1-2. Dahme aramas men anahne wia mwohn eh papidaisla?

 EREIN sounpar limau samwalahro, aramas daulih rar papidaisla nin duwen Sounkadehdehn Siohwa kei. Me tohto irail pwukat, duwehte tepin Kristiano Timoty, sukuhlki padahk mehlel sang ni eh “seri pwelel.” (2 Tim. 3:​14, 15) Meteikan sukuhlki duwen Siohwa ni ahnsou me re laudla, oh ekei ni ahnsou me re mahla. Emen lih me onop Paipel rehn Sounkadehdehn Siohwa kan papidaisla ni ahnsou me e sounpar 97!

² Ma kowe emen tohnsukuhl en Paipel de ma ke tikida rehn omw papah nohno me wia Sounkadehde kei, ke medemedewe en papidaisla? Mehn akadei mwahu ehu met! Ahpw, mwohn omw papidaisla, ke pahn anahne inoukihong Siohwa omw mour. Iren onop wet pahn kawehwehda ia wehwehn en inoukihong Koht omw mour. E pahn pil seweseiuk pwe ken kilang dahme kahrehda ke sohte anahne masak inoukihong Koht omw mour oh papidaisla ni ahnsou me ke onopadahr en wia met.

IA WEHWEHN EN INOUKIHONG SIOHWA OMW MOUR?

3. Menlau kihda karasepen aramas akan nan Paipel me inouda ong Siohwa.

³ Nan Paipel, emen me inoukihong Siohwa eh mour kin tohrohrala pwehn wia doadoahk kesempwal ehu. Mehn Israel kan wia wehi ehu me inouda ong Siohwa. Ahpw ekei irail nan wehi wet inouda ong Siohwa ni ahl tohrohr ehu. Karasepe, ni ahn Aaron lisoaropo, mie kapwat kohl ehu me wia “kilel sarawi ehu me e kasarawilahr.” Kapwat kohlo kasalehda me e pilipilda en papah Siohwa ni ahl tohrohr ehu, me iei en wia samworo  lapalap en Israel. (Lip. 8:9) Nasaraid kan pil inouda ong Siohwa ni ahl tohrohr ehu. Lepin lokaiao “Nasaraid,” me kohsang ni lokaiahn Ipruo nazirʹ, kin wehwehki “Emen me Tohrohrala” de “Emen me Inoudahier.” Nasaraid kan anahne peikiong kehkehlik tohrohro me ntingdiong irail nan Kosonned en Moseso.—Nemp. 6:​2-8.

4. (a) Ni omw inoukihong Siohwa omw mour, dahme kin kesempwalla nan omw mour? (b) Ia wehwehn en “tounmeteikihla” pein kowe? (Pil kilang kilel.)

⁴ Ni omw inoukihong Siohwa omw mour, ke pilada en wiahla emen sapwellimen Sises Krais tohnpadahk oh kin wiahki kupwuren Koht me keieu kesempwal nan omw mour. Dahme met kin pidada? Sises mahsanih: “Ma mehmen men idawehniehdo, a en tounmeteikihla pein ih.” (Mad. 16:24) Nin duwen emen me wiahda inou ong Siohwa, ke pahn anahne soikala soahng kan me Siohwa sohte ketin kupwurperenki. (2 Kor. 5:​14, 15) Me wehwehki ke pahn soikala “wiewiahn uduk,” me duwehte tiahk samin me pid wia nsenen pwopwoud. (Kal. 5:​19-21; 1 Kor. 6:18) Ia duwe, omw peikiong kaweid pwukat pahn kahrehiong omw mour nan apwal? E sohte pahn ma ke poakohng Siohwa oh kamehlele me sapwellime kosonned kan wia kamwahupomw. (Mel. 119:97; Ais. 48:​17, 18) Brother men me adaneki Nicholas koasoia, “Ke kak kilengwohng sapwellimen Siohwa koasoandi kan duwehte kehl en imweteng ehu me kin irehdi omw pahn wia dahme ke mwahuki de duwehte kehl en laion me kin pereiukasang keper.”

