1. Kahpwal dah kan me tepin Kristian kan kin ahneki?

EHU ahnsou nanpwungen pahr 62 oh 64, wahnpoaron Piter ntinglahng irail “me koukousoanseli duwehte mehn keiru kei, nan wehin Pondus, Kalesia, Kapadosia, Eisia oh Pidinia.” (1 Pit. 1:1) Kristian pwukat kohsang soangsoangen wasa kan. Irail kin lelohng “songosong kalok kan,” oh anahne mehn kangoang oh kaweid kan. Irail pil kousoan ni ahnsou ehu me uhdahn keper. Piter ntingihedi: “Imwin mehkoaros kerendohr.” Mwotomwotsang sounpar eisek, Serusalem pahn kamwomwomwla. Dahme kak sewese Kristian kan wasa koaros en dadaurete pahn kahpwal kan ni ahnsowo?​—1 Pit. 4:4, 7, 12.

2, 3. Dahme kahrehda Piter kangoange rie Kristian kan ren kasamwo meteikan? (Menlau kilang tepin kilel.)

² Ehu me Piter kangoangehki rie Kristian kan en wia iei en ‘ritingadahng [“kasamwo,” NW] emenemen irail koaros nan imwarail kan.’ (1 Pit. 4:9) Lepin lokaiahn Krihk wet “kasamwo” kin wehwehki “en perenki de kadekohng aramas akan me kitail sehse.” Ahpw Piter kin kangoange rie Kristian kan en kasamwo “emenemen” mendahki irail esehlahr emenemen de kin ehupene wia soahng kan. Ia duwen ar kasamwo meteikan eh kin kak sewese irail?

 ³ Met kin kahrehda ren karanihala emenemen. A ia duwen komwi? Ke tamataman ahnsou kan me kaperen en werekiong emen me kasamwo iuk ong imweo? Oh ni ahnsou me ke luke emen ong nan imwomwo, met kin kahrehda kumwail en karanihala emenemen. Ehu ahl mwahu en esehla riatail Kristian kan iei en kasamwo irail. Kristian kan ni mwehin Piter anahne karanihala emenemen pwehki kahpwal kan kin wie lalaudla. Ni “imwin rahn” pwukat, kitail pil anahne wia soahngohte.​—2 Tim. 3:1.

4. Peidek dah kei me kitail pahn koasoiapene nan iren onop wet?

⁴ Ni ahl dah kan me kitail kak kasamwo “emenemen”? Dahme kak kaukitaildihsang en kasamwo meteikan, oh ia duwen atail kak kamwahwihala atail kin wia met? Dahme kak sewese kitail en wia mwahu ong irail kan me kin kasamwo kitail?

5. Ia duwen atail kak kasamwo meteikan ni atail mihting kan?

⁵ Ni mihting kan: Siohwa oh sapwellime pwihn kin luke kitail ong mihting kan. Kitail men koaros me towehda atail mihting kan en pehm me kitail kasamwo irail, ahpw mehlel me kapw kan. (Rom 15:7) Siohwa me pil ketin kasamwo irail, eri kitail mwahuki irail en soanamwahu, sohte lipilipil soangen likou dah me re likawih de mwomwarail. (Seims 2:1-4) Ma ke kilang emen kelehpw kohdo, ke sou luke ih en mwohd rehmw? Ele e pahn kalahnganki ma ke sewese ih en wehwehki dahme kin wiawi erein mihtingo de rapahki iren Paipel kan me pahn wadawad. Met wia ahl kaselel ehu en “kasamwo mehn keiru kan.”​—Rom 12:13.

