1-2. Kahpwal dahieu me kitail ahneki me duwehte ahn Lohd?

 NI ATAIL kin kilang tiahk samin en aramas akan rahnwet, kitail kin ahneki soangen pepehmohte me Lohd ahneki. E kin “nsensuwedkihla kowahlap ahn aramas suwed kan ar kin wia me suwed ni ngidingid,” pwehki e ese me Samatailo nanleng kin ketin kalahdeki tiahk samin. (2 Pit. 2:7, 8) Pwehki Lohd uhdahn wauneki oh poakohng Koht, e uhdahn kailongki tiahk samin en aramas akan ahnsowo. Kitail pil mi nanpwungen aramas akan me sohte kin wauneki sapwellimen Siohwa koasoandi kan ong tiahk mwakelekel. Mendahki met, kitail kak kolokolete atail tiahk mwakelekel ma kitail kin poakohngete Koht oh sukuhlki en uhdahn lemmwiki ih.—Lep. Pad. 14:2.

² Siohwa kin ketin sewese kitail en wia met sang ni eh ketikihda mehn kangoang me kitail diar nan pwuhken Lepin Padahk. Kristian koaros, ohl oh lih, me pwulopwul oh mah, kak uhdahn paiekihda arail tehk kaweid erpit me dierek nan irelaudo.

3. Nin duwen me Lepin Padahk 17:3 mahsanih, ia ehu kahrepen atail en pere mohngiongitail? (Pil kilang kilel.)

³ Ehu kahrepe kesempwal me kitail en pere mohngiongitail iei pwehki Siohwa kin ketin kasawih mohngiongitail. Met wehwehki me e kin ketin mahsanih laudsang dahme meteikan kin kilang rehtail oh ketin mwahngih soangen aramas dah kitail. (Wadek Lepin Padahk 17:3.) E pahn ketin poakohng kitail ma kitail kin medemedewehte sapwellime kaweid kan me kak sewese kitail en mour kohkohlahte. (Sohn 4:14) Eri, tiahk samin oh likamw kan en Sehdan oh aramas suwed kan nan eh sampah sohte pahn kauweikitailla. (1 Sohn 5:18, 19) Ni atail kin karanihala Siohwa, atail poakohng oh wauneki ih pahn  laudla. Pwehki kitail sohte men kamedekihala Samatailo, kitail pahn kailongki en pil medewehda en wia dihp. Ni atail lelohng kasongosong en wia mehkot sapwung, kitail en pein idek, ‘Ia duwen ei kak kansensuwedihala Koht me kin ketin kasalehiong ie limpoak laud?’—1 Sohn 4:9, 10.

4. Ia duwen lemmwiki Siohwa eh pere sister men en dehr lohdi pahn kasongosong?

⁴ Marta, sister men sang Croatia, me lelohng songosong en wia tiahk samin, ntingihedi: “I kin apwalki en medewe mwahu soahng kan oh powehdi ei ineng en wia me suwed. Ahpw ei lemmwiki Siohwa kin pere ie.” b Ia duwen lemmwiki Koht eh sewese ih? Marta koasoia me e kin doudouloale soahng suwed kan me pahn wiawi ma e wiahda tiahk samin. Kitail pil kak wia soahngohte. Imwila me keieu suwed iei atail pahn kansensuwedihada Siohwa oh katihasang atail pwais kaselel en kaudokiong ih kohkohlahte.—Sen. 6:5, 6.

5. Dahme ke kak sukuhlkihsang dahme wiawihong Leo?

⁵ Ni atail kin lemmwiki Siohwa, kitail kin kanahieng en dehr kompoakepahnkihla irail kan me kin wia me suwed. Leo, sang Congo, esehda duwen met. Sounpar pahieu mwurin eh papidaisla, e kompoakepahnkihla aramas kei me kin wia me suwed. E medewe me met sohte sapwung ma pein ih sohte wia me suwed. Ahpw sohte pwand, kompoakepah suwed ko kahrehiong ih en kamamsakau oh wia tiahk samin. Ih eri tepida medemedewe dahme eh pahpa oh nohnou, me wia Kristian kei, padahkihong ih, oh uwen peren me e ahneki ni ahnsou me e kin papah Siohwa. Ia imwilahn met? E pwurehng tepida wia dahme pwung. Pwehki sawas sang elder kan, e pwurodo rehn Siohwa. Rahnwet, e kin peren ni eh papah nin duwen elder oh pioneer tohrohr men.

