1. Dahme kin keieu kamwakid mwomwen atail wiewia?

 SOHTE lipilipil ma kitail papidaislahr mwurin rahn keite mwoweo de pil erein sounpar tohto, kitail koaros kin men wia soangen aramas me Siohwa kin ketin poakohng. Pwehn wia soangen aramaso, kitail anahne kaunda atail madamadau. Dahme kahrehda? Pwehki atail madamadau iei me kin keieu kamwakid mwomwen atail wiewia. Ma kitail kin kalapw medemedewe ia duwen atail kak kaperenda pein kitail, kitail pahn nda oh wia soahng suwed kan. (Ep. 4:17-19) Ahpw ma kitail kin medemedewehte soahng mwahu kan, atail koasoi oh mwekid pahn kin kaperenda Samatailo, Siohwa.​—Kal. 5:16.

2. Peidek dah kan me kitail pahn koasoiapene nan iren onop wet?

² Nin duwen me iren onop en mwoweo kasalehda, kitail sohte kak kauhdi madamadau suwed koaros me kin pwarada nan atail madamadau. Ahpw kitail kak pilada en dehr dukiong soangen madamadau pwukat. Mwohn atail pahn papidaisla, kitail anahne uhdihsang koasoi oh mwekid ni ahl me Siohwa ketin kalahdeki. Met iei kahk me keieu kesempwal oh me kitail en keieu wia pwehn kapwuhrasang atail mouren mahs. Ahpw pwehn uhdahn kaperenda Siohwa, kitail pil anahne peikiong kehkehliko: “Kumwail pwuhriong nan mour kapw.” (Kol. 3:10) Nan iren onop wet, kitail pahn sapengala peidek pwukat: Dahkot “mour kapw”? Ia duwen atail kak pwuhriong nan mour kapw oh dehr kapwuhrasang?

3. Dahkot “mour kapw,” oh ia duwen emen eh kin pwuhriong loale? (Kalesia 5:22, 23)

³ Emen me ahneki “mour kapw” kin kahlemengih Siohwa. E kin pwuhriong nan mour kapwo sang ni eh kasalehda wahn sapwellimen  Koht manaman, oh mweidohng manaman wet en kamwakid eh madamadau, pepehm, oh wiewia kan. (Wadek Kalesia 5:22, 23.) Karasepe, e kin poakohng Siohwa oh Sapwellime aramas akan. (Mad. 22:36-39) Soangen aramaso kin kolokol eh peren pil ni eh kin dadaur pahn kahpwal kan. (Seims 1:2-4) E kin wiahda popohl. (Mad. 5:9) E kin kanengamah oh kadek ong meteikan. (Kol. 3:13) E kin poakohng me mwahu oh wia me mwahu. (Luk 6:35) E kin kadehdehda sang ni eh wiewia kan me e kin pwoson laud Semeo nanleng. (Seims 2:18) E kin kolokolete eh mpahi ni meteikan ar kalingeringerih, oh kin kaunda pein ih ni eh lelohng kasongosong kan.​—1 Kor. 9:25, 27; Taitus 3:2.

4. Dahme kahrehda kitail anahne kasalehda irair kaselel kan koaros me kileldi nan Kalesia 5:22, 23 pwehn pwuhriong nan mour kapw?

⁴ Pwehn pwuhriong nan mour kapw, kitail anahne kakairada irair kaselel ko koaros me kileldi nan Kalesia 5:22, 23 oh pil nan iren Paipel teikan. * Irair pwukat sohte duwehte ehuehu likou me kitail kin likawihada ehuehu ahnsou. Ni mehlel, tohtohn irair pwukat kin pidada irair mwahu teikan. Karasepe, ma ke uhdahn poakohng mehn mpomw men, ke pahn kanengamah oh kadek ong ih. Oh en wia aramas uhdahn mwahu men, ke anahne kasalehda mpahi oh kaunda pein kowe.

5. Ia wehwehn en “ahneki sapwellimen Krais madamadau,” oh dahme kahrehda kitail anahne onopki mouren Sises? (1 Korint 2:16)

⁵ Wadek 1 Korint 2:16. Pwehn pwuhriong nan mour kapw, kitail anahne “ahneki sapwellimen Krais madamadau.” Met pil wehwehki me kitail anahne sukuhlki sapwellimen Sises madamadau oh alasang. Sises ketin kasalehda wahn sapwellimen Koht manaman ni unsek. Duwehte kilahs en irongen unsek ehu, Sises kin ketin kasalehda sapwellimen Siohwa irair kaselel kan ni unsek. (Ipru 1:3) Ni atail kin kalaudehla atail alasang sapwellimen Sises madamadau, atail mwekid duwehte ih pahn laudla, oh atail kin kasalehda sapwellime irair kan pahn pil mwahula.​—Pil. 2:5.

