1-2. Nin duwen me Melkahka 25:14 mahsanih, dahme kitail anahne wia ma kitail men ahnekihte nanpwungmwahu keren rehn Siohwa?

 IRAIR dah kan me ke leme kesempwal ma ke men kolokol omw nanpwungmwahu rehn emen? Ele ke pahn nda me kompoakepah mwahu kan anahne limpoakpene de sewese emenemen. Ele ke pahn medewe me pepehm en masak de lemmwiki sohte kesempwal pwehn wia kompoakepah mwahu men. Ahpw, nin duwen me iren Paipel me iren onop wet poahsoankihda koasoia, irail kan me men ahneki nanpwungmwahu rehn Siohwa anahne “peikiong” de lemmwiki ih.—Wadek Melkahka 25:14.

² Sohte lipilipil ia uwen werei me kitail papahki Siohwa, kitail koaros uhdahn anahne lemmwiki ih. Ahpw, ia wehwehn en lemmwiki Koht? Ia duwen atail kak sukuhlki en lemmwiki Siohwa? Oh dahme kitail kak sukuhlki duwen en lemmwiki Koht sang sounapwaliho Opadaia, Samworo Lapalapo Sehoiada oh Nanmwarki Sohas?

3. Menlau kawehwehda ia duwen masak eh kak pere kitail?

³ Ele kitail kin masak ma kitail kamehlele me kitail pahn lelohng soangen kahpwal ehu. Soangen pepehm en masak wet kak wia mehkot mwahu, pwehki e kak sewese kitail en wiahda pilipil mwahu kan. Pepehm en masak kak kauhkitaildihsang en aluhla ni keilen wasa ileile ehu pwe kitail de pwupwudi. Masak pil kin kahrehiong kitail en soikala irair keper ehu pwe kitail en dehr medekla de ohla. Atail masak en kauwehla nanpwungmwahu me kitail ahneki rehn emen me kitail poakohng kin kauhkitaildi en dehr nda de wia mehkot me sohte kadek.

4. Soangen pepehm en masak dah me Sehdan men kitail en ahneki ong Siohwa?

⁴ Sehdan men aramas akan en masak Siohwa ni ahl sapwung.  Sehdan men kitail en kamehlele me Siohwa kin ahnsou koaros ketin engieng pahtail, oh kupwurki kaloke kitail oh me kitail sohte kak douluhl kaperenda ih. (Sohp 4:18, 19) Sehdan men kitail en uhdahn masak Siohwa me kahrehda kitail en uhdihsang papah ih. Pwehn soikala met, kitail anahne kakairada atail lemmwiki Koht ni ahl pwung.

5. Ia wehwehn en lemmwiki Koht?

⁵ Emen me kin lemmwiki Koht ni pwung kin poakohng ih oh sohte men wia mehkot me pahn kak kauwehla eh nanpwungmwahu reh. Sises pil ahneki “lemmwin Koht.” (Ipru 5:7) E sohte kin masak Siohwa ni ahl me sapwung. (Ais. 11:2, 3) Ahpw, e kin uhdahn poakohng oh men peikiong. (Sohn 14:21, 31) Duwehte Sises, kitail kin uhdahn wauneki oh lemmwiki Siohwa pwehki E kin ketin kasalehda limpoak, erpit, pwung, oh manaman. Kitail pil ese me Siohwa uhdahn ketin poakohng kitail oh kin nsenohki ia duwen atail kin mwekidki eh padahkih kitail. Kitail kak kansensuwedihada Siohwa de kaperenda ih.—Mel. 78:41; Lep. Pad. 27:11.

6. Ia ehu ahl me kitail kak sukuhlki en lemmwiki Koht? (Melkahka 34:11)

⁶ Kitail sohte ipwidihte lemmwiki Siohwa; kitail anahne kakairada irair wet. (Wadek Melkahka 34:11.) Ehu ahl me kitail kak wia met iei sang ni atail kin kilang kepikipik kan. Uwen laud en atail kin kilang sapwellimen Siohwa erpit, manaman oh limpoak laud ong kitail me sansalda nan “soahng kan me wiawihda,” atail wauneki oh poakohng ih pahn pil laudla. (Rom 1:20) Emen sister me adaneki Adrienne, koasoia, “Ni ahnsou me I kin kilang soahng koaros me Siohwa ketin kapikada oh kilang ia uwen erpit me Siohwa sapwellimanki, met kin uhdahn kaselel oh kapwuriamwei ong ie, oh kin sewese ie en pohnese me e ketin mwahngih dahme keieu mwahu ong ie.” Eh doudouloale mepwukat kahrehiong ih en nda, “Ia kahrepen ei pahn men wia mehkot me pahn kauwehla ei nanpwungmwahu rehn Siohwa, me wia Utupen ei mour?” Ia duwe, ke kak wiahda ahnsou nan wihket en medemedewe duwen kepikipik kan? Omw wia met pahn kalaudehla omw wauneki oh poakohng Siohwa.—Mel. 111:2, 3.

