IREN ONOP 30
Omw Limpoak en Pousehlahte Kekeirda
“Kitail anahne . . . kasalehda limpoak, kitail ahpw pahn kak kekeirda ni mehkoaros.”—EP. 4:15.
KOUL 2 Siohwa Iei Mwaromwi
AUDEPEN ONOP a
1. Padahk mehlel dah kan me ke sukuhlki ni ahnsou me ke tepida onopki Paipel?
KE TAMAN ahnsou me ke tepida onopki Paipel? Ele ke pwuriamweikihla omw esehda me mie mwaren Koht. Mwein ke nsenamwahula ni omw diarada me Koht sohte kin ketin kaloke aramas akan nan kisiniei. Oh mwein ke pil perenkihda duwen koapworopwor en pwurehng kilang irail kan me ke poakohng me mehla oh iang irail mi nan paradais ehu nin sampah.
2. Patehng omw sukuhlki padahk mehlel en Paipel kan, soahng mwahu dah kan me ke wiadahr? (Episos 5:1, 2)
2 Ni omw kalaudehla omw onopki Mahsen en Koht, omw limpoak ong Siohwa pil laudla. Limpoak wet kamwakid uhk en kapwaiada dahme ke sukuhlki. Ke kin wiahda pilipil mwahu kan me poahsoankihda kaweid kan en Paipel. Ke kamwahwihala omw madamadau oh tiahk kan pwehki ke men kaperenda Koht. Duwehte seri men me kin alasang eh pahpa nohno, ke kin kahlemengih Semomwo nanleng.—Wadek Episos 5:1, 2.
3. Peidek dah kan me kitail ele kak pein idek rehtail?
3 Kitail kak pein idek rehtail: ‘Ia duwe, ei limpoak ong Siohwa ahnsou wet kehlailsang ni ahnsou me I tepin wiahla Kristian? Mwurin ei papidaisla, ei kin kahlemengih Siohwa laudla, ahpw mehlel ni ei kin kasalehda limpoak ong riei Kristian kan?’ Ma “limpoak me ke ahneki mahso” ele tikitikla, dehr mworus. Ih met me pil wiawihong tepin Kristian ko. Sises sohte ketin soikirailla, oh e pil sohte pahn ketin soikkitailla. (Kaud. 2:4, 7) E mwahngih me kitail kak sukuhlki en pwurehng ahneki soangen limpoakohte me kitail ahneki ni tepin atail sukuhlki padahk mehlel.
4. Dahme kitail pahn koasoiapene nan iren onop wet?
4 Iren onop wet pahn koasoia ia duwen atail poakohng Siohwa oh meteikan eh kak pousehlahte kekeirda. Kitail eri pahn kilang ekei kapai kan me kitail oh meteikan kin paiekihda ni atail kin kakehlaka atail limpoak.
OMW POAKOHNG SIOHWA EN KEKEIRDA
5-6. Kahpwal dah kan me wahnpoaron Pohl lelohng erein eh kalohk, ahpw dahme kamwakid ih en pousehlahte papah Siohwa?
5 Wahnpoaron Pohl kin perenki eh papah Siohwa, ahpw met sohte kin mengei ahnsou koaros. Pohl kin kalapw seiloakla wasa doh, oh en seiloakseli soangen ahnsou ko kin apwal. Ni eh kin seiloak, ekei pak Pohl kin lelohng “kahpwal sang nan pillap kan” oh “kahpwal sang lipirap akan.” Pil mie ahnsou kan me eh imwintihti kan kin keme ih. (2 Kor. 11:23-27) Oh rie Kristian kan sohte kin ahnsou koaros kalahnganki soahng kan me e wiahda pwehn sewese irail.—2 Kor. 10:10; Pil. 4:15.
6 Dahme sewese Pohl en pousehlahte papah Siohwa? Pohl sukuhlki laud duwen sapwellimen Siohwa irair kaselel kan sang nan Paipel oh sang dahme pein ih kin lelohng. Pohl eri kamehlelehla me Siohwa Koht ketin poakohng ih. (Rom 8:38, 39; Ep. 2:4, 5) Oh e pil uhdahn poakohngala Siohwa. Pohl kasalehda eh limpoak ong Siohwa ‘sang ni eh kin papah aramas sarawi kan.’—Ipru 6:10.