6. Dahme kitail anahne tamataman ni atail kin nantihong en pwuhriong nan mour kapwo?

⁶ Ia duwe, kitail kak uhdahn idawehn sapwellimen Sises mehn kahlemeng? Ele kitail kin  medewe: ‘Sises ketin unsek. I sohte douluhl pahn kak duwehte ih!’ Ma ke ahneki soangen pepehm wet, tamataman ire mehlel pwukat. Keieu, ke kapikipikda rasehng Siohwa oh Sises. Eri ke kak pilada en alasang ira, oh ke kak pweida ni soangen ahl kei. (Sen. 1:26) Keriau, sapwellimen Koht manaman iei manaman me keieu kehlail nin sampah oh nanleng. Manaman wet kak seweseiuk en kapwaiada soahng kan me ke sohte kak pein wiahda. Kesiluh, Siohwa sohte ketin kasik me ke pahn kasalehda wahn sapwellime manamano ni unsek ahnsou wet. Ni mehlel, Samatail limpoako pahn ketikihong irail kan me kasikasik en mour nin sampah kohkohlahte sounpar 1,000 pwe ren unsekla. (Kaud. 20:1-3) Dahme Siohwa ketin kasik sang kitail ahnsou wet iei en nantihong wia uwen atail kak oh likih me e pahn ketin sewese kitail.

7. Dahme kitail pahn koasoiapene met?

⁷ Ia duwen atail kak uhdahn alasang Sises? Kitail pahn koasoiapene ni mwotomwot irair pahieu en wahn sapwellimen Koht manamano. Nan ehuehu irair ko, kitail pahn kilang dahme kitail kak sukuhlki duwen mwomwen Sises eh kin ketin kasalehda irair pwukat. Oh kitail pahn koasoiapene ekei peidek me kak sewese kitail en kamwahwihala atail kin pwuhriong nan mour kapwo.

8. Ia duwen Sises eh ketin kasalehda limpoak?

⁸ Pwehki Sises kin uhdahn ketin poakohng Siohwa, e ketin wiahda tounmetei kan ong Semeo oh pil kitail. (Sohn 14:31; 15:13) Sises ketin kadehdehda uwen laud en eh ketin poakohng aramas akan sang ni mwomwen eh mour nin sampah. Ehuehu rahn, e kin ketin kasalehda limpoak oh poakehla aramas, pil ni ekei ar kin uhwongada ih. Ehu ahl kesempwal me e kin ketin kasalehda eh poakohng aramas iei sang ni eh ketin padahkihong irail duwen Wehin Koht. (Luk 4:43, 44) Sises pil ketin kadehdehda eh poakohng Koht oh aramas sang ni eh kupwurki tounmeteikihla pein ih en lelohng lokolok oh kamakamala pahn me dipan kan. Ni eh ketin wia met, e kahrehda kitail koaros en kak ahneki mour soutuk.

9. Ia duwen atail kak alasang Sises ni atail kasalehda limpoak?

⁹ Kitail inoukihong Siohwa atail mour oh papidaisla pwehki kitail poakohng Samatailo nanleng. Eri, duwehte Sises, kitail anahne kasalehda atail poakohng Siohwa sang ni mwomwen atail wiewia ong aramas akan. Wahnpoaron Sohn ntingihedi: “Ma e sohte kin poakohng rie me e kin kilang, ia duwen eh kak poakohng Koht me e sohte kin kilang?” (1 Sohn 4:20) Kitail kak pein idek rehtail: ‘I kin kakairada limpoak laud ong aramas akan? I kin kasalehda ei poakehla aramas sang ei wiewia ong irail, mehnda ma irail lemeiong ie? Limpoak kin kamwakid ie en doadoahngki ei ahnsou oh dahme I ahneki pwehn sewese meteikan en sukuhlki duwen Siohwa? I kin men wia met mendahki pali laud en aramas akan sohte kin kalahnganki ei nannanti, de irail kin uhwong ie? I kak rapahki ahl kan en kalaudehla ei ahnsou ong doadoahk en katohnpadahk?’​—Ep. 5:15, 16.