7. Ia duwen kapakap eh kak sewese kitail en kakairada lemmwiki Siohwa ni ahl pwung?

⁷ Pil ehu ahl me kitail kak kakairada atail lemmwiki Koht iei sang ni atail kin kaukaule kapakap. Atail esehla Siohwa kin mwamwahula ehuehu ahnsou me kitail kin kapakapohng ih. Ahnsou koaros me kitail kin peki reh kehl pwehn dadaur pahn kahpwal ehu, met kin katamandohng kitail duwen sapwellime manaman lapalap. Ni atail kin kalahngankihong Ih sapwellime Ohlo, kitail kin tamanda ia uwen Siohwa eh ketin poakohng kitail. Oh ni atail kin peki Siohwa en ketin sewesehkin kitail kahpwal ehu, kitail kin tamanda me e uhdahn ketin erpit. Soangen kapakap kan me duwehte met pahn kalaudehla atail wauneki Siohwa. Oh e pil kahrehiong kitail en koasoanehdi teng en soikala soahng kan de soahng koaros me pahn kauwehla atail nanpwungmwahu reh.

8. Dahme kitail kak wia pwehn lemmwikihte Koht?

⁸ Kitail kak kolokolete atail lemmwiki Koht sang ni atail kin onopki Paipel pwehn sukuhlki mehn kahlemeng mwahu oh suwed kan loale. Kitail pahn koasoiapene sapwellimen Siohwa ladu lelepek riemen—Opadaia me kin apwalih tehnpas en Nanmwarki Eihap, oh Samworo Lapalapo Sehoiada. Mwuhr, kitail pahn kilang dahme kitail kak sukuhlkihsang Nanmwarki Sohas en Suda, me tepida mwahu ahpw mwuhr sohla papah Siohwa.

9. Ia duwen lemmwiki Siohwa eh sewese Opadaia? (1 Nanmwarki 18:3, 12)

⁹ Tepin Paipel eh koasoia duwen Opadaia, b e mahsanih: “Opadaia pil tohnkaudok mehlel en KAUN-O men.” (Wadek 1 Nanmwarki 18:3, 12.) Ia duwen met eh sewese Opadaia? Ehu kahrepe iei, e kahrehiong ih en wia aramas mehlel men oh meteikan kak likih, eri nanmwarkio kihong ih en apwalih tehnpeseo. (Pil kilang Nehmaia 7:2.) En Opadaia eh lemmwiki Koht pil kahrehiong ih en ahneki eimah laud, irair ehu me e uhdahn anahne. E momour ni mwehin nanmwarki suwedo Eihap, me kin “wiahda dihp ong KAUN-O laudsang nanmwarkien mwowe kan.” (1 Nan. 16:30) Pil ehu, ahn Eihap pwoudo Sesepel, me kin kaudokiong Paal, uhdahn kailongki Siohwa me kahrehda e song en kasohrehla kaudok mehlel nan keinek eisek en wehin Israel. Sesepel pil kemehla sapwellimen Koht soukohp tohto. (1 Nan. 18:4) Eri Opadaia kin kaudokiong Siohwa erein ahnsou apwal ehu.

10. Ia duwen Opadaia eh kasalehda eimah laud?

¹⁰ Ia duwen Opadaia eh kasalehda eimah laud? Ni ahnsou me Sesepel tepida rapahki sapwellimen Koht soukohp ko pwehn kemeirailla, Opadaia ale meh 100 oh ekihla irail ‘ni pwihn riau wad limehk oh e pil kihong irail arail kisin tungoal mwenge oh pihl.’ (1 Nan. 18:13, 14) Ma Sesepel esehda met, ohl eimaho Opadaia uhdahn pahn kamakamala. Ei uhdahn, Opadaia ele masepwehkada oh sohte men mehla. Ahpw Opadaia poakohng Siohwa oh irail kan me kin papah Ih laudsang eh poakohng eh mour.

