Pwehn kaperenda Siohwa, kitail anahne ahneki pwoson. Ahpw Paipel mahsanih me “kaidehn aramas koaros kin ahneki pwoson.” (2 Des. 3:2) Ni ahnsou me wahnpoaron Pohl nda met, e kin koasokoasoia duwen “aramas keper oh suwed kan” me kin kaloke ih. Ahpw dahme e koasoiahki duwen pwoson pil kin pidada aramas teikan. Ekei aramas sohte men kamehlele me mie Koht men me ketin kapikada soahng koaros. (Rom 1:20) Ele ekei kin nda me re kamehlele mehkot de emen me uhdahn manaman. Ahpw met kaidehn pwoson mehlel.

Kitail anahne kamehlele me Siohwa ketin ieias oh me e kin ketin “katingih” irail kan me kin uhdahn pwoson ih. (Ipru 11:6) Pwehn kakairada soangen pwoson wet, kitail anahne sapwellime manaman. Pwe kitail en alehdi sapwellime manaman, kitail anahne peki Siohwa en ketikihong kitail. (Luk 11:​9, 10, 13) Ehu ahl kesempwal me kitail kak alehdi sapwellimen Koht manaman iei sang ni atail wadek Paipel. Sapwellime manaman me kamwakid soun nting kan en ntingihdi Paipel. Eri kitail kak medemedewe dahme kitail wadek oh song en kapwaiada dahme kitail sukuhlki. Eri sapwellimen Koht manaman kak kamwakid atail mour oh sewese kitail en ahneki pwoson me kin kaperenda ih.