5. (a) Ia duwen omw pahn inoukihong Siohwa omw mour? (b) Ia wekpeseng en inoukihong Siohwa omw mour oh papidais? (Pil kilang kilel.)

⁵ Ia duwen omw pahn inoukihong Siohwa omw mour? Ke kin inoukihong nan omw kapakap me ke pahn kaudokiong ih kelehpw oh me ke pahn mwohneki mahs kupwure nan  omw mour. Eri, ke kin inoukihong Siohwa me ke pahn pousehlahte poakohng “ni omw mohngiong unsek oh omw mour unsek oh omw lamalam unsek oh omw kehl unsek.” (Mark 12:30) Kowe kelehpw me wia met, eri nanpwungen kowehte oh Siohwa. Weksang met, papidais kin wiawi mwohn wehipokon; e kin kasalehiong meteikan me ke wiadahr inou ehu. Inou me ke wiahda uhdahn kesempwal. Omw mehn akadei iei en kolokolete omw inowo oh Siohwa ketin kasik me ke pahn wia met.—Ekl. 5:​4, 5.

DAHME KAHREHDA KE INOUKIHONG SIOHWA OMW MOUR?

6. Dahme kahrehda aramas emen kin pilada en inoukihong Siohwa eh mour?

⁶ Kahrepe keieu kesempwal me ke inoukihong Siohwa omw mour iei pwehki ke poakohng ih. Omw poakohng ih sohte pidadahte omw pepehm. Ke poakohngala Siohwa pwehki ke esehla “loalokong pwung” duwen ih oh kupwure. (Kol. 1:9) Omw onopki Paipel kamehlelehiong uhk (1) me Siohwa ketin ieias, (2) me Paipel iei sapwellime Mahsen, oh (3) me e kin ketin doadoahngki sapwellime pwihn pwehn kapwaiada kupwure.

7. Dahme kitail anahne wia mwohn atail inoukihong Siohwa atail mour?

⁷ Irail me kin inoukihong Siohwa arail mour anahne ese padahk mengei kan sang nan Paipel oh kin peikiong sapwellimen Koht koasoandi kan. Irail kin wia uwen ar kak en padahkihong meteikan dahme irail sukuhlki. (Mad. 28:​19, 20) Arail poakohng Siohwa kin laudla, oh irail kin inengieng kaudokiong ih kelehpw. Ke kin wia met? Ma ke poakohng Siohwa nan mohngiongomw unsek, ke sohte pahn wiahda inou oh papidaisiala pwehki ke  men kaperenda omw sounpadahk en Paipelo de omw papah nohno, de pwehki ih met me kompoakepahmw koaros kin wiewia.

8. Ia duwen omw kasalehda kalahngan eh kak seweseiuk en inoukihong Siohwa omw mour? (Melkahka 116:​12-14)

⁸ Ni omw medewehla soahng mwahu koaros me Siohwa ketin wiahiong uhk, ke pahn men kalahnganohng oh inoukihong omw mour. (Wadek Melkahka 116:​12-14.) Paipel mahsanih me Siohwa kin ketikihda “kisakis mwahu oh unsek koaros.” (Seims 1:17) Kisakis me keieu laud iei meirong en sapwellime Ohlo, Sises. Nna medewehla! Pweinen pweipwei sapahlo kahrehiong ken ahneki nanpwungmwahu keren rehn Siohwa. Oh e ketikihong uhk koapworopwor en mour kohkohlahte. (1 Sohn 4:​9, 10, 19) Inoukihong Siohwa omw mour iei ahl keieu mwahu en kasalehda me ke uhdahn kalahnganki kasalepen limpoak me keieu laud, iangahki kapai teikan me Siohwa ketikihong uhk. (Deud. 16:17; 2 Kor. 5:15) Soangen kalahngan wet kin sansalda mwahu nan pwuhko Pereperenki Mour Kohkohlahte! iren mehn kasukuhl 46 ire 4, oh iangahki kisin kasdou Presenting Your Gifts to God, me reireiki minit siluh.

KE ONOPADAHR EN WIAHDA INOU OH PAPIDAISLA?

