1-2. (a) Irair dah me Pohl mi loale ni ahnsou me e ntinglahng mehn Episos ko, oh dahme kahrehda e ntinglahng irail? (b) Peidek dah kan me kitail pahn koasoiapene?

 EREIN eh sensel nan ihmw ehu nan Rom, wahnpoaron Pohl men kangoange rie Kristian kan. E sohte kak mwemweitla rehrail, eri e ntingihda kisinlikou ko. E ntingihda kisinlikou pwukat ong mehn Episos ko mpen pahr 60 de 61.—Ep. 1:1; 4:1.

² Kereniong sounpar eisek mwoweo, Pohl mihmi ekis werei nan Episos, kalokalohk oh padahngki rongamwahwo. (Wiewia 19:​1, 8-10; 20:​20, 21) E uhdahn poakohng rie Kristian ko oh men sewese irail en lelepekohngete Siohwa. Ahpw dahme kahrehda e ntingkilahng Kristian keidi ko duwen rotorot oh marain? Oh mehn kasukuhl dah me Kristian koaros kak sukuhlkihsang dahme e ntingihedi? Kitail pahn koasoiapene pasapengpen peidek pwukat.

SANG ROTOROT ONG MARAIN

3. Lepin lokaia dah kan me Pohl doadoahngki nan nah kisinlikou ong mehn Episos ko?

³ Pohl ntingkilahng Kristian kan nan Episos: “Mahso kumwail mi nan rotorot, ahpw met kumwail mi nan marain.” (Ep. 5:8) Wasaht Pohl doadoahngki lepin lokaia ko “rotorot” oh “marain” pwehn karasahda ia uwen laud en mehn Episos ko ar wekila. Kitail pahn koasoiapene dahme kahrehda Pohl kak nda me mehn Episos ko “mi nan rotorot” mahso.

4. Ia wehwehn mehn Episos ko ar mi nan rotorot pwehki pelien lamalam likamw?

⁴ Pelien lamalam likamw. Mwohn arail esehla padahk mehlel oh wiahla Kristian kei, mehn Episos ko kin kamehlele padahk en pelien lamalam likamw kan oh pil akmanaman kan. Nan  kahnimw en Episos, mie ahn mehn Krihk kan tehnpas sarawi en koht lih Artemis, me aramas tohto kin wiahki ehu rehn soahng kan me keieu kapwuriamwei me wiawihda. Aramas akan kin kohla ni tehnpaso pwehn kaudokiong dikedik kan. Sounparada kepwe kan kin wiahda mwohni laud sang ni arail wiahda oh netikihla dikedik kan en tehnpaso oh koht liho. (Wiewia 19:​23-27) Patehng met, aramas tohto nan Episos pil kin wunahni.—Wiewia 19:19.

5. Ia wehwehn mehn Episos ko ar mi nan rotorot pwehki tiahk suwed?

⁵ Tiahk suwed. Aramas akan nan Episos kin uhdahn wia tiahk suwed oh sohte kin namenengki. Sipai kan nan arail wasahn kasdo oh arail kasarawi kan kin kalapw pidada tiahk samin me pid wia nsenen pwopwoud. (Ep. 5:3) Mehn Episos tohto “solahr arail pepehm en namenek.” (Ep. 4:​17-19) Mwohn arail sukuhlki duwen sapwellimen Siohwa koasoandi kan ong dahme pwung oh sapwung, kadeikpen loalarail sohte kin kedirepwa arail wiahda mehkot sapwung. Irail pil sohte kin nsenohki ia sapwellimen Siohwa pepehm ong arail wiewia kan. Eri Pohl kak nda me irail mi “nan rotorot oh re kin dohsang mour me kin kohsang rehn Koht.”

