1-2. Luhk dahieu me Siohwa ketin wiahiong sapwellime tohnkaudok loalopwoat kan?

 MA EMEN idek rehmw, ‘Dahme ke kin wiahki Siohwa?’ dahme ke pahn nda? Ele ke pahn sapengki, ‘Siohwa iei Semei, ei Koht, oh Kompoakepahi.’ Ele pil mie lengileng teikan me ke kin medewehki duwen Siohwa. Ahpw ia duwe, ke kin wiahki ih me lukeiukdo nan tehnpese oh kamwenge oh apwalihiuk?

² Nanmwarki Depit kapahrekihong nanpwungmwahu me Siohwa sapwellimanki rehn sapwellime tohnkaudok loalopwoat kan ong nanpwungmwahu me emen ahneki ong irail kan me e lukehdo ni imweo. E peidengki: “Maing KAUN, ihs me kak patohlong nan Tehnpasomwi? Ihs me kak patohwan kaudok pohn Saion, sapwellimomwi dohl sarawio?” (Mel. 15:1) Nan iretikitik wet, kitail sukuhlki me kitail kak wia emen me lukodohng nan tehnpesen Siohwa de kompoakepah. Ia uwen met eh wia pai kaselel ehu!

SIOHWA KETIN KUPWURKI KITAIL EN WIA EMEN ME LUKODO NAN TEHNPESE

3. Ihs me tepin lukodohng nan tehnpesen Siohwa, oh ia en ih oh Siohwa pepehm?

³ Mwohn kepikipik kan ar miehla, Siohwa kin ketin kelekelehpw. Ahpw mwuhr, e ketin kapikada sapwellime Mesenih. Siohwa ketin duwehte emen me lukehdo tepin tohn tehnpeseo,  oh e uhdahn ketin kupwurperenki wia met. Paipel mahsanih me sapwellime Ohlo iei me kin “kapakaparanih [Siohwa] rahn koaros.” Oh me lukodohng nan tehnpeseo, Sises, ‘perenkihda eh patopato reh.’—Lep. Pad. 8:30.

4. Ihs me pil lukodohng nan tehnpesen Siohwa?

⁴ Mwuhr, Siohwa ketin kapikada tohnleng kan oh pil lukehiong irail nan tehnpeseo. Paipel mahsanih me “sapwellime tohnleng kan” kin pereperen ni ar patopato reh. (Sohp 38:7; Dan. 7:10) Erein sounpar tohto, kompoakepahn Koht kan iei irail kante me mi nanleng. Mwuhr, e ketin kapikada aramas akan oh irail pil kak wiahla kompoakepah. Ekei irail pwukat iei Enok, Noha, Eipraam, oh Sohp. Paipel kasalehda me irail wia kompoakepahn Siohwa pwehki irail kin peikiong.—Sen. 5:24; 6:9; Sohp 29:4; Ais. 41:8.

5. Dahme kitail kak sukuhlkihsang kokohpo nan Esekiel 37:​26, 27?

⁵ Erein sounpar epwiki kei, Siohwa kin ketin pousehlahte luke kompoakepah kan en wiahla emen me lukodohng nan tehnpese. (Wadek Esekiel 37:​26, 27.) Karasepe, nan kokohp en Esekiel kitail sukuhlki me Koht uhdahn ketin kupwurki sapwellime tohnkaudok loalopwoat kan en ahneki nanpwungmwahu keren reh. E ketin wiahda inou lap en popohl ehu rehrail. Kokohpo kin dokedoke ahnsou ehu me irail kan me ahneki koapworopwor en mi nanleng oh irail kan me ahneki koapworopwor nin sampah pahn mihpene nan sapwellimen Siohwa impwal nin duwen “pelin sihpw teieu.” (Sohn 10:16) Ahnsowo wiewiawi ahnsou wet!

KOHT KIN KETIN APWALIH KITAIL SOHTE LIPILIPIL WASA KITAIL MI IE

6. Ia duwen emen eh kak wiahla emen me Siohwa ketin lukehdohng nan sapwellime impwal, oh ia wasa sapwellime impwal kak dierek ie?

⁶ Nan Paipel, impwal iei wasa me emen kak kommoal oh ruksang keteu de karakar. Emen me lukodo nan impwalo pahn kasik me me imwaneki impwalo pahn apwalih ih mwahu. Ni atail inoukihong Siohwa atail mour, kitail kin wiahla emen me lukodohng nan eh impwalo. (Mel. 61:4) Mie soahng koaros me kitail anahne pwehn pousehlahte kakehlailih atail nanpwungmwahu rehn Siohwa, oh kitail kompoakepahnki irail kan me pil lukodohng nan sapwellimen Siohwa impwal. Sapwellime impwal sohte kin mi wasa ehute. Ele ke seiloaklahr wasa ehu pwehn iang towehda mihting tohrohr ehu oh tuhwong meteikan me perenki arail mi nan sapwellimen Koht  impwal. Sapwellimen Siohwa impwal kin mi wasa sohte lipilipil me sapwellime ladu lelepek kan mi ie.—Kaud. 21:3.

