1-2. Kapai dah kan me emen kin ahneki mwurin eh papidaisla?

 KITAIL koaros uhdahn perenki atail papidaisla oh wiahla kisehn sapwellimen Siohwa peneinei. E wia pai kaselel ehu en ahneki nanpwungmwahu keren wet rehn Siohwa. Kitail pwungki dahme sounmelkahkao Depit koasoia: “Meid pai irail kan me komwi [Siohwa] ketin pilada, me komwi ketikiniraildo pwe re en kin kousoan nan mwoalomwi sarawi.”—Mel. 65:4.

² Soangen aramas dah me Siohwa kin ketin mweidohng en ahneki nanpwungmwahu keren reh? Nin duwen me kitail koasoiapene nan iren onop en mwoweo, e kin ketin pilada en kainangihedo reh irail kan me kin kadehdehda me re men ahneki nanpwungmwahu keren reh. (Seims 4:8) Ni omw inoukihong Siohwa pein kowe oh papidaisla, ke kin karanihala ih ni ahl tohrohr ehu. Ke kak kamehlele me mwurin omw papidais, e pahn ketin ‘kamwerehdiong uhk soangen kamwahu kan ni uwe ieu me laud.’—Mal. 3:10; Ser. 17:​7, 8.

3. Pwukoa kesempwal dahieu me Kristian kan me wiahda inou ong Siohwa oh papidaisla ahneki? (Eklesiasdes 5:​4, 5)

³ Papidais iei tepin kahk me ke wiahda pwehn papah Siohwa. Mwurin omw wiahda kahk wet, ke pahn men wia uwen omw kak en kapwaiada omw inowo, pil ni omw kin lelohng kasongosong de kahpwal laud kan. (Wadek Eklesiasdes 5:​4, 5.) Nin duwen sapwellimen Sises tohnpadahk men, ke pahn idawehn sapwellimen Sises mehn kahlemeng oh kehkehlik kan ni uwen omw kak. (Mad. 28:​19, 20; 1 Pit. 2:21) Iren onop wet pahn seweseiuk en wia met.

 DOULAHTE “IDEIDAWEHN” SISES MENDAHKI KAHPWAL OH KASONGOSONG KAN

4. Ia wehwehn sapwellimen Sises tohnpadahk kan ar weuwa “tuhkehn kalokolok” pwoat? (Luk 9:23)

⁴ Dehr medewe me mwurin omw papidaisla, e pahn sohla omw kahpwal. Sises ketin kasalehda ni sansal me sapwellime tohnpadahk kan pahn weuwa “tuhkehn kalokolok” pwoat. Ni mehlel, irail pahn kin wia met “rahn koaros.” (Wadek Luk 9:23.) Ia duwe, Sises mahsanih me sapwellime tohnpadahk kan pahn kin ahnsou koaros wie lokolok? Uhdahn soh. Ahpw e mahsanih me patehng kapai kan me re pahn ahneki, irail pahn lelohng kahpwal kan. Ekei kahpwal pwukat kakete uhdahn laud.—2 Tim. 3:12.

5. Kapai dah kan me Sises ketin inoukihong irail kan me kin wiahda tounmetei kan?

⁵ Ele omw peneinei kin uhwong uhk, de ele ke tounmeteikihla ahneki kepwe de naineki mwohni tohto pwe ken kin mwohneki mahs Wehin Koht. (Mad. 6:33) Ma ei, ke kak kamehlele me Siohwa ketin mwahngih soahng koaros me ke wiahda ong ih. (Ipru 6:10) Ele ke kilangehr mehlelpen dahme Sises mahsanih: “Mehmen me pwilikihdi imwe de rie pwutak kan de serepein kan de ine de seme de nah seri kan de sapwe pwehki ngehi oh rongamwahwo pahn ale pak 100 ni imwe, ni rie pwutak, ni rie serepein, ni ine, ni nah seri kan oh ni sapwe iangahki kalokolok nan ahnsou pwukat, a ni koasoandi en mwehi me kohkohdo, mour soutuk.” (Mark 10:​29, 30) Kapai kan me ke alehdier uhdahn laudsang tounmetei kan koaros me ke wiahda.—Mel. 37:4.

