Paipel sohte kasalehda. Ahpw e padahkihong kitail ekei ire oaritik kan me kawehwehda dahme kahrehda ira pilada en dehr pwurala Nasaret ni ahnsowo.

Tohnleng men ndaiong Mery me e pahn liseianda oh kaipwidi seri men. Ni ahnsou me tohnlengo wahla rohng wet, Mery oh Sosep koukousoan Nasaret, wasa me Sosep tikida ien nan Kalili. (Luk 1:26-31; 2:4) Mwuhr, ni ahnsou me ira pwurasang Isip, ira pwurala Nasaret. Sises tikida wasao oh wiahla mehn Nasaret. (Mad. 2:19-23) Ihme kahrehda ni atail kin koasoia duwen Sises, Sosep, oh Mery, kitail kin medewe duwen Nasaret.

Mie kisehn Mery me adaneki Elisapet me kin kousoan nan Suda. E pwoudiki samworo Sekaraia oh wiahla inen Sohn Sounpapidais. (Luk 1:5, 9, 13, 36) Mery mwemweitla rehn Elisapet oh kousoan reh erein sounpwong siluh nan Suda. Mery eri pwurala Nasaret. (Luk 1:39, 40, 56) Ihme kahrehda Mery ese nan Suda.

Kedekedeo, Sosep pwungki peikiong kosonnedo “en iang ntingdi.” Eri Sosep seiloaksang Nasaret kohla Pedleem, nan “kahnimw en Depit” me kokohpdahr me Mesaiao pahn ipwidi ie. (Luk 2:3, 4; 1 Sam. 17:15; 20:6; Maika 5:2) Mwurin Mery eh kaipwidi Sises wasao, Sosep sohte men Mery en wia seiloak reirei pwurala Nasaret oh wa seri pwelelo. Irail mihmihte Pedleem me dohkihsang Serusalem mpen mwail 6. Eri e pahn mengeiong ira en wahda serio kohla ni tehnpas sarawio pwehn wia meirong nin duwen me kosonnedo koasoia.—Lip. 12:2, 6-8; Luk 2:22-24.

Mwoweo sapwellimen Koht tohnleng men padahkihong Mery me nah pwutako pahn alehdi “mwoalen seme Depit” oh pahn ketin “kaunda . . . nin duwen Nanmwarki men.” Ele Sosep oh Mery wehwehki me e kesempwal me Sises ketin ipwidi nan kahnimw en Depit. (Luk 1:32, 33; 2:11, 17) Mwein ira medewe me e pahn mwahu en mihmihte mwo lao ira esehda dahme Koht kupwurki irahn wia.

Kitail sohte ese ia uwen werein arail mihmi Pedleem ni ahnsou me ekei sounkasawih usu ko pwarek wasao. Ahpw, ni ahnsowo peneineio koukousoan nan ihmw ehu, oh neira “kisin serio” kaidehn seri pwelel men. (Mad. 2:11) E mwomwen me ira sohte pwurala Nasaret, ahpw ira wiahkihla Pedleem ara wasahn kousoan erein ahnsou ehu.

Erod ruwese me “pwutak koaros nan Pedleem . . . me sounpar riau kohdi en kamakamala.” (Mad. 2:16) Tohnleng men ndaiong Sosep duwen met, eri Sosep oh Mery wahda Sises oh tangala Isip oh koukousoan wasao lao Erod mehla. Mwuhr, Sosep wahla eh peneineio Nasaret. Dahme kahrehda irail sohte pwurala Pedleem? Pwehki ni ahnsowo nein Erod pwutako Arkelaus, kakaun Suda oh wia ohl lemei men. Pil ehu, tohnleng men pwurehng padahkihong Sosep keperpen pwurala wasao. Nasaret wia wasa sohte keper ehu me Sosep kak apwalihda Sises nin duwen sapwellimen Koht tohnkaudok mehlel men.—Mad. 2:19-22; 13:55; Luk 2:39, 52.

E sansal me Sosep mehla mwohn Sises ketin pwoula oh kahrehiong meteikan en kak kohdahla nanleng. Eri Sosep pahn kaiasada nin sampah. Me tohto pahn kak tuhwong oh sukuhlki soahng tohto sang reh ong dahme kahrehda ih oh Mery mihmihte Pedleem mwurin Sises ketin ipwidi.