11. Ia duwen sapwellimen Siohwa ladu kan rahnpwukat ar duwehte Opadaia? (Pil kilang kilel.)

¹¹ Rahnwet, sapwellimen Siohwa ladu tohto kin kousoan nan sahpw kan me atail doadoahko keinapwidi. Irail kin kasalehda arail wauneki kaun en koperment kan, ahpw duwehte Opadaia, riatail Kristian kan sohte kin uhdihsang kaudokiong Siohwa. (Mad. 22:21) Irail kin kasalehda arail lemmwiki Koht sang ni arail peikiong ih a kaidehn aramas. (Wiewia 5:29) Irail kin wia met sang ni arail kin pousehlahte kalohki rongamwahwo oh iang towehda mihting kan ni rir. (Mad. 10:16, 28) Irail  kin song en tehk mwahu me riarail Kristian kan kin alehdi soahng kan me irail anahne pwehn karanihte Siohwa. Medewehla mehn kahlemeng en Henri, me kousoan nan ehu sahpw en Aperika kan me atail doadoahko keinapwidi erein ahnsou ehu. Erein ahnsowo, Henri toukihda eh ahnsou pwehn wahla sawasepen Paipel kan ong rie Sounkadehde kan. E ntingihedi: “I kin namenek. Eri I kamehlele me ei wauneki laud Siohwa me kihong ie eimah me I anahne.” Ke medewe me ke kak ahneki eimah me Henri ahneki? Ke kak ma ke kakairada irair en lemmwiki Koht ni ahl me pwung.

12. Ia duwen Samworo Lapalap Sehoiada oh eh pwoudo ara kasalehda loalopwoat laud ong Siohwa?

¹² Samworo Lapalap Sehoiada kin lemmwiki Siohwa, oh met kamwakid ih en kin loalopwoat oh kangoange meteikan en kaudokiong Siohwa. Met sansalda ni ahnsou me nein Sesepel serepeino, Adalaia, adihada mwoahlo nan Suda. Aramas ako ahneki kahrepe mwahu en masak Adalaia. E uhdahn lemei oh uwen laud en eh men wiahla lih nanmwarki, e song en kemehla nein nah seri kan koaros pwehn kak kaunda. (2 Kron. 22:10, 11) Emen nein nah ko—Sohas—pitla pwehki ahn Sehoiada pwoudo Sehosihpa, me kapitala. Sehosihpa oh eh pwoudo Sehoiada ekihla serio oh apwalihada. Ni ahl wet, ira kin tehk mwahu me emen sang kadaudok en Depit kan pahn pitla oh kak kaunda nin duwen nanmwarki. Sehoiada kin loalopwoatohng Siohwa oh sohte masakada Adalaia.—Lep. Pad. 29:25.

13. Ahnsou me Sohas sounpar isuh, ia duwen Sehoiada eh pwurehng kasalehda eh loalopwoat?

¹³ Ni ahnsou me Sohas sounpar isuh, Sehoiada pil pwurehng kasalehda eh loalopwoatohng Siohwa. E wiahda pilahn ehu. Ma pilahno pweida, Sohas kadaudok en Depito, pahn wiahla nanmwarki ni pwung. Ahpw ma pilahno sohte pweida, Sehoiada uhdahn pahn kamakamala. Pwehki Siohwa ketin kapaiahda koasoandio, e pweida. Aramas lapalap ko oh mehn Lipai ko utungada koasoandi wet oh Sehoiada kasapwilada Sohas en wiahla nanmwarki oh kemehla Adalaia. (2 Kron. 23:1-5, 11, 12, 15; 24:1) Sehoiada eri “koasoanehdi pwe Nanmwarki Sohas oh aramas akan en wiahda ehu inou ong KAUN-O, me re pahn wiahla sapwellimen KAUN-O aramas.” (2 Nan. 11:17) Sehoiada “pil kihong silepen ewen kelen Tehnpas Sarawio, pwe re en silehsang aramas emen me sohte mwakelekel ong kaudok.”—2 Kron. 23:19.

14. Ni ahl dah me Sehoiada alehdi wahu pwehki eh wauneki Siohwa?

¹⁴ Siohwa ketin mahsanihier mwoweo: “I pahn kin wauneki irail kan me kin waunekin ie.” Ei, Siohwa ketin kapaiahda Sehoiada. (1 Sam. 2:30) Karasepe, e ketin mweidohng koasoiepen Sehoiada en kileldi nan Paipel pwehn kak kasukuhlih kitail. (Rom 15:4) Oh ahnsou me Sehoiada mehla, wahu tohrohr kowohng ih pwehki e iang seridi “nan sousoun nanmwarki kan nan kahnimw en Depit, kasalepen ar wauneki doadoahk en papah me e wiadahr ong mehn Israel, ong Koht, oh ong Tehnpas Sarawio.”—2 Kron. 24:15, 16.