6. Karasaras dahieu me pid “lih” riemen me kitail pahn koasoiapene met?

 ⁶ Kitail pahn koasoiapene Lepin Padahk irelaud 9 duwen lih riemen. Emen lih ako karasaraskihong erpit, oh emen karasaraskihong pweipwei. (Pil kilang Rom 5:14; Kalesia 4:24.) Ni atail wia met, tamataman me ahn Sehdan sampah kin medemedewehte tiahk samin me pid wia nsenen pwopwoud oh kilel oh kasdo suwed. (Ep. 4:19) Eri e uhdahn kesempwal kitail en pousehlahte sukuhlki en wauneki Koht oh sohpeisang me suwed. (Lep. Pad. 16:6) Eri, kitail koaros, sohte lipilipil ma ohl de lih, kak paiekihda sang dahme irelaud wet kasalehda. E kasalehda me lih riemeno luke me salamalam akan—irail kan me “pweipwei.” Ira kin mwomwen ndinda, ‘Kohdo ni imweiet oh mwenge.’ (Lep. Pad. 9:1, 5, 6, 13, 16, 17) Ahpw dahme wiawihong irail ako me alehdi ehuehu luhk ko uhdahn wekpeseng.

7. Nin duwen me Lepin Padahk 9:13-18 mahsanih, dahme kin wiawihong irail kan me alehda luhk sang lih pweipweio? (Pil kilang kilel.)

⁷ Medewehla luhk me kohsang ‘lih pweipweio.’ (Wadek Lepin Padahk 9:13-18.) Ni eimah, e kin likwerih me salamalam akan, “Kumwail kohdo” oh kamadipw. Dahme kin wiawihong irail pwukat? “Irail kan me kin kohla ni imwe kin mehla.” Ele ke taman me nan irelaud en mwowe ko nan Lepin Padahk pil doadoahngki soangen lokaiahn karasaras pwukat. Kitail wadek duwen “lih suwed me pahn song en kasongosongehkin uhk eh lokaia kansenamwahu kan.” E mahsanih: “Ma ke pahn kohla ni imwen soangen lih suwed menet, ke kekeidier nan ahl en kolahng mehla.” (Lep. Pad. 2:11-19) Lepin Padahk 5:3-10 (NW) pil katamankihong kitail duwen emen “lih suwed” me “neh kan kin kohkohdilahng mehla.”

8. Pilipil dahieu me kitail anahne pilada?

⁸ Irail kan me kin rong ‘lih pweipweio’ anahne pilada ma irail pahn alehda de soikala eh luhko. Kitail pil ele anahne wiahda soangen pilipilohte. Dahme kitail pahn wia ma emen song en kahrehiong kitail en wia tiahk samin, de ma kilel suwed pwarada nan Internet ni atail sohte kasik?

9-10. Ia ekei kahrepe kan me kitail en soikala tiahk samin me pid wia nsenen pwopwoud?

⁹ Mie kahrepe kan me uhdahn mwahu me kitail en soikala tiahk samin me pid wia nsenen pwopwoud. ‘Lih pweipweio’ kin mwomwen ndinda: “Pihl me pirapada me iou.” Ia wehwehn “pihl me pirapada”? Paipel kapahrekiong wia nsenen pwopwoud nanpwungen pwopwoud ehu pihl me kansenamwahu. (Lep.  Pad. 5:15-18) Pwopwoud ehu me pwopwoudida nin duwen kosonned kak perenki wia nsenen pwopwoud nanpwungara. Ahpw “pihl me pirapada” uhdahn weksang met. E kak pidada wia nsenen pwopwoud me sohte konehng. Soahng wet kin kalapw wiawi ni rir, duwehte sounpirap men me kin kalapw pirap ni rir. “Pihl me pirapada” ele kin mwomwen iou ma irail kan me wia tiahk wet kin medewe me sohte emen pahn diarada. Irail kin pitipitih pein irail pwehki Siohwa kin ketin mahsanih soahng koaros. Ma Siohwa sohla ketin kupwurkin kitail, met wia mehkot me keieu katik, de keieu suwed, me kak wiawihong kitail, oh e uhdahn sohte “iou.” (1 Kor. 6:9, 10) Ahpw pil mie kahrepe teikan.

