1. Dahme ekei sapwellimen Siohwa ladu lelepek kan kin apwalki kamehlele?

 IA UWEN eh kangoang en ese me Siohwa kin ketin kupwurperenki sapwellime aramas akan! Paipel mahsanih me Siohwa “kin kupwurperenki sapwellime aramas akan.” (Mel. 149:4) Ahpw ekei pak, ekei kin uhdahn mworusala me kahrehda re kin medewe, ‘Siohwa kin kupwurperenkin ie?’ Me tohto nan Paipel me kin papah Siohwa ni lelepek kin ekei pak apwalki kamehlele me Siohwa kin kupwurperenkin irail.—1 Sam. 1:​6-10; Sohp 29:​2, 4; Mel. 51:11.

2. Ihs me kin alehdi sapwellimen Siohwa kupwuramwahu?

² Paipel kasalehda ni sansal me aramas soh unsek kan kak ale sapwellimen Siohwa kupwuramwahu. Ia duwen? Kitail anahne kasalehda atail pwoson Sises Krais oh papidaisla. (Sohn 3:16) Ni ahl wet, kitail kin kasalehiong meteikan me kitail koluhkihlahr dipatail kan oh inoukihong Koht en wia kupwure. (Wiewia 2:38; 3:19) Siohwa kin uhdahn ketin kupwurperenkin kitail ni atail kin wia soahng pwukat pwehn karanihala ih. Ma kitail wia uwen atail kak en kapwaiada atail inou, Siohwa pahn ketin kupwurperenkin kitail oh wiahkin kitail kompoakepah keren.—Mel. 25:14.

3. Dahme kitail pahn koasoiapene ahnsou wet?

³ Ahpw dahme kahrehda ekei pak, ekei kin pehm me Koht sohte kin kupwurperenkin irail? Ia duwen Siohwa eh ketin kasalehda me e kin kupwurperenkin kitail? Oh ia duwen Kristian men eh kak kakehlakahla eh likih me Koht ketin kupwurperenki ih?

DAHME KAHREHDA EKEI PEHM ME SIOHWA SOHTE KIN KUPWURPERENKIN IRAIL

4-5. Mehnda ma kitail pehm me sohte katepatail, dahme kitail kak kamehlele?

⁴ Sangete ni atail seri, me tohto rehtail kin pehm me sohte katepatail. (Mel. 88:15) Emen brother me adaneki Adrián koasoia: “Ahnsou koaros I kin pehm me sohte katepei. I tamanda ni ei tikitiko I kapakapki me ei peneineio en iang mi nan Paradais,  mendahki I kamehlele me pein ngehi sohte warohng en iang mi mwo.” Tony, me tikida nan peneinei ehu me kaidehn Sounkadehdehn Siohwa, koasoia: “Sohte pak ehu me ei pahpa nohno kin kapinga ie de padahkihong ie me ira poakepoake ie. Met kahrehiong ie en medewe me soahng koaros me I kin wia sohte kak kaperenda ira.”

⁵ Ma ekei pak kitail kin pehm me sohte katepatail, kitail kak tamataman me pein Siohwa me ketin kakerenihkitailla reh. (Sohn 6:44) E ketin mwahngih soahng mwahu kan rehtail me pein kitail sohte kak kilang, oh e ketin mwahngih dahme mi nan mohngiongitail. (1 Sam. 16:7; 2 Kron. 6:30) Eri kitail kak likih ni eh ketin mahsanih me kitail kesempwal.—1 Sohn 3:​19, 20.

6. Ia ahn wahnpoaron Pohl pepehm ong dihp kan me e wiahda mahso?

⁶ Mwohn atail esehla padahk mehlel, ekei kitail kin wia soahng kan me met kitail kin suwedkihte. (1 Pit. 4:3) Pil Kristian lelepek kan kin pelipeliante arail luwet kan. Ia duwen pein kowe? Ke kin ekei pak pehm me Siohwa sohte kak ketin mahkohng uhk? Ma ei, e kak wia mehn kangoang ehu en ese me sapwellimen Siohwa ladu lelepek kan pil kin ahneki soangen pepehmohte. Karasepe, wahnpoaron Pohl kin nsensuwedla ni eh medewe duwen eh soh unsek kan. (Rom 7:24) Ei mehlel, Pohl koluhkihlahr dipe kan oh papidaisla. Ahpw, e kin wiahkihte ih “me keieu tikitik nanpwungen wahnpoaron kan” oh “me keieu dipan.”—1 Kor. 15:9; 1 Tim. 1:15.