9. Dahme kahrehda emen en dehr pwunodki inoukihong Koht eh mour?

⁹ Ele ke pehm me ke saikinte onopada en wiahda inou oh papidaisla. Mwein ke pehm me ke anahnehte wiahda wekidekla kan nan omw mour pwehn peikiong sapwellimen Siohwa koasoandi kan, de mwein ke anahnehte ahnsou pwehn kakehlakahla omw pwoson. (Kol. 2:​6, 7) Kaidehn tohnsukuhl en Paipel koaros kin kekeirda ni ahnsou tehieu, oh kaidehn me pwulopwul koaros kin onopada en wiahda inou oh papidaisla ni ahnsou tehieu. Song en wehwehki soahng kan me ke anahne kamwahwihala oh eri wia dahme ke kak, ahpw kaidehn en kapahrekiong uhk meteikan.—Kal. 6:​4, 5.

10. Dahme ke kak wia ma ke medewe me ke saikinte onopada en wiahda inou oh papidaisla? (Menlau pil kilang koakono “ Ong Irail kan me Tikida nan Padahk Mehlel.”)

¹⁰ Mehnda ma ke saikinte onopada en inoukihong Siohwa omw mour, wiahki met omw mehn akadei. Kapakapki sapwellimen Siohwa sawas pwehn wiahda wekidekla kan nan omw mour. (Pil. 2:13; 3:16) Ke kak kamehlele me e pahn ketin sapengala omw kapakap oh seweseiuk.—1 Sohn 5:14.

DAHME KAHREHDA EKEI KIN PWEIEK

11. Ia duwen Siohwa eh pahn ketin sewese kitail en lelepekte?

¹¹ Ekei me onopadahr en wiahda inou oh papidaisla kin pweiek en wia met. Mwein re kin medewe, ‘Ia duwen ma mwurin mwo I wiahda dihp laud ehu oh piskenla?’ Ma ke ahneki pepehm wet, kamehlele me Siohwa pahn ketikihong uhk soahng koaros me ke anahne pwehn ‘weweid ni ahl me e ketin kupwurki pwe ke en uhdahn kaperenda ih.’ (Kol. 1:10) E pahn pil ketikihong uhk kehl pwehn wia dahme pwung. E ketin sewesehier me tohto en wia met. (1 Kor. 10:13) Ihme kahrehda aramas malaulau keite me kin piskensang nan mwomwohdisohn Kristian. Siohwa kin sewese sapwellime aramas akan en lelepekte.

12. Ia duwen atail kak soikala wiahda dihp laud?

¹² Aramas soh unsek koaros kin lelohng kasongosong en wia mehkot sapwung. (Seims 1:14) Ahpw, ke anahne pilada dahme ke pahn wia ni omw lelohng songosong. Ni mehlel kowe me pahn kaunda mwomwen omw mour. Ekei aramas kin nda me kitail sohte kak kaunda atail pepehm oh dahme kitail kin  wia. Ahpw met sohte mehlel. Ke kak esehla kaunda omw ineng sapwung kan. Eri ni omw lelohng songosong, ke kak pilada en dehr wia me sapwung. Pil mie ekei soahng kan me kak seweseiuk en dehr wiahda sapwung. Karasepe, kapakapohng Siohwa rahn koaros. Kaukaule wia omw koasoandi en onopki Mahsen en Koht. Iang towehda mihting kan. Ehukihong meteikan omw pwoson. Omw kaukaule wia soahng pwukat pahn kakehlakaiuk pwe ken lelepekte ong Siohwa. Oh dehr manokehla me Siohwa pahn ketin seweseiuk.—Kal. 5:16.

13. Mehn kahlemeng mwahu dah me Sosep kasalehiong kitail?

¹³ E pahn mengei en lelepekte ong Siohwa ma ke koasoanehdi mwowe dahme ke pahn wia ma ke lelohng songosong. Paipel padahkihong kitail duwen aramas tohto me wia met, mendahki irail pil wia aramas soh unsek kei. Karasepe, ahn Podipar pwoudo kin pwurupwurehng kasonge Sosep. Ahpw Sosep esehier dahme e pahn wia. Paipel mahsanih me e “sohte men dukiong” liho, oh e koasoia: “Ia duwen ei pahn wiahda soangen sapwung laud wet, oh dipikihda mwohn Koht?” (Sen. 39:​8-10) E sansal me Sosep ese dahme e pahn wia pil mwohn liho eh kasonge. Met kamengeila en wia dahme pwung ni ahnsou me e lelohng kasongosong.

