Dahme kahrehda ohl me Pohas ekerki “kompoakepahi” nda me e pahn kauwehla eh sohso ma e pwoudikihda Rud? (Rud 4:1, 6)

Ni mwehin Paipel, ma ohl emen mehla ahpw sohte nah seri, peidek kei anahne pasapengla: Dahme pahn wiawihong sapweo? Eden eh peneinei pahn sohrala douluhl? Kosonned en Moseso kin sapengala peidek pwukat.

Dahme pahn wiawihong sapwen ohl emen me mehla de ohl emen me semwehmwehla oh netikihla sapweo? Rie pwutako de eh peneinei keren pahn pwurehng kasapahldo sahpwo de pwurehng pwainda. Met pahn kahrehda peneineio pahn kak sapwenikihte sahpwo.—Lip. 25:23-28; Nemp. 27:8-11.

Ia duwen eden peneinei en ohl me mehlao eh sohte pahn sohrala? Met kin epwella sang ni kapwopwoud en rien ohl me mehlao pwutak oh en ohl me mehlao eh pwoud, duwehte dahme wiawihong Rud. Ohl emen pahn pwoudikihda en rie pwutak me mehlao eh pwoudo pwe liho en kak naitikihong seri, ahpw serio me pahn adaneki eden ohl me mehlao oh sohsohki sapweo. Koasoandi limpoak wet kin pil apwalih liohdio.—Deud. 25:5-7; Mad. 22:23-28.

Medewehla en Naomi irairo. E pwoudikihda ohl emen me adaneki Elimelek. Ni ahnsou me eh pwoudo oh nah pwutak riemeno mehla, solahr aramas me pahn apwalih ih. (Rud 1:1-5) Ni eh pwurala Suda, Naomi padahkihong en nah pwutako pwoudo Rud en peki Pohas en pwurehng pwainda sapwarailo. Pohas wia peneinei keren men ong Elimelek. (Rud 2:1, 19, 20; 3:1-4) Ahpw e ese me mie emen peneinei me kerensang ih, me Paipel sohte kasalehda edeo. Eri peneinei menet me pahn tepin pilada ma e men pwainsapahlda sahpwo de soh.—Rud 3:9, 12, 13.

Nin tapio, ohl me sohte sansal edeo men sawas. (Rud 4:1-4) E ese me e anahne mwohni pwehn pwainkihda sahpwo, ahpw e pil ese me Naomi nohn mah pwehn kak naineki seri me pahn sohsohki sapwen Elimeleko. Eri ohl me ede sohte sansalo pahn uhd ale sahpwo oh sahpwo pahn wiahla kisehn eh sohso. Eri koasoandi wet mwomwen mwahuong ih.

Ahpw ohl me sohte sansal edeo wekidala eh madamadau ni eh esehda me e anahne pwoudikihda Rud. Ih eri nda: “I sohte pahn doadoahngki ei pwuhng en pwainda sahpwo, pwehki met wehwehki me kaidehn uhdahn nei seri kan me pahn sohsohki sahpwo.” (Rud 4:5, 6) Dahme kahrehda e wekidala eh madamadau?

Ma ih de emen tohrohr pwoudikihda Rud oh Rud naitikihada pwutak men, pwutako me pahn sohsohki sapwen Elimeleko. Ia duwen met eh kauwehla en ohl me sohte sansal edeo eh ‘sohso’? Paipel sohte kasalehda met, ahpw iet ekei soahng kan me kakete wia kahrepe kan.

• Keieu, mwohni me e pahn doadoahngkio pahn sohla katepe ong ih pwe e sohte pahn sapweniki sapwen Elimeleko. Pwe nein Rud pwutako me pahn sapweniki.

• Keriau, ih me pahn pwukoahki kamwenge oh apwalih Naomi oh Rud.

• Kesiluh, ma Rud neitikiong ohlo, seri ko pahn iang sohsohki sapwen nein ohlo seri kan.

• Kapahieu, ma ohl me sohte sansal edeo sohte naineki seri, pwutak me Rud naitikihedio pahn ahneki pwuhng ong sapwen Elimelek oh sapwen ohlo. Eri ni ohlo eh pahn mehla, sapweo pahn kohwong seri me pahn wa eden Elimeleko ah kaidehn edeo. Ohl me sohte sansal edeo sohte men kauwehla eh sohso pwehn sewese Naomi. Ahpw e men mweidohng Pohas me wia peneineien Elimelek me keriaun keren en uhd pwukoahki pwainda sapahl sahpwo. Pohas wia met pwehki e men “kolokol ong dipwisou oh soahng koaros ni eden en ohl melahro eh peneinei.”—Rud 4:10.

E sansal me ohl me sohte sansal edeo kolokolete edeo oh eh sohsou. E kin raparapahkihte pein kamwahupe. Ahpw mendahki ohl me sohte sansal edeo nanti laud pwehn kolokol edeo, leledo rahnwet sohte me ese edeo. E pil sohte alehdi pwais tohrohr me Pohas alehdi pwehn iang kisehn irekidi en eden peneinei en Mesaiao, Sises Krais. Eri e uhdahn imwila suwed ong ohl me sohte sansal edeo, pwehki e roporop oh sohte men sewese aramas emen me anahne sawas!—Mad. 1:5; Luk 3:23, 32.