I ipwidi nan December 22, 1929, nan Noville, kisin kousapw kis karanih Bastogne, nan Belgian Ardennes. Nan kousapwo, mie wasahn mwaht oh apwalih mahn duwau. I kin taman ni ei tikitiko ahnsou me ei peneineio kin mi nan at mwahto. Ahnsou ko wia ahnsou kaperen kei. Ngehi oh riei pwutak me tikitik sang ieo, Raymond, kin kohla kihsang milik rehn kou ko rahn koaros oh pil iang sewese dolung wahn at mwahto. Nan at kousapwo, kiht koaros kin sawaspene.

Ei pahpa nohno, Emile oh Alice, kin poadidiong Kadolik. Ira kin iang towehda Mihsa Rahn Sarawi koaros. Ahpw, mpen pahr 1939, pioneer kei sang England kohdo ni at kousapwo oh idek rehn ei pahpao ma e men oahte nah makasihn Consolation (met adaneki Awake!). Ei pahpao mwadang esehda me dahme makasihn ko koasoakoasoia mehlel oh met kamwakid ih en tepida wadek Paipel. Ni ahnsou me e uhdihsang iang Mihsa, mehn mpat kadek ko uhd wiahla sounuhwong kehlail kei. Irail kin idingkihong pahpa en iangete Kadolik, oh met kin kahrehda akamai tohto.

E uhdahn kansensuwed en kilang mehn mpat ko ar uhwong pahpa. Met kahrehda I en peki sawas sang Koht nan kapakapo me I koasoiahda nin tapio. Ni ahnsou me mehn mpat ko ekisekis sohla uhwong ei pahpao, I uhdahn perenda. I uhdahn kamehlelehla me Siohwa iei “Sounkaronge kapakap.”

Pwihn en Nazi Sehmen tepida mahwen nan Belgium nan May 10, 1940, oh kahrehda aramas tohto en tangasang wasao. At peneineio tangala ni palieir en France. Ni at tangatang kohla, ekei pak se kin mihla wasa keper me sounpei en Sehmen oh France ko kin mahmahwenpene.

Mwuhr, ni at pwurala ni imwato, se diarada me pali laud en at kepwe ko pirapala. Nait kidio kelehpw,  Bobbie, me mi mwo pwehn kasamwo kiht. Dahme wiawihong kiht kahrehiong ie en medewe, ‘Dahme kahrehda mahwen oh lokolok laud kin wiawi?’

Erein ahnsou ko, se kin paiekihda laud mwemweit en Brother Emile Schrantz, a emen pioneer lelepek me pil wia elder men. E kawehwehda ni sansal sang nan Paipel dahme kahrehda mie lokolok oh pil sapengala ei peidek teikan me pid mour. I kakairada nanpwungmwahu keren rehn Siohwa oh uhdahn kamehlelehla me Ih Koht limpoak men.

Pil mwohn mahweno imwisekla, at peneineio perenki at kin kalapw tuhwong oh koasoiong Sounkadehde teikan. Nan August 1943, Brother José-Nicolas Minet mwemweitdo ni at wasao pwehn wia padahk ehu. E idek, “Ihs me men papidaisla?” Ei pahpao kihda peho, oh I pil kihda pehie. Se papidaisla nan kisin pillap kis me karanih imwato.

Nan December 1944, karis en sounpei en Sehmen tepida arail mahwen me keieu laud, me aramas kin kahdaneki Battle of the Bulge, nan Mahwen Keriau en Sampah ni pali mese en Iurop. Se kin kousoan karanih wasa me mahweno wiawi, eri erein sounpwong ehu se anahne mi nan pere kis pahn imwato. Ehu rahno ni ei pedoila pwehn kamwenge nait mahn ko, pakudang ehu lel ni imwen nait mahn ko oh kauwehla kadoken ihmwo. Emen sounpei en wehin Amerika me rukuruk ni imwen nait mahn ko me karanih ie likwerdo nda, “Rukidi!” I tangala reh oh rukidi limwah oh e kihsang eh lisoarop en mahweno oh pwainkihdi moangeie pwehn pere ie.

Mwurin mahweno, se kak kaukaule tuhwong oh koasoiong riat Kristian kan nan mwomwohdiso en Liège, me mi paliepeng oh dohki mwail 56 sang kiht. Kedekedeo, se wiahla kisin pwihn ehu me kin onopki Paipel nan Bastogne. I tepida doadoahk nan pesines ehu me kin wia daksis oh ahneki ahnsou mwahu en sukuhlki palien kosonned. Mwuhr, I kin doadoahk nan ohpis ehu nan kopermento. Nan pahr 1951, se koasoanehdi mihting tohrohr ehu en wiawi nan Bastogne. Mpen aramas epwiki me iang towehda, pil iangahki pioneer  sister uhdahn ngoang men, Elly Reuter. E pwaisikelki mwail 31 pwehn iang towehda. Mwuhr se poakepoakehla emenemen oh wiahda inoun pwopwoud. Elly alehdi luhk en iang Sukuhl en Kilead nan Wehin Amerika. Eri e anahne ntingla ni poasen kaun en Sounkadehde Siohwa kan pwehn kawehwehiong irail kahrepen eh sohte kak iang. Brother Knorr, me ahnsowo kin tiengla mwowe nan sapwellimen Siohwa aramas akan, sapengki me e koapworopworki me ele ehu rahn Elly oh eh pwoudo pahn kak iang Kilead. Se pwopwoudla nan February 1953.