7. Dahme kitail anahne tamataman me pid dihp kan me kitail wiahda mahso?

⁷ Samatailo nanleng ketin inoukihda en mahkohng kitail ma kitail koluhla. (Mel. 86:5) Eri ma kitail uhdahn koluhkihla dipatail kan, kitail kak uhdahn kamehlele Siohwa ni eh mahsanih me e ketin mahkohngkitailehr.—Kol. 2:13.

8-9. Ia duwen atail kak powehdi pepehm me kitail sohte kak douluhl wia dahme itar pwehn kaperenda Siohwa?

⁸ Kitail koaros men papah Siohwa ni uwen atail kak. Ahpw, ekei kin pehm me dahme irail kin wia uhdahn sohte kak itar pwehn warohng ale sapwellime kupwuramwahu. Sister men me adaneki Amanda koasoia: “I kin kalapw medewe me en wia uwen ei kak ong Siohwa kin wehwehki me ahnsou koaros I anahne wia laudsang. Eri I kin kalapw song en wia laudsang me I kakohng. Ni ei sohte kak kapwaiada, I kin medewe me Siohwa kin kupwurtoutoukihla duwehte ei kin nsensuwedkihla pein ngehi.”

⁹ Ia duwen atail kak powehdi pepehm me kitail sohte kak douluhl wia dahme itar pwehn kaperenda Siohwa? Tamataman me Siohwa kin ketin toupahrek. E sohte kin ketin kasik laudsang me kitail kak wia. E ketin kalahnganki sohte lipilipil dahme kitail wiahiong ih erein atail kin wiewia uwen atail kak. Pil ehu, medewehla mehn kahlemeng en irail kan me kin papah Siohwa sang arail mohngiong unsek. Medewehla Pohl. E kin uhdahn doadoahk laud erein sounpar tohto, seiloangki mwail kid kid kei, oh pil tapiada mwomwohdiso tohto. Ahpw ni eh irairo wekila oh katikala eh doadoahk en kalohk, ia duwe, met wehwehki me Siohwa sohla ketin kupwurperenki ih? Soh. Pohl doulahte wia dahme e kak wia, oh Siohwa ketin kapaiahda. (Wiewia 28:​30, 31) Pil duwehte met, dahme kitail kak patohwanohng Siohwa kak wekila. Ahpw dahme kesempwal ong ih iei dahme kin kamwakid kitail en papah ih. Met kitail pahn tehkpene ekei ahl akan me Siohwa kin ketin kasalehda eh kupwurperenkin kitail.

IA DUWEN SIOHWA EH KASALEHDA EH KUPWURPERENKIN KITAIL?

10. Ia duwen atail kak “rong” Siohwa eh ketin kasalehda eh kupwurperenki kitail? (Sohn 16:27)

¹⁰ E ketikihong kitail Paipel. Siohwa kin ketin rapahki ahl akan en kasalehda me e ketin  kupwurperenki irail kan me e ketin poakohng. Paipel kasalehda ahnsou riau me E ketin mahsanihong Sises me ih iei sapwellime Ohl kompoake oh me e kin ketin kupwurperenki. (Mad. 3:17; 17:5) Ke men Siohwa en ketin mahsanihong uhk me e kupwurperenkin uhk? Siohwa sohte kin ketin mahseniong kitail sang nanleng, ahpw e kin mahseniong kitail sang nan sapwellime Mahsen. Ni atail kin wadek duwen Sises eh mahseniong sapwellime tohnpadahk kan ni limpoak, e kin mwomwen me kitail “rong” Siohwa eh mahsanihong kitail mahsen kohte. (Wadek Sohn 16:27.) Sises ketin kahlemengih ni unsek irair kaselel kan en Semeo. Eri ni atail wadek me Sises ketin kasalehda eh kupwurperenki sapwellime tohnpadahk lelepek kan me sohte unsek, kitail kak medewehla Siohwa eh mahsanihong kitail mahsen kohte.—Sohn 15:​9, 15.

11. Dahme kahrehda atail lelohng kahpwal kan sohte wehwehki me Siohwa sohla ketin kupwurperenkin kitail? (Seims 1:12)

¹¹ E ketikihong kitail dahme kitail anahne. Siohwa kin ketin kupwurperenki sewese kitail sang ni eh kin ketikihda dahme kitail anahne. Ekei pak, Siohwa kin ketin mweidohng kitail en lelohng kahpwal kan, duwehte me e ketin wiahiong Sohp. (Sohp 1:​8-11) Ni atail lelohng kahpwal kan, met sohte wehwehki me Koht sohla ketin kupwurperenkin kitail. Ahpw met kin kihong kitail ahnsou mwahu en kadehdehda uwen atail poakohng Koht oh likih ih. (Wadek Seims 1:12.) Erein atail kahpwal kan, kitail pahn kak kilang uwen eh ketin poakohng kitail ni eh ketin sewese kitail en dadaur.