6. Ihs me kitail en keieu kasamwo?

⁶ Mwenge marahra de ahnsoun mwenge: Nan Paipel, aramas akan kin kalapw kasamwo meteikan ong mwenge. Re kin kasalehda met pwehki re men kompoakepahnki oh ahneki popohl rehrail. (Sen. 18:1-8; Sounkopwung 13:15; Luk 24:28-30) Ihs me kitail en keieu kasamwo? Irail pwukat iei riatail Kristian kan nan mwomwohdiso. Ni imwin sampah wet eh wie susuwedla, kitail anahne koapworopworki riatail Kristian kan oh en wia kompoakparail kei me kin loalopwoat ong irail. Nan pahr 2011, Pwihn me Kin Apwalih Mwomwohdiso nan Sampah Pwon wekidala ahnsou en onop Kahn Iroir ong peneinei en Pedel nan Wehin Amerika sang kuloak 6:45 ni soutik ong 6:15 ni soutik. Dahme kahrehda? Pakairo kasalehda me e pahn mengei ong tohn Pedel kan en kasamwo emenemen ma mihting kan kin imwisekla mwadang. Ohpis teikan en Sounkadehdehn Siohwa kan pil kin wia soahngohte. Met kin wia ahnsou mwahu ong tohn Pedel kan en esehla emenemen.

7, 8. Ia duwen atail kak kasamwo brother kan me mwemweitdo ni atail Wasahn Kaudok?

⁷ Ni brother kan sang mwomwohdiso teikan ar kin kohdo wia padahk nan atail Wasahn Kaudok, iangahki sounapwalih me kin seiloak kan oh ekei pak wiliepen ohpis en Sounkadehdehn Siohwa kan, e wia ahnsou mwahu ong kitail en kasamwo irail. (Wadek 3 Sohn 5-8.) Ehu ahl me kitail kak wia met iei en lukehdo irail nan imwatail ong mwenge marahra de ahnsoun mwenge.

⁸ Emen sister nan Wehin Amerika nda: “Erein sounpar tohto, ngehi oh ei pwoudo kin ahneki ahnsou mwahu en kasamwo brother tohto me pahn wia padahk oh arail pwoud kan ni imwato.” E pehm me ahnsou ko koaros kin kakehlakahda ara pwoson oh ahnsowohte pil kaperen. E nda: “Sohte pak ehu se koluhkihla met.”

9, 10. (a) Ihs me ele anahne mi rehtail ekis werei? (b) Ia duwe, irail kan me imwarail kan tikitik kak sawas? Menlau kihda ehu karasaras.

⁹ Irail me kin mi rehtail ekis werei: Mahso, aramas kin kalapw kihong irail kan me mwemweitdo wasa ren mi ie. (Sohp 31:32; Pail. 22) Rahnwet, ele kitail pil anahne wia soahngohte. Sounapwalih me kin seiloak kan pil kin anahne wasa ehu me re kak mi ie ni arail mwemweitla ni mwomwohdiso kan. Met pil duwehte ong  tohnsukuhl en sukuhl en sapwellimen Siohwa pwihn oh irail me kin toukihda pein irail en iang kauwada Wasahn Kaudok kan. Ahpw ia duwen irail kan me solahr imwarail pwehki re lelohng kahpwal kan en melimel, rerrer en sahpw de iloak laud ape? Ele irail anahne wasa ehu en kousoan lao imwarail kan pwurehng kokouda. Kitail en dehr medewe me irail kante me imwaneki ihmw laud me kak sawas. Ele irail wiahier met pak tohto mwoweo. Ia duwe, ke kak toukihda ehu wasa me emen kak mi ie mehnda ma imwomwo tikitik?

¹⁰ Emen brother nan Palieir en Korea tamatamante ahnsou me e luke tohnsukuhl en sapwellimen Siohwa pwihn mi reh. E nda: “Nin tapio I ekis peikasal pwehki ngehi oh ei pwoudo ahpwtehn pwopwoudida oh se kin mi nan kisin ihmw kis. Ahpw en mweidohng tohnsukuhl ko en mi reht uhdahn wia ahnsou kaperen ehu. Nin duwen pwopwoud kapw ehu, se kak kilang ia uwen peren me pwopwoud ehu kak ahneki ni ara kin ehupene papah Siohwa oh wiahda mehn akadei kan.”

