh nsenohkin ie, met sewese ien wiahiong ei padahk ko en mengei pwe meteikan en wehwehki.

Ehu pwukoa me I pahn ahnsou koaros tamataman iei me I ahneki nan 1978 nan Mihting Tohrohro “Victorious Faith” me wiawi nan Montreal. I iang doadoahk nan pelien mwenge. Se kasik me aramas 80,000 pahn iang towehda, oh mwomwen at pahn kamwenge irail weksang dahme se kin wia mahso. Soahng koaros wekila: kepwehn doadoahk kan, mwenge me se pahn wiahda, oh mwomwen at pahn kaunopada. Mie aispwoaks lapala 20, ahpw ekei sohte kin doadoahk. Mwohn at tepida ni tepin rahno, se sohte kak pedolong nan wasahn kapokono pwehn kaunopada lao lukepen pwong pwehki mie mwadong laud ehu me wiawi mwohn mwo. Oh se anahne kamourada sidohp laud kan mwohn ketipino dakada pwe sen wiahda mwengehn menseng. Se pwangada, ahpw I sukuhlki soahng tohto duwen doadoahk laud, koahiek en iengei tohndoadoahk ko, oh arail kin perenki kamwan. Se wiahte kompoakepah mwahu kei leledo rahnwet. Ia uwen kesempwal en iang towehda mihting tohrohr kesempwal  wet nan Quebec, nan wasahute me kalokolok laud wiawi nanpwungen pahr 1940 oh 1950!

I sukuhlki soahng tohto sang iengei sounapwalih kan erein mihting tohrohro nan Montreal. Ehu pahr, David Splane, me met wia emen tohn Pwihn me Kin Apwalih Mwomwohdiso nan Sampah Pwon iei me apwalih mihting tohrohro. Ni mihting tohrohr ehu, ngehi me uhd apwalih pwukoau, David uhdahn sewese ie.

Ni 2011, mwurin at wiahier doadoahk en sounapwalih me kin seiloak erein sounpar 36, I alehdi luhk en papah nin duwen sounpadahk men ong sukuhl en Elder kan. Erein sounpar riau, ngehi oh Randi kin meir pohn peht 75, ahpw se perenki wia soangen tounmetei wet. Ni imwin ehuehu wihk ko, elder ko uhdahn kalahnganki pwehki re pehm me Pwihn me Kin Apwalih Mwomwohdiso nan Sampah Pwon uhdahn nsenohki arail nanpwungmwahu rehn Siohwa. 

Mwuhr, I kasukuhlih Sukuhl ong Sounkalohki Wehio kan. Tohnsukuhl ko kin uhdahn pwangada oh pwunod pwehki erein awa isuh irail kin mwomwohd nan peren sukuhlo, erein awa siluh koaros ni soutik re kin wia arail homework, oh kaunopada arail padahk pahieu de limau nan wihk koaros. Ngehi oh sounpadahk teiko kin kawehwehiong irail me re sohte kak wia met ma sohte sawas sang rehn Siohwa. I pahn tamatamante ia uwen tohnsukuhl ko ar pwuriamweikihla ar kilang me sang ni arail kin likih Siohwa, irail kak kapwaiada laudsang dahme re medewe.

Ei nohnou eh kin nsenohki meteikan sewese nah tohnsukuhl en Paipel kan en kekeirda oh pil sewese pahpa en wekidala eh madamadau ong padahk mehlel. Rahn siluh mwurin nohno mehla, se pwuriamweikihla pahpa kohdo ni Wasahn Kaudoko oh rong kapahrek en wehipokon, oh e pousehlahte towehda mihting kan erein sounpar 26 mwuri. Mendahki Pahpa sohte papidaisla, elder ko padahkihong ie me ih me kin ahnsou koaros tepin lella ni mihting kan ni ehuehu wihk.

Ei nohnou wia mehn kahlemeng mwahu ong ie oh riei serepein ko. Riei serepein silimen ko koaros oh arail pwoud ko kin papah Siohwa ni lelepek. Riei serepein riemen kin papah ni ohpis en Sounkadehdehn Siohwa kan—emen nan Portugal oh emen nan Haiti.

Met ngehi oh Randi kin papah nin duwen pioneer tohrohr kei nan Hamilton, Ontario. Ni ahnsou me se kin wia doadoahk en sounapwalih me kin seiloak, se perenki iang meteikan pwurala rehn irail me perenki rong oh rehn arail onop en Paipel kan. Ahpw met se perenki kilang nait tohnsukuhl en Paipel kan ar poakohngala Siohwa. Oh ni at kompoakepahnkihla riat Kristian kan nan mwomwohdiso kapwo, se kin kilang ia duwen Siohwa eh ketin sewese irail ni ahnsou mwahu oh apwal kan, oh met kin kangoangei kiht.

Se uhdahn kalahnganki me tohto ar kasalehda ar nsenohkin kiht. Pwehki met, se kin song en kasalehda at ‘uhdahn nsenohki’ meteikan, oh kangoange irail en papah Siohwa ni uwen arail kak koaros. (2 Kor. 7:6, 7) Karasepe, nan peneinei ehu, lih pwopwoudo, nah pwutako, oh serepeino kin kihong pali laud en arail ahnsou en papah Koht. I idek rehn ohl pwopwoudo ma mie pak e medewe en iang pioneer. E sapengki me e kin apwahpwalih pioneer silimen. Eri I idek reh, “Ke kak apwalih irail mwahusang Siohwa eh kak ketin apwalih irail?” I kangoange en perenki dahme re perenki wiewia. Mwurin sounpwong weneu, e wiahla pioneer men.

Ngehi oh Randi pahn pousehlahte “kalohki . . . , ong dih en mwuhr kan” duwen sapwellimen Siohwa “wiewia kapwuriamwei kan,” oh se koapworopworki me re pahn perenki papah Siohwa duwehte kiht.—Mel. 71:17, 18.