1. Dahme aramas kin tehkada ni arail ehdin iang towehda atail mihting kan? (Menlau pil kilang kilel.)

 MEDEWEHLA pwopwoud ehu me ehdin ara iang towehda mihting nan Wasahn Kaudok en Sounkadehdehn Siohwa kan. Pwopwoudo uhdahn pwuriamweikihla ara kilang ia uwen Kristian kan ar kasalehda kadek oh mwomwen arail kin limpoakpene. Ni ara pwurasang ni mihtingo, liho ndaiong eh pwoudo, ‘Aramas ko weksang aramas teikan me kita kin tuhwong, oh I uhdahn perenki patehng irail.’

2. Dahme kahrehda ekei kin dipekelekel?

² Limpoak me kin mi nanpwungen sapwellimen Siohwa aramas akan kin uhdahn kesempwal. Ei mehlel, Sounkadehdehn Siohwa kan sohte unsek. (1 Sohn 1:8) Eri ni atail esehla mwahu irail kan nan mwomwohdiso, ih uwen laud en atail pahn kak kilang arail sapwung kan. (Rom 3:23) E kansensuwed me ekei kin mweidohng ahn meteikan soh unsek en kadipekelekelih irail.

3. Ia duwen sapwellimen Sises tohnpadahk mehlel kan ar kin sansalda? (Sohn 13:34, 35)

³ Pwurehng tehk tepin iren Paipel en iren onop wet. (Wadek Sohn 13:34, 35.) Ia duwen aramas akan ar kak kasawihada ihs Kristian mehlel kan? Iei sang ni limpoak a kaidehn arail wia aramas unsek kei. Pil tehk me Sises sohte mahsanih: ‘Pwe kumwail pahn esehki me kumwail nei tohnpadahk kan.’ Ahpw e mahsanih: “Pwe koaros pahn esehki me kumwail nei tohnpadahk kan.” Eri Sises ketin kasalehda me kaidehn sapwellime tohnpadahk kante ahpw pil irail kan likin mwomwohdiso en Kristian pahn ese sapwellime tohnpadahk mehlel kan sang ni arail kin poakohng emenemen ni soh roporop.

4. Dahme kahrehda ekei ele kin men ese duwen Kristian mehlel kan?

⁴ Ekei me kaidehn Sounkadehdehn Siohwa kan kakete medewe: ‘Ia duwen limpoak eh kak sewese sapwellimen Sises tohnpadahk mehlel kan? Ia duwen Sises eh ketin kasalehiong sapwellime tohnpadahk kan limpoak? Oh ia duwen atail kak alasang sapwellimen Sises mehn kahlemeng rahnwet?’ Sounkadehde kan kin medemedewe pasapengpen peidek pwukat. En wia met ele pahn sewese kitail en kasalehda limpoak mehlel, ahpw mehlel ni atail kin dadaur pahn soh unsek en emenemen.—Ep. 5:2.

5. Menlau kawehwehda sapwellimen Sises mahsen ko nan Sohn 15:12, 13.

⁵ Sises ketin kawehwehda me sapwellime tohnpadahk kan pahn kin limpoakpene ni ahl tohrohr ehu. (Wadek Sohn 15:12, 13.) Tehk dahme Sises ketin kehkehlingkihong irail: “Poakohng emenemen duwehte ei kin poakohng kumwail.” Ia wehwehn met? Sises ketin pousehlahte mahsanih me met iei limpoak en tounmetei de soangen limpoak me wiahiong Kristian men en pil mehkihla emen ienge Kristian. b

6. Ia duwen Mahsen en Koht eh kasalehda kesempwalpen limpoak?

⁶ Mahsen en Koht padahkihong kitail me limpoak uhdahn kesempwal. Karasepe, ong aramas tohto iren Paipel pwukat iei ekei iren Paipel kan me re perenki: “Koht iei limpoak.” (1 Sohn 4:8) “Ke anahne poakohng mehn mpomw duwen omw kin poakohng pein uhk.” (Mad. 22:39) “Limpoak kin pwaindi dihp tohto.” (1 Pit. 4:8) “Limpoak me poatopoat.” (1 Kor. 13:8) Iren Paipel pwukat oh iren Paipel teikan kasansalehda me e uhdahn kesempwal en kasalehda irair kaselel wet.

