1-2. Dahme kin kalapw wiawi ni emen eh papidaisla, oh dahme ke anahne medemedewe?

 KE KILANGEHR pwihn ehu me pahn papidaisla? Arail pwoson sansalda sang ni ngilarail kan ni ahnsou me irail sapengala peidek riau mwohn arail papidaisla. Ke kilang arail peneinei oh kompoakparail kan ar uhdahn pohlkin irail. Ni me papidais ko ar kohdahsang nan pihlo, ke rong ngilen lopwolopw oh kilang ar mas peren. Nan ehuehu wihk, irail meh kid kid kei kin inoukihong arail mour ong Siohwa oh papidaisla nin duwen sapwellime Sounkadehde kei.

² A ia duwen kowe? Ma ke medemedewe en papidaisla, ke wia emen me uhdahn kesempwal nan sampah suwed wet pwehki ke kin “rapahki Siohwa.” (Mel. 14:1, 2, NW) Iren onop wet ntingdi ong uhk mehnda ma ke pwulopwul de mah. Ahpw kitail me papidaislahr pil men kakehlaka atail koasoanehdi teng en papah Siohwa kohkohlahte. Eri kitail pahn koasoiapene soahng siluh nanpwungen kahrepe tohto kan me kitail en men papah Siohwa.

3. Dahme kahrehda sapwellimen Siohwa ladu kan kin poakohng me mehlel oh pwung? (Melkahka 119:128, 163)

³ Siohwa ketin kehkehlikiong sapwellime aramas akan en “poakohng me mehlel.” (Sek. 8:19) Sises ketin kangoangehki sapwellime tohnpadahk kan en rapahki dahme pwung. (Mad. 5:6) Met wehwehki me emen anahne ahneki ineng laud en wia dahme pwung, mwahu, oh mwakelekel mwohn silangin Koht. Ke kin poakohng me mehlel oh pwung? Se kamehlele me ke kin wia met. Ke kin kailongki likamw oh soahng koaros me sapwung oh suwed. (Wadek Melkahka 119:128, 163.) Emen me kin likamw kin alasang Sehdan, kaunen sampah wet. (Sohn 8:44; 12:31) Ehu ahn Sehdan mehn akadei iei en lahlahwe mwaren Siohwa Koht. Sehdan kin kihpeseng likamw kan duwen atail  Kohto sangete ni ahnsou me e uhwongada nan Eden. E kin song en kahrehiong aramas akan en medewe me Siohwa ketin roporop oh wia Kaun emen me likamw oh kin ekihsang aramas akan soahng mwahu kan. (Sen. 3:1, 4, 5) Ahn Sehdan likamw kan duwen Siohwa kin pousehlahte kahrehiong aramas akan en medewe soahng suwed kan duwen Ih. Ni aramas akan ar pilada en dehr “poakohng me mehlel,” Sehdan kak kamwakid irail en wia soahng koaros me suwed oh sapwung.—Rom 1:25-31.

4. Ia duwen Siohwa eh ketin kasalehda me ih “Koht en mehlel”? (Pil menlau kilang kilel.)

⁴ Siohwa iei “Koht en mehlel,” oh ni kadek e kin ketin padahkihong irail kan me poakohng ih me mehlel. (Mel. 31:5, NW) Sang ni eh kin ketin wia met, e kin sewese irail pwe ren dehr dukula pahn ahn Sehdan likamw kan. Siohwa pil kin ketin padahkihong sapwellime ladu kan en kin mehlel oh pwung. Met pahn sewese irail en kalaudehla wahuparail oh ahneki meleilei. (Lep. Pad. 13:5, 6) Ia duwe, e ketin wiahionguhkehr met ni omw kin onopki Paipel? Ke sukuhlkier me sapwellimen Siohwa ahl akan me keieu mwahu ong aramas koaros oh ong pein kowe. (Mel. 77:13) Eri ke men wia dahme Koht mahsanih me pwung. (Mad. 6:33) Ke men kasalehda me mehlelo oh kadehdehda me dahme Sehdan ndahki duwen atail Kohto kin likamw. Ia duwen omw kak wia met?

5. Ia duwen omw kak utungada me mehlelo oh pwung?

⁵ Ke kak pilada elen mour ehu me koasoia: “I kin soikala ahn Sehdan likamw kan oh utungada me mehlel. I men Siohwa en ketin wia ei Kaun Wasa Lapalahpie, oh I men wia dahme e mahsanih me pwung.” Ia duwen omw kak wia met? Padahkihong Siohwa nan omw kapakap me ke inoukihda en papah ih kohkohlahte oh kasalehda mwohn koaros ni omw papidaisla. En poakohng me mehlel oh pwung kin uhdahn kamwakid uhk en pilada en papidaisla.

