Mwein ekei me mwadangete wadekala ire wet kakete idek peideko. Ahpw mie ohl riemen me adaneki Mepiposed, oh kitail kak sukuhlki mehkot kesempwal sang dahme wiawi.

Nanmwarki Sohl en Israel naineki pwutak isimen oh serepein riemen. Nein Sohl meseniho iei Sonadan. Mwuhr, nanmwarkio nainekihda pwutak men me adaneki Mepiposed ong eh pekehio Rispa. Oh Sonadan pil nainekihda pwutak men me adaneki Mepiposed. Kahrehda, Nanmwarki Sohl naineki pwutak men me adaneki Mepiposed oh emen nah pwutak ko naineki emen pwutak me pil adaneki ahdohte.

Ehu ahnsou, Nanmwarki Sohl tepida kailongkihla mehn Kipeon ko oh song en kemeirailla koaros. Oh mwomwen me e kemehla me tohto. Met uhdahn sapwung. Dahme kahrehda? Pwehki ni mwehin Sosuao, kaunen mehn Israel ko wiahda inou ehu ong mehn Kipeon ko me irail pahn kin ahnekipene popohl.​—Sos. 9:3-27.

Inou wet manamante ni mwehin Nanmwarki Sohl. Ahpw nanmwarkio sohte men idawehn inowo oh song en kemehla mehn Kipeon kan koaros. Imwilahn met kahrehiong “Sohl oh eh peneinei dipikidahr dipen kamaramas.” (2 Sam. 21:1) Kedekedeo, Depit wiahla nanmwarki. Mehn Kipeon kan me pitsang kamakamala kohla rehn Depit oh koasoiaiong ih duwen sapwung laud me Sohl wiahda. Depit eri kalelapek ia duwen eh pahn kak pwainla sapwung laud me Sohl wiahdao pwe Siohwa en kak ketin kapaiahda Israel. Mehn Kipeon ko sohte peki mwohni, ahpw re peki Depit en kihong irail pwutak isimen nein ohl me ‘men kamwomwirailla oh sohte men emen en luhwehdi’ pwe irail en kemehla. (Nemp. 35:30, 31) Depit eri kapwaiada arail pekipeko.​—2 Sam. 21:2-6.

Ni ahnsowo, Sohl oh Sonadan kamakamalahr nan mahwen, ahpw nein Sonadan pwutako Mepiposed momourte. Mepiposed mwoatorala ni ahnsou me e tikitik, kahrehda e sohte iang eh pahpa kahlapo song en kemehla mehn Kipeon ko. Depit wiadahr inou en pirien rehn Sonadan, oh met wia kamwahu ehu ong kadaudok en Sonadan kan, pil iangahki nah pwutako Mepiposed. (1 Sam. 18:1; 20:42) Paipel mahsanih: “Pwehki inou sarawi me Depit oh Sonadan wiahda nanpwungara, Depit ketin kupwurehla nein Sonadan pwutak Mepiposed, me pahpa kahlapki Sohl.”​—2 Sam. 21:7.

Ahpw Depit kapwaiada ahn mehn Kipeon ko pekipeko. E kihong irail nein Sohl pwutak riemen, me emen ira adaneki Mepiposed, oh pil pwutak limmen me Sohl pahn naineki. (2 Sam. 21:8, 9) Dahme Depit wiahdao kihsang dipen kamaramas nan sahpwo.

Koasoi pwoatet sohte wiahte poadopoad ehu. Sapwellimen Koht kosonned kin uhdahn sansal. E mahsanih: “Seri kan sohte pahn kamakamkihla dipen samarail kan.” (Deud. 24:16) Siohwa sohte pahn ketin kupwurki dahme wiawihong nein Sohl pwutak riemeno oh pwutak limmen ko me Sohl pahn naineki ma irail sohte iang wiahda sapwung. Kosonnedo pil mahsanih: “Aramas emen pahn kamakamkihla dihp me pein ih wiahda.” E mwomwen me kadaudok en Sohl meh isimen ko me mehla pil iangete Sohl song en kemehla mehn Kipeon ko. Pwehki met, meh isimen ko koaros mehkihla diparail kan.

Koasoi pwoatet karasahda duwen aramas emen eh sohte kak pitsang eh wiewia sapwung ni eh medewe de nda me e idawehnte kaweid me kohwong ih. Mie erpit nan lepin kahs wet me mahsanih: “Koasoanehdi ni keneinei dahme ke pahn wia, oh mehkan me ke pahn wia ahpw pahn pweida mwahu.”​—Lep. Pad. 4:24-27; Ep. 5:15.