Ni mehlel, sohte emen kak uhdahn ese mwomwen Pohl. Mahlen kan nan neitail sawasepen Paipel kan wiahte mahlen kaselel kei, a kaidehn uhdahn kilel kei me poahsoandahsang mehn kadehde kan sang irail me kin rapahki poadopoad en aramas.

Ahpw, mie ekei mehn kadehde kan duwen mwomwen Pohl. Karasepe, Kahn Iroir (Zion’s Watch Tower) en March 1, 1902, kasalehda ehu mehn kadehde oh nda: “Nin duwen mwomwen Pohl: . . . Nan ehu pwuhk en mahs, ‘Acts of Paul and Thecla,’ . . . me ntingdi mpen pahr 150 kawehwehda duwen mwomwen Pohl ni ahl me keieu mwahu oh konehng. Pwuhko kawehwehda me Pohl mwotomwot, moangamad, pwukiewet, pwukel, padi ko tuhpene, oh reirei tumweo.’”

Ehu dikseneri me wiawihda nan pahr 1997, The Oxford Dictionary of the Christian Church, koasoia duwen pwuhk en mahs wet: “Kitail kak kamehlele me pwuhken ‘Wiewia kan’ kakete audaudki ire mehlel kei sang poadopoad.” Sounpar epwiki kei mwurin e ntingdi, aramas akan kin kesempwalki pwuhk en mahs wet Acts of Paul and Thecla me kahrehda ire mehlel pwukat kin pwarada nan doaropwe kesempwal en Krihk 80, oh pil nan ekei doaropwe kan ni lokaia teikan. Eri at mahlen kan kin pahrekiong ekei mehn kadehde kan en mahs duwen mwomwen Pohl.

Tamataman me mie soahng teikan me kesempwal sang mwomwen Pohl. Pil ni ahnsou me Pohl wiewia eh doadoahk en kalohk, ekei aramas nda me e “kin luwet oh eh mahsen kan pil sohte wia mehkot.” (2 Kor. 10:10) Ahpw kitail en dehr manokehla me e wiahla Kristian men pwehki manaman kan me Krais ketin wiahda. Kitail pil kak medemedewe dahme Pohl wiadahr nin duwen emen me Krais ketin piladahr pwe en wahlahng mehn liki kan mwaren Sises. (Wiewia 9:3-5, 15; 22:6-8) Oh medewehla kamwahu kan me kitail kak paiekihda sang pwuhk en Paipel kan me Siohwa ketin doadoahngki Pohl en ntingihedi.

Pohl sohte suweiki soahng kan me e pweida loale mwohn e wiahla Kristian men, oh e sohte pil kawehwehda duwen mwomweo. (Wiewia 26:4, 5; Pil. 3:4-6) E nda: “Ngehi me keieu tikitik nanpwungen wahnpoaron kan oh I sohte warohng adaneki wahnpoaron.” (1 Kor. 15:9) Mwuhr e pil ntingihedi: “Ngehi me keieu tikitik rehn sapwellimen Koht [“aramas sarawi kan,” NW], Koht ahpw ketikihong ie kalahngan wet, iei kalahngan en lohkihong mehn liki kan Rongamwahu duwen kapai lapalap kan en Krais.” (Ep. 3:8) Rohng me Pohl lohki uhdahn kesempwalsang soahng kan me pid duwen mwomwen Pohl.