SIOHWA KOHT ketin kangoange Kristian kan en kesempwalki popohl oh wiahki popohl mehkot kesempwal nan mour. Kahrepen atail ahneki popohl iei pwehki tohnkaudok mehlel kan kin ahneki popohl me uhdahn laud. Met kin kahrehda meteikan me men ahneki meleilei en men esehla mwomwohdisohn Kristian.

Karasepe, sounwunahni ndand men nan Madagascar kin tehk duwen popohl me Sounkadehdehn Siohwa kan ahneki. E pein ndaiong ih, ‘Ma I men iangala ehu pelien lamalam, pelien lamalam wet me I pahn iang.’ Kedekedeo, e uhdihsang eh tiahk en wunahni, oh erein sounpwong kei e kapwungala eh mouren pwopwoud pwehn pahrekiong padahk en Paipel, oh wiahla tohnkaudok en Siohwa, Koht en popohl.

Duwehte ohl menet, sounpar koaros aramas kid kid kei kin diarada nan mwomwohdisohn Kristian soangen popohl me re uhdahn men ahneki. Ahpw, Paipel kasalehda ni sansal me “peirin, akatat, oh mehwo” nan mwomwohdiso kak kauwehla nanpwungmwahu oh kahrehda kahpwal. (Seims 3:14-16) Ahpw Paipel pil kihong kitail kaweid mwahu ong ia duwen atail kak soikala kahpwal kan oh kalaudehla popohl. Pwe kitail en wia met, kitail tehkpene dahme wiawihong ekei aramas.

“I kin apwalki ehuong emen brother me kin iang ie doadoahk. Ehu pak, se akamaida ni ngihl laud oh aramas riemen pedolong oh kilang at akamaio.”​—CHRIS.

“Sister men me I kin kalapw iang kalohk uhdahte kauhdi at koasoandi en kalohk. Mwuhr e pil sohla koasoiong ie. I sohte ese dahme kahrehda.”​—JANET.

“I koasoakoasoiong aramas riemen nan delepwohn. Emeno rahnmwahwihala kiht, oh I medewe me e pwilikidier nah delepwohno. Ngehi eri tepida nda soahng suwed kan duwen ih ong meteio, ahpw I sohte ese me e sohte pwilikihdi nah delepwohno.”​—MICHAEL.

“Nan at mwomwohdiso, pioneer riemen tepida ahneki kahpwal. Emen kin lipwoare meteio. Ara akamai kan kin kaluwetehla meteikan.”​—GARY.

Ele ke medewe me kahpwal pwukat mwomwen tikitik. Ahpw, ehuehu kahpwal pwukat kak kauwehla pepehm en irail kan me pidada oh pil arail nanpwungmwahu rehn Siohwa. Ke pahn perenki ese me riatail pwukat pwurehng ahneki popohl pwehki re doadoahngki Paipel en kaweid irail. Ia duwe, mehnia kaweid en Paipel me ke medewe re doadoahngki oh pweida?

“Kaleke kumwail akahkamai kohwei nanialo.” (Sen. 45:24) Sosep me kihong kaweid wet rehn rie pwutak ko me pahn pwurala rehn arail pahpao. Ia uwen erpit en eh kaweido! Ni aramas emen eh sohte kaunda eh pepehm oh kin  mwadang lingeringerda, ele e kak kahrehiong meteikan en pil lingeringerda. Chris esehda me eh luweto iei aklapalap oh sohte men ale kaweid. Pwehki e men wekila, e pekmahk ong brothero me e akamai ong oh nantihong laud en kaunda eh lingeringer. Ni ienge tohndoadoahko eh kilang ahn Chris nantihong en wekila, e pil wiahda wekidekla kan. Met ira kin perenki ehupene papah Siohwa.

“Ale kaweid koaros uwen me ke kak, . . . pwe ma soh, ke pahn pwupwudi.” (Lep. Pad. 15:22) Janet esehda me e anahne kapwaiada kaweid mehlel wet. E pilada en koasoiong sistero. Erein ara koasoakoasoi, Janet ni kadek mweidohng sistero en kasalehda kahrepen eh nsensuwedo. Ira tepte sohte soanamwahu ni ara koasoipene, ahpw e mwahula ni ara koasoiapene ara kahpwalo ni meleilei. Sistero esehda me e sohte uhdahn wehwehki irair ehu me pil sohte pidada Janet. E pekmahk, oh met ira pil pwurehng ehupene papah Siohwa.

