1. Nin duwen me 1 Piter 5:2 mahsanih, pwukoa kesempwal dah me elder kan anahne wia?

 KRISTIAN elder kan anahne apwalih sapwellimen Siohwa sihpw kesempwal kan. Ohl poadidi pwukat kin kesempwalki arail pwais kaselel wet en papah riarail Kristian kan, oh irail kin doadoahk laud pwehn wia “silepen sihpw kan me uhdahn pahn apwalih irail.” (Ser. 23:4; wadek 1 Piter 5:2.) Ia uwen atail kalahnganki ohl pwukat nan atail mwomwohdiso!

2. Soangen kasongosong dah kan me ekei elder kin lelohng?

² Elder kan kin lelohng kahpwal tohto ni arail kin apwalih arail pwukoa kan. Keieu, elder kan anahne doadoahk laud pwehn apwalih mwomwohdiso. Tony, elder men nan Amerika, anahne sukuhlki en kalaudehla eh mpahi pwehn apwalih uwen doadoahk me e alehdi. E koasoia: “Ni ahnsou me soumwahu en COVID-19 tepida, I alehdi doadoahk tohto pwehn koasoanehdi mihting kan oh kalohk. Ahpw, mendahki uwen laud me I kin wia, miehte doadoahk tohto ahnsou koaros. I uhdahn kedirepwla me kahrehda I sohte wiahda ahnsou en wadek Paipel, onop, oh kapakap.” Ilir, emen elder nan Kosovo, pil lelohng ehu kahpwal tohrohr. E apwal ong ih en peikiong sapwellimen Siohwa pwihn ni ahnsou me e mi nan sahpw ehu me mie mahwen. E koasoia: “Ni ahnsou me ohpis en Sounkadehdehn Siohwa kan kihong ie pwukoa en sewese riei Kristian kan nan wasa keper ehu, met kasonge ei eimah. I masepwehk oh kaweido sohte mwomwen mwahu ong ahnsowo.” Tim, misineri men nan Eisia, kin apwalki wia soahng koaros me e anahne wia rahn koaros. E koasoia: “Ekei pak I kin uhdahn pwangada en apwalih riei Kristian kan.” Dahme kak sewese elder kan me kin lelohng soangen kahpwal pwukat?

3. Ia duwen koaros ar kak paiekihda ni arail tehk mehn kahlemeng en Sounkopwungo Kidion?

 ³ Elder kan kak sukuhlki mehn kahlemeng en Sounkopwungo, Kidion. (Ipru 6:12; 11:32) E kin pere oh apwalih sapwellimen Koht aramas akan. (Sounkopwung 2:16; 1 Kron. 17:6) Duwehte Kidion, elder kan idihdida pwehn apwalih sapwellimen Koht aramas akan erein ahnsou uhdahn apwal pwukat. (Wiewia 20:28; 2 Tim. 3:1) Kitail kak sukuhlsang ahn Kidion mpahi, aktikitik oh peik. Eh dadaur kin lelohng songosong ni eh kin apwalihala eh pwukoa kan. Sohte lipilipil ma kitail elder kei de soh, kitail anahne kakairada atail kalahnganki elder kan. Kitail kak sewese brother pwukat me kin doadoahk laud pwehn apwalih kitail nan mwomwohdiso.—Ipru 13:17.

4. Ia duwen Kidion eh kasalehda mpahi oh aktikitik?

⁴ Kidion iei ohl emen me kin mpahi oh aktikitik. b Ni sapwellimen Koht tohnleng men eh ndaiong Kidion me ih me pilipilda en kapitasang mehn Israel kan sang mehn Midian kan, ohl aktikitik menet nda: “Ei peneinei me keieu luwet nan kadaudok en Manase, oh ngehi me keieu sohte wadei rehn ei peneinei.” (Sounkopwung 6:15) E pehm me e sohte warohng wia pwukoa wet, ahpw Siohwa ketin mwahngih me Kidion kak wia met. Pwehki sapwellimen Siohwa sawas, Kidion kapwaiada eh pwukoa kan.

5. Ahnsou dah me e apwal ong elder men en aktikitik oh mpahi?

⁵ Elder kan kin wia uwen ar kak en kasalehda mpahi oh aktikitik ni soahng koaros me irail kin wia. (Maika 6:8; Wiewia 20:18, 19) Irail sohte kin suweiki dahme re kak wia de wiadahr. Oh re sohte kin medewe me sohte kateparail pwehki sapwung kan me re wiahda. Ahpw ekei pak, e apwal ong elder men en aktikitik oh mpahi. Karasepe, e kak alehdi pwukoa tohto oh mwuhr diarada me e apwal en kapwaiada koaros. De ele e apwal ong ih en aktikitik oh mpahi ni ekei ar kin kauwe ih pwehki mwomwen eh kin wia pwukoa ehu de kapinga ih ni eh wia pwukoa teikan. Dahme elder kan kak sukuhlkihsang Kidion me pahn sewese irail nan soangen irair ko?

