1-2. Ma ke saikinte onopada pwe ken papidaisla, dahme kahrehda ken dehr mworusala? (Menlau kilang kilel ni kilin Kahn Iroir wet.)

 MA KE men papidaisla, ke wiadahr mehn akadei mwahu ong pein uhk. Ia duwe, ke onopadahr en papidaisla ahnsou wet? Ma ke kamehlele me ke onopadahr oh elder kan pil pwungki, eri dehr peikasalki en papidaisla ni ahnsou me papidais kin wiawi. Ma ke wia met, ke pahn ahneki mour ehu me kansenamwahu oh katapan ni omw kin papah Siohwa.

² Ahpw mie me ndaiong uhk me ke anahne pousehlahte kekeirda mwohn omw papidaisla? De kowe me pein tehkada me ke anahne wia met? Ma iei, dehr mworusala. Ke kak kekeirda oh lel mehn akadei wet, mehnda ma ke pwulopwul de mah.

3. Dahme lapalap en mehn Idiopiao idek rehn Pilip, oh peidek dah me pwarada? (Wiewia 8:36, 38)

³ Wadek Wiewia 8:36, 38. Lapalap men sang Idiopia idek rehn sounkalohko Pilip: “Dahme irehdi ei pahn papidaisla?” Ohlen Idiopiao men papidaisla, ahpw ia duwe, e uhdahn onopadahr en kapwaiada kahk kesempwal wet?

4. Ia duwen mehn Idiopiao kasalehda me e men pousehlahte kalaudehla dahme e sukuhlki?

⁴ Ohlen Idiopiao “kolahngehr Serusalem pwe en kaudok.” (Wiewia 8:27) Eri mwein ih mehn liki men me iangala pelien lamalam en mehn Suhs. Uhdahn e eseier duwen Siohwa sang nan nting sarawi kan en Palien Paipel ni Lokaiahn Ipru. Ahpw, e pil men sukuhlki laudsang met. Pwe ni ahnsou me Pilip tuhwong lapalap menet pohn ahlo, dahme ohlo wiewia? E wie wadewadek pwuhken soukohp Aiseia. (Wiewia 8:28) Ire pwukat iei padahk loal kei en Paipel. Lapalapo sohte itarkihte en esehte padahk mengei kan; e men pousehlahte kalaudehla dahme e sukuhlki.

5. Dahme mehn Idiopiao wiahiong dahme e sukuhlki?

⁵ Ohlen Idiopiao wia lapalap men pahn Kandehsi, lih nanmwarkien Idiopia, oh e “kin apwahpwalih eh dipwisou kesempwal kan koaros.” (Wiewia 8:27) Eri mwein e wia ohl kedirepw men me ahneki pwukoa tohto. Ahpw e doadoahngki ahnsou pwehn kaudokiong Siohwa. E sohte itarki en ihte sukuhlki padahk mehlel; e kin kapwaiada dahme e sukuhlki. Eri e seiloak sang Idiopia lao lella Serusalem pwe en kaudokiong Siohwa ni tehnpas sarawio. Seiloak wet kin anahne ahnsou laud oh mwohni, ahpw ohl menet men kaudokiong Siohwa sohte lipilipil dahme e anahne wia.

6-7. Ia duwen en mehn Idiopiao limpoak ong Siohwa eh pousehlahte kehlailla?

⁶ Mehn Idiopiao sukuhlkihsang Pilip ekei padahk kesempwal kapw kan me kisehn padahk mehlel. Ehu padahk pwukat iei me Sises iei Mesaiao. (Wiewia 8:34, 35) Lapalap menet uhdahn perenkihda eh sukuhlki dahme Sises ketin wiadahr ong ih. Dahme e wia mwurin eh sukuhlki mepwukat? E kak wiewiahte mehn liki wahu men me wekiong mehn Suhs. Ahpw eh limpoak ong Siohwa oh Sapwellime Ohlo laudla. E mwekidki en wiahda pilipil kesempwal wet en papidaisla oh wiahla sapwellimen Sises Krais tohnpadahk. Pilip kak kilang me ohlo onopadahr, ih eri papidaisihala ih.

⁷ Ma ke alasang karasaras en mehn Idiopiao, ke kak onopadahr en papidaisla. Ke pil kak nda ni koapworopwor, “Dahme irehdi ei pahn papidaisla?” Kitail pahn koasoiapene ia duwen omw kak wia dahme ohlen Idiopiao wia: E pousehlahte sukuhlki padahk mehlel, e kapwaiada dahme e sukuhlki, oh pousehlahte kakehlailihala eh poakohng Koht.