7. Dahme kahrehda Sehdan sohte kak padahkihong aramas akan en limpoakpene oh miniminpene?

 ⁷ Aramas tohto kin idek: ‘Ia duwen ei kak ese mehnia kaudok me mehlel? Pelien lamalam koaros kin nda me re kin padahngki me mehlel, ahpw irail kin padahngki mehkot me weksang duwen Koht.’ Sehdan wiahda kaudok likamw tohto oh met kahrehiong en apwal ong aramas akan en ese mehnia kaudok me mehlel. Ahpw e sohte kak kihpene aramas akan nan sampah pwon ren limpoakpene. Siohwa kelehpw me kak ketin wia met. Kitail ese met pwehki limpoak kohsang rehn Siohwa. Irail kante me ahneki sapwellimen Siohwa manaman oh kapai me kak ahneki limpoak mehlel nanpwungarail. (1 Sohn 4:7) Ihme kahrehda Sises mahsanih me sapwellime tohnpadahk kante me pahn ahneki limpoak mehlel ong emenemen.

8-9. Ia duwen me tohto ar mwekidki limpoak me re kilang nanpwungen Sounkadehdehn Siohwa kan?

⁸ Duwehte me Sises ketin kohpada, me tohto pahn ese sapwellime tohnpadahk mehlel kan sang ni limpoak mehlel me re kin kasalehda nanpwungarail. Karasepe, brother men me adaneki Ian tamanda ahnsou me e ehdin iang towehda mihting tohrohr, me wiawi nan wasahn mwadong ehu me karanih imweo. Sounpwong kei mwoweo e kohla wasao pwehn iang kilang mwadang ehu. E koasoia: “Ahn aramas akan mwekid ni mihting tohrohro uhdahn weksang mwomwen aramas kan ar kin kilang mwadong. Sounkadehde kan kin kasalehda wahu oh likouda mwahu, oh neirail seri kan sohte ketihwo.” E pil koasoia: “Ahpw keieu kesempwal, aramas pwukat kin mwomwen nsenamwahu oh popohl. Ih soangen mour wet me I mwahuki. I sohte taman padahk kan me wiawi rahno, ahpw I tamatamante mwomwen ahn Sounkadehde ko mwekid.” c Ei mehlel, soangen wiewia wet kin kohsang limpoak mehlel me kitail kin ahneki ong emenemen. Pwehki kitail kin poakohng riatail Kristian kan, kitail kin kadekohng oh waunekin irail.

⁹ John ahneki soangen pepehmohte ni ahnsou me e tepida iang towehda mihting kan, e koasoia: “I pwuriamweikihla me koaros wasao uhdahn kadek. Irail uhdahn kadek me kahrehda I medewe me irail aramas sarawi kei. Arail limpoak mehlel kamehlelehiong ie me I diaradahr kaudok mehlel.” d Karasepe pwukat oh me tohto teikan kasalehda me sapwellimen Siohwa aramas akan iei Kristian mehlel kei.

10. Ahnsou dah me kitail keieu anahne kasalehda limpoak en Kristian? (Pil kilang dahme ntingdi pah.)

¹⁰ Nin duwen me kitail koasoiapenehr, sohte emen riatail Kristian kan me unsek. Ekei pak, irail pahn kin nda de wia soahng kan me pahn kansensuwedihkitailla. e (Seims 3:2) Ni mehlel ahnsou me meteikan kin kansensuwedihkitailla, kitail kak kasalehda me kitail uhdahn poakohng irail sang ni dahme kitail kin nda oh wia. Nan soangen irairo, dahme kitail kak sukuhlkihsang sapwellimen Sises mehn kahlemeng?—Sohn 13:15.

11. Madamadau sapwung dah me Seims oh Sohn kasalehda? (Menlau pil kilang kilel.)

¹¹ Sises sohte ketin kasik sapwellime tohnpadahk kan en unsek. Ahpw, ni limpoak e ketin sewese irail en kamwahwihala arail luwet kan oh wiahda wekidekla kan pwe ren kak kaperenda Siohwa. Nan ehu ahnsowo, sapwellime wahnpoaron riemeno Seims oh Sohn ndaiong ara nohnou en peki rehn Sises en ketikihong ira dehu kesempwal ehu nan Wehio. (Mad. 20:20, 21) Dahme Seims oh Sohn wia kasalehda me ira pohnmwahso oh men uhdahn kesempwalsang meteikan.—Lep. Pad. 16:18.