7. Ia ehu ahl me atail poakohng Siohwa kak wie kekeirda?
7 Atail poakohng Koht kak wie kekeirda sang ni atail kin pwerisekiong onopki sapwellime Mahsen. Ni omw kin wadek Paipel, song en wehwehki dahme ehuehu ire ko kasalehda duwen Siohwa. Pein idek rehmw: ‘Ia duwen ire wet eh kasalehda me Siohwa kin ketin poakohng ie? Kahrepe dah kan me met kihong ie pwehn poakohng Siohwa?’
8. Ia duwen kapakap eh kak sewese atail poakohng Koht en kekeirda?
8 Pil ehu ahl me atail poakohng Siohwa kak kekeirda iei sang ni atail kin kaukaule kapakap ong ih sang mohngiongitail. (Mel. 25:4, 5) Siohwa eri pahn ketin sapengala atail kapakap kan. (1 Sohn 3:21, 22) Khanh, emen sister sang Eisia, koasoia: “Nin tapio, I kin poakohng Siohwa pwehki soahng kan me I sukuhlki duwen ih. Ahpw ni ei kilang eh kin ketin sapengala ei kapakap kan, ei poakohng ih kin laudla. Met kahrehiong ie en men wia soahng kan me kin kaperenda ih.” b
OMW POAKOHNG METEIKAN EN WIE KEKEIRDA
9. Ia duwen Timoty eh kasalehda me eh poakohng rie Kristian kan kin wie kekeirda?
9 Sounpar kei mwurin eh papidaisla, Pohl tuhwong mwahnakapw mwahu men me adaneki Timoty. Timoty kin poakohng Siohwa oh pil aramas akan. Pohl padahkihong mehn Pilipai ko: “Sohte emen me mi rehi me duwehte [Timoty] me uhdahn pahn nsenohkin kumwail.” (Pil. 2:20) Pohl sohte koasoakoasoia duwen koahiek me Timoty ahneki nin duwen emen me kin koasoanehdi soahng kan de wia padahk, ahpw Pohl kak kilang me Timoty uhdahn poakohng rie Kristian kan. Ihme kahrehda mwomwohdiso kan me Timoty kin papah kin kasikasik eh kin mwemweitla rehrail.—1 Kor. 4:17.
10. Ia duwen Anna oh eh pwoudo ara kasalehda ara poakohng riara Kristian kan?
10 Kitail pil kin rapahki elen sewese riatail Kristian kan. (Ipru 13:16) Medewehla dahme wiawihong Anna me kitail koasoiapene nan iren onop en mwoweo. Mwurin melimel laud ehu, ih oh eh pwoudo mwemweitla rehn peneinei ehu me wia Sounkadehde kei, oh ira esehda me melimelo kauwehla kadoken imwarailo. Pwehki met, ahn peneineio likou ko koaros pwelipwel. Anna koasoia: “Se ale arail likou ko, lopworada, ainihda, limpene, oh kapwurehla rehrail. Met sohte apwal ong kiht, ahpw pwehki se wia met, se uhdahn wiahla kompoakparail mwahu kei lao lel met.” Ara limpoak ong riera Kristian kan kamwakid ira en kihda sawas mwahu.—1 Sohn 3:17, 18.
11. (a) Dahme meteikan kin medewe ni atail kasalehda limpoak ong irail? (b) Nin duwen me Lepin Padahk 19:17 mahsanih, dahme Siohwa kin ketin wia ni atail kasalehda limpoak?
