1. Ia mwomwen omw mour mwohn omw tepida onopki Paipel?

 IA MWOMWEN omw mour mwohn omw tepida onopki Paipel rehn Sounkadehdehn Siohwa kan? Tohtohn kitail sohte men medewe duwen met. Ele mwoweo, dahme sampah kin medewe ong dahme pwung oh sapwung kin kamwakid atail madamadau oh wiewia kan. Ma ei, kitail “sohte ahneki koapworopwor oh sohte ese Koht.” (Ep. 2:12) Ahpw mwurin atail tepida onopki Paipel, mwomwen atail mour wekila.

2. Dahme ke diarada ni omw tepida onopki Paipel?

² Mwurin omw tepida onopki Paipel, ke esehda me mie Sahm men nanleng me uhdahn ketin poakohng uhk. Ke esehda me ma ke men kaperenda Siohwa oh wiahla kisehn sapwellime peneinei, ke anahne wekidala laud mwomwen omw mour oh madamadau. Ke anahne sukuhlki en mour pahrekiong sapwellimen Siohwa koasoandi kan.​—Ep. 5:3-5.

3. Nin duwen me Kolose 3:9, 10 mahsanih, dahme Siohwa ketin kupwurki kitail en wia, oh dahme kitail pahn koasoiapene nan iren onop wet?

³ Siohwa iei Sounkapikpatail oh Samatail nanleng, eri e ketin sapwellimanki pwuhng en koasoanehdi soangen wiewia dah kan me sapwellime tohnkaudok kan en wia. Oh e ketin kupwurki me mwohn atail pahn papidaisla, kitail anahne nantihong en ‘kapwuhrasang atail mouren mahs iangahki eh wiewia kan.’ * (Wadek Kolose 3:9, 10.) Iren onop wet pahn sewese irail kan me men papidaisla en sapengala peidek siluh pwukat: (1) Dahkot “mouren mahs”? (2) Dahme kahrehda Siohwa ketin kupwurki kitail en kapwuhrasang atail mouren mahs?  (3) Ia duwen atail kak wia met? Ong me papidaislahr kan, iren onop wet pahn sewese kitail en dehr kin ahneki soangen madamadau de wiewia kan me kitail ahneki mahso.

4. Ia mwomwen emen ni eh “mouren mahs” kin kaunda ih?

⁴ Emen me eh “mouren mahs” kin kaunda ih kin kasalehda madamadau oh wiewiahn uduk. Ele e kin roporop, keh lingeringer, sohte kin kasapahlkalahngan, oh pohnmwahso. Ele e kin perenki kilang kilel de kasdo suwed de kasdo me kin kasalehda tiahk lemei. Mwein e ahneki ekei irair kaselel, oh e kin koluhkihla soahng suwed kan me e nda oh wia. Ahpw eh ineng en wekidala eh madamadau oh wiewia me luwet.​—Kal. 5:19-21; 2 Tim. 3:2-5.

5. Kitail kak kapwuhrasang douluhl atail mouren mahs? Menlau kawehwehda. (Wiewia 3:19)

⁵ Kitail sohte unsek, eri sohte emen kitail kak kihsang douluhl madamadau oh ineng suwed kan. Ekei pak, kitail pahn wia de nda mehkot me kitail pahn koluhkihla. (Ser. 17:9; Seims 3:2) Ahpw ni atail kapwuhrasang atail mouren mahs, atail madamadau oh wiewiahn uduk sohla kin kaunda kitail. Kitail kin wekila.​—Ais. 55:7; wadek Wiewia 3:19.

6. Dahme kahrehda Siohwa ketin kupwurki kitail en kihsang madamadau oh wiewia sapwung kan en atail mouren mahso?

⁶ Siohwa ketin kangoange kitail en kihsang madamadau oh wiewia sapwung kan pwehki e uhdahn ketin poakohng kitail oh kupwurki kitail en ahneki mour nsenamwahu. (Ais. 48:17, 18) E ketin mwahngih me irail kan me kin dukula pahn arail ineng sapwung kan kin kamedekihala pein irail oh meteikan me re poakohng. E kin ketin kupwursuwedki atail kamedekihala pein kitail oh meteikan.