12. Ia duwe, Seims oh Sohn kelehpw me kasalehda madamadau sapwung? Menlau kawehwehda.

¹² Kaidehn Seims oh Sohn kelehpw me kasalehda madamadau sapwung nan irairo. Tehk ia duwen wahnpoaron teikan ar mwekidki met: ‘Ni ahnsou me irail meh ehko rongada duwen met, irail ahpw lingeringerda pahn pirieno.’ (Mad. 20:24) Kitail kak medewehla me Seims oh Sohn oh wahnpoaron teiko akamaida nanpwungarail. Mwein ekei nda mehkot me duwehte met: ‘Kumwa medewe me kumwa mwahusang kiht? Ihme kumwa pekihki dehu ehu me lapalapasang kiht? Kaidehn kumwa kelehpw me iang Sises doadoahk laud. Se pil warohng ahneki pwais kesempwal kan duwehte kumwa!’ Sohte lipilipil dahme re medewe de nda, nan soangen irairo irail manokehla en kin ahnsou koaros kasalehda limpoak oh kadek ong emenemen.

13. Ia duwen Sises eh ketin mwekidki ahn sapwellime wahnpoaron ko soh unsek? (Madiu 20:25-28)

¹³ Dahme Sises ketin wia? E sohte ketin lingeringerda. E sohte mahsanih me e pahn ketin rapahkihda wahnpoaron teikan me mwahusang irail, ohl akan me kin uhdahn aktikitik oh me pahn kin ahnsou koaros limpoak ong emenemen. Ahpw, Sises ketin mahseniong irail ni kanengamah pwehki e mwahngih me irail men wia dahme pwung. (Wadek Madiu 20:25-28.) Sises kin ketin ahnsou koaros kadek ong wahnpoaron ko mendahki arail kin pwurupwurehng akamaiki ihs me keieu lapalap nanpwungarail.—Mark 9:34; Luk 22:24.  

14. Tiahk dah me sapwellimen Sises wahnpoaron ko tikida ie?

¹⁴ Sises uhdahn ketin tamataman tiahk me wahnpoaron ko tikida ie. (Sohn 2:24, 25) Sounkawehwehn mehn Suhs kan oh Parisi kan kin padahngki me aramas me kesempwal iei irail kante me ahneki dehu lapalap. (Mad. 23:6; pil kilang kisin kasdou The Front Seats in Synagogue nan study note en Matthew 23:6.) Kaunen pelien lamalam en mehn Suhs kan pil kin medewe me re mwahusang meteikan. f (Luk 18:9-12) Sises mwahngih me soangen madamadau wet kak kamwakid mwomwen sapwellime wahnpoaron ko ar kin kilengwohng pein irail oh meteikan. (Lep. Pad. 19:11) E sohte ketin kasik me sapwellime wahnpoaron ko sohte pahn wiahda sapwung kan oh kin kanengamahiong irail ni ar wia met. E mwahngih me irail men wia dahme mwahu. Eri ni kanengamah e ketin padahkihong irail en kalaudehla arail aktikitik oh kasalehda limpoak ong meteikan ahpw kaidehn en ahnsou koaros songosong en mwahusang irail.

15. Dahme kitail kak sukuhlkihsang dahme wiawi nanpwungen Seims, Sohn oh tohnpadahk teikan?

¹⁵ Kitail kak sukuhlki soahng tohto sang dahme wiawihong Seims oh Sohn. E sapwung Seims oh Sohn en peki rehn Sises dehu kesempwal nan Wehio. Ahpw wahnpoaron teiko pil sapwung. Irail sohte song en miniminpene. Ahpw Sises ketin kadek oh limpoakohng wahnpoaron 12 ko koaros. Ia mehn kasukuhl ong kitail? Dahme kesempwal iei kaidehn ihte dahme meteikan wia ahpw pil mwomwen atail mwekidki arail sapwung oh soh unsek kan. Dahme kak sewese kitail? Ni atail kin nsensuwed pahn emen riatail Kristian, kitail kak pein idek rehtail: ‘Dahme kahrehda dahme e wiao uhdahn kasensuwedihiehda? Ia duwe, met kasalehda ehu luwet me I anahne kamwahwihala? Mwein me kansensuwedihiehdao ahneki kahpwal? Mehnda ma mie kahrepe mwahu ien nsensuwed, I kak kasalehda limpoak oh mahkohng ih?’ Ni atail kin kasalehda limpoak ong emenemen, kitail kin kasalehda me kitail wia sapwellimen Sises tohnpadahk mehlel.