11. Dahme kahrehda kitail anahne kasamwo irail me kapwodo nan atail mwomwohdiso?

¹¹ Brother oh sister kapw kan nan mwomwohdiso: Ele ekei brother oh sister de peneinei kan keseudo nan omw wasa sang mwomwohdiso teikan. Ele re keseudo pwehki omw mwomwohdiso anahne sawas. De ele irail pioneer kei me pekederdo nan omw mwomwohdiso. Met kin wia wekidekla laud ehu ong irail. Irail pahn anahne ahnla wasa kapw, mwomwohdiso kapw, oh mwein re pil anahne esehla ehu lokaia tohrohr de tiahk en wasao. Ia duwe, ke kak luke irail ong mwenge marahra de ahnsoun mwenge de kohla wasakis? Met pahn sewese irail en wiahda kompoakparail kapw kan oh re kak wiahda wekidekla kan ong arail irair kan.

12. Dahme wiawi me kasalehda me ke sohte anahne kaunopada soahng tohto pwehn kasamwo meteikan?

¹² Ke sohte anahne kaunopada soahng tohto pwehn kasamwo meteikan. (Wadek Luk 10:41, 42.) Emen brother tamatamante dahme wiawi ni ih oh eh pwoudo ara tepin wiahla misineri. E nda: “Se pwulopwulte, soakoahiek, oh loaleidki sapwato. Ehu ni soutiko, ei pwoudo uhdahn loaleid, oh ei nannanti en sewese ih sohte pweida. Ahpw, mpen kuloak 7:30 ni soutik, mie me letelet ni at wenihmwo. Tohnsukuhl en Paipel men me kesikesihnen ni wenihmwo kolokol karer siluh. Liho kohdo pwehn kasamwo misineri kapw kan. Se lukehiong ih nan imwat oh kihong nime pihl. Kiht eri wiahda tea oh pilen sokoled karakar. Se saikinte esehla lokaiahn Swahili, oh liho pil sehse lokaiahn wai.” Brothero koasoia me dahme wiawihong ira sewese ira en tepida wiahda kompoakepahra kapw kan wasao oh ara peren laudla.

13. Ia duwen en kasamwo meteikan eh kin seweseiuk?

¹³ Ia duwe, mie pak me ke kin peikasalki kasamwo meteikan? Ma ei, ele ke kin katihasang ahnsou kaperen wet oh wiahda kompoakepah kan me pahn wiahla omw pirien kohkohlahte. Kasamwo meteikan kin wia ehu ahl en katikala omw loaleid. Ahpw ele ke medewe, ‘Dahme kahrehda emen en peikasalki kasamwo meteikan?’ Mie ekei kahrepe kan.

14. Dahme kitail kak wia ma kitail sohte ahneki ahnsou laud oh kehl ong kasamwo emenemen?

¹⁴ Atail ahnsou oh kehl: Sapwellimen Siohwa aramas akan kin uhdahn kedirepw oh kin ahneki pwukoa tohto. Ekei kin medewe me re sohte ahneki ahnsou laud de kehl pwehn kasamwo meteikan. Ma ke ahneki soangen pepehm wet, ke anahne wekidala omw koasoandi kan pwehn kasamwo emenemen de kalahnganki ahn emen eh kasamwo iuk. Met kesempwal pwe Paipel kangoange kitail en kasamwo meteikan. (Ipru 13:2) Eri en kasamwo meteikan wia mehkot pwung. Ahpw pwe ken wia met, ke anahne katikala omw ahnsou ong soahng kan me sohte uhdahn kesempwal.

15. Dahme kahrehda ekei kin pehm me re sohte kak kasamwo meteikan?

 ¹⁵ Omw pepehm ong pein uhk: Ia duwe, mie pak me ke kin men kasamwo meteikan ahpw ke pehm me ke sohte kak wia met? Ele ke kin namenek oh pwunodki ma irail me ke kasamwo pahn sangatada. Ele ke sohte naineki mwohni laud oh ke pwunodki me ke sohte kak kihong irail me ke kasamwo dahme Kristian teikan kak kihong irail. Ahpw tamataman me ihmw ehu sohte anahne kaselel. Irail kan me ke kasamwo pahn perenki ma imwomwo mwakelekel oh soandi mwahu oh pil ma ke kin perenki kasamwo irail.