8. Dahme Sohn 17:3 mahsanih me ke anahne wia?

⁸ Wadek Sohn 17:3. Ia duwe, sapwellimen Sises mahsen pwukat seweseiuk en pilada en onopki Paipel? Ele met sewese pali tohtohn kitail. Ahpw mahsen pwukat pil padahkihong kitail en pousehlahte sukuhl? Ei. Kitail sohte pahn uhdihsang atail pahn ‘esehla . . . Koht mehlelo.’ (Ekl. 3:11) Kitail pahn pousehlahte sukuhlki duwen ih kohkohlahte. Ni uwen laud me kitail pahn sukuhlki duwen ih, ih uwen laud me kitail pahn karanihala ih.—Mel. 73:28.

9. Dahme kitail anahne wia mwurin atail sukuhlkier padahk mengei kan en Paipel?

⁹ Ni atail kin tepida sukuhlki duwen Siohwa, kitail kin sukuhlkihte padahk mengei kan. Nan nah kisinlikou ong mehn Ipru ko, wahnpoaron Pohl koasoiahki padahk mengei kan nin duwen “keieun padahk kan.” E sohte ndinda me “tepin padahk kan” sohte kesempwal. Ahpw e kasalehda me e rasehng milik me seri  pwelel men kin kang. (Ipru 5:12; 6:1) Ahpw e pil kangoange Kristian koaros ren pousehlahte sukuhlki laudsang padahk mengei kan oh sukuhlki padahk loal kan en Mahsen en Koht. Ia duwe, ke kalaudelahr omw men sukuhlki padahk loal kan en Paipel? Ke men pousehlahte kekeirda pwehn kin sukuhlki duwen Siohwa oh kupwure kan?

10. Dahme kahrehda e kak apwal ong ekei aramas en onop?

¹⁰ Ahpw ong kitail me tohto, e kin apwal en onop. Ahpw ia omw pepehm ong onop? Ke sukuhlki en wadawad mwahu oh onop? Ke kin perenki onop oh pehm me ke sukuhlki soahng tohto? De ke medewe me ke sohte kak sukuhlkihdi mehkot sang nan pwuhk kan? Ma ei, eri aramas tohto kin ahneki pepehmohte. Ahpw Siohwa kak ketin seweseiuk. E me ketin unsek oh iei Sounpadahk me keieu mwahu.

11. Ia duwen Siohwa eh ketin kasalehda me ih me Sounpadahk Lapalapo?

¹¹ Siohwa ketin kamwarehki pein ih “omw Sounpadahk Lapalapo.” (Ais. 30:20, 21, NW) E ketin wia Sounpadahk me kin kanengamah, kadek oh mwahngih omw irair. E kin ketin raparapahki soahng mwahu kan rehn sapwellime tohnsukuhl kan. (Mel. 130:3) Oh e sohte kin ketin kasik me kitail en wia laudsang dahme kitail kak wia. Tamataman me e ketin wiahda omw mwahliel, kisakis kaselel ehu. (Mel. 139:14) Kitail kin ahneki ineng en sukuhlki mehkot. Sounkapikpatailo ketin kupwurki kitail en kin pousehlahte suksukuhl kohkohlahte—oh perenki wia met. Eri e wia elen loalokong en “kakairada ineng” ong padahk mehlel en Paipel ahnsou wet. (1 Pit. 2:2) Eri wiahda mehn akadei kan me ke kak kapwaiada oh kin kaukaule wadek oh onopki Paipel. (Sos. 1:8) Sang ni sapwellimen Siohwa sawas, ke pahn perenki omw kalaudehla omw kin wadewadek oh suksukuhlki duwen ih.

12. Dahme kahrehda kitail anahne onopki duwen sapwellimen Sises mour oh kalohk?

¹² Kaukaule doudouloale duwen sapwellimen Sises mour oh kalohk. E kin kesempwal kitail en alasang Sises ni keneinei ma kitail men papah Siohwa, ahpw mehlel ni ahnsou apwal pwukat. (1 Pit. 2:21) Sises ketin padahkihong sapwellime tohnpadahk kan me re pahn lelohng kahpwal kan. (Luk 14:27, 28) Ahpw e ketin kamehlele me sapwellime tohnpadahk mehlel kan kak lelepekohngete Koht duwehte ih. (Sohn 16:33) Onopki mwahu duwen sapwellimen Sises mour, oh wiahda mehn akadei kan pwe ken alasang ih nan omw mour ehuehu rahn.

13. Dahme ken pousehlahte peki rehn Siohwa oh dahme kahrehda?

¹³ En ahnekihte loalokong sohte itar. Kahrepe me ke anahne loalokong iei pwe ken kak kalaudehla omw esehla Siohwa oh kakairada irair kan duwehte poakohng ih oh pwoson ih. (1 Kor. 8:1-3) Ni omw pousehlahte suksukuhl, kin peki Siohwa en ketin seweseiuk en kalaudehla omw pwoson. (Luk 17:5) E me ketin sapan oh kin sapengala soangen kapakap pwukat. Pwoson mehlel me kin poahsoankihda loalokong pwung en atail Kohto pahn seweseiuk en kekeirda.—Seims 2:26.