16. Dahme kitail pil kak sukuhlkihsang sapwellimen Sises mehn kahlemeng?

¹⁶ Sapwellimen Sises mehn kahlemeng pil padahkihong kitail en kin song en wehwehki riatail Kristian kan. (Lep. Pad. 20:5) Ni mehlel, Sises kak mwahngih dahme mi nan mohngiongitail. Kitail sohte kak. Ahpw kitail kak kanengamahiong riatail Kristian kan ni arail kansensuwedihkitailla. (Ep. 4:1, 2; 1 Pit. 3:8) E pahn mengei en wia met ma kitail esehla mwahu irail. Medewehla ehu karasepe.

17. Ia duwen emen sounapwalih me kin seiloak paiekihda eh esehla mwahu rie Kristian men?

¹⁷ Sounapwalih me kin seiloak men tamanda brother men sang ehu mwomwohdiso ko me e kin apwalih nan Palimese en Aperika. Nin tapio, sounapwaliho medewe me brothero sohte kin kadek. Ia duwen sounapwaliho eh mwekidki met? E koasoia: “I koasoanehdi en esehla mwahu brothero, ahpw kaidehn en pohnsehsehla.” Ni ahnsou me sounapwaliho wiahda ahnsou pwehn patehng brothero, e esehda mwomwen brothero eh tikida oh ia duwen met eh kamwakid mwomwen eh wiewia ong meteikan. Sounapwaliho doula koasoia:  “Ni ahnsou me I diarada uwen eh apwal ong ih en wiahda wekidekla kan me e men wiahda pwehn patehng meteikan oh uwen laud en wekidekla me e wiadahr, I uhdahn waunekin ih. Se wiahla kompoakepah mwahu kei.” Mehlel, ni atail kin song en wehwehki riatail Kristian kan, kitail kin esehda me e mengei en kasalehiong irail limpoak.

18. Peidek dah kan me kitail kak idek rehtail ma riatail Kristian men kansensuwedihkitailla? (Lepin Padahk 26:20)

¹⁸ Ele ekei pak kitail kin pehm me kitail anahne kohla koasoiong riatail Kristian men me kansensuwedihkitailla. Ahpw keieu, e pahn mwahu en pein idek rehtail peidek pwukat: ‘I kin uhdahn wehwehki dahme wiawi?’ (Lep. Pad. 18:13) ‘E songosong en dehr kansensuwedihiehla?’ (Ekl. 7:20) ‘Mie pak I wiahda soangen sapwungohte?’ (Ekl. 7:21, 22) ‘Ma I koasoiaiong aramaso duwen met, e sou pahn pil kalaudehla kahpwalo?’ (Wadek Lepin Padahk 26:20.) Ni atail kin uhdi oh medemedewe soangen peidek pwukat, ele kitail pahn wehwehkihda me limpoak kak kamwakid kitail en uhdihsang medemedewe dahme wiawi.

19. Dahme ke koasoanehdi teng en wia?

¹⁹ Sounkadehdehn Siohwa kan kin kadehdehda me irail wia sapwellimen Sises tohnpadahk mehlel kei ni arail kin limpoakpene. Emenemen kitail kin kasalehda me kitail uhdahn wia sapwellimen Sises tohnpadahk kei ni atail kin kasalehiong riatail Kristian kan limpoak soh roporop mendahki arail soh unsek kan. Ni atail kin kasalehda limpoak me soh roporop, ele meteikan pahn pil esehda kaudok mehlel oh iang kitail kaudokiong Siohwa, Koht en limpoak. Eri kitail en koasoanehdi teng en pousehlahte kasalehda limpoak me kin kadehdehda me kitail Kristian mehlel kei.