6. Dahme elder kan kak sukuhlkihsang Kidion duwen mpahi? (Pil kilang kilel.)

 ⁶ Peki sawas. Emen me mpahi kin pohnese me mie soahng kan me e sohte kak wia. Kidion kasalehda me e mpahi pwehki e peki sawas sang meteikan. (Sounkopwung 6:27, 35; 7:24) Elder kan me erpit pil kin wia soahngohte. Tony, me kitail koasoiapenehier mwoweo, nda: “Pwehki mwomwen ei tikida, I kin alehda doadoahk tohtohsang dahme I kak wia. Eri I koasoanehdi en koasoia duwen mpahi nan at kaudok en peneinei oh peki rehn ei pwoudo dahme e medewehki. I pil kilang kisin kasdou nan jw.org me oaralape, Train, Trust, and Empower Others, as Jesus Does.” Tony tepida peki meteikan en sewese ih wia eh pwukoa ko. Ia imwilahn met? Tony koasoia: “Se apwalihala doadoahko nan mwomwohdiso oh met mie ei ahnsou en kakehlakahda ei nanpwungmwahu rehn Siohwa.”

7. Ia duwen elder kan ar kak alasang Kidion ma meteikan kauwe irail? (Seims 3:13)

⁷ Dehr lingeringerda ma meteikan kauweiuk. Pil ehu kasongosong me elder kan kin lelohng iei ni meteikan ar kin kauwe irail. Ahn Kidion mehn kahlemeng pil kak sawas. E ese me e sohte unsek, eri e kin meleilei ni mehn Epraim ko ar kauwe ih. (Sounkopwung 8:1-3) Kidion sohte lingeringer ni eh sapeng irail. E kasalehda aktikitik ni eh rong arail kaulim oh pil sang ni eh lokaia kadek ong irail. Met kameleileiraildi. Elder kan me erpit kin alasang Kidion sang ni arail rong kanahieng oh sapeng ni meleilei ma meteikan kauwe irail. (Wadek Seims 3:13.) Irail eri kin sewese wiahda popohl nan mwomwohdiso.

8. Dahme elder kan anahne wia ma irail alehdi kaping? Menlau kihda ehu karasaras.

⁸ Patohwanohng Siohwa kaping koaros. Ni meteikan ar kapinga Kidion pwehki eh kalowehdi mehn Midian kan, e patohwanohng Siohwa kaping koaros. (Sounkopwung 8:22, 23) Ia duwen ohl akan me idihdida ar kak alasang Kidion? Irail anahne kapinga Siohwa pwehki soahng kan me irail wiahda. (1 Kor. 4:6, 7) Karasepe, ma meteikan kin kapinga elder men pwehki eh koahiek en padahk, e kak nda me kaweid ko kohsang Mahsen en Koht oh me kitail koaros kin ale kasukuhl sang pwihn en Siohwa. Elder kan kak medewe ma irail kin wia padahk ni ahl me kin kawauwih Siohwa, de ma irail kin wia met pwehn wahdo kaping ong irail. Medewehla dahme wiawihong emen elder me adaneki Timothy. Ni ahnsou me Timothy wiahla elder men, e kin perenki wia kapahrek en wehipokon. E koasoia: “I kin wia tepin koasoi kan oh karasaras kan me reirei oh ekis kapwonopwon. Meteikan kalapw kapinga ie pwehki padahk ko. Ahpw met kahrehda irail en kapinga ie ahpw kaidehn Paipel de Siohwa.” Timothy esehda me e anahne wekidala mwomwen eh kin padahk pwe meteikan en dehr nohn kapinga ih. (Lep. Pad. 27:21) Ia imwilahn met? E koasoia: “Met, riei Kristian kan kin ndaiong ie me ei padahk ko kin sewese irail powehdi soangen kahpwal ehu, dadaur pahn kahpwal ehu, de karanihala Siohwa. Ni ei kin rong arail nda met, ei peren kin laudsang ni ahnsou me irail kin kapinga ie.”

9. Dahme kahrehda e apwal ong Kidion en peikiong Siohwa oh en eimah? (Menlau kilang kilel ni kilin Kahn Iroir wet.)

⁹ Mwurin Kidion alehdi pwukoa en kahluwa mehn Israel ko, e anahne peik oh eimah. E ale pwukoa keper ehu en kauwehla pei sarawi en Paal me eh pahpao kin kaudokiong. (Sounkopwung 6:25, 26) Mwurin eh kihpene nah sounpei ko, Siohwa mahsanihong Kidion pak riau me e anahne kamalaulauiala nan sounpei ko. (Sounkopwung 7:2-7) Mwuhr, Siohwa eri  mahsanihong ih en mahweniong eh imwintihti kan nan lukepen pwohngo.—Sounkopwung 7:9-11.