11 Ni atail kin kadek oh kasalehda limpoak ong meteikan, irail kak kilang me kitail kin songosong en kahlemengih Siohwa. Oh ele re pahn kalahnganki atail kadek laudsang me kitail ese. Khanh, me kitail koasoiapene mwoweo, kin taman irail kan me sewese ih. E koasoia: “I uhdahn kalahnganki riei sister kan koaros me kin wa ie kohla kalohk. Irail kin pwekiehda, luke ie en iang irail kohla mwenge, oh kapwureiehla ni imweio. Met I esehda me e wia doadoahk laud ehu ong irail. Oh re wia met ni limpoak.” Ei mehlel, kaidehn koaros pahn kalahnganki dahme kitail wiahiong irail. Khanh ndahki irail kan me sewese ih: “I uhdahn men kapwungohng irail soangen wiewia kadek tohto me irail wiahiong ie, ahpw I sehse ia wasa irail kin mi ie. Siohwa ketin mwahngih, oh I kapakapki me e pahn ketin welianiehdi oh kapwungohng irail.” E pwung dahme Khanh nda. Siohwa kin ketin tehk wiewiahn kadek koaros me kitail kin wiahiong meteikan, mehnda ma pil tikitik. E kin ketin wiahki met meirong kesempwal ehu oh pweipwand ehu me e pahn ketin kapwungala.—Wadek Lepin Padahk 19:17.
Ni emen eh kin kekeirda, e kin rapahki ahl akan en sewese meteikan (Menlau kilang parakrap 12)
12. Ia duwen brother kan ar kak kasalehda arail poakohng mwomwohdiso? (Pil kilang kilel kan.)
12 Ma kowe brother men, ia duwen omw kak kasalehda omw poakohng meteikan oh wia soahng kan pwehn sewese irail? Brother pwulopwul men me adaneki Jordan idek rehn emen elder ia duwen eh kak kalaudehla eh sewese mwomwohdiso. Eldero kapingahki eh kekeirda nan soahng kan me e wiahda, oh eri kihong ekei kaweid ong ia duwen eh kak kalaudehla. Karasepe, e kaweidki me Jordan en kin mwadangala ni Wasahn Kaudok oh kasamwo meteikan, pasapeng nan mihting kan, kaukaule iang eh pwihnen kalohk, oh rapahki ahl mwahu kan en sewese meteikan. Ni Jordan eh wia met, e sohte esehlahte en wia soahng kan, ahpw e pil esehla en kalaudehla eh poakohng rie Kristian kan. Jordan esehda me ni brother men eh wiahla sounsawas men, e sohte kin tepida sewese meteikan; ahpw e kin pousehlahte sewese irail.—1 Tim. 3:8-10, 13.
13. Ia duwen limpoak eh kamwakid brother men me adaneki Christian en kak pwurehng papah nin duwen elder men?
13 Ia duwen ma ke kin wia sounsawas de elder men mahso? Siohwa kin ketin tamataman doadoahk me ke wia mahso oh duwen limpoak me kamwakid uhk en wia met. (1 Kor. 15:58) E pil kin ketin tehk limpoak me ke kin pousehlahte kasalehda. Brother men me adaneki Christian mworuskihla eh sohla wia emen elder. Ahpw e koasoia: “I koasoanehdi en wia uwen ei kak koaros en papah Siohwa pwehki I poakohng ih, mehnda ma I wia elder men de soh.” Kedekedeo, e pwurehng idihdida nin duwen elder men. Christian koasoia: “I ekis saloh en pwurehng papah. Ahpw I koasoanehdi me ma Siohwa, pwehki sapwellime kalahngan, ketin mweidohng ie en pwurehng papah nin duwen elder men, I pahn wia met pwehki ei poakohng ih oh riei Kristian kan.”
14. Dahme ke sukuhlkihsang dahme sister men sang Georgia koasoia?
14 Sapwellimen Siohwa ladu kan pil kin kasalehda arail limpoak ong mehn mparail kan. (Mad. 22:37-39) Karasepe, Elena, sister men sang sapwen Georgia, koasoia: “Nin tapio, ihte me kin kamwakid ie en kalohk iei ei poakohng Siohwa. Ahpw ni ei poakohng Semeio nanleng eh laudla, ei poakohng aramas pil laudla. I kin song en medewehla duwen kahpwal kan me irail kin lelohng oh dahme irail pahn men koasoia. Ni ei kin medewe duwen irail ni ahl wet, met kin kalaudehla ei men sewese irail.”—Rom 10:13-15.