“Eri, ni omw pahn wiahiong Koht omw meirong pohn pei sarawi ehu, ke ahpw tamanda me riomw mehn Suhs men nsensuwed pahmw, pwilikihdi mahs omw meirongo mwohn pei sarawio, ke ahpw kohwei oh kapwungala nanpwungamwa.” (Mad. 5:23, 24) Ele ke taman kaweid me Sises ketikihda ni Kapahrek en Pohn Dohl. Michael uhdahn nsensuwedla ni eh esehda uwen eh sehse lamalam oh sohte kadek. E koasoanehdi teng en nantihong wiahda popohl. Ni aktikitik e pekmahk ong brothero me e kamedekihala. Ia imwilahn met? Michael nda: “Riei brothero uhdahn mahkohng ie.” Ara nanpwungmwahu pwurehng mwahula.

“Kumwail en sawaspene oh mahkpene nanpwungamwail, ni emen rehmwail eh pahn kin kaulime emen.” (Kol. 3:12-14) Me pid meh riemeno me wereila nan doadoahk en pioneer, elder kadek men sewese ira en medemedewe peidek pwukat: ‘Ia duwe, mie ata pwuhng en kansensuwedihada meteikan pwehki ata sawehwepene? Mie kahrepe mwahu ehu kita en dehr kanengamahiong emenemen oh pousehlahte papah Siohwa ni meleilei?’ Ira pwungki ahn eldero kaweid oh kapwaiada. Met ira kin nanpwungmwahupene ni ara kin kalohki rongamwahwo.

Omw doadoahngki kaweid en Paipel me ntingdi poweo, Kolose 3:12-14, ele pahn kak seweseiuk ma emen kamedekeiukala. Me tohto diarada me ni aktikitik, irail kak kasalehda mahk oh manokehla. Ma mwurin emen eh nantihong wia met ahpw e anahnehte sawas, ia duwe, e kak kapwaiada kaweid nan Madiu 18:15? Sapwellimen Sises kaweid wasaht kin dokedoke dahme emen en wia ni emen tohrohr eh wiahda dihp laud ehu ong emen. Eri nin duwen kaweid, ele met iei kahk me ke anahne wia.  Ke kak tuhwong riomw brother oh sister kan oh ni kadek oh aktikitik song en koasoiapene ireo oh nantihong kamwahwihala.

Mehlel, Paipel pil kihda kaweid kesempwal teikan. Ke kak kilang ire mehlel tohto pwukat ni omw kasalehda “wahn sapwellimen Koht manaman . . . limpoak, peren, popohl, kanengamah, kadek, kamwahu, pwoson, opampap, kaunda pein kitail.” (Kal. 5:22, 23, NW) Duwehte oil eh kin kahrehiong misihn en tangamwahu, wahn sapwellimen Koht manaman kak kahrehda ken ahneki popohl rehn emen.

Pein atail irair kaselel kan​—iei soangen irair kan me emenemen kitail ahneki oh me weksang ahn meteio​—kak kahrehiong kitail en ahneki kompoakepah mwahu kan. Wekpeseng en atail irair kan pil kak kahrehda nanpwung suwed. Emen elder koahiek kihda karasaras wet: “Emen me namenek kak apwalki mi rehn emen me kin perenki koasoi oh ahn aramas. Wekpeseng wet ele sohte mwomwen kesempwal, ahpw, e kak kahrehda kahpwal laud kan.” Ia omw madamadau, aramas akan me arail irair weksang meteikan kin ahneki kahpwal kan? Eri kitail pahn tehk duwen wahnpoaron riemen. Soangen aramas dahmen Piter? Ele ke medewe me ih emen me kin perenki koasoi oh kin kalapw pwurur. A ia duwen Sohn? Ele kitail medewe me e wia aramas men me ahneki limpoak oh e kin kanahieng dahme e nda oh wia. Ele mie kahrepe kan en ahneki soangen madamadau wet duwen wahnpoaron riemeno. E sansal me ira ahneki irair me wekpeseng. Ahpw, ira kin doadoahkpenehte. (Wiewia 8:14; Kal. 2:9) Eri, mendahki Kristian kan ahneki irair me wekpeseng, irail kin kak doadoahkpene rahnwet.

Ele mie brother men nan omw mwomwohdiso me eh lokaia kan oh wiewia kan kin kalingeringerihukada. Ahpw ke pohnese me Krais pil pwoukihla aramas menet oh ke anahne kasalehda limpoak. (Sohn 13:34, 35; Rom 5:6-8)  Pwe ken dehr sohla wia kompoakepah de song en soikala ih, ke sou pein idek rehmw: ‘Ia duwe, riei Kristian menet kin wiahiong ie mehkot me ni sansal uhwong Paipel? E kin wia mehkot ni elen mwersuwed pwehn kahrehiong ie en soansuwed? De se ahneki irair ehu me wekpeseng?’ Pil mie peidek kesempwal ehu: ‘Mehnia nanpwungen irair kaselel kan me e ahneki me I kak paiekihda?’