10. Dahme kahrehda e kakete apwal ong elder kan en peik?

¹⁰ Elder kan anahne “kin men peik.” (Seims 3:17) Elder peik men kin men mwadang en uhpah dahme Paipel mahsanih oh kaweid me kohsang sapwellimen Koht pwihn. Eri, e kak wiahda mehn kahlemeng mwahu ong meteikan. Ahpw e pil kak apwal ong ih en peik. Karasepe, ele e ale kaweid tohto, de kaweid ko mwadang wekila oh e apwalki kapwaiada koaros. Ele ekei pak, e kin medewe ma kaweido uhdahn mwahu ong irairo. De e alehdi pwukoa ehu me kakete kahrehiong ih en selidi. Ia duwen elder kan ar kak alasang ahn Kidion peik nan soangen irair ko?

11. Dahme kak sewese elder kan en peik?

¹¹ Rong kanahieng kaweid oh doadoahngki. Koht mahsanihong Kidion duwen eh pahn kauwehla en eh pahpao pei sarawio, wasa me e pahn kauwada ehu pei sarawi kapw ong Siohwa, oh mahn dah me e pahn meirongkihla. Kidion sohte kauwe kaweid ko, ahpw e kin idawehnte. Rahnwet, elder kan kin alehdi kaweid nan kisinlikou kan, pakair kan, oh kaweid teikan sang sapwellimen Siohwa pwihn me pahn sewese kitail en karanihala Siohwa oh sohte lelohng keper. Kitail kin poakohng elder kan pwehki ni lelepek irail kin idawehnte kaweid kan sang sapwellimen Siohwa pwihn. Mwomwohdiso pwon kin paiekihda.—Mel. 119:112.

12. Ia duwen elder kan ar kak kapwaiada Ipru 13:17 ma sapwellimen Siohwa pwihn padahkihong irail en wekidala mwomwen arail kin wia soahng kan?

¹² Ahnla wekidekla kan. Tamataman me Siohwa ketin mahsanihong Kidion en kadarala pali laud en nah sounpei ko ni imwarail ko. (Sounkopwung 7:8) Ele Kidion medewe: ‘Wekidekla wet uhdahn anahn? E pahn kak kadoadoahk?’ Mendahki met, Kidion peikiong kaweido. Elder kan rahnwet kin alasang Kidion sang ni arail kin peik ni ahnsou me sapwellimen Siohwa pwihn padahkihong irail en wia mehkot me weksang dahme irail kin wia. (Wadek Ipru 13:17.) Karasepe, nan pahr 2014, Pwihn me Kin Apwalih Mwomwohdiso nan Sampah Pwon wekidala mwomwen arail kin pwain kokoudahn Wasahn Kaudok oh Mihting Tohrohr kan. (2 Kor. 8:12-14) Mahso sapwellimen Siohwa pwihn kin kihong mwomwohdiso kan mwohni pwehn kauwada wasahn kaudok kan oh mwomwohdiso kan kin uhd pwainohng mwuhr. Ahpw met, pwihno kin doadoahngki sawas en mwohni sang mwomwohdiso koaros nin sampah pwehn kauwada Wasahn Kaudok oh Wasahn Mihting Tohrohr kan sohte lipilipil wasa me anahn, mehnda ma mwomwohdiso ehu kak kihdahte sawas tikitik. Ni José eh tepin esehda wekidekla wet, e sohte medewe me met pahn kadoadoahk. E nda: ‘Sohte Wasahn Kaudok ehu pahn kak kokouda. Kaidehn ih mwomwen me kin wiawi wasaht.’ Dahme  sewese José en utung kaweido? E koasoia: “Mahsen en Lepin Padahk 3:5, 6 katamankihong ie en likih Siohwa. Oh imwilahn met uhdahn mwahu! Se sohte kauwadahte Wasahn Kaudok kan, ahpw se pil sukuhlki en kihda sawas ni soangsoangen ahl akan pwe soahng kan en kak wiawi ni pahrek tehieu.”

13. (a) Dahme Kidion kamehlele? (b) Ia duwen elder kan ar kak alasang Kidion? (Pil kilang kilel.)