Nan pahrohte, ngehi oh Elly iang towehda mihting tohrohro (New World Society Assembly) me wiawi nan Yankee Stadium, New York. Ni at mi mwo, I tuhwong brother men me men kihong ie doadoahk mwahu ehu oh luke kiht en keseula Wehin Amerika. Mwurin at kapakapkihong Siohwa ireo, ngehi oh Elly pilada en dehr ale doadoahko oh se pwurala Belgium pwehn sewese pwihnen kalohk tikitiko nan Bastogne me sounkalohk ehkte iang. Nan pahro mwuhr, se uhdahn perenki at nainekihda kisin pwutak kis, Serge. Ahpw e kansensuwed pwe sounpwong isuh mwurin mwo, Serge soumwahuda oh mehla. Se ehukihong Siohwa nan kapakap duwen at nsensuwedo, oh koapworopwor en kaiasadao kin kakehlaka kiht.

Nan October 1961, I diar doadoahk ehu ong lepin ahnsou pwe I en kak pioneer. Ahpw rahnohte, emen brother me iang pwihn me kin apwalih ohpis en Sounkadehdehn Siohwa kan nan Belgium call ie. E idek ma I kak tepida papah nin duwen sounapwalih me kin seiloak. Ahpw I idek, “Se kak pioneer mahs mwohn at wia pwukoahn?” Brother ko nda me se kak. Mwurin at pioneerki sounpwong waluh, se tepida wia doadoahk en sounapwalih me kin seiloak nan September 1962.

Mwurin sounpar riau nan doadoahko, se alehdi luhk en kohla papah nan Pedel en Brussels. Se tepida papah wasao nan October 1964. Pwukoa kapw wet wadohng kiht kapai tohto. Mwurinte Brother Knorr mwemweitdo ni at Pedelo nan 1965, I pwuriamweikihla ei ididda en iangala pwihn me kin apwalih ohpiso. Mwuhr, ngehi oh Elly alehdi luhk en iang Sukuhl en Kilead nempe 41. Dahme Brother Knorr nda sounpar 13 samwalahro pweida! Mwurin at kesepwil, se pwurala ni Pedel en Belgium.

Erein sounpar tohto I ahneki pwais kaselel en kin doadoahngki dahme I ese me pid palien kosonned pwehn uhki pwuhng en sapwellimen Koht aramas akan nan Iurop oh wasa teikan pwe ren wia arail kaudok ni saledek. (Pil. 1:7) Met kahrehda I en tuhwong me lapalap akan nan koperment en sahpw daulih 55 me kin keinapwih atail doadoahk en kalohk. I sohte kin koasoiaiong irail duwen ei koahiek nan palien kosonned, ahpw I kin ndahte me I kin papah Koht. I kin ahnsou koaros kapakapki sapwellimen Siohwa kaweid pwehki  I ese me ‘e mengeiong Siohwa en ketin kakaun kupwur en nanmwarki kan rasehng eh kin ketin kaweid pwilipwilahn piletik ehu.’—Lep. Pad. 21:1.

I tamante ehu pako me I koasoiong ohl emen me iang pwihn me kin wiahda de wekidala kosonned kan nan Iurop (European Parliament). I pekiher pak tohto en koasoiong ahpw kohkohlaho e pwungki sen tuhpene. E koasoia, “I pahn mweidohng uhk minit limaute, sohte daulih.” Ngehi eri itiekidi oh tepida kapakap. Ohlo salohda oh idek dahme I wiewia. I kilengda oh nda, “I kalahngankihong Koht omw wia emen sapwellime sounpapah.” E idek, “Ia wehwehn men?” I kasalehiong pwuhken Rom 13:4. E kin iang Prohs, eri iren Paipelo kamwakid ih. Ia imwilahn met? E mweidohng ie elep en awa, oh at tuhpeneo uhdahn pweida mwahu. E pil kasalehda me e kin wauneki doadoahk me Sounkadehdehn Siohwa kan kin wia.

Erein sounpar tohto, sapwellimen Siohwa aramas akan kin lelohng kopwung tohto nan Iurop me pid soupoupali, pwuhng en apwalih seri, daksis, oh soahng teikan. E wia pwais kaselel ehu en iang kopwung tohto pwukat oh pein kilang duwen Siohwa eh kin ketin sewese kiht en kana. Sounkadehdehn Siohwa kan kanahier nan kopwung daulih 140 nan mwoalen kopwung lapalap en Iurop (European Court of Human Rights)!