14. Ia duwen wahnpoaron Piter kasansalehda ia uwen kesempwal en kapwaiada dahme kitail sukuhlki? (Pil menlau kilang kilel.)

¹⁴ Wahnpoaron Piter kasansalehda ia uwen kesempwal ong tohnpadahk en Krais kan en pousehlahte kapwaiada dahme re sukuhlki. E koasoia koasoiepen duwen Noha. Siohwa ketin mahsanihong Noha me E pahn ketin doadoahngki Nohliko pwehn kasohrehla aramas suwed kan ni ahnsowo. En Noha oh eh peneinei arail ese duwen Nohliko eh pahn wiawi  sohte kin itar en komourirailla. Tehk me Piter koasoakoasoia ahnsowo mwohn Nohliko “nindoken warihmwo eh wie kokou.” (1 Pit. 3:20) Ei, Noha oh eh peneinei kapwaiada dahme re sukuhlkihsang Koht ni arail kauwada warihmwo, lapalahn sohp ehu. (Ipru 11:7) Piter eri kapahrekihpene dahme Noha wia oh papidais oh ntingihdi: “Papidais, me pahrekiong met, pil kin komourkumwailla.” (1 Pit. 3:21) Eri kitail kak kapahrekihong doadoahk me ke wiewia ahnsouwet pwehn onopadahng papidais oh doadoahk me Noha oh eh peneineio wia erein sounpar tohto pwehn kauwada warihmwo. Eri doadoahk dah me ke anahne wia pwe ken kaunopadahng papidaisla?

15. Ia duwen atail kin kasalehda me kitail koluhla mehlel?

¹⁵ Ehu tepin soahng kan me kitail anahne wia iei en koluhkihla dipatail kan ni mehlel. (Wiewia 2:37, 38) Ni atail kin koluhla mehlel, kitail pahn uhdahn wiahda wekidekla kan. Ia duwe, ke uhdihsangehr wia soahng kan me kin kansensuwedihada Siohwa, me duwehte tiahk suwed, kang sika de doadoahngki lokaia suwed de lokaia lemei? (1 Kor. 6:9, 10; 2 Kor. 7:1; Ep. 4:29) Ma ke saikinte wia met, eri nantihong pousehla wiahda wekidekla kan. Koasoiong aramas me onop rehmwo, de peki rehn elder kan nan mwomwohdiso sawas oh kaweid. Ma ke pwulopwul oh mihmihte rehn omw pahpa nohno, eri pousehlahte peki rehra en seweseiuk pwe ken uhdihsang wiewia kan me kin irehiukedi sang papidaisla.

16. Dahme kitail anahne wia ma kitail men kaukaule kaudokiong Siohwa?

¹⁶ E pil kin kesempwal en idawehn koasoandi mwahu ehu ong kaudok. Met kin iangahki en iang towehda mihting en Kristian kan oh iang pasapeng. (Ipru 10:24, 25) Oh ni omw pahn kakehr iang kalohk, eri nantihong ken kin kaukaule wia met. Ni omw kalaudehla omw kin iang kalohk, ke pahn pil kalaudehla omw perenki wia met. (2 Tim. 4:5) Ma ke kin mihmihte rehn omw pahpa nohno, pein idek rehmw: ‘Ei pahpa nohno anahne katamankin ie en iang towehda mihting de iang kalohk? De I kin pein kohla iang mihting de kalohk?’ Ni omw kin wia soahng pwukat, ke kin kasalehda me ke ahneki pwoson oh me ke poakohng Siohwa Koht oh kalahnganki soahng kan me e ketikihong uhk. Soahng pwukat iei soahng kan “me pid poadidiong Koht,” kisakis  kei me ke pein toukihda ong Siohwa. (2 Pit. 3:11; Ipru 13:15) Koht kin ketin kupwurperenki kisakis koaros me kitail kin perenki patohwanohng ih. (Pil kilang 2 Korint 9:7.) Kitail kin wia soahng pwukat pwehki kitail kin perenki patohwanohng ih uwen atail kak koaros.

17-18. Irair kesempwal dah me pahn seweseiuk en kekeirda oh papidaisla, oh dahme kahrehda? (Lepin Padahk 3:3-6)

¹⁷ Ni omw pousehlahte kekeirda pwe ken papidaisla, ke pahn ahneki kahpwal kan. Ekei aramas kin kauweiuk pwehki dahme ke kin kamehlele. Ele re kin uhwong de kalokeiuk. (2 Tim. 3:12) Ele ke kin nantihong laud pwe ken uhdihsang wia mehkot me ke ese me sapwung. Ahpw ekei pak ke pwurehng wia soahngohte. De mwein ke pehmte me ke nsensuwed oh sohla kak kanengamah pwehki omw saik kak lel omw mehn akadei. Eri dahme pahn seweseiuk en dadaurete? Iei irair kesempwal wet—poakohng Siohwa.