16, 17. Dahme ke kak wia ma ke kin pwunodki kasamwo meteikan?

¹⁶ Ma ke pwunodki kasamwo meteikan, ke sohte kelehpw. Emen elder nan Britain nda: “Mie pepehm en pwunod ni emen eh kin kaunopada pwehn kasamwo meteikan. Ahpw mehkot me pid atail papah Siohwa, kapai kan oh nsenamwahu me imwikihla atail wia met inenen mwahusang pwunod koaros. I kin perenki mwomwohd rehn irail ko me I kasamwo niminim koahpi oh koasoakoasoi.” E kesempwal en ahnsou koaros kasalehda me ke nsenohki irail kan me ke kin kasamwo. (Pil. 2:4) Pali laud en aramas akan kin perenki koasoia dahme wiawihong irail nan arail mour. Oh ehu ahl me keieu mwahu en rong soahng pwukat iei ahnsou me kitail kin werekiong meteikan. Pil emen elder nda: “En kasamwolong nan imweio kompoakepahi kan sang nan mwomwohdiso sewese ie en kalaudehla ei wehwehkihla irail oh e kihong ie ahnsou laud en esehla irail, ahpw mehlel duwen mwomwen arail iangala padahk mehlel.” Ma ke kin kasalehda me ke nsenohki irail kan me ke kasamwo, ke kak kamehlele me re pahn perenki arail ahnsou rehmw.

¹⁷ Sister pioneer men me kin kalapw kasamwo irail kan sang soangsoangen sukuhl en sapwellimen Siohwa pwihn en mi reh nda: “Nin tapio I kin pwunodki pwehki kepwe kan nan imweio malaulau oh kepwe ko me aramas akan kihong ie sohte kapw. Emen sister me pwoudiki brother me kin wia kasukuhl kangoange ie oh I sohla nohn pwunod. E nda me ni ara wia ara doadoahk en seiloak, wihk kan me ira keieu perenki iei ahnsou me ira kin mihmi rehn emen me ahneki nanpwungmwahu kehlail rehn Koht me sohte ahneki kepwe tohto ahpw ahneki soangen madamadauohte me ira ahneki, me iei en papah Siohwa oh sohte kedirepwki mehkan me sohte nohn kesempwal nan mour. Met katamankihong ie dahme ei nohno ndaiong kiht seri kan: ‘Tungoale tehntuhke rehn aramas me ke poakepoake mwahusang tungoale uduk iou wasa me kailok mie.’” (Lep. Pad. 15:17) Kitail sohte anahne pwunod pwehki dahme keieu kesempwal iei atail kasalehda limpoak ong irail kan me kitail kasamwo.

18, 19. Ia duwen kasamwo emenemen eh kak sewese kitail en powehdi atail madamadau sapwung duwen meteikan?

¹⁸ Omw pepehm ong meteikan: Mie emen me kin kalingeringerih iuk nan omw mwomwohdiso? Ma ke sohte song en powehdi pepehm pwukat, omw pepehm sohte pahn wekila. Ele ke sohte pahn men lukehdo emen nan imwomwo ma ke sohte perenki eh wiewiao. De ele mie emen me kansensuwedihiukala mahso oh e apwal ken manokehla.

¹⁹ Paipel mahsanih me ke kak kamwahwihala omw nanpwungmwahu rehn meteikan, pil omw imwintihti kan, ma ke kin kasamwo irail. (Wadek Lepin Padahk 25:21, 22.) Ma ke lukehiong emen nan imwomwo, met pahn kak sewese iuk powehdi omw madamadau sapwung kan oh kalaudehla omw nanpwungmwahu oh popohl reh. Ele ke kakehr kilang soangen irair kaselel kohte reh me Siohwa ketin mahsanih ni eh ketin kainangihedo aramaso nan padahk mehlel. (Sohn 6:44) Ni limpoak eh kin kamwakid uhk en luke emen me sohte kasik ken kasamwo ih, met kak wia tepin amwa kompoakepahnkihla emenemen. Ia duwen omw kak tehk mwahu me limpoak iei me uhdahn kin kamwakid uhk? Ehu ahl iei en  kapwaiada kaweid en Pilipai 2:3 (NW) me mahsanih: “Ni aktikitik, kumwail wiahki meteikan lapalapasang kumwail.” Kitail en medewehda ahl akan me riatail Kristian kan kin mwahusang kitail. Ele kitail kak sukuhlki sang arail pwoson, dadaur, de ekei arail irair kaselel en Kristian. Medemedewe irair kaselel pwukat pahn kalaudehla atail poakohng irail oh pahn kamengeila atail en kasamwo emenemen.