6. Kahrepe dah kan me Melkahka 45:4 kihong uhk pwehn poakohng Sises Krais?

⁶ Dahme kahrehda ke poakohng Sises Krais? Tehk ekei kahrepe mwahu kan me mi nan Melkahka 45:4. (Wadek.) Sises kin ketin poakohng me mehlel, aktikitik, oh dahme pwung. Ma ke kin poakohng me mehlel oh dahme pwung, eri ke kin poakohng Sises Krais. Medewehla ia duwen Sises eh kin ketin utung me mehlel oh pwung ni eimah. (Sohn 18:37) Ahpw ia duwen Sises eh kin ketin kasalehda aktikitik?

7. Dahme ke perenki duwen sapwellimen Sises aktikitik?

⁷ Sises kin ketin kasalehda aktikitik sang  ni sapwellime mehn kahlemeng. Karasepe, e ketin patohwanohng Semeo lingan koaros a kaidehn ong pein ih. (Mark 10:17, 18; Sohn 5:19) Ia omw pepehm ong sapwellimen Sises aktikitik? Met sou kamwakid uhk en poakohng sapwellimen Koht Ohlo oh idawehn ih? Ei uhdahn. Dahme kahrehda Sises ketin aktikitik? Pwehki e poakohng oh kin kahlemengih Semeo me ketin aktikitik. (Mel. 18:35; Ipru 1:3) Ia duwe, ke sou karanihala Sises me kin kahlemengih ni unsek sapwellimen Siohwa irair kaselel kan?

8. Dahme kahrehda kitail kin perenki me Sises iei atail Nanmwarki?

⁸ Kitail poakohng Sises nin duwen atail Nanmwarki pwehki e ketin wia atail Kaun me keieu mwahu. Siohwa pein ketin kaiahnehda sapwellime Ohlo oh idihada en kaunda. (Ais. 50:4, 5) Pil medewehla limpoak me Sises ketin kasalehda sang ni eh tounmeteikihla eh mour. (Sohn 13:1) Pwehki Sises iei omw Nanmwarki, e ketin warohng omw limpoak. E ketin kawehwehda me e kin ekerki kompoakepah irail kan me uhdahn poakohng ih oh me irail kin kasalehda arail limpoak sang ni arail peikiong sapwellime kehkehlik kan. (Sohn 14:15; 15:14, 15) Ia uwen eh wia pwais kaselel ehu en wia kompoakepahn sapwellimen Siohwa Ohlo!

9. Ia duwen ahn Kristian kan papidais eh duwehte sapwellimen Krais papidais?

⁹ Ehu sapwellimen Sises kehkehlik iei me sapwellime tohnpadahk kan en papidaisla. (Mad. 28:19, 20) E ketikihda mehn kahlemeng ong met. Nan ekei ahl, sapwellime papidais weksang ahn sapwellime tohnpadahk kan papidais. (Menlau kilang koakono “ Sapwellimen Sises Papidais oh Ahn Sapwellime Tohnpadahk kan Papidais—Ia Duwen Ar Wekpeseng.”) Ahpw nan ekei ahl e duwepenehte. Ni ahnsou me e papidaisla, Sises ketin toukihda pein ih pwehn wia kupwuren Semeo. (Ipru 10:7) Duwehte met, ni ahnsou me sapwellimen Krais tohnpadahk kan kin papidaisla, met kin kasalehda mwohn wehipokon me irail inoukihong Siohwa arail mour. Met me keieu kesempwal nan arail mour iei en wia kupwuren Koht, a kaidehn nsenarail. Eri irail kin idawehn ahn arail Soumaso mehn kahlemeng.

10. Dahme kahrehda limpoak ong Sises anahne kamwakid uhk en papidaisla?

¹⁰ Ke kamehlele me Sises iei sapwellimen Siohwa Iehros, oh ke perenki me ih me Nanmwarki me Koht ketin idihada en kaunkitailda. Ke ese me Sises ketin aktikitik oh kin kahlemengih ni unsek Semeo. Ke sukuhlki me e ketin kamwenge irail kan me men mwenge, kansenamwahwih me mworusala, oh pil kamwahwihala me soumwahu kan. (Mad. 14:14-21) Ke kilangehr duwen eh kin ketin kaweid sapwellime mwomwohdiso rahnwet. (Mad. 23:10) Oh ke ese me nin duwen Nanmwarki en Wehin Koht, e pahn ketin wiahda soahng mwahu tohto ni ahnsou kohkohdo. Ia duwen omw kak kasalehda me ke poakohng ih? Sang ni omw idawehn sapwellime mehn kahlemeng. (Sohn 14:21) Ke kak tepte wia met sang ni omw inoukihong Siohwa omw mour oh papidaisla.