10. Ia duwen Sises eh kin ketin wiahda popohl?

¹⁰ Sises kin ketin wiahda popohl. Ni aramas akan ar kin kauwe ih, e sohte kin ketin dupungki me suwed ong me suwed. Ahpw e ketin wia laudsang met. E kin ketin tiengla mwowe en wiahda popohl oh kangoange meteikan en uhdihsang akamai. Karasepe, e ketin padahkihong irail me irail anahne wiahda popohl rehn riarail Kristian kan ma re men Siohwa en ketin kupwurki arail kaudok. (Mad. 5:9, 23, 24) Oh e kin ketin pwurupwurehng sewese sapwellime tohnpadahk ko ren uhdihsang akamaiki ihs me keieu lapalap nanpwungarail.​—Luk 9:46-48; 22:24-27.

11. Ia duwen atail kak wiahda popohl?

 ¹¹ Pwehn wiahda popohl, kitail anahne wia laudsang en soikalahte kahrehda akamai. Kitail anahne nantihong wiahda popohl rehn meteikan oh kangoange riatail Kristian kan en uhdihsang akamai. (Pil. 4:2, 3; Seims 3:17, 18) Kitail kak pein idek rehtail peidek pwukat: ‘Dahme I pahn men tounmeteikihla pwehn wiahda popohl rehn meteikan? Ni riei Kristian men eh kamedekihehla, I kin kadakadaur ei nsensuwed pah? I kin awih meteio en tiengla mwowe oh wiahda popohl, de ngehi me kin tiengla mwowe, mehnda ma e mwomwen me meteio me kahrehda kahpwalo? Ni ahnsou me konehng, I kin kangoange irail kan me akamaipene ren wiahda popohl nanpwungarail?’

12. Ia duwen Sises eh kin ketin kasalehda kadek?

¹² Sises kin ketin kadek. (Mad. 11:28-30) E ketin kadek sang ni eh ketin kasalehda toupahrek, pil ni ahnsou me apwal. Karasepe, ni lihen Penisia men eh peki Sises en ketin kamwahwihala nah serio, Sises sohte ketin wia dahme liho peki ni tapio, ahpw ni liho eh kasalehda pwoson laud, ni kadek Sises ketin kamwahwihala nein liho serio. (Mad. 15:22-28) Sises kin ketin kadek, ahpw e sohte kin soikala ketikihda kaweid. Ekei pak e ketin kasalehda kadek sang ni eh kin mahsen inen ong irail kan me e ketin poakohng. Karasepe, ni ahnsou me Piter song en kauhdi Sises sang eh wiewia kupwuren Siohwa, Sises ketin kapwungala ih mwohn tohnpadahk teiko. (Mark 8:32, 33) E ketin wia met, kaidehn pwehn kasarowehdi Piter, ahpw pwehn kaiahne Piter oh pil katamankihong tohnpadahk teiko ren dehr kin pohnmwahso. Piter ele ekis namenekda, ahpw e paiekihda kaweido.

13. Ia duwen atail kak kasalehda me kitail kin uhdahn kadek?

¹³ Pwehn uhdahn kadek ong irail kan me ke poakohng, ekei pak ke anahne koasoi inen ong irail. Ni omw wia met, alasang Sises ni omw kin kihda kaweid kan me poahsoankihda Mahsen en Koht. Doadoahngki lokaia kadek. Kamehlele me re kin men wia me mwahu, oh likih me irail kan me kin poakohng Siohwa oh kowe pahn mwekidki omw kaweid irail ni limpoak. Idek rehmw peidek pwukat: ‘I kin eimah en nda mehkot ni ei kilang emen me I poakohng wiewia mehkot sapwung? Ma I anahne kihda kaweid, I kin koasoi ni kadek, de ni lemei? Kahrepe dahieu me I ahneki en kihda kaweid? I kin kaweid emen pwehki e kalidoarih ie, de pwehki I men sewese?’

14. Ia duwen Sises eh ketin kasalehda kamwahu?

¹⁴ Sises sohte kin mwahngihete dahme mwahu, ahpw e pil kin ketin wia dahme mwahu. Sises kin ketin poakohng Semeo, eri e kin ahnsou koaros sapwellimanki kahrepe pwung en wia dahme mwahu. Aramas mwahu men kin ahnsou koaros rapahki ahl akan en sewese meteikan oh wiahda soahng mwahu kan ong irail. E sohte itar en esehte dahme mwahu me kitail en wia, ahpw kitail en pil ahneki kahrepe pwung en wia dahme mwahu. Emen kakete idek, ‘Kitail kak ahneki kahrepe sapwung en wia dahme mwahu?’ Ei, uhdahn. Karasepe, Sises mahsanihki irail kan me kin kisekise me semwehmwe kan ahpw kin tehk mwahu me meteikan kak kilang dahme re wiewia oh kapingahki irail. Mendahki arail wiewia ko mwahu, Siohwa sohte ketin kupwurperenki.​—Mad. 6:1-4.