¹⁸ Omw limpoak ong Siohwa iei irair kaselel ehu, irair me keieu mwahu me ke ahneki. (Wadek Lepin Padahk 3:3-6.) Limpoak laud ong Koht kak seweseiuk en pweida ni omw lelohng kahpwal kan. Paipel kin kalapw kasalehda sapwellimen Siohwa limpoak loalopwoat ong sapwellime ladu lelepek kan. Sapwellime limpoak loalopwoat kin wehwehki me e soh mwahn pahn ketin likidmeliehla sapwellime ladu kan de sohla poakohng irail. (Mel. 100:5) Ke wiawihda rasehng Koht. (Sen. 1:26) Eri ia duwen omw kak kasalehda soangen limpoak wet?

19. Ia duwen omw kak kalaudehla omw kalahnganki soahng koaros me Siohwa ketin wiadahr ong uhk? (Kalesia 2:20)

¹⁹ Tepikihda omw kalahngan. (1 Des. 5:18) Pein idek rehmw ehuehu rahn, ‘Ia duwen Siohwa eh ketin kasalehiong ie limpoak?’ Mwuri tehk mwahu me ken kalahngankihong Siohwa nan omw kapakap oh koasoia soahng kan me e ketin wiadahr ong uhk. Pohnese me Siohwa ketin wiahiong uhk soahng mwahu kan pwehki e ketin poakohng uhk, duwehte wahnpoaron Pohl eh wehwehkihda duwen Siohwa. (Wadek Kalesia 2:20.) Pein idek rehmw: ‘I pil men kasalehiong ih ei limpoak?’ Limpoak ong Siohwa pahn seweseiuk en pousehlahte pelianda kasongosong kan oh seweseiuk en pweida ni omw lelohng kahpwal kan. E pahn kamwakid uhk en pousehlahte kaudokiong Siohwa  oh kasalehiong Semomwo me ke poakohng ih rahn koaros.

20. Dahme ke anahne wia pwe ken inoukihong Siohwa omw mour, oh ia uwen kesempwal en pilipil wet?

²⁰ Omw limpoak ong Siohwa pahn kamwakid uhk en wia kapakap kesempwal ehu. Ke pahn inoukihong Koht omw mour. Tamataman me ni omw inoukiongehr Siohwa omw mour, ke ahnekier koapworopwor wet: E pahn ketin sapwellimankinuhkala kohkohlahte. Ni omw inoukihong Siohwa omw mour, ke inoukihda me ke pahn papah ih ni ahnsou mwahu kan oh pil ni ahnsou apwal akan. Ke sohte anahne pwurehng wiahda inou wet. Ei mehlel, ni omw kin wiahda inou ehu, ke kin wiahda pilipil kesempwal ehu. Medewehla met: Ke pahn wiahda pilipil tohto nan omw mour, ekei pilipil pwukat me inenen mwahu, ahpw pilipil en inoukihong Siohwa omw mour me mwahusang koaros. (Mel. 50:14) Sehdan pahn song en kaluwetehla omw limpoak ong Semomwo oh kin kasikasik me ke sohla pahn lelepek ong ih. Dehr mweidohng Sehdan en kana! (Sohp 27:5) Omw limpoak laud ong Siohwa pahn seweseiuk en kolokolete omw inou en papah Siohwa kohkohlahte oh ke pahn uhdahn karanihala Semomwo nanleng.

21. Dahme kahrehda kitail kak nda me papidais kin sohte kaimwisekala omw papah Siohwa, ahpw e tapiada soangen mour wet?

²¹ Mwurin omw inoukihong Siohwa omw mour, koasoiong elder kan nan omw mwomwohdiso duwen kahk kesempwal me ke pahn wia mwuri. Ahpw tamataman me papidais kin sohte kaimwisekala omw papah Siohwa, ahpw e tapiada elen omw mour en papah Siohwa kohkohlahte. Eri kakehlaka omw limpoak ong Semomwo ahnsou wet. Wiahda mehn akadei kan pwe omw limpoak en kin kehlailla ehuehu rahn. Met pahn kamwakid uhk en papidaisla. Rahnen omw papidaiso pahn wia rahn kaselel ehu. Ahpw rahno wiahte tepin omw papah Siohwa. Eri pousehlahte kalaudehla omw limpoak ong Siohwa oh sapwellime Ohlo kohkohlahte!