¹⁰ Tiahk samin me pid wia nsenen pwopwoud kak kahrehda pepehm en namenek, sohte katepomw, liseian ni omw sohte men, oh kauwehla peneinei. E sansal me e wia elen erpit en soikala luhk me kohsang lih pweipweio. Patehng arail luhssang arail nanpwungmwahu rehn Siohwa, me tohto me kin wia tiahk samin kin elehieng irail soumwahu kan me kak kemeirailla. (Lep. Pad. 7:23, 26) Imwilahn iretikitik 18 en irelaud 9 mahsanih: “Irail kan me pedolongehr milahr nan wasahn me melahr akan.” Eri, dahme kahrehda me tohto kin alehda luhk me imwikihla kahpwal?—Lep. Pad. 9:13-18.

11. Dahme kahrehda e uhdahn keper en kilang kilel suwed?

¹¹ Ehu lidip me kitail anahne soikala iei kilang kilel suwed. Ekei medewe me met sohte keper. Ahpw kilang kilel suwed kin keper ong aramas, kahrehiong irail oh meteikan en sohla wahuparail, oh e uhdahn apwal en uhdihsang kilang. Ma aramas kilang kilel suwed, e apwal en manokehla. Kilel suwed pil sohte kin sewese aramas en kihsang ineng suwed, ahpw e kin kalaudehla. (Kol. 3:5; Seims 1:14, 15) Ei, me tohto me kin kilang kilel suwed kin imwila wiahda tiahk samin.

12. Ia duwen atail kin kasalehda me kitail kin song en soikala kilel kan me kahrehda ineng suwed?

¹² Dahme kitail, nin duwen Kristian kei, anahne wia ma ni soh kasikpe, kilel suwed ehu pwarada nan neitail tablet de sehlpwohn ape? Kitail anahne mwadangete dehr kilang. E pahn mengei en wia met ma kitail tamanda me dahme keieu kesempwal rehtail iei atail nanpwungmwahu rehn Siohwa. Pil ekei kilel me sohte uhdahn samin kak kahrehiong kitail en ahnekihda ineng suwed. Dahme kahrehda kitail anahne soikala met? Pwehki kitail sohte pil men medewehda en wia tiahk samin. (Mad. 5:28, 29) Elder men nan Thailand me adaneki David koasoia: “I kin pein idek rehi: ‘Mendahte ekei kilel ele sohte uhdahn suwed, ia duwe, Siohwa pahn ketin kupwurperenki ma I kilikilang?’ Soangen madamadau wet kin sewese ie en wiahda pilipil loalokong.”

13. Dahme kin sewese kitail en mwekid ni elen loalokong?

¹³ Atail perki en wia mehkot me pahn kansensuwedihada Siohwa pahn sewese kitail en mwekid ni elen loalokong. Lemmwiki Koht iei “tepin,” de poahsoanpen, “erpit.” (Lep. Pad. 9:10, NW) Kitail kilang duwen met ni tepidahn Lepin Padahk irelaud 9, wasa me “kupwurokong,” de erpit mehlel, kin karasaraskihong lih emen.

14. Luhk dahieu me kitail wadek nan Lepin Padahk 9:1-6 me weksang luhk en mwoweo?

¹⁴ Wadek Lepin Padahk 9:1-6. Kitail wadek wasao duwen luhk ehu sang rehn Siohwa, me ketin wia Sounkapikpatail oh utupen erpit koaros. (Lep. Pad. 2:6; Rom 16:27) Nan karasaraso, kitail wadek duwen ihmw laud ehu me mie uhr isipwoat. Met karasahda  duwen Siohwa eh ketin sapan oh kin ketin kasamwo koaros me men sukuhlsang reh oh loalokongla.

15. Dahme Koht ketin luke kitail en wia?

¹⁵ Siohwa kin ketin apwalih kitail ni eh ketin sapankihong kitail soahng tohto. Sang liho me karasaraskihong “kupwurokong,” de erpit mehlel nan Lepin Padahk irelaud 9, kitail sukuhlki me Siohwa kin ketin sapan oh kin ketikihong kitail soahng mwahu tohto. Iretikitik ko koasoia me liho lukehdo aramas akan en pedolong nan imweo pwehn tungoale mwenge oh nim wain me e kaunopadahr. (Lep. Pad. 9:2) Iretikitik 4 oh 5 pil doula koasoia me liho kin ndindaiong me “pweipweio” en “kohdo tungoale” mwenge ko. Dahme kahrehda kitail en ale luhko sang lih menet? Siohwa ketin kupwurki me sapwellime kan en kin loalokong oh dehr lelohng keper. E sohte ketin kupwurki kitail en wiahda sapwung kan me pahn kamedekeikitailla. Ihme kahrehda “e kin ketin nahkpene erpit mehlel ong me pwung.” (Lep. Pad. 2:7, NW) Ni atail kin lemmwiki Siohwa, kitail pahn men kaperenda ih. Kitail kin rong sapwellime kaweid erpit, oh perenki kapwaiada.—Seims 1:25.