15. Ia duwen atail kak wia aramas uhdahn mwahu men?

¹⁵ Kitail kak wia aramas me uhdahn mwahu men ihte ma kitail kin wia dahme pwung ahpw kaidehn ong kahrepe roporop kan. Eri ke kak pein idek rehmw peidek pwukat: ‘Ia duwe, I kin ese dahme pwung me I anahne wia oh doulahte kapwaiada? Kahrepe dah kan me I ahneki pwehn wia soahng mwahu kan?’

16. Dahme kitail anahne wia ehuehu rahn, oh dahme kahrehda?

¹⁶ Kitail en dehr medewe me ni atail papidaisla, kitail pwuhriongehr nan mour kapw oh sohla anahne apwalih mwahu mour kapw wet. Atail mour kapw kin rasehng likou kapw ehu me kitail en kin doulahte apwalih mwahu. Ehu ahl me kitail kak wia met iei en rapahki ahl akan en kasalehda wahn sapwellimen Koht manaman rahn koaros. Dahme kahrehda? Pwehki Siohwa ketin wia Koht emen me sohte kin ketin uhdihsang doadoahk, oh sapwellime manaman kin mwekimwekid sohte uhdi. (Sen. 1:2) Eri irair kaselel ko koaros en wahn sapwellimen Koht manaman kak oh pil anahne kamwakid kitail en mwekid. Karasepe, tohnpadahko Seims ntingihedi: “Pwoson me wiewia sohte iang, e wia pwoson mehla ehu.” (Seims 2:26) Kitail pil kak ndahki irair kaselel teikan en wahn sapwellimen Koht manaman. Ehuehu ahnsou me kitail kin kasalehda irair pwukat, met kin kadehdehda me manaman wet kin kamwakamwakid kitail.

17. Dahme kitail anahne wia ma kitail sohte kasalehda wahn sapwellimen Koht manamano?

¹⁷ Pil Kristian kan me papidaislahr erein sounpar tohto kin ekei pak sohte kasalehda wahn sapwellimen Koht manamano. Ahpw dahme kesempwal iei me kitail en dehr uhdihsang kasalehda irair pwukat. Medewehla karasaras wet. Ma omw likou me ke kin keieu perenki likawih teidi, ke pahn mwadangete kesehla? Soh. Ele ke pahn ni keneinei kamwahwihala wasa teidio, ma kak. Oh mwuhr ke pahn kanahieng en dehr pwurehng tei. Duwehte met, ma ekei pak ke sohte kin kasalehda kadek, kanengamah, de limpoak ong emen, dehr mworusala. Omw pekimahk reh ni mehlel kak kamwahwihala dahme ohla nanpwungamwa, oh ke kak kolokolete omw nanpwungmwahu reh. Koasoanehdi teng ken wia mwahusang met mwuhr.

18. Dahme kitail kak uhdahn kamehlele?

¹⁸ Kitail uhdahn kalahnganki mehn kahlemeng me Sises ketikihda! Ni atail kin kalaudehla atail alasang sapwellime elen madamadau, e pahn mengeila ong kitail en alasang sapwellime wiewia kan. Oh uwen laud en atail kin alasang sapwellime wiewia kan, atail pwuhriong nan mour kapwo pahn pil ehute mwahula. Nan iren onop wet, kitail koasoiapene irair kaselel pahieute en wahn sapwellimen Koht manamano. E pahn mwahu ma ke wiahda ahnsou en onopki irair kaselel teiko koaros oh medemedewe mwomwen omw kin kamwahwihala omw kasalehda irair pwukat. Ke pahn diar artikel kan me koasoia duwen met nan Sawas ong Wia Roporop en Sounkadehdehn Siohwa kan nan oaralapo “Mouren Kristian” pahnangin “Wahn Sapwellimen Koht Manaman.” Ke kak uhdahn kamehlele me ma ke nantihong en pwuhriong nan mour kapwo oh dehr kapwuhrasang, Siohwa pahn ketin seweseiuk.