11. Ia kahrepe keieu kesempwal en papidaisla, oh dahme kahrehda?

¹¹ Ia kahrepe keieu kesempwal en papidaisla? Sises ketin kasalehda sapwellimen Koht kehkehlik me keieu kesempwal ni eh mahsanih: “Ke anahne poakohng Siohwa omw Koht ni omw mohngiong unsek oh omw mour unsek oh omw lamalam unsek oh omw kehl unsek.” (Mark 12:30) Ia duwe, mahsen pwukat kasalehda ia uwen laud en omw poakohng Koht?

12. Dahme kahrehda ke poakohng Siohwa? (Pil menlau kilang kilel.)

¹² Mie kahrepe tohto en poakohng Siohwa. Karasepe, ke wehwehkihda me e ketin wia  “poahsoan en mour” oh me ih me ketikihda “kisakis mwahu oh unsek koaros.” (Mel. 36:9; Seims 1:17) Soahng mwahu koaros me ke kin perenki kin kohsang atail Koht limpoako oh sapan.

13. Dahme kahrehda pweinen pweipwei sapahlo wia kisakis kaselel ehu?

¹³ Pweinen pweipwei sapahlo wia kisakis kaselel ehu me Siohwa ketikihong kitail. Dahme kahrehda kitail kak nda met? Medewehla duwen nanpwungmwahu keren en Siohwa oh sapwellime Ohlo. Sises mahsanih: ‘Sahmo ketin poakohng ie’ oh “I poakohng Sahmo.” (Sohn 10:17; 14:31) Ara nanpwungmwahu uhdahn kehlailla ni ara kin ketin doadoahkpene erein sounpar lik lik kei. (Lep. Pad. 8:22, 23, 30) Medewehla ia uwen Koht eh ketin lokolok ni eh mweidohng sapwellime Ohlo en lokolok oh pwoula. Siohwa uhdahn ketin poakohng aramas akan—iangahki kowe—me kahrehda e kupwurki ketikihda sapwellime Ohlo kompoako nin duwen meirong ehu pwehn kahrehiong uhk oh meteikan en mour kohkohlahte. (Sohn 3:16; Kal. 2:20) Met kahrepe keieu laud me kitail ahneki pwehn poakohng Koht.

14. Mehn akadei keieu mwahu dah me ke kak pilada nan omw mour?

¹⁴ Omw poakohng Siohwa laudla pwehki ke sukuhlki soahng tohto duwen ih. Ke uhdahn men karanihala ih ahnsou wet oh kohkohlahte.  Oh ke kak. E ketin kangoangeiuk ni kadek pwe ken kaperenda kupwure. (Lep. Pad. 23:15, 16) Ke kak wia met kaidehn sangete ni dahme ke kin nda ahpw pil sang ni omw wiewia kan. Mwomwen omw mour pahn kasalehda me ke uhdahn poakohng Siohwa. (1 Sohn 5:3) Akadei wet me keieu mwahu nan omw mour me ke kak pilada.

15. Ia duwen omw kak kasalehda me ke poakohng Siohwa?

¹⁵ Ia duwen omw kak kasalehda me ke poakohng Siohwa? Keieu, ke pahn wiahda kapakap tohrohr ehu me ke inoukihong Koht mehlelo omw mour. (Mel. 40:8) Mwuri, kowe kasalehiong koaros omw inowo ni omw papidaisla. Ni atail koasoiapenehr nan iren onop wet, omw papidais kin wia ahnsou kaperen oh kesempwal ehu nan omw mour. Ke tepida mourki mour kapw ehu, kaidehn ong pein uhk, ahpw ong Siohwa. (Rom 14:8; 1 Pit. 4:1, 2) Ei mehlel, ele met mwomwen wia pilipil laud ehu me ke anahne wia, oh met mehlel. Ahpw pilipil wet kahrehiong uhk en ahneki mour me keieu mwahu. Ia duwen?