7. Ia duwen atail ese me irail me lelepek kan me melahr wiahte kisehn irail kan me Siohwa ketin lukehdohng nan eh impwal? (Pil kilang kilel.)

⁷ Ahpw ia duwen me lelepek kan me melahr? Irail wiahte irail kan me Siohwa ketin lukehiong nan eh impwal? Ei! Dahme kahrehda kitail kak nda met? Pwehki Siohwa ketin tamatamante irail. Sises mahsanih: “Duwen me melahr akan ar pahn iasada, Moses pil kasalehda nan koasoipen tuhke tekateko, ni eh patohwan ekerki Siohwa ‘Koht en Eipraam oh Koht en Aisek oh Koht en Seikop.’ Ih Koht emen, kaidehn Koht en me melahr akan, ahpw Koht en me momour akan, pwe irail koaros kin momouriong ih.”—Luk 20:​37, 38.

KAMWAHU OH PWUKOA KAN ME KITAIL AHNEKI

8. Kamwahu dah kan me kitail kak alehsang atail mi nan sapwellimen Siohwa impwal?

⁸ Sapwellimen Siohwa impwal kin pere irail kan me lukodo pwe mehkot de kauwehla arail nanpwungmwahu reh oh kihong irail koapworopwor mehlel ong ahnsou kohkohdo. Ni atail kin karanihete Siohwa, Sehdan sohte kak wia mehkot me kak kauweikitailla kohkohlahte. (Mel. 31:23; 1 Sohn 3:8) Nan sampah kapwo, Siohwa pahn ketin pousehlahte pere kompoakepah lelepek kan kaidehn keper kante me kak kauwehla arail nanpwungmwahu reh ahpw pil sang mehla.—Kaud. 21:4.

9. Dahme Siohwa ketin kasik me irail me lukodohng nan sapwellime impwalo pahn wia?

⁹ E uhdahn wia pai kaselel ehu en wia emen me lukodohng nan sapwellimen Siohwa impwal. Kitail kak ahneki nanpwungmwahu keren reh me kak poatopoat. Dahme kitail anahne wia ma kitail men wiahte tohn sapwellime impwal? Ma emen lukeiukla ni imweo, ke pahn men wia soahng kan me pahn kaperenda ih. Karasepe, ele e kasik me ke pahn kihsang ahmw sohri ko mwohn ahmw pedolong, oh ke pahn wia met. Duwehte met, kitail uhdahn men ese dahme Siohwa ketin kupwurki sang irail kan me men wiahte tohn sapwellime impwal. Atail poakohng Siohwa kin kamwakid kitail en wia uwen atail kak koaros “en uhdahn kaperenda ih.” (Kol. 1:10) Mehlel me Siohwa iei kompoakepatail, ahpw e pil ketin wia atail Koht oh Samatail, me warohng atail wahu. (Mel. 25:14) Kitail en dehr manokehla met oh ahnsou koaros wauneki ih. Atail wauneki pahn sewese kitail en soikala wiewia kan me pahn kansensuwedihada. Kitail kin uhdahn inengieng “peikiong atail Koht ni karakarahk.”—Maika 6:8.

SIOHWA SOHTE KETIN LIPILIPILKI MEHN ISRAEL KAN

10-11. Ia duwen sapwellimen Siohwa wiewia ong mehn Israel kan nan sapwtehn en Sainai eh kasalehda me e sohte ketin lipilipilki aramas?

¹⁰ Siohwa sohte kin ketin lipilipilki kompoakepah kan. (Rom 2:11) Kitail kak sukuhlki met sang ni mwomwen sapwellime wiewia ong mehn Israel ko nan sapwtehn en Sainai.

¹¹ Mwurin eh ketin kapitasang sapwellime aramas akan sang kalidu nan Isip, Siohwa ketin idihada samworo kan pwehn papah nan impwal sarawio. E ketikihong mehn Lipai kan en apwalih pwukoa teikan nan impwal sarawio. Ia duwe, Siohwa kin ketin apwalih mwahu irail kan me kin papah nan impwal sarawio mwahusang irail kan me mi karanih wasao? Soh! Siohwa sohte kin ketin lipilipilki aramas.

12. Ia duwen sapwellimen Siohwa wiewia ong mehn Israel kan nan sapwtehno eh kasalehda me e sohte kin ketin lipilipilki aramas? (Eksodus 40:38) (Pil kilang kilel.)