15. Dahme kitail kak sukuhlkihsang koasoiepen Sehoiada? (Pil kilang kilel.)

¹⁵ Koasoipen Sehoiada kak sewese kitail koaros en kakairada atail lemmwiki Koht. Brother kan me kin tiengla mwowe kak alasang Sehoiada sang ni arail kin ni lelepek tetehk oh apwalih mwahu sapwellimen Koht pelin sihpw kan. (Wiewia 20:28) Me mah kan kak sukuhlkihsang Sehoiada me ni arail kin lemmwiki Siohwa oh loalopwoatete, Siohwa  kak ketin doadoahngki irail en kapwaiada kupwure. E sohte kin ketin likidmelieirailla. Me pwulopwul kan kak kilang sapwellimen Siohwa wiewia ong Sehoiada oh kahlemengih sang ni arail wauneki riarail Kristian kan, ahpw mehlel irail kan me papahkier Siohwa erein sounpar tohto. (Lep. Pad. 16:31) Oh kitail koaros kak sukuhlkihsang me lapalap kan oh mehn Lipai kan ar utungada Sehoiada. Ni loalopwoat, kitail en utungada ‘irail kan me kin tiengla mwohtail’ sang ni atail kin peikiong irail.—Ipru 13:17.

16. Dahme kasalehda me Nanmwarki Sohas wia aramas luwet men?

¹⁶ Sehoiada sewese Nanmwarki Sohas en wia aramas mwahu men. (2 Nan. 12:2) Eri, ni ahnsou me nanmwarkio pwulopwul, e kin men kaperenda Siohwa. Ahpw mwurin Sehoiada mehla, Sohas uhd kin rong irail me lapalap kan me kesehla oh uhwongada kaudok mehlel. Ia imwilahn met? Ih oh nah aramas akan “tapihada kaudokiong dikedik en eni oh sansal akan.” (2 Kron. 24:4, 17, 18) Mendahki Siohwa ketin kupwurtoutoukihla met, e ketin “kadaralahng irail soukohp kei pwe re en kapehmkin irail ar sapwung kan pwe re en pwurehng sohpeiong ih, ahpw aramas akan sohte men rong.” Irail sohte pil rong nein Sehoiada pwutako, Sekaraia, me sohte wiahte sapwellimen Siohwa soukohp oh samworo, ahpw e pil wia emen me Nanmwarki Sohas pahn rianiki. Nanmwarki Sohas pil kemehla Sekaraia mendahki ahn Sekaraia peneineio kapitala Sohas.—2 Kron. 22:11; 24:19-22.

17. Dahme wiawihong Sohas?

 ¹⁷ Sohas sohte kin lemmwiki Siohwa oh met kahrehda en imwila suwed. Siohwa ketin mahsanihier: “I pahn kin mwamwahliki irail kan me kin mwamwahlikin ie.” (1 Sam. 2:30) Mwuhr, pwihn en sounpei en Siria tikitik ehu kalowehdi nein Sohas “karis laud” oh kahrehiong ih en “inenen ohla laud.” Mwurin mehn Siria ko kohkohla, emen nein Sohas ladu kemehla Sohas pwehki eh kemehla Sekaraia. Aramas ako medewe me nanmwarki menet uhdahn suwed, kahrehda re sohte pil men sarepedi ih “nan sousoun nanmwarki kan.”—2 Kron. 24:23-25.

18. Nin duwen me Seremaia 17:7, 8 mahsanih, ia duwen atail kak dehr duwehte Sohas?

¹⁸ Dahme kitail kak sukuhlkihsang mehn kahlemeng en Sohas? E duwehte tuhke pwoat me kalewe kan pedeped oh anahne lepin tuhke pwoat en utungada. Mwurin Sehoiada me kin utung ih mehla, oh Sohas tepida rong irail kan me uhwongada oh kesehla kaudok mehlel, e sohla lelepek ong Siohwa. Karasaras wet kasalehda me kitail en dehr peikiong Koht ihte pwehki atail peneinei de meteikan nan mwomwohdiso wiahda mehn kahlemeng mwahu ong kitail. Pwe kitail en mi karanihte Siohwa, kitail anahne kakehlaka atail poakohng oh wauneki ih sang ni atail kin kaukaule onopki Paipel, doudouloale, oh kapakap.—Wadek Seremaia 17:7, 8; Kol. 2:6, 7.

19. Dahme Siohwa ketin kasik sang kitail?

¹⁹ Siohwa sohte ketin kasik kitail en wia laudsang dahme kitail kakohng. Dahme e ketin kasik sang kitail iei me Eklesiasdes 12:13 mahsanih: “Lemmwiki Koht, oh kapwaiada sapwellime mahsen, pwehki ih kahrepe wet me aramas kepikipikihda.” Ni atail lemmwiki Koht, kitail pahn kak loalopwoatohngete ih, sohte lipilipil dahme pahn wiawi ni ahnsou kohkohdo, duwehte me Opadaia oh Sehoiada wia. Sohte mehkot pahn kak kauwehla atail nanpwungmwahu rehn Siohwa.