16. Ia duwen lemmwiki Koht eh sewese Alain en wiahda pilipil mwahu, oh ia imwilahn met?

¹⁶ Tehk ia duwen lemmwiki Koht eh sewese Alain en wiahda pilipil mwahu kan. Alain wia elder men nan ehu mwomwohdiso oh pil sounpadahk en sukuhl men. E koasoia: “Iengei sounpadahk tohto kin wiahki kilel oh kasdo suwed kan mwomwen kasukuhl ehu.” Ahpw Alain ese me met sohte mehlel. E koasoia: “Pwehki I poakohng Siohwa oh pil wauneki ih, I sohte douluhl kin kilang kasdo ko. I pil kawehwehiong irail dahme kahrehda.” Alain doadoahngki kaweid en “kupwurokong,” de erpit mehlel, en “idawehn ahl en loalokong.” (Lep. Pad. 9:6) Ekei ienge sounpadahk ko uhdahn mwekidkihda kahrehda met irail kin onop Paipel oh towehda mihting kan.

17-18. Kamwahu dah kan me irail kan me ale luhk sang “kupwurokong” ahneki, oh dahme kitail kak kasikasik? (Pil kilang kilel.)

¹⁷ Siohwa ketin doadoahngki karasaras en lih riemeno pwehn kasalehiong kitail ia duwen atail pahn ahneki mour nsenamwahu ni ahnsou kohkohdo. Irail kan me ale luhk me kohsang “lih pweipwei” oh ewen wedeio kin medemedewehte peren me kohsang tiahk samin. Ahpw irail sohte wehwehki me dahme irail kin wia pahn pidada dahme pahn wiawihong irail ni ahnsou kohkohdo. Arail tiahk kan pahn imwila “nan wasahn me melahr akan.”—Lep. Pad. 9:13, 17, 18.

 ¹⁸ Ahpw dahme pahn wiawi ni ahnsou kohkohdo ong irail kan me ale luhk sang lih me karasaraskihong erpit mehlel pahn uhdahn weksang! Irail pahn peren pwehki irail ahneki soahng koaros me irail anahne pwehn mihmihte karanih Siohwa. (Ais. 65:13) Siohwa ketin doadoahngki Aiseia pwehn mahsanih: “Kumwail rong ie oh kapwaiada dahme I pahn mahsanih, kumwail ahpw pahn nsenamwahukihla kisin tungoal me keieu kaselel sang koaros.” (Ais. 55:1, 2) Kitail kin sukusukuhlki en poakohng dahme Siohwa ketin poakohng oh kailongki dahme e ketin kalahdeki. (Mel. 97:10) Oh kitail kin peren pwehki kitail kak luke meteikan en sukuhlsang “kupwurokong,” de erpit mehlel. E mwomwen me kitail kin “likwer sang wasa ile kan en kahnimwo, patohwan: ‘Kohdo, kumwail me sehse lamalam akan!’” Kamwahu kan ong kitail oh irail kan me mwekidki sohte kin ongete ahnsou wet. E kin poatopoat, oh kak kahrehiong kitail en “mour” kohkohlahte ni atail “idawehn ahl en loalokong.”—Lep. Pad. 9:3, 4, 6.

19. Nin duwen me Eklesiasdes 12:13, 14 mahsanih, dahme kitail anahne koasoanehdi teng en wia? (Pil kilang kakon me oaralape “ Lemmwiki Koht Kin Wia Kamwahupatail.”)

¹⁹ Wadek Eklesiasdes 12:13, 14. Atail wauneki laud Siohwa pahn pere oh sewese kitail en kolokolete tiahk mwakelekel oh pil karanih ih erein imwin rahn suwed pwukat. Pepehm wet pahn kamwakid kitail en pousehlahte luke me tohto me kitail kak pwe ren rapahki erpit mehlel oh paiekihda.