Nan 1990 samwa, I kin iang Brother Philip Brumley sang poasen kaun en Sounkadehdehn Siohwa kan, oh Brother Valter Farneti sang Italy, pwehn sewese riatail Kristian kan nan Cuba en kaudokiong Siohwa ni saledek pwehki atail doadoahko keinapwidi wasao. I ntinglahng ohpis en embassy en Cuba nan Belgium oh eri tuhwong ohl lapalap emen me pahn pwukoahki at pekipeko. Erein at tepin mihting ko, se sohte kak kapwungala sawehwe kan me kahrehiong kopermento en keinapwihdi atail doadoahko wasao.

Mwurin at kapakapki sapwellimen Siohwa kaweid, se peki oh alehdi mweimwei sang kopermento en kadarala Cuba Paipel 5,000. Paipel ko lella wasao oh kohpeseng rehn riatail ko, kahrehda se kamehlele me Siohwa ketin kapaiahda at nanti laud. Eri se pwurehng peki mweimwei en pil kadarala Paipel 27,500. Kopermento pil mweidada. En sewese riat Kristian kan nan Cuba en alehdi pein neirail Paipel kin uhdahn kapereniehda.

I kohla Cuba pak tohto pwehn sewese irair en atail doadoahko me pid palien kosonned en wasao. Erein ei wia met, I kak wiahda nanpwungmwahu rehn me lapalap tohto nan kopermento.

Nan pahr 1994, aramas daulih 1,000,000 sang keinek en Tutsi kamakamala nan Rwanda. Ekei riatail brother oh sister kan pil kamakamala. Sohte pwand, pwihn en brother kei idihdida pwehn sewesehki riatail kan wasao dahme irail anahne, duwehte mwenge, kepwe, oh soahng teikan.

Ni ahnsou me at pwihno lella Kigali, poasen kaun en Rwanda, se diarada ohpis en kawehweo oh wasahn neitail sawasepen Paipel ko uhdahn ohkihla lipwen kesik. Se rong koasoi tohto duwen riatail Kristian kan ar kamakamkihla naip. Ahpw se pil rong duwen riatail kan ar kin kasalehpene limpoak. Karasepe, se tuhwong emen brother mehn Tutsi me rukula nan pwoahr ehu erein rahn 28, oh peneinei ehu mehn Hutu, me pil wia Sounkadehde kei, me pere brothero. Erein ehu mihting nan Kigali, se doadoahk laud pwehn kangoange oh kansenamwahwihala riatail Kristian daulih 900.

Se uhd kohla Zaire (met adaneki Democratic Republic of the Congo) pwehn rapahki Sounkadehde tohto mehn Rwanda me tangasang arail wasao tangalahng camp kan me karanih kahnimw en Goma. Se sohte kak diarirailda, eri se kapakap oh peki Siohwa en ketin kaweidkitla rehrail. Kiht eri kilang ohl emen eh alialu kohdo reht, oh se idek ma e ese Sounkadehdehn Siohwa kan. Ohlo sapeng nda, “Ei, ngehi emen Sounkadehde. I pahn perenki kahre kumwailla rehn pwihn me kin kihda sawaso.” Mwurin at tuhwong pwihnen sawaso me uhdahn kangoange kiht koaros, se pil tuhwong riatail meh 1,600 me tangasang arail wasa pwehn kangoange oh kansenamwahwihirailla. Se pil ehukihong irail kisinlikou ehu sang Pwihn me Kin Apwalih Mwomwohdiso nan Sampah Pwon. Riatail ko uhdahn perenkihda arail rong kisinlikowo me koasoia: “Se kin kalapw kapakapkin kumwail. Se ese me Siohwa sohte pahn ketin likidmeliehkumwailla.” Dahme Pwihno koasoia uhdahn mehlel. Rahnwet, Sounkadehde daulih 30,000 kin ehupene papah Siohwa ni peren.

Mwurin at pwopwoudkier kereniong sounpar 58, ei pwoudo Elly mehla nan pahr 2011. I kin padahkihong Siohwa uwen ei nsensuwed, oh e kin ketin kansenamwahwihela. I kin pil diar nsenamwahu sang ni ei kin iang kalohki rongamwahu en Wehin Koht ong mehn mpei kan.

Mendahki I sounparehr 90 samwa, I kin ieiangete kalohk ehuehu wihk. I pil perenki sewese Palien Kosonned nan ohpis en Sounkadehdehn Siohwa kan nan Belgium, en ehukihong meteikan duwen ei mour erein ei papah Siohwa, oh en sewese kangoange me pwulopwul kan nan Pedel.

Mpen sounpar 84 samwalahro, I ehdin wia ei kapakap ong Siohwa. Sang ahnsowo kohdo, ei mour uhdahn kaperen oh kahrehiong ien karanihala Siohwa. Ia uwen ei kalahnganki me erein ei mour Siohwa kin ketin karonge ei kapakap kan.—Mel. 66:19. b