16. Nin duwen me Melkahka 41:12 mahsanih, ia duwen Siohwa eh pahn ketin katingih irail kan me inoukihong ih arail mour?

¹⁶ Siohwa wia Koht emen me keieu sapan. Sohte lipilipil dahme ke patohwanohng ih, e pahn ketin ahnsou koaros ketikihwei me laudsang. (Mark 10:29, 30) E pahn ketikihong uhk mour ehu me uhdahn kaperen, katapan, kansenamwahu, pil nan sampah suwed wet. Oh ke pahn ahpwtehn tepida wia met. Omw mour mwurin omw papidaisla sohte anahne imwisekla. Ke kak pousehlahte papah Semomw limpoako kohkohlahte. Limpoak nanpwungen kowe oh Semomwo pahn pousehlahte kekeirda, oh ke pahn mour kohkohlahte duwehte ih.—Wadek Melkahka 41:12.

17. Dahme ke kak patohwanohng Siohwa me e saikinte sapwellimanki?

¹⁷ Ni omw inoukihong Koht omw mour oh papidaisla, ke ahneki pwais kaselel en patohwanohng Semomwo mehkot me uhdahn kesempwal. E ketikihong uhk soahng mwahu koaros oh ahnsou kaperen kan me ke kin perenki. Eri ke pahn patohwanohng me ketin sapwellimanki nanleng oh sampah mehkot  me e saikinte sapwellimanki sang rehmw, me iei omw men loalopwoat papah ih. (Sohp 1:8; 41:11; Lep. Pad. 27:11) Met elen mour me keieu mwahu! Eri omw limpoak ong Siohwa pahn wia kahrepe keieu mwahu en papidaisla.

18. Peidek dah kan me ke kak idek?

¹⁸ Eri ia duwen omw pahn sapengala peideko, Ke pahn papidais? Kowe kelehpw me kak sapeng met. Ahpw e pahn sawas ma ke pein idek rehmw, ‘Dahme I awiawih pwehn papidaisla?’ (Wiewia 8:36) Tamataman kahrepe siluh me kitail koasoiapenehr. Keieu, ke poakohng me mehlel oh pwung. Pein idek rehmw, ‘I men iang mi ahnsowo me koaros pahn kin koasoi mehlel oh wia dahme pwung?’ Keriau, ke poakohng Sises Krais. Pein idek rehmw, ‘I men sapwellimen Koht Ohlo en wia ei Nanmwarki, oh I men kahlemengih ih?’ Kesiluh, me keieu kesempwal, ke poakohng Siohwa. Pein idek rehmw, ‘I men kaperenda kupwuren Siohwa sang ni ei papah ih?’ Ma omw pasapengpen peidek pwukat ei, eri dahme ke awiawih?—Wiewia 16:33.

19. Dahme kahrehda ke sohte anahne pweiek en papidaisla? Menlau kihda ehu karasaras. (Sohn 4:34)

¹⁹ Ma ke pweiek en papidaisla, medewehla karasaras me Sises ketin doadoahngki. (Wadek Sohn 4:34.) Tehk me Sises ketin karasahiong en wia kupwuren Semeo kene mwenge. Dahme kahrehda? Mwenge kin mwahuong kitail. Sises mwahngih me soahng koaros me Siohwa ketin kupwurki kitail en wia kin mwahuong kitail. Siohwa sohte ketin kupwurki kitail en wia mehkot me pahn keper ong kitail. Ia duwe, Siohwa ketin kupwurki ken papidaisla? Ei. (Wiewia 2:38) Eri ke kak kamehlele me ma ke pahn peikiong kehkehliko en papidaisla, e pahn wia kamwahupomw. Ma ke sohte pweiek en kang mwenge me keieu mwahu, eri dahme kahrehda ke pweiek en papidaisla?

20. Dahme kitail pahn koasoiapene nan iren onop en mwuhr?

²⁰ Dahme kahrehda ekei kin pweiek en papidaisla? Ele me tohto pahn sapengki met, “I saikinte onopada.” Ni mehlel pilipil en inoukihong Siohwa omw mour oh papidaisla iei pilipil keieu kesempwal me ke pahn wiahda. Eri ke anahne medemedewe mwahu duwen omw pilipilo, oh ke anahne ahnsou oh nanti laud pwehn kak papidaisla. Ahpw ma ke uhdahn men papidaisla, dahme ke kak wia ahnsou wet pwehn onopada? Kitail pahn koasoiapene pasapengpen peidek wet nan iren onop en mwuhr.