Karasepe, ma aramas emen perenki koasoi ahpw ke nennen, kumwa sou doadoahkpene nan kalohk oh kilang dahme kumwa kak sukuhlkihsang emenemen? De ia duwen ma e kin kasalehda kadek laudsang uhk? Ke kin kilang peren me kohsang kisikise me mah, me soumwahu, de me semwehmwe kan? Ia duwe, ke kak sukuhlkihsang aramaso ia duwen omw pahn kalaudehla kasalehda kadek? Ire kesempwalo iei mendahki kowe oh riomw Kristiano wekpeseng, ke kak kilang irair kaselel kan me e ahneki. Mehnda ma kumwa sohte uhdahn wiahla kompoakepah kei me keieu mwahu, kumwa kak karanihala emenemen. Met kak sewese kakairada popohl ong uhk oh pil nan mwomwohdiso.

Ni mwehin tepin Kristian ko, mie sister riemen me adaneki Iuodia oh Sindiki. Ira uhdahn wekpeseng, ahpw wahnpoaron Pohl kangoange ira en ‘miniminpene nanpwungara duwehte pirien ehu rehn Kaun-o.’ (Pil. 4:2) Kitail pil men ehupene iang riatail Kristian kan kaudokiong Siohwa oh kalaudehla popohl nan mwomwohdiso.

Dahme kahrehda kitail anahne kihsang pepehm suwed me kitail ahneki ong meteikan? Kitail kak karasahiong pepehm pwukat duwehte dihpw suwed kan me kin wosada nan mwetuwel en rohs kaselel ehu. Ma kitail sohte kihsang dihpw suwed ko, re pahn wosada oh kadirehla nan mwetuwelo pwon. Pil duwehte met, ma atail pepehm sapwung kan ong meteikan laudla, met kin kak kamwakid mwomwohdiso pwon. Ahpw ma kitail poakohng Siohwa oh riatail  Kristian kan, kitail pahn wia soahng koaros me kitail kak pwehn pere popohl nan mwomwohdiso.

Ni atail kin song en wiahda popohl rehn meteikan, ele kitail pahn pwuriamweikihla eh imwila mwahu. Emen Sounkadehde me lelohng met nda: “I pehm me emen sister kin wiahki me ngehi kisin seri. I kin pwunodki met. Ei kalidorki ih laudla, eri I tepida sapeng ih ni ngihl lemei. I medewe, ‘E sohte kin waunekin ie nin duwen me warohng ie, eri I sohte pahn wauneki ih.’”

Eri sister menet medewehla duwen pein ih. “I tepida kilang ei irair en soh unsek kan oh uhdahn nsensuwedkihla pein ngehi. I tehkada me I anahne wekidala ei madamadau. Mwurin ei kapakapkihong Siohwa duwen ire wet, I pwainda kisin kisakis ehu ong sistero oh ntingihada kisinlikou ehu pwehn pek mahk ong ih pwehki ei mwomwen sohte kadek ong ih. Se pwoalehdi emenemen oh pwungkihda sen manokehla dahme wiawi. Met solahr kahpwal nanpwungat.”

Koaros anahne popohl. Ahpw pepehm en sohte koapworopworki pein irail de aklapalap kak kahrehiong aramas en mwekid ni ahl ehu me sohte kin kasalehda popohl. Nan sampah, met kin kalapw wiawi, ahpw Siohwa ketin kasik me sapwellime tohnkaudok kan en weksang sampah wet. Sounkadehdehn Siohwa kan anahne ahneki popohl oh minimin nanpwungarail. Siohwa ketin doadoahngki Pohl en ntingwohng Kristian kan ren ‘weweidki nan arail mour soangen ahl me Koht ketin kilelehiong irail ni eh ketin malipeirailo.’ Pohl kangoange irail en wia met ni ‘mpahi, meleilei oh kanengamah. Ren kasalehda nanpwungarail arail limpoak ni arail sohte pahn idingki meteikan en wia soangen mour me irail kin pwungki de men wia. Ren wia uwen me irail kak pwe irail en kin dadaurete minimin’ oh ‘popohl me kin kolokolirailpene.’ (Ep. 4:1-3) ‘Popohl me kin kolokolirailpene’ me sapwellimen Siohwa aramas akan ahneki uhdahn kesempwal. Eri emenemen kitail en wia uwen atail kak koaros pwehn kakehlakahda oh kamwahwihala kahpwal kan me kitail ahneki rehn riatail Kristian kan.