6. Dahme kahrehda Pohl kak nda me mehn Episos ko met “mi nan marain”?

⁶ Ahpw ekei mehn Episos ko kohkohsang nan rotorot. Pohl ntingihedi me ‘met irail mi nan marain pwehki arail miniminiong Kauno.’ (Ep. 5:8) Met irail kin mour pahrekiong sapwellimen Siohwa mahsen, me duwehte marain ehu me kin kaweid irail. (Mel. 119:105) Mehn Episos pwukat kesehla arail tiahk me kohsang pelien lamalam likamw oh pil arail tiahk samin kan. Irail kin “kahlemengih Koht” oh kin wia uwen arail kak koaros en kaudokiong Siohwa oh kaperenda ih.—Ep. 5:1.

7. Ni ahl dah me atail irair duwehte irair en Kristian tohto nan Episos?

⁷ Ni ahlohte, mwohn atail esehla padahk mehlel, kitail mi nan rotorot pwehki pelien lamalam likamw oh atail tiahk kan. Ekei kitail kin kasarawi rahn akan; ekei kitail kin wia  tiahk suwed kan. Ahpw ahnsou me kitail sukuhlki sapwellimen Siohwa koasoandi kan ong dahme pwung oh sapwung, kitail wiahda wekidekla kan. Kitail tepida wekidala atail mour pwehn mour pahrekiong sapwellime koasoandi pwung kan. Oh pwehki met, mie kapai tohto me kitail ahneki. (Ais. 48:17) Ahpw met kitail pil kin lelohng kahpwal kan. E sohte kin ahnsou koaros mengei en soikala rotoroto oh “pousehlahte weweid nin duwen seri en marain.” Ia duwen atail kak wia met?

SOIKALA ROTOROTO

8. Nin duwen me Episos 5:​3-5 mahsanih, dahme mehn Episos ko anahne soikala?

⁸ Wadek Episos 5:​3-5. Pwe irail en soikala tiahk en rotorot, Kristian kan nan Episos anahne pousehlahte soikala wiewia kan me kin kansensuwedihala Siohwa. Soahng pwukat me iangahki tiahk samin me pid wia nsenen pwopwoud oh kamwan suwed. Pohl katamankihong mehn Episos ko me irail en soikala soahng pwukat ma irail men “sohsohki Wehin Krais oh Koht.”

9. Dahme kahrehda kitail anahne kanahieng en dehr wia soahng kan me kak kahrehiong kitail en wia tiahk samin?

⁹ Kitail pil anahne pousehlahte kanahieng en dehr wia soahng kan me “wia kisehn rotorot.” (Ep. 5:11) E uhdahn mehlel me ni aramas emen eh kin kilikilang, rongorong, de koasokoasoia soahng kan me samin, e pahn mengeiong en wia mehkot sapwung. (Sen. 3:6; Seims 1:​14, 15) Nan ehu sahpw, mie Sounkadehde tohto me tepida koasoipene de textpene nan social media. Nin tapio, irail tepida koasoia soahng kan duwen Siohwa de padahk mehlel. Ahpw ekisekis, irail tepida koasoia soahng kan me sohte kin kaperenda Siohwa. Irail tepida koasoia soahng kan me pid wia nsenen pwopwoud. Me tohtohn brother pwukat mwuhr koasoia me arail kin koasoia soahng samin kan kahrehiong irail en wia tiahk samin me pid wia nsenen pwopwoud.

10. Ia duwen Sehdan eh kin song en pitih kitail? (Episos 5:6)

¹⁰ Ahn Sehdan sampah kin song en pitih kitail, pwehn kamehlelehiong kitail me dahme Siohwa ketin mahsanih me samin sohte uhdahn sapwung. (2 Pit. 2:19) Met sohte kapwuriamwei! Tepilo kin ahnsou koaros song en karotongehla aramas akan pwe ren sohte kak ese dahme pwung oh sapwung. (Ais. 5:20; 2 Kor. 4:4) Ihme kahrehda nan kasdo, tv, oh website tohto, kin kangoange soahng kan me uhwong sapwellimen Siohwa koasoandi pwung kan! Sehdan men kitail en medewe me wiewia oh mour samin me ndand nan sampah rahnwet sohte sapwung ahpw e kaperen oh sohte keper.—Wadek Episos 5:6.