12. Dahme kitail kak sukuhlkihsang dahme wiawihong Dmitrii?

¹² Medewehla dahme wiawihong brother men nan Eisia me adaneki Dmitrii. Sohla eh doadoahk oh e sohte kak diar doadoahk erein sounpwong tohto. Eri e koasoanehdi en kalaudehla eh doadoahk en kalohk, oh kasalehda eh likih Siohwa. Sounpwong tohto dower powe, ahpw e saikinte kak diar doadoahk. Ih eri ahnekihda soumwahu laud ehu me kahrehda e kin wonohntohr oh sohte kak alu. E tepida medewe me e sohla wia ohl pwopwoud oh pahpa mwahu men, oh e medewe ma Siohwa sohla ketin kupwurperenki ih. Ahpw ehu ni soutiko, nah serepeino ntingihada nan doaropwe ehu mahsen kan nan Aiseia 30:15 (NW). Ireo mahsanih: “Kumwail pahn kehlail ni amwail kin meleilei oh kasalehda amwail likih ie.” Nah serepeino eri wahla reh oh ndaiong, “Ipa, ma ke kin nsensuwed, ke kak taman iren Paipel wet.” Dmitrii eri wehwehkihda me, pwehki Siohwa,  miehte kenen eh peneineio mwenge, arail likou, oh wasahn kousoan. E koasoia: “Dahme I anahne wia iei en meleilei oh pousehlahte likih ei Kohto.” Ma ke pil lelohng soangen kahpwal wet, ke kak likih me Siohwa ketin nsenohkin uhk oh pahn ketin seweseiuk en dadaur.

13. Ihs me Siohwa kakete ketin doadoahngki pwehn kasalehiong kitail me e kupwurperenki kitail, oh ia duwen?

¹³ E ketikihong kitail riatail Kristian kan. Siohwa kin ketin doadoahngki riatail kan pwehn kasalehda eh ketin kupwurperenki kitail. Karasepe, e kak ketin kamwakid meteikan en kangoange kitail ni ahnsou me kitail uhdahn anahne. Met wiawihong sister men nan Eisia ni ahnsou me e lelohng pwunod laud. Sohla eh doadoahk oh e pil ahnekihda soumwahu laud ehu. Eh pwoudo pil wiahda dihp laud ehu eri sohla kak papah nin duwen elder men. Sistero koasoia: “I sohte kak wehwehki dahme kahrehda mepwukat wiawihong ie. I medewe me mwein I wiahda mehkot sapwung me kahrehda Siohwa sohla ketin kupwurperenkin ie.” E peki ni ngidingid Siohwa en ketin kamehlelehiong ih me E kupwurperenkihte ih. Ia duwen Siohwa eh ketin wia met? Sistero koasoia, “Elder kan nan mwomwohdiso koasoiong ie oh kamehlelehiong ie me Siohwa ketin poakohng ie.” Mwuhr, sistero pil pwurehng peki Siohwa en ketin sewese ih. E koasoia: “Ni rahnohte, I alehdi kisinlikou ehu sang riei Kristian tohto nan ei mwomwohdisou. Ni ei wadek arail lokaia kadek kan, I pehm me Siohwa ketin karonge ie.” Ei, Siohwa kin kalapw ketin kasalehda eh kupwurperenki kitail sang ni ahn meteikan lokaia kadek kan.—Mel. 10:17.

14. Ia pil ehu ahl me Siohwa kin ketin kasalehda eh kupwurperenki kitail?

¹⁴ Siohwa pil ketin kasalehda eh kupwurperenki kitail sang ni eh ketin doadoahngki riatail kan en kihda kaweid ni ahnsou me kitail anahne. Karasepe, ni mwehin tepin Kristian ko,  Siohwa ketin doadoahngki wahnpoaron Pohl en ntingihada kisinlikou 14 ong rie Kristian kan. Nan kisinlikou ko, Pohl kaweid rie Kristian ko ni inen ahpw ni elen limpoak. Dahme kahrehda Siohwa ketin kamwakid Pohl en kihda soangen kaweid pwukat? Siohwa iei Sahm mwahu men, oh e kin ketin panawih sapwellime kan “me e kin ketin loalloale.” (Lep. Pad. 3:​11, 12) Eri ma emen kihong kitail kaweid ehu sang nan Paipel, met sohte wehwehki me Siohwa ketin engieng pahtail. Ahpw met kin kasalehda me e ketin poakepoakehte kitail. (Ipru 12:6) Ia pil ekei mehn kadehde me Siohwa kin ketin kupwurperenki kitail?