14. Ia duwen atail kak esehla soikala kasongosong kan?

¹⁴ Ia duwen omw kak alasang Sosep oh soikala kasongosong? Ke kak pilada ahnsou wet dahme ke pahn wia ni omw lelohng songosong. Esehla mwadang soikala soahng kan me Siohwa ketin kalahdeki oh dehr pil medemedewe soahng pwukat. (Mel. 97:10; 119:165) Ni ahl wet, ke sohte pahn wiahda dihp ni omw lelohng songosong. Ke pahn esehier dahme ke pahn wia.

15. Ia duwen emen eh kak kasalehda me e kin “ngoangki rapahki” Siohwa? (Ipru 11:6)

¹⁵ Ele ke ese me ke diaradahr padahk mehlel oh me ke men papah Siohwa ni mohngiongomw unsek ahpw ke pehm me ke pil saikinte onopada en wiahda inou oh papidais. Ke kak wia dahme Nanmwarki Depit wia. Ke kak peki rehn Siohwa: “Maing Koht, komw ketin kasawih ie, pwe komwi en mwahngih mohngiongiet; komw ketin song ie, pwe komwi en mwahngih ei lamalam akan. Komw ketin rapahki ma mie suwed ehu rehi oh ketin kahluwa ie nan ahl en mour soutuk.”  (Mel. 139:​23, 24) Siohwa kin ketin kapaia irail kan me kin “ngoangki rapahki ih.” Omw kin nantihong en lel mehn akadei en wiahda inou oh papidaisla kin kasalehiong ih me ke kin wiewiahte met.—Wadek Ipru 11:6.

POUSEHLAHTE KARANIHALA SIOHWA

16-17. Ia duwen irail kan me tikida nan padahk mehlel ar kin karanihala Siohwa? (Sohn 6:44)

¹⁶ Sises mahsanih me Siohwa ketin kakerenihedo sapwellime tohnpadahk kan reh. (Wadek Sohn 6:44.) Medewehla ia uwen kaselel en met oh ia duwen eh pidada kowe. Siohwa kin ketin mahsanih soahng mwahu ehu rehn emenemen aramas me e kin kakerenihala reh. E kin ketin wiahki emenemen aramas duwehte sapwellime “aramas pilipil” kei. (Deud. 7:6) Ih mwomwen eh kin ketin kilengwohng uhk.

¹⁷ Ahpw, ele kowe emen me pwulopwul me tikida nan padahk mehlel. Ele ke pehm me ke kin papah Siohwa pwehki omw papah nohno kin wia met a kaidehn pwehki Siohwa ketin kakerenihiukala reh. Paipel mahsanih: “Kumwail karanihala Koht, oh e pahn ketin karanihala kumwail.” (Seims 4:8; 1 Kron. 28:9) Ni omw tiengla mwowe oh karanihala Siohwa, e pahn ketin karanihiukala. Siohwa sohte ketin kilengwohng uhk me ke iangete kisehn pwihn ehu. E ketin kakerenihala emenemen reh—iangahki emenemen me tikida nan padahk mehlel. Ni emen eh kin karanihala Siohwa, Siohwa pahn ketin karanihala, duwehte me Seims 4:8 mahsanih.—Pil kilang 2 Deselonika 2:13.

18. Dahme kitail pahn koasoiapene nan iren onop en mwuhr? (Melkahka 40:8)

¹⁸ Ni omw inoukihong Siohwa omw mour oh papidaisla, ke kin kasalehda sapwellimen Sises madamadau. E tounmeteikihla pein ih pwehn wia kupwuren Semeo. (Wadek Melkahka 40:8; Ipru 10:7) Nan iren onop en mwuhr, kitail pahn koasoiapene dahme pahn seweseiuk pwe ken pousehlahte papah Siohwa ni lelepek mwurin omw papidaisla.