7. Nin duwen me Rom 12:1, 2 mahsanih, pilipil dahieu me kitail anahne wiahda?

⁷ Kompoakepatail kan oh atail peneinei ele ekei pak kin kapailoke kitail pwehki kitail songosong en wekidala mwomwen atail mour. (1 Pit. 4:3, 4) Ele re kin nda me kitail ahneki pwung en wia dahme kitail men wia oh dehr mweidohng meteikan en ndaiong kitail dahme kitail en wia. Ahpw irail kan me kin soikala sapwellimen Siohwa koasoandi kan sohte kin uhdahn saledek. Ni mehlel, irail kin mweidohng sampah wet me Sehdan kaunda  en kamwakid irail. (Wadek Rom 12:1, 2.) Kitail koaros anahne pilada ma kitail pahn kolokolete atail mouren mahs me dihp oh ahn Sehdan sampah kin kaunda, de mweidohng Siohwa en ketin wekidala kitail ong aramas mwahu ahnsou wet.​—Ais. 64:8.

8. Dahme kak sewese kitail en soikala madamadau oh wiewia suwed kan?

⁸ Siohwa ketin mwahngih me kitail anahne ahnsou oh nanti laud pwehn soikala madamadau oh wiewia suwed kan. (Mel. 103:13, 14) Ahpw, sang ni eh ketin doadoahngki sapwellime Mahsen, sapwellime manaman, oh sapwellime pwihn, Siohwa kin ketikihong kitail erpit, kehl, oh sawas me kitail anahne pwehn wekidala mwomwatail. Ele e ketin seweseiukehr. Met kitail pahn koasoiapene soahng kei me kitail kak wia pwehn pousehlahte kapwuhrasang mouren mahso oh kak papidaisla.

9. Dahme Mahsen en Koht kak seweseiuk en wia?

⁹ Doadoahngki Paipel pwehn kasawih mwahu pein uhk. Mahsen en Koht kin duwehte kilahs en irongen ehu me kak seweseiuk en kasawih mwomwen omw madamadau, koasoi, oh wiewia. (Seims 1:22-25) Omw sounpadahk en Paipelo de Kristian koahiek kan kak kihong uhk kaweid. Karasepe, irail kak doadoahngki Paipel pwehn seweseiuk esehda omw koahiek kan oh omw luwet kan. Irail kak padahkihong uhk ia duwen omw kak diarada ire kan me poahsoankihda Paipel me kak kihda kaweid mwahu ong ia duwen omw kak powehdi wiewia suwed kan. Oh Siohwa kin ahnsou koaros ketin kupwurki seweseiuk. Ih me keieu kak ketin seweseiuk pwehki e ketin mwahngih dahme mi nan omw mohngiong. (Lep. Pad. 14:10; 15:11) Eri nantihong en ahnla kapakap ong ih oh onopki sapwellime Mahsen rahn koaros.

10. Dahme ke sukuhlkihsang dahme wiawihong Elie?

¹⁰ Kamehlele me sapwellimen Siohwa koasoandi kan me keieu mwahu. Kitail kak paiekihda soahng koaros me Siohwa ketin kupwurki kitail en wia. Irail kan me kin mour pahrekiong sapwellime koasoandi kan kin miehla katepen arail mour, miehla wahuparail, oh ahneki nsenamwahu mehlel. (Mel. 19:7-11) Ahpw, irail kan me kin soikala sapwellimen Siohwa koasoandi kan kin lokolongki imwilahn arail wiewiahn uduk. Tehk duwen emen ohl me adaneki Elie me koasoiahda duwen eh soikala sapwellimen Koht koasoandi kan. E tikida rehn eh pahpa nohno me kin poakohng Siohwa. Ahpw ni ahnsou me e sounpar eisek samwa, e tepida werek suwed. E tepida doadoahngki wini en kasahliel, wia tiahk samin, oh pirap. Elie nda me eh lingeringer oh tiahk lemei kin wie lalaudla. E koasoia: “I kin wia soahng koaros me I sukuhlki ien dehr wia nin duwen Kristian men.” Ahpw, Elie sohte manokehla dahme e sukuhlki ni ahnsou me e pwulopwul. Kedekedeo, e pwurehng tepida onopki Paipel. E kin nanti laud en kihsang reh wiewia suwed kan oh eri papidaisla nan pahr 2000. Ia duwen eh paiekihda eh kin mour pahrekiong sapwellimen Siohwa koasoandi kan? Elie koasoia: “Met I ahneki meleilei oh nsenmwakelekel.” * Nin duwen me koasoipen Elie kasalehda, irail kan me kin soikala sapwellimen Siohwa koasoandi kan kin kamedekihala pein irail. Ahpw Siohwa kin ketin kupwurkihte sewese irail en wekila.