6. Dahme kahrehda ke anahne pousehlahte pelian omw “ineng en uduk” mwurin omw papidaisla?

⁶ Ke pahn kin anahnehte pelianda omw “ineng en uduk” mwurin omw papidaisla. (1 Sohn 2:16) Met pwehki ke dipante. Ele ekei pak, ke kin ahneki soangen pepehmohte me wahnpoaron Pohl ahneki. E ntingihedi: “I kin uhdahn perenkihda kosonned en Koht nan mohngiongi, I ahpw kin kilang pil ehu kosonned nan paliwerei, me kin uhwong kosonned en ei lamalam oh kahluwaielahng selidi pahn kosonned en dihp me kin mi nan paliwerei.” (Rom 7:​22, 23) Ele ke kin mworusala pwehki ke anahne pelianda omw ineng sapwung kan. Ahpw, omw medemedewe inowo me ke wiahiong Siohwa pahn kakehlaka omw koasoanehdi teng en pelianda kasongosong. Ni mehlel, ni omw kin lelohng kasongosong, inowo pahn seweseiuk. Ia duwen?

7. Ia duwen omw inou ong Siohwa eh pahn seweseiuk en lelepekohngete ih?

⁷ Ni omw inoukihong Siohwa omw mour, ke tounmeteikilahr omw mour. Met wehwehki me ke piladahr en soikala pein omw ineng kan oh mehn akadei kan me pahn kansensuwedihala Siohwa. (Mad. 16:24) Eri, ni omw lelohng kasongosong ehu, ke sohte anahne medemedewe dahme ke anahne wia. Ke koasoanedier dahme ke pahn wia, me iei en lelepekohngete Siohwa. Ke pahn tengediongete en kaperenda Siohwa. Ke pahn duwehte Sohp. Mendahki e lelohng kahpwal kan me uhdahn laud, e koasoia: “I pahn keptakaila koasoakoasoia ei mwakelekel.”—Sohp 27:5.

8. Ia duwen omw medemedewe kapakapo me ke wia ni ahnsou me ke inoukihong Siohwa omw mour eh kak seweseiuk en pelianda kasongosong?

⁸ Sang ni omw kin medemedewe kapakapo me ke wia ni ahnsou me ke inoukihong Siohwa omw mour, ke pahn diar kehl en pelianda soangen kasongosong koaros. Karasepe, ke pahn kalahiong ahn emen pwoud? Uhdahn soh! Ke inoukihongehr Siohwa me ke sohte pahn wia mehkot me duwehte met. Ma ke sohte mweidohng madamadau sohte konehng kan en kekeirda, eri ke sohte anahne  nannanti mwuhr en kihsang soangen madamadau wet. Ke pahn “sohpeisang” “wasa aramas suwed kan kin kohla ie.”—Lep. Pad. 4:​14, 15.

9. Ia duwen omw medemedewe kapakapo me ke wia ni ahnsou me ke inoukihong Siohwa omw mour eh kak seweseiuk en mwohnkihte omw papah Siohwa?

⁹ Ia duwen ma emen men kihong uhk doadoahk ehu me pahn kerempwa omw kin kaukaule towehda mihting en Kristian kan? Ke pahn eseier dahme ke pahn wia. Mwohn aramaso kihong uhk doadoahko, ke koasoanedier me ke sohte pahn ale doadoahko. Eri, ke sohte pahn lelohng kasongosong en alehda doadoahko ahpw mwuhr song en rapahki ia duwen omw pahn kin mwohnkihte Siohwa. En doudouloale sapwellimen Sises mehn kahlemeng kak sewese kitail. Sises ketin koasoanehdi teng en kaperenda Semeo. Duwehte Sises, ken koasoanehdi teng en mwadang soikala soahng koaros me ke ese pahn kansensuwedihada Kohto me ke inoukihongehr omw mour.—Mad. 4:10; Sohn 8:29.

10. Ia duwen Siohwa eh pahn ketin seweseiuk mwurin omw papidaisla pwe ken doulahte “ideidawehn” Sises?

¹⁰ Kahpwal oh kasongosong kan kin kihong uhk ahnsou mwahu en kasalehda me ke men doulahte “ideidawehn” Sises. Ni omw wia met, ke kak kamehlele me Siohwa pahn ketin seweseiuk. Paipel mahsanih: “Koht me lelepek oh e sohte pahn ketin mweidohng kumwail en ale songosong me kumwail sohte kakohng, ahpw ni songosong eh leledo, e pahn ketikihda elen pitsang pwe kumwail en kak dadaurete.”—1 Kor. 10:13.