11. Ia duwen dahme wiawihong Angela eh kasalehda anahnepen peikiong kaweid erpit kan nan Episos 5:7? (Pil kilang kilel.)

¹¹ Sehdan men kitail en werekiong aramas akan me pahn kahrehiong en apwal ong kitail en peikiong sapwellimen Siohwa koasoandi kan. Ihme kahrehda Pohl kangoangehki mehn Episos ko: “Kumwail dehr kin wia dahme re kin wia,” me wehwehki irail akan me kin wia dahme sapwung mwohn silangin Koht. (Ep. 5:7) Eri kitail anahne kanahieng laudsang mehn Episos en mahs ko, pwehki rahnwet kitail kak patehng aramas akan kaidehn sang ni atail tuhwong irail, ahpw pil nan social media. Angela, a sang Eisia, esehda uwen keperpen social media. E koasoia: “Ei madamadau ekisekis wekila. Sohte pwand, I tepida sohla perki kompoakepahnki irail kan me sohte wauneki kaweid en Paipel. Mwuri, I tepida medewe me e mwahu en mourki  mour ehu me kin kansensuwedihada Siohwa.” Ahpw ni limpoak, ekei elder sewese Angela en wiahda wekidekla kan me anahn. E koasoia: “Met I kin medemedewehte Siohwa oh sapwellime madamadau a kaidehn social media.”

12. Dahme pahn sewese kitail en peikiongete sapwellimen Siohwa koasoandi ong dahme pwung oh sapwung?

¹² Kitail anahne pelianda madamadau en sampah me tiahk samin sohte sapwung. Kitail ese me e sapwung. (Ep. 4:​19, 20) Ahpw e mwahu en pein idek rehtail: ‘Ni keneinei I kin soikala werekiong iengei tohndoadoahk kan, iengei tohnsukuhl kan, de meteikan me sohte kin wauneki sapwellimen Siohwa koasoandi? I kin eimah idawehn dahme Siohwa ketin mahsanih me pwung de sapwung mehnda ma ekei kin nda me I kin lipilipilki aramas?’ Nin duwen me 2 Timoty 2:​20-22 mahsanih, kitail pil anahne kanahieng ni atail pilada kompoakepatail keren kan nan mwomwohdisohn Kristian. Kitail en tamataman me ekei kakete sohte kin sewese kitail en lelepekte nan atail papah Siohwa.

WEWEID “NIN DUWEN SERI EN MARAIN”

13. Ia wehwehn en “pousehlahte weweid nin duwen seri en marain”? (Episos 5:​7-9)

¹³ Pohl kangoange Kristian en Episos ko en dehr ihte soikala rotorot ahpw ren pil “pousehlahte weweid nin duwen seri en marain.” (Wadek Episos 5:​7-9.) Ia wehwehn met? Met wehwehki me atail tiahk anahne ahnsou koaros kasalehda me kitail Kristian mehlel kei. Ehu ahl en lel mehn akadei wet iei sang ni atail pwerisekiong wadek oh onopki Paipel iangahki neitail sawasepen Paipel kan. E uhdahn kesempwal en tehk kanahieng padahk kan oh mehn kahlemeng kan en Sises Krais, me wia “marain en sampah.”—Sohn 8:12; Lep. Pad. 6:23.

14. Ia duwen sapwellimen Koht manaman eh kak sewese kitail?

¹⁴ Kitail pil anahne sapwellimen Koht manaman pwe kitail en kak doulahte wia “seri en marain.” Dahme kahrehda? Pwehki e sohte mengei en kolokolete atail mwakelekel nan sampah samin wet. (1 Des. 4:​3-5, 7, 8) Sapwellimen Koht manaman kak sewese kitail en pelianda madamadau en aramas akan  nin sampah me kin uhwong sapwellimen Koht madamadau. Sapwellimen Koht manaman pil kak sewese kitail en kakairada “soangen mwahu koaros oh pwung oh mehlel.”—Ep. 5:9.