11. Soahng dah kan me Siohwa kin ketin kalahdeki?

¹¹ Sukuhlki en kailongki dahme Siohwa ketin  kalahdeki. (Mel. 97:10) Paipel kasalehda me Siohwa kin ketin kalahdeki “aklapalap, au likamw, peh kan me kin kemehla aramas me soh-dipe.” (Lep. Pad. 6:16, 17) E pil “sohte ketin kupwurki [“kalahdeki,” NW] me widingan oh sounkam aramas akan.” (Mel. 5:6) Siohwa uhdahn ketin kalahdeki madamadau oh wiewia pwukat kahrehda e ketin kasohrehla aramas suwed koaros ni mwehin Nohao pwehki irail kadirehkihla sampah tiahk lemei. (Sen. 6:13) Pil medewehla ehu karasaras. Sang ni eh ketin doadoahngki soukohp Malakai, Siohwa ketin mahsanih me E ketin kalahdeki irail kan me kin koasoakoasoane en mweisang arail pwoud me sohte wiahda sapwung. Koht ketin soikala arail kaudok oh pahn ketin kadeikada arail wiewia kan.​—Mal. 2:13-16; Ipru 13:4.

12. Ia wehwehn en “tatki me suwed”?

¹² Siohwa ketin kupwurki kitail en “tatki me suwed.” (Rom 12:9) Lepin lokaiao “tatki” kin wehwehki pepehm kehlail ehu en uhdahn kailongki de sautki mehkot. Medewehla ia pahn omw pepehm ni emen eh kihong uhk ken kang mwenge me kiteila. Omw medewehla met kakete kahrehiong uhk en men mwus. Duwehte met, kitail en pil sautki en medewehda wia mehkot me Siohwa ketin mahsanih me suwed.

13. Dahme kahrehda kitail en pere atail madamadau?

¹³ Pere omw madamadau. Atail madamadau kin kamwakid atail wiewia. Ihme kahrehda Sises ketin padahkihong kitail en soikala madamadau kan me kak kahrehiong kitail en wiahda dihp laud. (Mad. 5:21, 22, 28, 29) Kitail kin men kaperenda Samatailo nanleng, kaidehn? Eri ia uwen eh kesempwal kitail en mwadang soikala madamadau suwed koaros me kitail medewehda!

14. Dahme atail koasoi kin kasalehda, oh peidek dah kan me kitail anahne sapengala?

¹⁴ Kaunda omw kin koasoi. Sises mahsanih: “Dahme kin kohieisang nan ewe kin kohsang nan eh mohngiong.” (Mad. 15:18) Ei, atail kin koasoi kin kasalehda laud dahme mi loalatail. Eri pein idek rehmw peidek pwukat: ‘I sohte kin likamw, mehnda ma ei lokaia mehlel pahn kahrehiong ie nan apwal? Pwehki I pwopwoud, I kin kanahieng en dehr kalahiong emen tohrohr? I kin soikala douluhl lokaia samin? Ni emen eh kansensuwedihela, I kin sapeng ni meleilei?’ E pahn sawas ma ke medemedewe mwahu peidek pwukat.  Omw koasoi ele kak rasehng pwaten ni likou ehu. Ma ke kin pwatenihpeseng omw likou, e pahn mengei ong uhk en kapwuhrasang likowo. Duwehte met, ma ke kin song ni uwen omw kak en kihsang lokaia lemei, likamw, oh samin, e pahn mengei ong uhk en kapwuhrasang mouren mahso.

15. Ia wehwehn atail en pasurdiong “nin tuhkeo” atail mouren mahs?

¹⁵ Men wiahda wekidekla sohte lipilipil kan me anahn. Wahnpoaron Pohl doadoahngki karasaras ehu pwehn padahkihong kitail me e uhdahn kesempwal ong kitail en wekidala mwomwen atail mour. E ntingihedi me kitail anahne pasurdiong “nin tuhkeo” atail mouren mahs. (Rom 6:6) Sises kupwurki posdahng nin tuhkeo pwehn kaperenda Siohwa. Duwehte met, pwehn kaperenda Siohwa, kitail en men kihsang madamadau oh wiewia kan me Siohwa ketin kalahdeki. Kitail anahne wia soahng pwukat pwe kitail en ahneki nsenmwakelekel oh koapworopwor en mour kohkohlahte. (Sohn 17:3; 1 Pit. 3:21) Tamataman me Siohwa sohte pahn ketin wekidala sapwellime koasoandi kan pwehn kaperenda kitail. Ahpw, kitail anahne wekidala mwomwatail oh idawehn sapwellime koasoandi kan.​—Ais. 1:16-18; 55:9.