IA DUWEN OMW PAHN IDEIDAWEHNTE SISES

11. Ia ehu ahl me keieu mwahu en ideidawehnte Sises? (Pil kilang kilel.)

¹¹ Sises kin ketin ngoangki papah Siohwa oh kin karanihete Siohwa nan eh kapakap kan. (Luk 6:12) Ni mehlel, ehu ahl me keieu  mwahu en ideidawehnte Sises mwurin omw papidaisla iei en pousehlahte wia soahng kan me pahn kakerenihiukala rehn Siohwa. Paipel mahsanih: “Nin duwen atail kekeirdahr, kitail en pousehlahte kekeid ni pwung ni soangen ahl wet.” (Pil. 3:16) Mie ahnsou kan me ke pahn rong duwen dahme wiawihong riatail Kristian kan me pilada en kalaudehla arail papah Siohwa. Ele re iang Sukuhl ong Sounkalohki Wehio kan de keseula wasa kan me anahn laud mie ong sounkalohk. Ma omw irairo kakohng, met pil wia mehn akadei ehu me uhdahn mwahu. Sapwellimen Siohwa aramas akan kin ngoangki kalaudehla arail papah Ih. (Wiewia 16:9) Ahpw ia duwen ma ahnsou wet ke sohte kak wia met? Dehr medewe me ke sohte kesempwal duwehte irail kan me kak wia met. Dahme kesempwal iei me ke pousehlahte dadaur. (Mad. 10:22) Dehr manokehla me ke kin uhdahn kaperenda Siohwa ni omw wia uwen omw kak nan omw irairo. Met iei ehu ahl kesempwal me ke kak wia pwehn ideidawehnte Sises mwurin omw papidaisla.—Mel. 26:1.

12-13. Dahme ke kak wia ma omw ngoang tepida tikitikla? (1 Korint 9:​16, 17) (Pil kilang koakon “ Dehr Uhdihsang Weiren Tango.”)

¹² Ia duwen ma erein ahnsou ehu, ke pehm me omw kapakap kan sohte kin uhdahn kohsang nan omw mohngiong de ke sohla perenki doadoahk en kalohk? Ia duwen ma ke sohla perenki wadek Paipel duwehte mahso? Ma irair pwukat wiawihong uhk mwurin omw papidaisla, dehr medewe me sapwellimen Siohwa manaman solahr ieiang uhk. Ke sohte unsek, oh omw pepehm kak wekiwekla. Ma omw ngoang tepida luwetala, medemedewe mehn kahlemeng en wahnpoaron Pohl. Mendahki e kin song en kahlemengih Sises, e ese me ekei pak e sohte pahn kin nohn men wia dahme e  anahne wia. (Wadek 1 Korint 9:​16, 17.) E koasoia: “Mehnda ma kaidehn sang ni pein nsenei me I wia met, I pil ahnekihte pwukoa doadoahk ehu me kohieng ie.” Met wehwehki me Pohl koasoanedier teng en kapwaiada eh doadoahk en kalohk mehnda ma e sohte nohn men wia met ni ahnsowo.

¹³ Pil duwehte met, ken dehr mweidohng omw madamadau soh unsek en kamwakid omw pilipil kan. Koasoanehdi teng me ke pahn wia dahme pwung mehnda ma met sohte pahrekiong nsenomw. Ma ke kin doulahte wia me pwung, omw pepehm pahn ekisekis wekila. Lao lel ahnsowo, omw wiewiahte omw koasoandi en pein onop, kapakap, towehda mihting kan, oh kalohk pahn seweseiuk en ideidawehnte Sises mwurin omw papidais. Omw kaukaule wia met pahn pil kangoange riomw Kristian kan.—1 Des. 5:11.