20. Dahme kahrehda oh ia duwen atail kak wia aramas likilik men ni atail ale luhk ehu?

²⁰ Sounmelkahkao Depit patohwan idek: “Maing KAUN, ihs me kak patohlong nan Tehnpasomwi?” (Mel. 15:1) Mwurin mwo, Depit koasoia duwen irair kaselel kan me Siohwa ketin kupwurki ong irail kan me e ketin kasamwo en ahneki. Ehu nanpwungen irair pwukat iei en wia aramas likilik men. Wasaht mahsanih: “E kin kapwaiada dahme e inouki ahnsou koaros, mehnda ma e apwal.” (Mel. 15:4) Ma kitail ale luhk ehu, kitail en dehr kauwehla, ahpw ihte ma mie kahrepe kesempwal ehu pwehn kauhdi met. Me lukeiuko ele kaunopadahr omw pahn mwemweitla reh oh ma ke sohte kohla, eh nannanti oh doadoahk laud sohte pahn katepe. (Mad. 5:37) Ekei aramas sohte kin kapwaiada luhk kan me kohwong irail ihte pwe ren kak kohla ni ehu luhk tohrohr me re medewe mwahusang. Ia duwe, kitail kin kasalehda limpoak oh wahu ni soangen ahl wet? Kitail anahne kalahnganki soahng koaros me e wiahiong kitail. (Luk 10:7) Ma kitail sohte kak kohla, e pahn mwahu kitail en kasalehda limpoak oh kadek lamalam oh mwadang kehsehkin ih.

21. Ia duwen atail wauneki tiahk en sahpw ehu eh kak sewese kitail en wia mwahu ong me luke kitail?

²¹ E pil kesempwal en wauneki tiahk en sahpwo. Nan ekei sahpw, kitail kak kohla ni imwen aramas akan ni arail sohte kasik. Ahpw nan sahpw teikan, e mwahu en wiahda koasoandi kan mwohn omw pahn mwemweitla ni imwen aramas akan. Nan ekei wasa, me lukeiuko pahn kaunopada mwenge me keieu mwahu ong uhk, a mwuhr kenen eh peneineio. Nan wasa teikan, kenen koaros duwehpene. Nan ekei wasa, ke pahn anahne iang kihda mwenge. Ahpw ekei wasa, me lukeiuko pahn kasik me ke sohte anahne kihda mwenge. Nan ekei tiahk en sahpw, ni kadek ke pahn nda soh ong ni keieu oh keriau en luhk. Ahpw nan ekei wasa, e suwed en nda soh ong keieu en luhk. Ahnsou koaros kitail anahne wia uwen atail kak en tehk mwahu pwe me luke kitailo en perenki eh luke kitail.

22. Dahme kahrehda e uhdahn kesempwal en kasamwo emenemen?

²² Piter nda: “Imwin mehkoaros kerendohr.” (1 Pit. 4:7) Rahnwet, imwio kerensang mahs. Kitail kin kilang apwal me keieu laud me sampah wet lelohng. Ni koasoandi wet eh wie susuwedla, kitail pahn anahne kasalehiong riatail Kristian kan limpoak laud. Kitail anahne kapwaiada laudsang mahs kaweid me Piter kihda: “Kumwail ritingadahng [“kasamwo,” NW] emenemen kumwail koaros imwamwail kan.” (1 Pit. 4:9) Ei, en kasamwo emenemen kin kaperen oh e kesempwal en wia met nan atail mour ahnsou wet oh pil kohkohlahte.