MEHN KADEHDE TEIKAN ME SIOHWA KIN KUPWURPERENKI KITAIL

15. Ihs me Siohwa kin ketikihong sapwellime manaman, oh dahme kahrehda met kin kihong kitail koapworopwor?

¹⁵ Siohwa kin ketikihong irail kan me e ketin kupwurperenki sapwellime manaman. (Mad. 12:18) Medewehla peidek wet, ‘I kin kasalehda ekei irair kaselel kan me kohsang wahn sapwellimen Koht manaman?’ Omw kanengamahiong meteikan laudla sang ahnsowo mwohn omw esehla Siohwa? Uwen laud en omw kakairada irair kaselel kan me kohsang wahn sapwellimen Koht manaman, ih uwen laud en omw pahn kamehlele me Siohwa kin kupwurperenkin uhk!—Menlau kilang koakono “ Wahn Sapwellimen Koht Manaman Iei . . . ”

16. Ihs me Siohwa kin ketin doadoahngki pwehn kalohki rongamwahwo, oh ia omw pepehm duwen met? (1 Deselonika 2:4)

¹⁶ Siohwa ketin kupwurki ketikihong irail kan me e kin kupwurperenki rongamwahwo. (Wadek 1 Deselonika 2:4.) Tehk ia duwen sister men me adaneki Jocelyn eh paiekihda eh ehukihong meteikan rongamwahwo. Ehu rahno, Jocelyn pirida oh nsensuwed. E koasoia: “I pehm me sohte ei kehl oh sohte katepei. Ahpw I wia pioneer men, oh rahno rahnen ei kalohk. Eri I kapakap oh kohla kalohk.” Ni menseng en rahno, Jocelyn tuhwong Mary, lih emen me kadek oh pwungki en onopki Paipel. Sounpwong kei mwuhr, Mary koasoia me rahn me Jocelyn letelet ni eh wenihmwo, e wie kapakapohng Koht oh pekipeki sawas. Ni Jocelyn eh medewehla dahme wiawi, e koasoia, “I pehm me mwomwen Siohwa ketin mahsanihong ie, ‘I pwungkin uhk.’” Mehlel, kaidehn koaros pahn mwekidki atail doadoahk en kalohk. Ahpw kitail kak kamehlele me Siohwa kin kupwurperenkihda ni atail kin wia uwen atail kak en ehukihong meteikan rongamwahwo.

17. Dahme ke sukuhlkihsang Vicky duwen pweinen pweipwei sapahlo? (Melkahka 5:12)

 ¹⁷ Siohwa ketikihda pweinen pweipwei sapahlo ong irail kan me e ketin poakohng. (1 Tim. 2:​5, 6) Ahpw ia duwen ma kitail ahnekihte pepehm me Siohwa sohte ketin kupwurperenki kitail, mendahki kitail pwoson pweinen pweipwei sapahlo oh papidaisla? Tamataman, kitail sohte kak ahnsou koaros likih atail pepehm ahpw kitail kak likih Siohwa. E kin ketin wiahki irail kan me pwoson pweinen pweipwei sapahlo aramas pwung kei mwohn silangi, oh ketin inoukihda en kapaiairailda. (Wadek Melkahka 5:12; Rom 3:26) Vicky diarada me e sawas en doudouloale duwen pweinen pweipwei sapahlo. Ehu rahno, mwurin eh medemedewe laud duwen pweinen pweipwei sapahlo, e koasoia: “Siohwa ketin kanengamahiong ie ahnsou reirei. . . . Ahpw I kin mwomwen ndindaiong ih: ‘Ke sohte kak poakohng soangen ngehi ie. Meirong en sapwellimomwi Ohlo pil sohte kak pwainla dipei ka.’” Ahpw sang ni eh doudouloale duwen kisakis en pweinen pweipwei sapahlo, e tepida pehm sapwellimen Siohwa limpoak. Kitail pil kak pehm me Siohwa ketin poakohng kitail oh kehn eh kupwurperenki kitail ma kitail kin doudouloale duwen pweinen pweipwei sapahlo.

18. Dahme kitail kak kamehlele ma kitail kin doulahte poakohng Samatailo nanleng?

¹⁸ Mendahki kitail kin nantihong en doadoahngki dahme kitail sukuhlki nan iren onop wet, ele ekei pak kitail pahn mworusala oh medewe ma Siohwa kin ketin kupwurperenki kitail. Ma met wiawi, tamataman me e kin kupwurperenki “irail kan me kin pousehlahte poakohng Ih.” (Seims 1:12) Eri, doulahte karanihala Siohwa oh rapahki ahl akan me e kin ketin kasalehda eh kupwurperenkin uhk. Oh dehr manokehla me Siohwa “sohte ketin dohsang emenemen kitail.”—Wiewia 17:27.