 ¹² Emenemen mehn Israel kak wia kompoakepahn Siohwa me keren, mehnda ma e kin papah nan impwal sarawio de soh oh mehnda ma e mi kin karanih impwalo de soh. Karasepe, Siohwa ketin tehk mwahu me wehio pwon kak kilang uhren depweko oh uhren kisiniei ehu me mi pohn impwal sarawio. (Wadek Eksodus 40:38.) Ni ahnsou me pelien depweko kin tepida mwekidla ehu wasa, pil irail kan me mi keieu dohsang impwalo kak kilang. Eri irail kak kihpene arail kepwe kan, imwarail impwal kan, oh iangih aramas ako kohkohla. (Nemp. 9:​15-23) Aramas koaros kak rong ngilen sowi silper riau ko me kin padahkihong irail me re anahne tepida mwekid. (Nemp. 10:2) Eri met sohte wehwehki me emen me mi karanih impwal sarawio ahneki nanpwungmwahu keren rehn Siohwa laudsang irail kan me mi wasa doh. Ahpw, mehn Israel koaros kak wia emen me lukodohng nan sapwellimen Siohwa impwal oh kamehlele me e pahn ketin kaweid oh pere irail. Duwehte rahnwet, sohte lipilipil wasa me kitail kin mi ie nin sampah, Siohwa kin ketin poakohng, apwalih, oh pere kitail.

SIOHWA SOHTE KIN KETIN LIPILPILKI ARAMAS RAHNWET

13. Dahme kahrehda kitail kak nda me Siohwa sohte kin ketin lipilipilki aramas rahnwet?

¹³ Ekei sapwellimen Koht aramas akan rahnwet kin mi karanih poasen kaun de ohpis en Sounkadehdehn Siohwa kan. Ekei kin papah nan wasa pwukat. Met kahrehda irail pwukat kak iang wia doadoahk tohto nan wasa pwukat oh pil iang werekiong irail kan me kin tiengla mwowe. Ekei kin papah nin duwen sounapwalih me kin seiloak de doadoahngki pali laud en arail ahnsou en papah Siohwa ni soangen ahl teikan. Mehnda ma ke sohte kin iang wia soahng pwukat, ke kak kamehlele me ke wiahte emen me lukodohng nan sapwellimen Siohwa impwal oh me e ketin poakohng  uhk. E uhdahn ketin mwahngih pein kowe oh pahn ketikihong uhk dahme ke anahne. (1 Pit. 5:7) Siohwa ketikihong emenemen sapwellime ladu padahk kan me rasehng mwenge oh kin ketin kaweid oh pere irail.

14. Ia pil ehu ahl me Siohwa ketin kasalehda me e sohte ketin lipilipilki aramas?

¹⁴ Ehu ahl me Siohwa kin ketin kasalehda me e sohte ketin lipilipilki aramas iei sang ni eh ketin tehk mwahu me aramas koaros kak wadek Paipel. Nting Sarawi kan tepin ntingdi ni lokaia siluh: Ipru, Aramaik, oh Krihs. Ia duwe, irail kante me kak wadek Paipel ni lokaia pwukat me kak ahneki nanpwungmwahu keren rehn Siohwa a irail kan me sohte kak wadek sohte kak? Soh.—Mad. 11:25.

15. Dahme kadehdehda me Siohwa sohte kin ketin lipilipilki aramas? (Pil kilang kilel.)

¹⁵ Siohwa sohte ketin luke kitail en wia kompoakepah pwehki kitail sukuhl laud de kitail ese lokaiahn Ipru, Aramaik, oh Krihs. Siohwa ketin padahkihong aramas koaros sapwellime erpit a kaidehn irail kante me sukuhl laud. Sapwellime mahsen Paipel, kawehwehdier ni lokaia kid kid kei, kahrehda aramas akan nin sampah pwon kak paiekihda padahk kan loale oh sukuhlki ia duwen arail kak wiahla kompoakepah.—2 Tim. 3:​16, 17.

WIAHTE EMEN ME SIOHWA KIN “KUPWURPERENKI”

16. Nin duwen me Wiewia 10:​34, 35 mahsanih, ia duwen atail kak wiahte emen me Siohwa kin ketin kupwurperenki?

¹⁶ E uhdahn wia pai kaselel ehu en wia emen me lukodohng nan sapwellimen Siohwa impwal. Ih me kin keieu ketin kadek, limpoak, oh kin keieu ketin kasamwo aramas. Patehng met, e sohte kin ketin lipilipilki aramas. E kin ketin kasamwo koaros sohte lipilipil wasa kitail mi ie, tikida ie, sukuhl ie, mehn ia, keinek en ia, sounpar, de ma kitail ohl de lih. Ahpw, Siohwa kin ketin kasamwo irail kante me kin peikiong ren wia kisehn sapwellime impwal.—Wadek Wiewia 10:​34, 35.

17. Ia wasa kitail pahn diarada soahng teikan duwen atail en wia emen me lukodohng nan sapwellimen Siohwa impwal?

¹⁷ Duwehte me kileldi nan Melkahka 15:​1, Depit peidengki: “Maing KAUN, ihs me kak patohlong nan Tehnpasomwi? Ihs me kak patohwan kaudok pohn Saion, sapwellimomwi dohl sarawio?” Siohwa eri ketin doadoahngki Depit pwehn sapengala peidek pwukat. Iren onop en mwurin met pahn koasoia ekei soahng kan me kitail anahne wia pwehn kaperenda Siohwa oh wiahte kompoakepah.