¹³ Wia kupwuren Siohwa ni eimah. Kidion peikiong Siohwa pil ni eh kin masepwehk oh eh pwukoau keper. (Sounkopwung 9:17) Mwurin Siohwa eh ketin kangoange ih, Kidion uhdahn kamehlele me Koht pahn ketin sewese ih pere sapwellime aramas akan. Elder kan me kin mi nan wasa me atail doadoahko keinapwidi, kin alasang Kidion. Ni eimah, irail kin tiengla mwowe nan mihting oh doadoahk en kalohk mehnda ma pilismen kan pahn salihiraildi, kapeidakih irail, de sohla arail doadoahk, de re lelohng tiahk lemei kan. c Erein kahn kamakam kowahlapo, elder kan pahn anahne eimah pwehn peikiong kaweid kan me re alehdi, sohte lipilipil ma e keper. Karasepe, ele kitail pahn alehdi kaweid ong ia duwen atail pahn kalohki rohng en kadeik kehlail oh dahme kitail anahne wia pwehn pitsang uhwong sang Kok en Makok.—Esek. 38:18; Kaud. 16:21.

14. Dahme kahrehda e apwal ong Kidion en dadaurete?

¹⁴ Pwehn wia Sounkopwung men, Kidion anahne doadoahk laud. Ni en mehn Midian ko ar tangdoaui erein mahweno, Kidion pwakih irail sang wahu en Sesreel lel Pillap en Sordan, wasa kan me ele tuhke tohto kapilpene. (Sounkopwung 7:22) Ia duwe, Kidion uhdi ni Pillap en Sordan? Soh! Mendahki irail pwangadahr, ih oh nah sounpei silipwuki ko kotehla oh pousehlahte pwakih arail imwintihti ko. Irail eri pwakihedi mehn Midian ko oh kaloweiraildi.—Sounkopwung 8:4-12.

15. Dahme kahrehda ekei pak e apwal ong elder men en dadaurete?

¹⁵ Ele elder men ekei pak kin uhdahn pwangada sang ni eh kin apwalih mwomwohdiso  oh eh peneinei. Nan soangen irair pwukat, ia duwen elder kan ar kak alasang Kidion?

16-17. Dahme sewese Kidion en dadaurete, oh dahme elder kan kak kamehlele? (Aiseia 40:28-31) (Pil kilang kilel.)

¹⁶ Likih me Siohwa pahn ketin kakehlaiukada. Kidion likih me Siohwa pahn ketin kakehlakahda ih, oh ih met me Siohwa ketin wia. (Sounkopwung 6:14, 34) Ehu ahnsowo, Kidion oh nah ohl ako tang pwakih nanmwarki en Midian riemen ni ara dake kamel. (Sounkopwung 8:12, 21) Koht ketin sewese mehn Israel ko en koledi irail oh kana nan mahweno. Elder kan pil kak koapworopworki Siohwa, me “sohte mwahn kin ngirala de luwetala.” E pahn ketikihong irail kehl ni ahnsou me re anahne.—Wadek Aiseia 40:28-31.

¹⁷ Medewehla dahme wiawihong Matthew, me kin iang Pwihn me Kin Ehuiong Imwen Wini kan. Dahme sewese ih en dadaurete? Matthew koasoia: “I pehm mehlelpen Pilipai 4:13. Pak tohto ni ei kin pehm me I pwangada oh sohte kak doula, I kin kapakap pekipeki Koht en ketikihong ie kehl me I anahne pwehn sewese riei Kristian kan. Ni ahnsou pwuko, I kin pehm me sapwellimen Siohwa manaman kin kakehlaka ie pwe ien dadaurete.” Duwehte Kidion, riatail elder kan kin doadoahk laud pwehn apwalih sapwellimen Siohwa aramas akan mendahki met sohte kin ahnsou koaros mengei. Irail anahne mpahi oh pohnese me irail sohte kak ahnsou koaros wia soahng koaros me re men wia. Ahpw, irail kak likih me Siohwa pahn ketin ahnsou koaros karonge arail peksawas kan oh ketin sewese oh kakehlairailda pwe ren dadaurete.—Mel. 116:1; Pil. 2:13.

18. Pwehn kousapahl, ia duwen elder kan ar kak alasang Kidion?

¹⁸ Elder kan kak sukuhlki soahng tohto sang mehn kahlemeng en Kidion. Elder kan anahne mpahi oh aktikitik me pid ia uwen laud en doadoahk me re pwungki en alehda oh pil ni meteikan ar kauwe de kapinga irail. Irail anahne kasalehda peik oh eimah, ahpw mehlel ni imwin koasoandi wet eh kerendohr. Oh irail anahne likih me sohte lipilipil soangen kahpwal dah me re pahn lelohng, Siohwa kak ketin kakehlairailda. Uhdahn kitail kalahnganki doadoahk me sounsilepe pwukat kin wia oh “kesempwalki soangen aramas” pwukat.—Pil. 2:29.