15. Ni ahl dah kan me kitail kak alehdi sapwellimen Koht manaman? (Episos 5:​19, 20)

¹⁵ Ehu ahl me kitail kak ale sapwellimen Koht manaman iei sang ni atail kapakapki. Sises mahsanih me Siohwa pahn “ketikihong irail kan me peki reh sapwellime manaman!” (Luk 11:13) Oh ni atail kin kapinga Siohwa nan mihting kan, kitail pahn pil alehdi sapwellime manaman. (Wadek Episos 5:​19, 20.) Soahng kan me kin kohsang sapwellimen Koht manaman pahn sewese kitail en mour ni ahl me kin kaperenda Koht.

16. Dahme pahn sewese kitail en wiahda pilipil mwahu? (Episos 5:​10, 17)

¹⁶ Ni atail anahne wiahda pilipil kesempwal ehu, kitail anahne esehda “dahme Siohwa ketin kupwurki” oh eri mwekid pahrekiong. (Wadek Episos 5:​10, 17.) Ni atail kin diarada kaweid en Paipel kan me kitail kak doadoahngki ong atail irairo, kitail kin rapahki sapwellimen Koht madamadau ong met. Oh ni atail kin kapwaiada sapwellime kaweid kan, kitail pahn kak wiahda pilipil mwahu.

17. Ia duwen atail kak doadoahngki mwahu atail ahnsou? (Episos 5:​15, 16) (Pil kilang kilel.)

¹⁷ Pohl pil kangoange Kristian en Episos ko ren doadoahngki mwahu arail ahnsou. (Wadek Episos 5:​15, 16.) “Me suwedo,” atail imwintihtio Sehdan, men kitail en kedirepwkihla soahng kan en sampah wet me kahrehda en sohla atail ahnsou en papah Koht. (1 Sohn 5:19) Kristian men kak tepida medemedewehte mwohni, sukuhl, de doadoahk a kaidehn soahng tohto me e kak wia pwehn papah Siohwa. Ma e wia met, e pahn tepida kasalehda me e ahneki madamadau en sampah. Ei mehlel, soahng pwukat sohte uhdahn sapwung, ahpw kitail en dehr wiakihla me ihme keieu kesempwal nan atail mour. Pwehn weweid “nin duwen seri en marain,”  kitail anahne “doadoahngki mwahu [atail] ahnsou,” me wehwehki en medemedewehte dahme uhdahn kesempwal.

18. Dahme Donald wia pwehn doadoahngki mwahu eh ahnsou?

¹⁸ Rapahki ahl akan me ke kak kalaudehla omw papah Siohwa. Ih met me Donald sang South Africa wia. E koasoia: “I medemedewe duwen ei mour oh kapakapkihong Siohwa en sewese ie kalaudehla ei doadoahk en kalohk. I kapakapki en mie ei doadoahk me pahn mweidohng ie en kalaudehla ei ahnsoun kalohk. Sang ni sapwellimen Siohwa sawas, I diarada soangen doadoahko. Ngehi oh ei pwoudo tepida doadoahngki pali laud en at ahnsou en papah Siohwa.”

19. Ia duwen atail kak pousehlahte weweid “nin duwen seri en marain”?

¹⁹ Nein Pohl kisinlikou ong mehn Episos ko sewese irail en lelepekohngete Siohwa. Oh kaweido pil kak sewesei kitail. Nin duwen me kitail sukuhlki, met kak sewese kitail en pilada mwahu mehn kamweit oh ihs me kitail pahn kompoakepahnki. E kak kamwakid kitail en kaukaule onopki Paipel pwe marain en padahk mehlel en kak pousehlahte kaweid kitail ni soahng koaros me kitail kin wia. Oh e kasalehda kesempwalpen sapwellimen Koht manaman me kak sewese kitail en ahneki irair kaselel kan. En doadoahngki dahme Pohl ntingihedi kak sewese kitail en wiahda pilipil mwahu kan, me kin pahrekiong sapwellimen Siohwa madamadau. Ni atail wia soahng pwukat, kitail sohte pahn mihmihte nan sampah rotorot wet ahpw kitail pahn mihmihte nan marain!