16. Dahme kahrehda ke anahne koasoanehdi teng en pousehlahte pelianda ineng sapwung kan?

¹⁶ Pousehlahte pelianda ineng suwed kan. Pil mwurin omw papidaisla, ke anahne pousehlahte pelianda ineng sapwung kan. Medewehla dahme wiawihong ohl emen me adaneki Maurício. Ni ahnsou me e pwulopwul, e tepida wia mouren ohl mwahuki ohl. Kedekedeo, e tuhwong sapwellimen Siohwa aramas akan oh tepida onopki Paipel. Mwurin eh wiahda wekidekla kan nan eh mour, e papidaisla nan pahr 2002. Mendahki met e papahkier Siohwa erein sounpar tohto, Maurício koasoia: “Ni mehlel, ekei pak I anahne pelianda ineng sapwung kan.” Ahpw e sohte mweidohng met en kamworusihala ih. E koasoia: “I kin nsenamwahuki ei ese me ni ei pilada en dehr kapwaiada ineng pwukat, I kak kaperenda Siohwa.” *

17. Dahme ke diar nan koasoiepen Nabiha me kangoange iuk?

¹⁷ Kapakapki sapwellimen Siohwa sawas oh likih sapwellime manaman, a kaidehn pein omw kehl. (Kal. 5:22; Pil. 4:6) Kitail anahne doadoahk laud ma kitail men kapwuhrasang  mouren mahs oh pwilikihdi douluhl. Medewehla dahme wiawihong lih emen me adaneki Nabiha. E pahpao kohkohsang ih ni ahnsou me e sounparte weneu. E koasoia: “Met uhdahn kamedek ong ie.” Ni eh lalaudla, eh lingeringer oh lemei pil laudla. E tepida netiki wini en kasahliel, selidi, oh mi nan imweteng erein sounpar kei. Sounkadehde kan me kalohkla ni imwetengo tepida onop Paipel reh. Nabiha tepida wiahda wekidekla laud kan. E koasoia: “Mie soangen wiewia kei me e mengei ong ie en uhdihsang, ahpw en uhdihsang sumwoak uhdahn apwal.” Nabiha nannanti daulih sounpar ehu oh kedekedeo uhdihsang sumwoak. Ia duwen eh wia met? E koasoia: “Ei kalapw kapakap ong Siohwa me sewese ie en uhdihsang sumwoak.” Met e kin kalapw ndaiong meteikan: “I uhdahn kamehlele me ma I kak wiahda wekidekla kan pwehn kaperenda Siohwa, meteikan pil kak wia met!” *

18. Nin duwen me 1 Korint 6:9-11 mahsanih, dahme sapwellimen Koht ladu tohto kak wia?

¹⁸ Ni mwehin tepin Kristian ko, ekei irail me Siohwa ketin pilada en iang Krais kaunda kin wia soahng kan me uhdahn suwed mahso. Karasepe, ekei kin kamwahl, wia tiahk en ohl mwahuki ohl, oh sounpirap. Ahpw, pwehki sawas sang sapwellimen Koht manaman, irail kak wekidala mwomwen arail mour. (Wadek 1 Korint 6:9-11.) Duwehte met, Paipel sewesehier aramas rar rar kei en wiahda wekidala kan nan arail mour. * Irail uhdihsang tiahk suwed kan me uhdahn apwal ong irail en kesehla. Arail mehn kahlemeng kadehdehda me ke pil kak wiahda wekidekla kan oh powehdi wiewia suwed kan pwe ken kak papidaisla.

19. Dahme iren onop en mwuhr pahn koasoia?

¹⁹ Likin atail nantihong en kapwuhrasang mouren mahs, irail kan me men papidaisla anahne nanti laud en pwuhriong nan mour kapwo. Iren onop en mwuhr pahn koasoia ia duwen atail kak wia met, oh ia duwen meteikan ar kak sewese kitail.