KAPAI KAN ME KOHSANG ATAIL KASALEHDA ATAIL POAKOHNG METEIKAN
Ehute mwekid en limpoak kak kahrehda me tohto teikan en paiekihda (Menlau kilang parakrap 15-16)
15-16. Nin duwen me kilel kan kasalehda, soangen kapai dah kan me kohsang atail kin kasalehda atail poakohng meteikan?
15 Ni atail kasalehda atail poakohng riatail Kristian kan, kaidehn irailte me kin paiekihda. Mwurin soumwahu lusuluso COVID-19 eh tepida, brother men me adaneki Paolo oh eh pwoudo sewese sister mah tohto en esehla doadoahngki neirail sehlpwohn de tablet ape nan kalohk. Emen sister ko me nin tapio apwalki doadoahngki, kedekedeo esehla. Ih eri doadoahngki pwehn luke kiseh kan ong Katamano. Kiseh meh 60 iang towehda Katamano nan videoconference! Sistero oh kiseh ko koaros paiekihda ahn Paolo oh eh pwoudo ara nanti laud. Mwuhr, sistero ntinglahng Paolo koasoia: “Kalahnganki omw padahki kiht me mah kan. I sohte pahn manokehla ia uwen Siohwa eh kin ketin nsenohkin kiht, oh ia uwen omw doadoahk laud pwehn sewese kiht.”
16 Dahme kin wiawihong riatail kan me duwehte met padahkihong Paolo mehn kasukuhl kesempwal ehu. E katamankihong ih me limpoak kin kesempwal sang loalokong de koahiek. E koasoia: “Mahso I wia emen sounapwalih me kin seiloak. Rahnwet, I wehwehkidahr me mehnda ma riei Kristian kan ele manokehla ei padahk kan, irail kin tamatamante soahng kan me I wiahiong irail.”
17. Ihs me pahn pil paiekihda ni atail kasalehda limpoak?
17 Ni atail kin kasalehda atail poakohng meteikan, pein kitail kin paiekihda ni ahl me kitail sohte kasik. Jonathan, me kin kousoan New Zealand, kasalehda mehlelpen met. Mwurin souwas en Rahn Kaunop ehu, e kilangada pioneer men me kelehpw kalokalohk. Rahno uhdahn karakar. Jonathan eri koasoanehdi en iang pioneero kalohk mwurin souwas en Rahn Kaunop kan. E sohte ese ahnsowo ia uwen laud me pein ih pahn paiekihda wiewiahn kadek wet. Jonathan koasoia: “Ni ahnsou ko, I sohte kin perenki kalohk. Ahpw ni ei kin rongorong mwomwen pioneero eh kin padahk oh kilang eh kin pweida mwahu nan kalohk, I tepida perenki kalohk. Brothero pil wiahla kompoakepahi keren men oh sewese ie en kekeirda, perenkihla kalohk, oh kalaudehla ei karanihala Siohwa.”
18. Dahme Siohwa ketin kupwurki kitail en wia?
18 Siohwa ketin kupwurki me kitail koaros en kalaudehla atail poakohng ih oh meteikan. Nin duwen me kitail sukuhlkiher, kitail kak kakehlakahla atail poakohng Siohwa sang ni atail kin wadek sapwellime Mahsen oh doudouloale, oh sang ni atail kin kaukaule kapakap ong ih. Kitail kak kalaudehla atail poakohng riatail kan sang ni atail kin sewese irail ni ahl me konehng arail irairo. Ni atail limpoak eh lalaudla, met pahn kalaudehla atail karanihala Siohwa oh riatail kan. Oh kitail pahn perenki kompoakepahnki irail kohkohlahte!
KOUL 109 Limpoak Laud Sang Mohngiongitail
a Sohte lipilipil ma kitail kapw nan padahk mehlel de papahkier Siohwa erein sounpar tohto, kitail koaros kak pousehlahte kekeirda. Nan iren onop wet, kitail pahn sukuhlki ia duwen atail kak wia met. Met iei sang ni atail kin kalaudehla atail poakohng Siohwa oh meteikan. Ni omw doudouloale iren onop wet, medewehla mwomwen omw kekeirdahr oh ia duwen omw kak pousehlahte kekeirda.
b Ekei ahd kan me pwarada wasaht kaidehn uhdahn adarail.