“POUSEHLAHTE KASAWIH . . . POUSEHLAHTE KADEHDEHDA”

14. Dahme ke anahne kaukaule tehk mwahu, oh dahme kahrehda? (2 Korint 13:5)

¹⁴ E pahn pil sawas ma mwurin omw papidais ke kin kaukaule kasawih pein kowe. (Wadek 2 Korint 13:5.) Ekei ahnsou, e mwahu en tehk mwahu ma ke kin kapakap rahn koaros, wadek oh onopki Paipel, towehda mihting kan, oh iang kalohk. Song rapahki elen omw pahn perenki oh paiekihda wiewia pwukat. Karasepe, pein idek rehmw peidek pwukat: ‘I kak kawehwehiong meteikan padahk mengei kan en Paipel? Mie soahng kan me I kak wia pwehn kalaudehla ei peren nan kalohk? Ei kapakap kan kin kasalehda dahme I uhdahn men peki, oh me I uhdahn kin koapworopworki Siohwa? I kin kaukaule towehda mihting en Kristian kan? Ia duwen ei kak kamwahwihala ei kin rong mwahu oh iang pasapeng nan mihting kan?’

15-16. Dahme ke sukuhlkihsang brother men duwen en powehdi kasongosong?

¹⁵ E pil kesempwal en esehla omw luwet kan. Brother men me adaneki Robert koasoiahda dahme wiawihong ih me pid met. E koasoia: “Ni ahnsou me I sounpar 20 samwa, I kin doadoahk lepin ahnsou. Ehu rahno mwurin doadoahk, emen iengei tohndoadoahk serepein luke ie en iangih kohla ni imweo. E nda me se pahn kak kelehpwla oh ‘wia nsenat.’ Nin tapio, I kihda kahrepe kei pwehn dehr ndaiong uhdahn kahrepen ei sohte pahn iang ih, ahpw mwuhr I nda soh oh kawehwehda dahme kahrehda.” Robert soikala kasongosongo, oh met mwahu. Ahpw mwuhr, e medewehla dahme wiawio oh mentehno wia mwahusang. E koasoia: “I sohte ni inen mwadang soikala kasongosongo  duwehte me Sosep wiahiong ahn Podipar pwoudo. (Sen. 39:​7-9) Ni mehlel, I pwuriamweikihla uwen eh apwal ong ie en sohte dukiong. Dahme wiawio sewese ie en kilang me I anahne kakehlakahla ei nanpwungmwahu rehn Siohwa.”

¹⁶ Ke kak paiekihda omw kasawih pein kowe duwehte me Robert wia. Pil ni omw powehdi kasongosong ehu, idek rehmw, ‘Ia uwen werei mwohn ei nda soh?’ Ma mie wasa kan me ke anahne kamwahwihala, dehr nsensuwed. Kalahnganki me met ke esehda duwen omw luweto. Kapakapki duwen met, oh wiahda dahme anahn pwehn kalaudehla omw koasoanehdi teng en peikiong Siohwa.—Mel. 139:​23, 24.

17. Ia duwen mwaren Siohwa eh pidada dahme wiawihong Robert?

¹⁷ Kaidehn ihte met me wiawihong Robert. E doula koasoia: “Mwurin ei ndaiong iengei tohndoadoahko soh, e nda, ‘Ke powehdi kasongosongo!’ I idek reh dahme kahrehda e ndahki met. E koasoiahda me mie emen ienge, me wia Sounkadehde men mahso, me ndaiong ih me Sounkadehde pwulopwul koaros kin wiewia me suwed ni rir ma ahnsou mwahu kohwong irail en wia. Eri e ndaiong iengeo me e pahn kilang ma I duwehte irail. Ia uwen ei kalahnganki me I sohte kahdsuwedihala mwaren Siohwa.”

18. Dahme ke koasoanehdi teng en wia mwurin omw papidais? (Pil kilang koakon “ Artikel Riau me Ke Pahn Perenki.”)

¹⁸ Ni ahnsou me ke inoukihong Siohwa omw mour oh papidaisla, ke kasalehda me ke men kasarawihala mware sohte lipilipil dahme pahn wiawi. Ke kak kamehlele me Siohwa ketin mwahngih duwen kahpwal kan me ke kin lelohng oh kasongosong kan me ke kin soikala. E pahn ketin kapaiahda omw nannanti en lelepekte. Ke kak likih me e kak ketin doadoahngki sapwellime manaman pwehn ketikihong uhk kehl en wia met. (Luk 11:​11-13) Pwehki sapwellime sawas, ke pahn kak ideidawehnte Sises mwurin omw papidaisla.